Ichedendik 19
19
Mpyibha s'anạng p'Sodom
1Ukwu ukpira k'ẹchọhkha, atọhmọ mbọma afa p'Ubinọkpaabyi p'asạk Abraham, akpira k'Sodom. Ma okpe ngwọ, Lọt uning ẹyạr ma ẹbaakhamma ch'Sodom, masẹ ose bẹ, ubina okhebha bẹ, ọrạkha uttima ititikha k'isek usima bẹ. 2Oben bẹ bẹ́, “Abaro paam, totokhạn, abạnga akwu asạkha k'ọchọhm kw'amma ọtọhmnạng kwabạnga, ọfha nnạng bạnga asi p'abạnga m'akpobhu mfhok sabạnga, abạnga abhing maa, de iwu kk'echobha, abạnga apạm-ọpạm abina osenga kwabạnga.”
Abẹ abhin-ẹ bẹ́, “Mesese, m'amming k'ẹbhaama e.”
3Okhenka, Lọt ofon ororo ọkpạna bẹ matạrr, brasẹ abẹ n'acher atwạn abẹ anwa k'akhẹ k'ọchọhm. Lọt ukwu usi brẹd kw'nạn yist ọ̀khaam, ọnạng bẹ, abẹ achi. 4Brasẹ Lọt ọttạra akhikhennạng pẹ n'ayim o, ajunung phyibh, adikkobh, ọttạra adennạng p'ofhon kw'Sodom kk'ọchọhm ngwọ abaabha age ngekha.
5Mạnna wọ abẹ akwọhrọ Lọt ẹmạng abạbh-ẹ bẹ́, “Akhikhennạng mbọ p'asạkh-ọ ma irungu khẹ mbạn? Tạkha bẹ nạng mạna anyima bẹ abẹ.”
6Lọt uyin k'iyaan ọta okhebha bẹ, obhen ukhubh okpora akhikhennạng pẹ kha ẹtaanga, 7oben bẹ bẹ́, “Mma e, abayi, totokhạn abạnga igbaan demasẹ nna kkási. 8Akker e, amma nkhaam aminava afa p'nạn ajunung tạm násonga. Amma m'ntte bẹ ọbọhk nnạng bạnga, ọfha abạnga atima bẹ asi oche kw'ọdaakhẹ bạnga. Node ajunung mbama, abạnga bẹ igbaan demasẹ nna kási, khiri abẹ asạk amma.”
9Abẹ apọhna bẹ́, “Rik mạna ẹbhaang anseng. Ttọttọ, ọma ukhikhenạng wọ m'akwu atek mạna udik kw'm'ansi? De nạn mạna ẹbhaang nárikha, f'm'ansi-ọ m'upyibh ọyọhnga f'wạra m'ansi abẹma.” Anạng mbọ afona ororo age Lọt ẹwạna tạrr abẹ n'abạra avọhkhọ ọmmakhubh. 10Okhenka, ajunung mbọ p'aning k'ọchọhm ẹtaanga n'annemi mbọhk atwạr Lọt anwa k'ọchọhm ẹtaanga, abẹ abhen ukhubh. 11Ma o, abẹ asi ajunung mbọ phyibh p'abe k'iyaan, adikkobh ọttạra adennạng akpa achen, abẹ dạkhẹ ẹchọhmma násia.
Oche kw'Lọt ubin k'Sodom
12Ma wọ, akhikhennạng mbọ abạbh Lọt bẹ́, “Akhaam anạng adwạkh-ọdwạk ma efhonfhạr yeri? Sọhng ta atạkha adim p'iva pọ, ọttạra ajunungva pọ, ọttạra apanạngva pọ, ọttạra ọnạng kwidede kw'ode kwọ, atima bẹ phyibh abina ma ofhon ngwa, 13ukwuru bẹ, bạra andimi ofhon ngwama e. Mpyibha s'anạng p'ofhon ngwa kk'asia kk'isaabha iseng eden k'ititikha s'Ọvaar Ubinọkpaabyi, ẹgwọ usi, ọtọhmọ mạna bẹ, ankwu andimi ofhon ngwama e.”
14Ma o, Lọt uyin k'iyaan ọta ọkpaak ajunung p'arạk aminava pẹ umina, oben bẹ bẹ́, “Asi ẹbhạr-ẹbhạr abina arik ofhon ngwa, khiri Ọvaar Ubinọkpaabyi bạra udimi kwẹ.”
Ajunung mbọ p'arạk aminava pẹ umina atạk bẹ, Lọt n'usi orokhu.
15Masẹ iwu n'echobh, atọhmọ mbọ ayạk Lọt bẹ́, “Tima ikwanạng kwọ, ọttạra apanạngva pọ afa p'aning ma, bina ma ofhon ngwa ẹbhạr-ẹbhạre, deja, m'agba ape ọttạra ẹchọhmfhạr chọ k'ipyibha ch'ofhon ngwa kk'usia.”
16Masẹ Lọt ukhibhi okpe o, atọhmọ mbọ n'avạk ẹma ọttạra ikwanạng kwẹ, ọttạra apanạngva pẹ afa k'mbọhk, atima bẹ bẹ bẹẹẹm, abina ma ofhon ngwọ, s'Ọvaar Ubinọkpaabyi ose bẹ ikwosi. 17Masẹ abẹ kk'bẹ atima ayin ma ofhon ngwọ, ọnạng wạnọ ma ikhaana s'atọhmọ mbọ oben bẹ́, “Abạnga arạbh akkaana akpen pabạnga o! Abạnga k'nnạm káphyebha o, abạnga k'ẹkpẹme chidede kábạra abe o! Arạbh afona k'akpecho, deja, abạnga m'apope!”
18Ma wọ, Lọt obeni bẹ́, “Mma e, abaro paam, ase-m ikwosi. 19Abạnga kk'aam ọphyaam asia, abạnga kk'ijibha chididen abạra asia anạng-m s'abạnga akkaan akpen paam. Okhenka, amma mạ́nkke nnạbh mkpira k'akpecho, de njaar, ipyibha nja m'ẹvạkh-m k'eden, m'mbạra mpe nttra ma. 20Abạnga akkeri ofhon nwa nwọ kw'uning ọbaanga ma, bina ma kpira kha k'idaam núbhira, tte annạbh amfona kha ọfha ankhaama annaanga.”
21Osenga ma, itọhmọ nnọ ipọhn-ẹ bẹ́, “Amma m'nsi oche kw'aphyem-m. M'ntte ofhon ngwọ ọbọhk otte, kwẹ mạ́ndimi. 22Ẹbhạr-ẹbhạr, abạnga arạbh afona kha, ukwuru bẹ́, amma udik gwạnọ-gwạnọ mạ́nkpongma nsi tạrr abạnga akpira ma.” Ẹgwọ usi abẹ ayeri ofhon ngwọ Zoar, kw'uyini ofhon kw'isisạkhẹ.
Idima ch'Sodom ọttạra Gọmọra
23Lọt ọttạra anạng pẹ akpir Zoar k'okpe kw'iwu kk'ẹttaana. 24Ma wọ, Ọvaar Ubinọkpaabyi ọtọhmọ akpon-ta p'abin k'erạng atebh k'Sodom ọttạra Gọmọra. 25Mạnna wọ wa Ubinọkpaabyi oseng udimi ifhon nnọ, ọttạra ifhon phyibh s'ining k'akpecho, ọttạra anạng phyibh p'arukhu ma ifhon nnọ, ọttạra ekpo py'emeni ma isisek nnọ.
26Okhenka, ikwanạng kw'Lọt ophyebh k'nnạm, ukwu ọbhạkhẹ ẹtakpa ch'unung ch'ebe bẹ gbẹẹng.
27Masẹ iwu n'echobh, ma ekpekpebha, Abraham ubina ofona k'ibyi s'uwa obe Ọvaar Ubinọkpaabyi k'ititikha. 28Masẹ okkeri Sodom ọttạra Gọmọra, ọttạra k'isekhisek kw'akpecho phyibh, ose isusong-bina s'niyin ma ukhubha ngwọ, s'ibạra ipyi bẹ kkạạng.
29Masẹ Ọvaar Ubinọkpaabyi udimi ifhon nnọ s'ining k'isekhisek kw'akpecho phyibh, ujima Abraham, osenga ma, ọrạbha Lọt k'ipyibha ch'etto ekhebha ifhon nnọ s'uwa Lọt kk'urukha.
Etạma ch'Moab ọttạra Ammọn
30Wa Lọt ojor-ẹ oche kw'm'uruk k'Zoar, n'ubin ọttạra apanạngva pẹ afa ọta uruk k'ukhubha kw'akpecho, k'ọmma gwạnọ kw'ẹtakpa.
31Iwu jạnẹ, ocheden-nwa kw'Lọt, obeni oyok kw'isạsạkhẹ bẹ́, “Otte kwamạna kk'ọtạma, de akker-okkeri, ujunung ma ibyi nna kóde kw'm'uyima mạna abẹ k'oche kw'ẹmmaana ch'iyagbin phyibh ede. 32Tte annạng otte kwamạna atwuk ogwo ubuma, ọfha anyima abẹ, ọfha ansenga k'otte kwamạna ansi ichimma chamạna nạngẹ idimi.”
33Ukwu ukpira k'irungu, abẹ anạng otte atwuk ogwo ubuma, ocheden-nwa ọta uyima otte abẹ. Otte okpe kw'nnwa ukwu uyima ma ọttạra okpe kw'ọbạra ubina kósong.
34Masẹ iwu echobh, ocheden-nwa oben oyok kwisạsạkhẹ bẹ́, “K'irungu ch'chạnachẹ, amma k'otte kwamạna abẹ nyima e. M'annạng-ẹ dạkhẹ atwuk ogwo ma irungu, oche kw'ansi chạnachẹ, ọma bạra ata ayima abẹ, ọfha ansenga k'otte kwamạna ansi ichimma chamạna nạngẹ idimi.” 35Ma irungu njọ, abẹ anạng otte atwuk, ogwo ubuma. Oyok kw'isạsạkhẹ ọbạra ọta uyima otte abẹ. Otte okpe kw'nnwa ukwu uyima ma, ọttạra okpe kw'ọbạra ubina kósong.
36Ma wọ, apanạngva p'Lọt atim ọfhạr anạng otte kwabẹ. 37Ochedennwa ọmaan ujunung, ukpuẹ-ẹ Moab, ẹma wọ ode otte kw'ẹkhạma ch'Moab tạrr ukpira chemma. 38Oyok kw'isạsạkhẹ ọbạra ọmaan ujunung, ukpuẹ-ẹ Bẹn-Ammi, ẹma wọ ode otte kw'ẹkhạma ch'Ammọn tạrr ukpira chemma.
Currently Selected:
Ichedendik 19: mfn-x-os
Highlight
Share
Copy
Want to have your highlights saved across all your devices? Sign up or sign in
©️2025 West Africa Christian Mission
