Nnwẹr s'Osenga 31

Bẹzalẹl ọttạra Oholiyab

1Wa Ọvaar Ubinọkpaabyi obeni Mosẹs bẹ́, 2“Kker e, amma kk'Bẹzalẹl kw'ode ujunungnwa kw'Uri, kw'ode nnwa kw'Hur, k'efona ch'Juda nnenga. 3Amma khẹ Iguguma s'Ubinọkpaabyi nnạnga, ọttạra ekkoji, ọttạra idik-songa, ọttạra itina ch'emengkka-khira chidede, 4ọfha usi ọtọhm f'gol, ọttạra f'silva, ọttạra f'brons tạtekha, 5f'm'ọphyaakhẹ ata, ọbạra otobha pyẹ, ọbạra ọgwa nchi, ọttạra ọtọhm ommengkka-tọhm k'ukhira-k'ukhira. 6Ayongu ma, amma kk'Oholiyab kw'ode ujunungnwa kw'Ahisamak, k'efona ch'Dan nnenga bẹ́, ugi-ẹ ọbọhk. Amma kk'ammengkka phyi-phyibh ekkoji ch'emmengkka nnạnga, ch'abẹ m'atima asi ọttọhk fidede f'kk'ọ ntọhna. 7M'asi ukkira kw'etobha, ọttạra Ikwukwur s'Echekha, ọttạra ikwukwurkpa ch'efokhu, ọttạra ẹnya-kpo mbyọkha phyibh py'ukkira nwọ, 8ọttạra okpokkro, ọttạra ekpo phyibh py'm'ẹnạna ma, ọttạra itukkạng-chi ch'gol ọkkọkka, oseng k'ekpo pyẹ phyi-phyibh, ọttạra ijabyi s'insẹns, 9ọttạra ijabyi s'ẹnạnga-ẹkkạmachẹ, ọttạra ekpo pyẹ phyibh, ọttạra ọgbangbang ọttạra ẹnạna chẹ, 10ọttạra nnya iyokhasẹ s'ide nnya s'awurada s'Aarọn kw'ode ọfọhnẹja, ọttạra nnya s'ajunungva pẹ k'okpe kw'abẹ m'asi ọttọhm f'afọhnẹja, 11ọttạra ana p'abẹ n'abyenga ọnạng k'echo, ọttạra insẹns kw'orebhi iruk kw'abẹ m'achok k'ibyi s'Awurada. Tte abẹ asi idik nnọ ator k'oche kw'ntọhn-ọ.”

Ẹyọhngkwokhawu

12Ma wọ, Ọvaar Ubinọkpaabyi obeni Mosẹs bẹ́, 13“Ben anạng p'Israẹl bẹ́, ‘Ọbaan bẹ́, abạnga achok Iyọhngkwokhawu saam. Ma wọ m'ode ẹkhọhkha ch'abạngama amma abẹ, tạrr ukpira igbo s'iwu oro, ọfha abạnga asonga bẹ́, amma wọ nde Ọvaar Ubinọkpaabyi kw'n'usi bạnga akhaama awurada.

14“ ‘Abạnga achok Ẹyọhngkwokhawu njọ, ukwuru bẹ́, achẹ ede iwu ch'awurada ẹnạng bạnga. Ọnạng kwidede kw'unnukhu iwu njọ, ọbaan bẹ́, abẹ afhẹ-ẹ. Ọnạng kwidede kw'usi ọtọhm-khira fidede ma iwu njọ, ọbaan bẹ́, abẹ akhubh-ẹ k'ofhon. 15Iwu isajạnẹ rọ s'abạnga m'asi ọttọhm, okhenka, iwu ch'ettong iwu isenọfa, m'ede Ẹyọhngkwokha ch'awurada ẹnạng Ọvaar Ubinọkpaabyi. Ọnạng kwidede kw'usi ọttọhm ma iwu njọ, ọbaan k'obo. 16Ma wọ, anạng p'Israẹl m'achok ẹyọhngkwokhawu njọ, abẹ m'achok iwu njọ masẹ echekha ch'm'ininga tạrr ukpira k'igbọ s'm'ikwu k'iwu oro. 17Iwu njọ m'ede ẹkhọhkha ch'amma ọttạra anạng p'Israẹl tạrr ipimmanitor, ukwuru bẹ́, Ọvaar Ubinọkpaabyi utim iwu isajạnẹ usi ẹrạng ọttạra isek, okhenka, s'ottong iwu isenọfa, ukuma ọtọhm sisi, okwokha ọyọhng.”

18Masẹ Ọvaar Ubinọkpaabyi kk'Mosẹs idik nnọ ọkpaakha phyibh k'okpecho kw'Sinai, n'ọtạk ata-gbẹra afa p'nnyina, p'ẹma Ubinọkpaabyi utim ẹnọhna chẹ ọkkẹr, ọnạng Mosẹs.

Currently Selected:

Nnwẹr s'Osenga 31: mfn-x-os

Highlight

Copy