Nnwẹr s'Osenga 18
18
Jẹtro udibhi Mosẹs
1Wa Jẹtro kw'ode ọfọhnẹja kw'Midiyan, kw'ọbạra ode otte-ofhon-ikwa kw'Mosẹs, ọbhaang idik phyi-phyibh s'Ubinọkpaabyi kk'usia ọnạng Mosẹs ọttạra anạng p'Israẹl, ọttạra oche kw'Ọvaar Ubinọkpaabyi kk'osenga ọrạbha anạng p'Israẹl k'Ijip.
2Masẹ Mosẹs kk'ikwanạng kwẹ, Zipọra ọtọhma bẹ́, ọta ibhinga k'otte Jẹtro, wa otte ọtạkh-ẹ, 3ọttạra iva pẹ ncho mfa. Wa okpe oyok wạnọ Gẹrshọm, oben bẹ́, “Amma kk'ukhikhennạng ndia k'anạng k'ofhon.” 4Okpe oyok nwọkha Eliyeza, ukwu oben bẹ́, “Ubinọkpaabyi kw'otte kwaam okpobh, wọ wa ode ọkkaan-m. Ẹma wọ ọkkaan-m, ọrạbh-m k'ọkkangkkang-kkro kw'Phero.”
5Wa Jẹtro, kw'ode otte-ofhon-ikwa kw'Mosẹs, utim iva mbọ afa, ọttạra ikwanạng kw'Mosẹs ọta okhebha Mosẹs k'ibyi s'owor, s'uwa ubhingi ọbaanga okpecho kw'Ubinọkpaabyi. 6N'ode s'Jẹtro kk'ẹkkaabha ọtọhma ọnạng Mosẹs bẹ́, “Amma Jẹtro, kw'ode otte-ofhon-ikwa kwọ, nkwuma ikwanạng kwọ abẹ, ọttạra ajunungva pẹ afa bẹ́, nkwu nkhebh-ọ e.”
7Ma wọ, Mosẹs ukhubhu ọta okhebha bẹ kha eden, utwunga echo k'ikpukpobha, ọbaakha otte-ofhon-ikwa kwẹ. Abẹ asima ayok, brasẹ abẹ n'anwa k'ukkira. 8Mosẹs ọkpaak otte-ofhon-ikwa idik phyi-phyibh s'Ọvaar Ubinọkpaabyi kk'Phero ọttạra anạng p'Ijip usia ukwuru anạng p'Israẹl. Ọbạra ọkpaakh-ẹ irem-khira sabẹ kk'asia k'eden bẹ́ phyibh, ọttạra oche kw'Ovaar Ubinọkpaabyi kk'bẹ ọkkaana.
9Wa ettem erebhi Jẹtro k'idik-jibhada phyi-phyibh s'Ọvaar Ubinọkpaabyi kk'usia, ọrạbha anạng p'Israẹl k'mbọhk s'anạng p'Ijip. 10Oben bẹ́, “Ẹtọhnga iyim ẹnạng Ọvaar Ubinọkpaabyi kw'ọrạbhọ bạnga k'mbọhk s'anạng p'Ijip, ọttạra s'Phero, kw'ọbạra ọrạbha anạng mbọ k'mbọhk s'anạng p'Ijip. 11Amma kk'nsonga k'udik ọkka bẹ́, Ọvaar Ubinọkpaabyi ọbạrẹ ọyọhnga fidede f'ayokhanạng n'akpobha, s'usi udik ngwa utima otor anạng p'age ifor asi Israẹl igbaan.” 12Ma wọ Jẹtro kw'ode otte-ofhon-ikwa kw'Mosẹs, ọtạk ẹnạnga-ẹkkạmachẹ, ọttạra nnạnga idwạkh-ọdwạk ọnạng Ubinọkpaabyi. Wa Aarọn ọbạra utima adennạng p'Israẹl phyibh, ọta uchi ọttọhk ọttạra otte-ofhon-ikwa kw'Mosẹs k'ititikha s'Ubinọkpaabyi.
13Masẹ iwu n'echobh, Mosẹs ọta uninga ẹyạr bẹ́, usi aponga p'anạng mbọ. Anạng mbọ abaabh-ẹ age ngekha, tạma k'ekpebha tạrr ukpira k'ẹchọhkha. 14Masẹ otte-ofhon-ikwa ose idik nnọ phyibh s'Mosẹs n'usi ọnạng anạng mbọ, n'ọbạbhọ bẹ́, “Bạng ọtọhm-khira vọ n'asi anạng anạng mba ma o? Mbạng vọ usi ọma mạnkkeni n'asi aponga, s'anạng mba phyibh n'abaabh-ọ age ngekha tạma k'ekpebha kpira k'ẹchọhkha o?”
15Mosẹs ubhin-ẹ bẹ́, “Ukwuru s'anạng n'akwu akhebh-m bẹ́, ntekhi bẹ ẹkka ch'Ubinọkpaabyi otena bẹ e. 16Okpe kwidede kw'abẹ akhaam ẹkhọhr, abẹ n'atima akwu akhebh-m bẹ́, nttọhnọ nnạng bẹ, mbạra mkpaak bẹ akpebhi, ọttạra nnyina s'Ubinọkpaabyi.”
17Ọnyẹ kw'Mosẹs n'ọpọhn-ẹ bẹ́, “Nọ́baana bẹ́, asi oche ngwọ. 18Ọma ọttạra anạng mba p'n'akwu akhebh-ọ maa m'ugima ọkhọhn bạnga e. Ọtọhm mva ọbạrẹ ọyọhng-ọ, pfẹ mạnkkeni mákke asi e. 19Khọhm-m itọhng k'ntọhna s'm'nnạng-ọ. Tte Ubinọkpaabyi uninga abọ. Ọma abaan bẹ́, atera echo ch'anạng mba, abạra atima nkhọhr sabẹ ayin Ubinọkpaabyi k'ititikha. 20Kpebhi bẹ akpebhi mbọ, ọttạra nnyina nnọ, abạra atọhn bẹ oche kw'ọbaan bẹ́ abẹ aruk, ọttạra ibọhktọhm s'ibaan-ọbaana bẹ́ abẹ asi. 21Okhenka, tekha ajunung p'abaan-ọbaana k'ikhaana s'anạng mbọ phyibh, ajunung p'akhaam ojora f'Ubinọkpaabyi, p'ẹmmaana chabẹ etor-otor, p'nạn itwukha nárora, asi bẹ adecho p'ayok, k'nnọhna-k'nnọhna, ọttạra arạbh k'asen-k'asen, ọttạra arạbh afa ukuma jobh, ọttạra k'ajobh-k'ajobh. 22Tte abẹ n'asi aponga p'anạng mba k'okpe idede. Tte abẹ atima aponga p'idede p'akpọhkh-ọkpọhkhọ akken-ọ, tte abẹ akhenka akpaara aponga p'isạsạkhẹ kabẹ ifhor. Ma wọ, ọtọhm m'obhekh-ọ de abẹ ator-ọ ọtọhm. 23Ode asi ukhira ngwọ, ọttạra oche kw'Ubinọkpaabyi ọtọhn-ọ, m'akke akwẹ okke, anạng mba phyibh n'abạra abhạna k'ottennebh.”
24Ma wọ Mosẹs ọkhọmọ ọnnyẹ kwẹ itọhng, usi ukhira kw'ọtọhn-ẹ. 25Mosẹs otekha ajunung p'abaan-ọbaana k'ikhaana s'anạng p'Israẹl phyibh, ukwu usi bẹ acho p'anạng mbọ k'ikhaana s'nnọhna k'nnọhna, ọttạra s'arạbh k'asen k'asen, ọttạra s'arạbh afa ukuma jobh, ọttạra s'jobh k'ajobh. 26Anạng mbọ bọ n'ade asi-aponga p'ayok k'okpe kwidede. Aponga p'akpọhkh-ọkpọhkhọ abẹ atạkha akkena Mosẹs, p'amạm-ọmạm, abẹma aponga.
27Ma wọ, Mosẹs ọta urik otte-ofhon-ikwa kha eden. Jẹtro ọbhạna kakhẹ ẹkhạma.
Currently Selected:
Nnwẹr s'Osenga 18: mfn-x-os
Highlight
Share
Copy
Want to have your highlights saved across all your devices? Sign up or sign in
©️2025 West Africa Christian Mission
