1 Samwẹl 6
6
Ikwukwur s'echekha ch'Ọvaar Ubinọkpaabyi ikpa nnạm k'Israẹl
1Masẹ ikwukwur s'echekha ch'Ọvaar Ubinọkpaabyi kk'aphye asenọfa ikkia k'APhilistiya k'mbọhk, 2abẹ ayeri afọhnẹja, ọttạra abọhnganạng p'Aphilistiya, abạbh bẹ́, “M'ansi yạn ọttạra ikwukwur nna s'echekha ch'Ọvaar Ubinọkpaabyi o? Akpaak mạna eden ch'm'ansenga antọhm sẹ ikpa nnạm k'ibyi s'asẹ ibin ikwu.”
3Abẹ abhina bẹ́, “Abạnga ikwukwur nna s'ọkha f'Israẹl mbọhk-mbọhk kátọhm ikpa nnạm o, ọkwọnọ upyibh, abạnga atọhm sẹ ọttạra ẹnạnga ch'ipongapyibha. Ma wọ abạnga m'abina k'ikhạmana, abạnga m'abạra asonga oche kw'usi bạra utim ọnạng bạnga irem ọnạng.” 4APhilistiya n'abạbhọ bẹ́, “Ma, bạng ẹnạnga ch'ipongapyibha khira jọ m'antọhm ankken-ẹ yeri?”
Abẹ abhina bẹ́, “Ibirakpo esen py'abẹ atim gold asi, ọttạra okpomma osen pf'abẹ atim gold asi, ator k'ubhik kw'avaar p'aPhilistiya, ukwuru bẹ́ ọkhạnkhạmọ nwọ wạnọ-wạnọ wọ otto okhebha bạnga ọttạra avaarnạng pabạnga. 5Abạnga asi apyẹ ede masẹ aphyi ọttạra masẹ okpomma f'n'ukhibhi isisek nna, abạnga abạra anạng ọkha f'Israẹl ikpukpobha. Nạnudusi, ọkhạnkhạmọ nwọ m'otte bạnga ọbọhk otte, ọttạra ikha sabạnga, ọttạra isisek sabạnga. 6Ukwuru yạn kw'abạnga abạrẹ nttem oche kw'uwa aJipnạng ọttạra Phero abạrẹ o? Okpe ngwọ kw'Ubinọkpaabyi ọnạngẹ bẹ irem sididen, wa abẹ anạng p'Israẹl nábena bẹ, abẹ abina ofhona o?
7“Mantọhmma, abạnga okpe kákhibhi, ado ọkpaar ọbhakwẹ kw'nnyạnyaang n'itwạr, ọttạra mmaam mfa s'itim ẹrạkh iva, sabẹ nạn ọyaar tạm nágia. Kpạna mmaam nnọ mfa ma ọkpaar kw'nten n'itwạr, okhenka, tima iva p'mmaam nnọ kpa nnạm k'ọpa kwabẹ. 8Dira Ikwukwur s'Echekha ch'Ọvaar Ubinọkpaabyi anạna k'ọkpaar ngwọ kw'nten n'itwạr, abạra atạkha ekpo py'abẹ atim gol asi, p'abạnga m'atọhm masẹ ẹnạnga ch'ipongapyibha, akken-ẹ, age k'ukwukwur--nwa kw'uning ọbaanga ikwukwur s'echekha ch'Ọvaar Ubinọkpaabyi. Abạnga atọhm sẹ ifona, 9okhenka, abạnga age sẹ utum. De ivur ifona k'ibyi s'ibin, k'ukhubha kw'Bẹt-Shẹmẹsh, ma wọ uyini bẹ, Ọvaar Ubinọkpaabyi wọ ọtọhmọ ọkhạnkhạmọ khira nwa okkena mạna. Okhenkha, de nạn k'ukhubha ngwọ nítena, ma wọ m'asonga bẹ́, ọbọhk kwẹ ma kòde, kw'uyini bẹ́, akwẹ ọkhankẹ ode oche ngwọ.”
10Ma wọ, abẹ asi oche ngwọ. Wa abẹ atạk mmaam mfa akpạna k'ọkpaar kw'nten n'itwạr, abẹ abạra atạkha abhaamva mbọ akpạkha k'ọbhaampa. 11Abẹ atạkha ikwukwur s'echekha ch'Ọvaar Ubinọkpaabyi age k'ọkpaar ngwọ, ọttạra ikwukwur s'okpomma pf'abẹ atim gol asi, ọttạra ibirakpo p'gold. 12Wa mmaam nnọ innemi bẹ gbẹẹng itor k'eden ch'eten k'Bẹt-Shẹmẹsh, asẹ n'isenga immẹbhẹ k'eden; asẹ k'udimbọhk ọttạra k'ọkwabọhk níttena. Wa avaar p'aPhilistiya atwạnọ sẹ asẹ tạrr akpira k'erem ch'Bẹt-Shẹmẹsh.
13Ma okpe ngwa, anạng p'Bẹt-Shẹmẹsh n'asi iphya s'awit k'ipekhuma. Masẹ abẹ adir achen ase ikwukwur s'echekha ch'Ọvaar Ubinọkpaabyi, ettem erebhi bẹ k'ọttọhk f'abẹ ase. 14Masẹ ọkpaar ngwọ ukpir k'owonu kw'Joshua kw'ubin Bẹt-Shẹmẹsh, ukwu uphyikha k'ẹtakpa chididen. Anạng mba aphyaakhẹ ọkpaar ngwa, atima amuma ekpon, abẹ abạra atima mmaam nnọ afọhnọ ẹja ẹkkạmachẹ anạng Ọvaar Ubinọkpaabyi. 15Anạng p'Lẹvi adir ikwukwur nnọ s'Echekha ch'Ọvaar Ubinọkpaabyi, ọttạra nnọkha s'ekpo p'gold iyik, atạkha anạna k'ẹtakpa njọ chididen. Ma iwu njọ, anạng p'Bẹt-Shẹmẹsh anạngẹ nnạnga ikkạmasẹ, abạra afọhnọ nja anạng Ọvaar Ubinọkpaabyi. 16Wa avaarnạng mbọ asen p'ifhon s'Philistiya ase idik nnọ phyibh, brasẹ abẹ n'abin akpa nnạm k'Ẹkrọn ma iwu njọ-njọ.
17Ma wọ ode ibirakpo p'gold p'uwa aPhilistiya atọhmọ anạng Ọvaar Ubinọkpaabyi masẹ ẹnạnga ch'ipongapyibha. Wa ofhon kwidede kw'ode Ashdọd, ọttạra Gaza, ọttạra Ashkẹlọn, ọttạra Gat, ọttạra Ẹkrọn, utim ẹnạnga chẹ. 18Wa ubhik f'okpomma pf'abẹ atim gol asi otoru k'ubhik kw'avaar mbọ asen, p'ifhon s'aPhilistiya s'ikpọkh-ọkpọkhọ, ọttạra ifhon sabẹ s'nạníkpọkha. Ẹtakpa njọ chididen ch'uwa abẹ anạn ikwukwur s'echekha ch'Ọvaar Ubinọkpaabyi, itim ining k'owonu kw'Joshua, kw'ubin Bẹt-Shẹmẹsh, mas'ẹkhọhkha k'udik kw'uwa otto ma, tạrr ukpira k'iwu ch'chemma.
19Okhenkha, Ubinọkpaabyi usi ajunung bạnọ p'Bẹt-Shẹmẹsh, p'akpir anạng nnạbh attaan ukuma jobh, ape, ukwuru sabẹ akkeri k'ẹtaanga kw'Ikwukwur s'echekha ch'Ọvaar Ubinọkpaabyi. Wa anạng aning k'ikwosi, ukwuru s'Ọvaar Ubinọkpaabyi ọtạk akpen pabẹ k'ọsaabh. 20Ma wọ anạng p'Bẹt-Shẹmẹsh n'abạbhọ bẹ́, “Anẹ wọ m'okke obe Ọvaar Ubinọkpaabyi k'ititikha, Ubinọkpaabyi nwa kw'awurada o? M'antọhm ikwukwur nna s'echekha anạng anẹ o?”
21Ma wọ abẹ atọhmọ anạng kha Kiriyat-Jẹrim aben bẹ, “APhilistiya kk'ikwukwur s'echekha ch'Ọvaar Ubinọkpaabyi arikha e. Asạkha akwu adira sẹ avura afona k'abạnga k'ibyi e.”
Currently Selected:
1 Samwẹl 6: mfn-x-os
Highlight
Share
Copy
Want to have your highlights saved across all your devices? Sign up or sign in
©️2025 West Africa Christian Mission
