Nnwẹr s'Osenga 2
2
Ẹmmaana ch'Mosẹs
1Wa ujunung wạnọ kw'efona ch'Lẹvi, ọta ọtạkha ikwanạng k'efona ch'Lẹvi k'ọbada. 2Wa ikwanạng nwọ utim ifhạr ọmaan ujunung. Masẹ ose bẹ́, nnwa nwọ ujibh-ujibh, udubh-ẹ k'aphye attaan. 3Masẹ nạn adạkhẹ khẹ nókke udubh o, n'ọtạk nnwa nwọ oge k'ikhạrạbaang s'utim aganttima oyok. Utima ẹbaantum ọkpa abhaang p'ikhạrạbaang nnọ. Ọtạkha ikhạrạbaang nnọ, ọttạra nnwa kha ẹtaanga, ọnạna k'asạsaarẹ p'ameni k'asi, k'ẹraanga-kha ch'ọraanga kw'Nile. 4Nnwọkka kwẹ kw'ikwanạng ọyẹrẹ obe, ọfha ose ọttọhk f'm'usi nnwa nwọ.
5Wa nnwa kw'Phero kw'ikwanạng utim aminava p'ade atọhmnạng pẹ ọta isi-kpobha k'ọraanga kw'Nile. Masẹ aminava mbọ n'asenga ma ẹraangakha, nnwa kw'Phero n'ose ikhạrạbaang k'ottemkwẹ kw'asạsaarẹ p'ameni k'ẹraangakha, ọtọhm ọtọhmnạng kwẹ wạnọ bẹ́, ọta ọtạkha sẹ utima ukwu. 6Masẹ owong sẹ, ose nnwa k'ẹtaanga s'n'ọgạma ẹmạng. Ọkhaama abẹ ikwosi. Oben bẹ́, “Nnwa nwa m'ode oHibru-nwa wạnọ e .”
7Ma wọ nwọkka kw'nnwa nwọ ọbạbhọ nnwa kw'Phero bẹ́, “Ma, n'nta nyeri oHibru-kwanạng wạnọ, kw'm'okke ọrạk nnwa nwa ọnạng-ọ?”
8Nnwa kw'Phero ọpọhn-ẹ bẹ́, “Ọbaan ma, sọhng!” Ma wọ, ọta utima ọkka kw'nnwa nwọ ukwu. 9Nnwa kw'Phero oben ọkka kw'nnwa nwọ bẹ́, “Tạkha nnwa nwa, rạkh-ẹ nạng-m, amma m'nnạng-ọ akpokha k'ọtọhm pfọ.” Ma wọ ọkka kwa nnwa nwọ ọtạkh-ẹ ọta ọrạk. 10K'okpe kw'nnwa nwọ n'ọbạrẹ, ọtạkh-ẹ okkena nnwa kw'Phero kw'node ọkka kw'nnwa nwọ. Ukpẹ-ẹ Mosẹs#2.10 Mosẹs, k'eHiburu, iyini ọttọhk masẹ ewonga k'asi., oben bẹ́, “Nnwong nwa k'asi.”
Mosẹs ọrạbhọ ofona Midiyan
11Wa k'iwu jạnẹ k'okpe kw'uwa Mosẹs kk'ọbạra, wa ofon ọta udibh anạng pẹ p'Israẹl. Ose itọhm-kpọhkha s'irem s'anạng pẹ n'asi, ọbạra ose s'uJip-nạng wạnọ n'uvun oHiburu-nạng, kw'ode oyok-ofhon kw'ẹma Mosẹs. 12Masẹ Mosẹs ophyebh, ọnạng núsia, ọfhọ ujunung nwọ kw'ubin Ijip, ọtạkha apfura pẹ ọnnọhnga k'uyiyeng. 13Masẹ iwu echobh ma, Mosẹs n'uyini k'iyaan, ọta ose aHiburu-junung afa p'n'arima irima, ọbạbh oyok kw'iponga ipyibhi bẹ́, “Aseng mbạng apfẹ n'avun oyok-oyokh o?”
14Ujunung nwọ ubhin-ẹ bẹ́, “Anẹ wọ usi-ọ ochonạng, ọttạra ọkpaar-aponga kwamạna? Ma n'attọhnọ bẹ́, abạra afhọ-m oche kw'afhọ uJip-nạng sa?” Ma wọ Mosẹs ojor-ẹ, ukwu ọkkẹ bẹ́, “K'udik'okka, udik ngwọ kk'ọyaakha.”
15Masẹ Phero ọbhaang udik ngwọ, oror nden s'm'utima ọfhọ Mosẹs. Osenga ma, Mosẹs ọrạbh k'Phero k'ititikha, ọta uruk k'Midiyan, ọta uninga ẹyạr ọbaanga isipe jạnẹ. 16Wa ọkhaam ọfọhnẹja wạnọ kw'Midiyan, kw'ofhonu aminava asenọfa. Iwu jạnẹ, aminava mbọ asenọfa akwu atwạr asi age k'nkkora, ọfha abẹ anạng itirakpo py'otte kwabẹ. 17Okhenka, akker-arạkhạmaan bạnọ akwu akhubh aminava mbọ, ma wọ, Mosẹs ubin bẹ bik ọta ọkkaana bẹ, ọnạng itirakpo pyabẹ asi.
18Masẹ aminava mbọ abhạn, otte kwabẹ, kw'okpen Reuẹl ọbạbh bẹ bẹ́, “Asong bẹ́ abạnga k'ẹbhạr-ẹbhạr akwuna chemma. Ode yạn?”
19Abẹ abhin-ẹ bẹ́, “UJip-nạng wạnọ wọ ọkkaan mạna k'mbọhk s'akker-arakhạmaan, ọbạra ọkkaana ọnạng itirakpo pyamạna asi.”
20Reuẹl ọbạbh aminava pẹ bẹ́, “Abạnga asi yạn akwuna arikh-ẹ? Asọhng ata ayer-ẹ ukwu uchi ọttọhk.”
21Ma o Mosẹs ukwu ochera bẹ́, m'uruk Ruẹl abẹ. Wa Ruẹl ọtạk uminanwa wạnọ kwẹ kw'okpen Zipọra ọnạng Mosẹs k'ọbada. 22Zipọra ọmaanẹ Mosẹs ujunungnwa, Mosẹs ukpẹ-ẹ Gẹrshọm, ọbẹ́, “Amma n'nde ukhikhennạng k'anạng k'isek.”
Ubinọkpaabyi ọbhaang ẹmạng ch'anạng p'Israẹl
23Ma okpe-bhirada ngwọ, ọvaarnạng kw'Ijip ukwu ope. Anạng p'Israẹl agạma ẹmạng ch'ẹkkaana anạng Ubinọkpaabyi, ukwuru ibira ch'abẹ aning k'Ijip. Ubinọkpaabyi ọbhaang ẹmạng chabẹ, ch'abẹ agạm k'irem. 24Wa Ubinọkpaabyi ọbhaang ẹmạng chabẹ, ọbạra ujima echekha ch'ọkhaam ọttạra Abraham, ọttạra Isaak, ọttạra Jekọb. 25Wa Ubinọkpaabyi ose bẹ́, anạng p'Israẹl aning k'irem, ukwu ọkhaama ẹkka bẹ́ m'ọkkaana bẹ.
Currently Selected:
Nnwẹr s'Osenga 2: mfn-x-os
Highlight
Share
Copy
Want to have your highlights saved across all your devices? Sign up or sign in
©️2025 West Africa Christian Mission
