Nnwẹr s'Osenga 14
14
1Ma wọ Ọvaar Ubinọkpaabyi obeni Mosẹs bẹ́, 2“Kpaak anạng p'Israẹl bẹ́, abẹ akpa nnạm ata abhing abaanga Pi-Hahirọt, kw'uning k'ngekha s'Migdol, ọttạra ẹraanga-diden. Tte abẹ abhing k'ẹraanga-kha, akkeri Baal-Zẹphọn ititikha. 3Phero m'ọkkẹ bẹ́ anạng p'Israẹl nạnkha awena abaabha isisek nnọ k'dạmadạma, k'ibyi s'anạng nạnárukha. 4Amma m'nsi Phero ọkpọhkhọ echo ukhubh bẹ k'nnạm. Okhenka, amma m'nsenga k'Phero ọttạra k'arim-ekpong pẹ ntạkha abạrada nnạng ifor saam, ọfha anạng p'Ijip atima asonga bẹ́ amma wọ nde Ọvaar Ubinọkpaabyi.” Ma wọ anạng p'Israẹl asi oche ngwọ.
5Masẹ abẹ atekhi Phero kw'ode ọvaarnạng kw'Ijip bẹ́ anạng p'Israẹl kk'arạbha afona, ẹma ọttạra ajukwa pẹ afhona ẹkka chabẹ, aben bẹ́ “Mbẹ, bạng udik gwọ ansi ma o? Kk'anạng mbọ ọbọhk anttia abẹ afona. Kk'itọhm sabẹ n'asi anạng mạna angwana.” 6Osenga ma, Phero odo ijaar sẹ s'nnyạnyaang n'itwạr, ọttạra k'akpongnạng pẹ p'atwạn abẹ. 7Utim ijaar ikkasẹ s'nnyạnyaang n'itwạr, s'ide ẹnọhna ukuma arạbh jobh, ọttạra k'ijaar nnọkha phyibh s'Ijip s'nnyạnyaang n'itwạr, ọttạra adecho phyi-phyibh p'atim bẹ eden. 8Ọvaar Ubinọkpaabyi usi Phero kw'ode ọvaarnạng kw'Ijip ọbạr ettem, ukhubh anạng p'Israẹl p'n'asenga akkemkpa-akkemkpa afona. 9Anạng p'Ijip, ọttạra nnyạnyaang s'Phero, ọttạra ijaar s'nnyạnyaang n'itwạr, ọttạra anạng p'n'ayaar nnyạnyaang, oseng k'akpongnạng p'aseng osenga, afon ororo akhubh anạng p'Israẹl tạrr abẹ ata akhebha bẹ k'ibyi sabẹ asi uruk kwabẹ k'ẹraangakha, ọbaanga Pi-Hahirọt, kw'Baal-Zẹphọn abẹ akkeri ayok ititikha.
10Masẹ anạng p'Israẹl ase bẹ́, Phero ọttạra anạng p'Ijip kk'bẹ afora, ojora ọvạkha bẹ. Abẹ agạma ayeri Ọvaar Ubinọkpaabyi. 11Abẹ abhạkhẹ abạbh Mosẹs bẹ́, “Ma, s'apekwur nạ́n k'Ijip ade, ẹgwọ kw'atima mạna akwu ma k'ibyi s'owor bẹ́, ampe o? Bạng udik-khira gwọ asi mạna oche ngwa, asi yạn atima mạna abina k'Ijip o? 12Wa, khọ námbena bẹ́, atte mạna ọbọhk ankhenka anninga ande abira p'anạng p'Ijip? Wạra m'ujibh mạna ọtạm bẹ́, ande atọhmnạng p'aJipnạng ọyọhnga bẹ́, ankwu ampe k'ibyi-khira nna!”
13Mosẹs ubhina bẹ bẹ́, “Nạng bạnga ojor, abạnga ado abe, khiri chemma wọ kw'abạnga m'ase eden ch'Ọvaar Ubinọkpaabyi m'osenga ọnạng bạnga ẹkkaana. Anạng mbọ p'Ijip p'abạnga ase ma, chemma wọ abạnga ase bẹ akpicho, abạnga dạkhẹ bẹ máse tạrr ipimmanitor. 14Aninga bẹ́ tạkkạbh, khiri Ọvaar Ubinọkpaabyi m'usi irima chabạnga.” 15Ma wọ, Ọvaar Ubinọkpaabyi obeni Mosẹs bẹ́, “Ode yạn kw'n'agạma ayer-m? Tera ben anạng p'Israẹl afona ororo. 16Dira uchikwura kwọ k'ẹrạng, anemi ọbọhk atena k'ẹraanga-diden njọ, ọfha awẹ ọbhaangẹ ibyi ifa, anạng p'Israẹl asenga k'isisek ajaakha. 17Amma m'nsi anạng p'Ijip akpọhkhọ echo, ọfha abẹ akhubh anạng p'Israẹl k'nnạm. Amma m'nsenga Phero abẹ, ọttạra akpongnạng pẹ phyibh, ọttạra ijaar sẹ s'nnyạnyaang n'itwạr, ọttạra ayaar-nnyạnyaang pẹ, ntạkha abạrada. 18AJipnạng m'asonga bẹ́, amma wọ nde Ọvaar Ubinọkpaabyi, masẹ m'nsenga Phero abẹ, ọttạra ijaar sẹ s'nnyạnyaang n'itwạr, ọttạra ayaar-nnyạnyaang pẹ, ntạkha abạrada.”
19Ma wọ, itọhmọ s'Ubinọkpaabyi, s'kk'akpongnạng p'Israẹl eden ichia, n'ikpa nnạm ita ininga bẹ k'nnạm. Ebona ch'ebe masẹ ẹtakpa ẹbạra ibina bẹ k'ititikha, efona adạkhẹ ẹta ebe bẹ k'nnạm, 20kw'ode ottem-kwẹ kw'akpongnạng p'Ijip ọttạra p'Israẹl. Ma irungu njọ phyibh ebona njọ itim urungubạnga ikwu k'ukhubha gwạnọ, ọyaanttaana uninga k'ukhubha ngwọkha. Ma wọ, ọnạng kw'm'oke osenga ọbaanga oyok ma irunguwu njọ kóde.
21Ma wọ Mosẹs onemi ọbọhk otena k'ẹraanga-diden ma irungu njọ phyibh. Ọvaar Ubinọkpaabyi utima ufhum kw'ubin k'ukhubha kw'okpebha-dudon, ọtwạnọ asi tạrr apyẹ ẹbhaangẹ, igbin iyin. 22Wa anạng p'Israẹl asengi k'igbin ma ẹraangattem, k'asi p'abe masẹ udimokpon k'udimbọhk kwabẹ ọttạra k'ọkwabọhk kwabẹ.
23Ajipnạng ọttạra nnyạnyaang s'Phero, ọttạra ijaar sẹ s'nnyạnyaang n'itwạr, ọttạra ayaar-nnyạnyaang pẹ phyibh, akhubhu anạng p'Israẹl anwa ma ẹraangattem ch'ẹraanga-diden. 24Ma ekpebha-rungu, Ọvaar Ubinọkpaabyi oseng ma ekpon ch'ebe masẹ ẹtakpa, ọttạra k'ebona, ose akpongnạng p'Ijip, ukwu oge bẹ k'dạmadạma. 25Usi ntwạkhọ s'ijaar s'nnyạnyaang n'itwạr irạbha, tạrr ọyaara ọkhaarẹ bẹ. Ma wọ, aJipnạng n'abeni bẹ́, “Ayok mba, tte antte anạng p'Israẹl ọbọhk abẹ afona o, khiri Ọvaar Ubinọkpaabyi wọ n'urima mạna abẹ k'abẹ k'echo ma e!” 26Ma o, Ọvaar Ubinọkpaabyi oben Mosẹs bẹ́, “Nemi ọbọhk tena k'ẹraanga-diden, ọfha asi akpa nnạm anwa akpora aJipnạng, ọttạra ijaar sabẹ s'nnyạnyaang n'itwạr, ọttạra ayaar-nnyạnyaang pabẹ.” 27Ma o, Mosẹs onemi ọbọhk otena k'ẹraanga-diden. Se iwu echobh, ẹraanga-diden njọ ekpa nnạm k'ọche kw'wura ening. Masẹ anạng p'Ijip akhong bé arạbh, Ovaar Ubinọkpaabyi ọkpaanga bẹ phyibh ọbhạrẹ ma k'ẹraanga-diden njọ. 28Ma wọ asi afhobhu afhạrọ ijaar s'nnyạnyaang n'itwạr, ọttạra ayaar-nnyạnyaang, ọttạra akpongnạng p'Phero phyi-phyibh p'kk'anạng p'Israẹl akhubha kk'nnạm, anwa k'ẹraanga-diden. Ọnạng wạnọ-wạnọ kw'ọnnaang kòde. 29Okhenka, wa anạng p'Israẹl asengi k'igbin ma ẹraangattem, s'asi n'abe masẹ udimokpon k'udimbọhk kwabẹ, ọttạra k'ọkwabọhk kwabẹ. 30Ma iwu njọ, Ọvaar Ubinọkpaabyi ọkkaan anạng p'Israẹl k'mbọhk s'aJipnạng. Anạng p'Israẹl n'ase s'apfura p'aJipnạng ayim k'ẹraangapa. 31Ma wọ, masẹ anạng p'Israẹl ase ẹfa chididen ch'Ọvaar Ubinọkpaabyi utim okhema anạng p'Ijip, abẹ n'akhaam ojora f'Ubinọkpaabyi, abẹ abạra akhaama echera kakhẹ, ọttạra k'ọtọhmnạng kwẹ Mosẹs.
Currently Selected:
Nnwẹr s'Osenga 14: mfn-x-os
Highlight
Share
Copy
Want to have your highlights saved across all your devices? Sign up or sign in
©️2025 West Africa Christian Mission
