1 Samwẹl 11
11
Saul ọkkaan anạng p'Jabẹsh k'ekpong
1Wa Nahash kw'ọdạbhẹ Ammọn utim akpongnạng pẹ ofona ọta ọbaabha ofhon kw'Jabẹsh-Gilead oge k'ngekha bẹ́, urima bẹ abẹ. Ma wọ, ajunung p'Jabẹsh phyibh aben-ẹ bẹ́, “Khaama ẹgbagba ọttạra mạna, ọfha amạna anninga isekhisek kwọ.”
2Okhenkha, Nahash kw'ubin Ammọn ubhin bẹ bẹ́, “Amma m'nkhaama ẹgbagba ọkhaama ọttạra bạnga abẹ, de abạnga acher bẹ́, nnạbha ichen s'udimbọhk s'ọnạng kw'idede ọfha osenga ma ẹsẹkha ede ch'Israẹl phyibh.”
3Ma wọ adecho p'Jabẹsh aben-ẹ bẹ́, “Nạng mạna iwu isenọfa ọfha antọhm ẹkkaabha annạng anạng p'Israẹl phyibh, de ọnạng wạnọ-wạnọ nạn ukwua bẹ́, ọkkaana mạna, amạnamba m'antte ifor samạna ọbọhk annạng-ọ.”
4Masẹ atọhmọ mbọ akpir k'Gibea, kw'ode ofhon kw'Saul ubin, abẹ atạkha idik nnọ akpaak anạng mbọ, abẹma phyibh agạma ẹfhonmạng k'ẹrạng. 5Okpe núbhira, Saul utima mmaam sẹ n'ukwuna, ukw'ukpira ma, ọbạbh bẹ, “Bạng udik gwọ uyini o? Ode yạn kw'abẹ n'agạma ẹmạng o?” Osenga ma, abẹ atạkha dạkhẹ udik kw'anạng p'Jabẹsh kk'bẹ akpaakha, akpaakh-ẹ.
6Masẹ Saul ọbhaang ẹkkaabha njọ ch'abẹ atim akwu, ẹfa ch'Iguguma s'Ubinọkpaabyi ẹnwẹ-ẹ, ettem ipyibh-ẹ. 7Ma wọ n'ọtạk mmaam mfa ọkpaara bẹ chẹkchẹkchẹk, ọtakha ọnạng atọhmọ mbọ, ọtọhmọ bẹ, abẹ akhebh abaabha Israẹl, n'awon bẹ́, “Oche ngwa gwọ abẹ m'asi mmaam s'ọnạng kw'idede kw'nạn Saul ọttạra Samwẹl abẹ nọ́twạna.” Ma wọ, ojora f'Ọvaar Ubinọkpaabyi ọnwa anạng mbọ, abẹma phyibh akhaama ẹkka jạnẹ. 8Okpe kw'Saul oyeri bẹ ininga k'Bẹzẹk, ubhik kw'ajunung p'aning ma ode nnọhna nnọhna ukuma arạbh chi ukuma afa ukuma jobh p'abin k'efhonfhạr ch'Israẹl, p'abin k'efhonfhạr ch'Juda ade ajunung nnọhna ẹrạbh ukuma jobh.
9Abẹ aben atọhmọ p'atim ẹkkaabha njọ akwu bẹ́, “Abạnga akpaak ajunung p'Jabẹsh-Gilead bẹ́, ‘Uphyini okpe kw'ekkekhạra ẹkhạmọ, abạnga m'akhaama ẹnnaanga ọkhaama.’ ” Masẹ atọhmọ mbọ akpa nnạm ata akpaak ajunung p'Jabẹsh idik nna, ettem erebh bẹ. 10Ma wọ, abẹ akpaak anạng p'Amọn bẹ́, “Uphyini m'antte ifor samạna ọbọhk annạng bạnga, ọfha abạnga asi mạna oche kw'ọdaakhẹ bạnga.”
11Mas'iwu echobh, Saul ọbhaangẹ akpongnạng k'ikhaana ittaan; ochengwọ iwu echobh, ab'anwa k'ibyibhingasẹ s'Ammọn, ab'afhọ bẹ tạrr ukpira okpe kw'ekkekhạra ẹkhạmọ. Ayok mbọ p'annạng-ọnnanga, ọnạng-ọnạng ọrạbhọ otor eden chẹ, ọnạng kw'ọkhaam oyokh-ikhaana kóde.
Saul ọdạbhẹ ẹvaar
12Ma wọ anạng n'abạbhọ Samwẹl bẹ́, “Anẹ wọ kw'uwa ọbạbhọ bẹ́, ‘Ma, Saul wọ m'ọdạbh mạna ẹvaar o?’ Abạnga atima ajunung mbọ akwu amfhọ bẹ echomajạnẹ!”
13Saul okhenka oben bẹ, “Mma e, ọnạng wạnọ-wạnọ kw'm'amfhọ chemma kode, ukwuru bẹ, k'iwu ch'chemma, Ọvaar Ubinọkpaabyi kk'Israẹl ọkkaana.”
14Ma wọ, Samwẹl obeni anạng mbọ bẹ́, “Akwu amạna amfona k'Gilgal anta anchera ọttạra ẹvaar nja.” 15Ma o, anạng mbọ phyibh abin afona k'Gilgal, abẹ achera k'ititikha s'Ọvaar Ubinọkpaabyi bẹ, Saul wọ ode ọvaarnạng. Mạma wọ abẹ afọhnọ ẹja ch'oforgbạkha anạng Ọvaar Ubinọkpaabyi. Osenga ma, Saul ọttạra efhonfhạr ch'Israẹl phyibh asi erobha ch'ididen.
Currently Selected:
1 Samwẹl 11: mfn-x-os
Highlight
Share
Copy
Want to have your highlights saved across all your devices? Sign up or sign in
©️2025 West Africa Christian Mission
