Lukasa 8

Aakiinhu mba ya enda naYesus

1Nhyi pwa pita efimbo, Yesus okwa ya, ta ende moilando nomomikunda, ta uvifa Onghundana Oiwa kombiga youhamba waKalunga. Aalongwa yaye omulongo nayaali oya ya pamwe nae 2naakiinhu mba ya li ya yeluvwa keemhepo va kaka nokomauvu yamwe, Malia Mahatalena, ngu muye mwa li mwa tewa eemhepo va kaka heyali, 3na Yohana, omukiinhu waKusa elenga lyaHelodesa, naSusana naakiinhu yamwe mba ya longifa oiniwe yawo mokukwafa Yesus naalongwa yaye.

Eele lyomukuni

(Mateusa13:1-9; Malukusa4:1-9)

4Aanhu oyendji oye ya kuYesus okuza koilando noilando, nanhyi ongudu onene ya ongala, Yesus nokwe ya lombwela eyele,

5“Omukuni okwa ya a ka kuna eembuto mepya. Mokukuna kwae okwa kuna ta kupula. Eembuto vimwe ova wila mondjila, mu va lyatelwa mo kaanhu neevila ove ya, ndee avi vi shomona po. 6Vimwe ova wila poukukutu kapuna evu olindji, ndee mokumena ova nganya, oshonhyi evu lyamho kali na oututo. 7Vimwe ova yila meehongo, ndee eehongo ova koka ndee avi vifininike. 8Vimwe ova wila mevu oliwa, ndee avi koko ndee avi vala lwefele.”

Yesus nhyi a mana okupopya, okwa ti kuyo, “Ngu ena omakutwi yokuuva ko, na uve ko!”

Elalakano lyomaele

9Aalongwa yaye oye mu pula kutya eyele ali ti ngeepi, 10Yesus okwa ti, “Nye omwa pewa mu shiwe oiholekwa yOuhamba waKalunga, ndele yamwe otaa lombwelwa momayele, onghee, oku tala ohaa tala, ndele kaye wete ko, nokupwaikina ohaa pwiikine, ndele kaye uviteko.”

Eele lyomukuni ali fatululwa

(Mateusa13:18-23; Malukusa4:13-20)

11“Eele ali ti, Ombuto oyo eehapu vaKalunga. 12Vi va yila mondjila, ova fa aanhu mba haa pwiikine eehapu, ndele Satana ote ya, ndee ta kufa mo eehapu vi va kunwa momitima vawo, opo ya kale ihaa vulu kwiitaela yo ya hupifwe. 13Vi va yila poukukutu, ova fa aanhu mba taa uvu eehapu, ndee taye vi tambula nehafo, ndee ihavi mene omivi muyo. Otaa itaele okafimbo, ndele mefimbo lyomashongo otaa efa po eitaelo. 14Vi va yila meehongo, ova fa mba taa uvu eehapu, ndele konima yefimbo oimhwiyu nouyamba nouhalu wopauyuni otau fininike eehapu, opo inaya vula okwiimika oiyimati. 15Vi va yila mevu oliwa, ova fa aanhu mba taa uvu eehapu, ndee taye vi tambula nomutima omuwa, una evuliko, ndee taa viinine, siyo taa imike oiyimati.”

Olamba kohi yonhungwa

(Malukusa4:21-25)

16“Kaku na omunhu ta teme olamba, ndee te yi tula kohi yonhungwa nenge kohi yombete, ndele okuna kuyi tula koshikwatelwalamba, opo kehe ngu teya meumbo a mone ouyelele.”

17“Kehe nhyi sha holekwa ashi ka hololwa, nanhyi sha siikilwa, a shi keya pouyelele.”

18“Hano kaleni mwa kotoka nye mu pwiikine. Oshonhyi ngu e na oye ta pewa, ndele ngu kena, ota kufwa noshishonalela nhyi taa vilaavila kutya oku na.”

Yina naamwainamati yaYesus

(Mateusa12:46-50; Malukusa3:31-35)

19Yina yaYesus naamwayina aalumenhu oye ya ku ye, ndee kaya li taa vulu okufika ku ye omolwouwundji waanhu. 20Umwe okwa ti kuYesus, “Nyoko naamwanyoko oye li pondje ya hala yeku mone.”

21Yesus okwa ti kuyo ayehe, “Meme naamwameme oyo mba taa uvu eehapu va Kalunga, ndee taa vulika kuvo.”

Yesus ta lotifa oshikungulu

(Mateusa8:23-27; Malukusa4:35-41)

22Esiku limwe Yesus okwa londa mowato pamwe naalongwa yaye, ndee ti kuyo, “Tu taulukeni tuyeni kombiga onghwao.” Oya ya. 23Mokweenda kwawo Yesus okwa kofa. Okwa tukuluka omhepo onene nowato oyali ya ya omeya, noya li yeli mouviyu. 24Aalongwa oye ya kuYesus, ndee taye mu pendula ya ti, “Omwene, Omwene, atu sile mo, penduka!”

Yesus okwa penduka, ndee ta ngada oshikungulu, nomakufikufi oya mwena, nefuta olya lota. 25Yesus okwa ti kuyo, “Eitaelo lyeni oli li peni?”

Aalongwa oyali ya tila noya kumwa, ndee taa pulafana, “Ngu olye hano, ta ngada omhepo nomakufikufi, ndee otaa vulika kuye?”

Yesus ta eluva omulumenhu e na eemhepo va kaka

(Mateusa8:28-34; Malukusa5:1-20)

26Yesus naalongwa yaye, oya ya koshitopolwa shaGelasene, sha taalelafana naGalilea. 27Yesus nhyi e ya koukukutu, okwa shakenekwa komulumenhu womoshilando mo, e niwe keemhepo va kaka, a ninga efimbo iha zala oikutu, ye iha kala meumbo, ndele okwa kala momakololo yeembila. 28Ndele nhyi a mona Yesus okwa ingiva mopale, ta wile pohi puye, ndee ta popi mopale, “Yesus Omona waKalunga Wopombadambada! Owa halela nge shi? Andi ku yalikana, ino hepeka nge.” 29Nhyi okwe shi popya shaanhyi Yesus okwa lombwela omhepo ya kaka yi zemo muye. Efimbo olindji nge yemu hanga, okwa kala ha evililwa, a mangwa nomalyenge neemwiya komaako nokomaulu, ndele oheitokola mo, nomhepo ya kaka ohai mu fala mombuwa. 30Yesus okwe mu pula, “Ooye lye?” Ye okwa ti, ‘Ose ongudu yaakwaita,’ oshonhyi muye omwa li eemhepo va kaka ovidji. 31Eemhepo va kaka ova indila Yesus ine vi undulila moshaasi.

32Popepi nondudu opwa li oshuunda oshinene shoingulu sha napa. Eemhepo va kaka ova indila Yesus evi tule moingulu. Yesus okwe vi pitika vi ye moingulu. 33Eemhepo va kaka ova zamo momulumenhu nova ya moingulu. Oshuunda ashihe shoingulu osha nhuka okuza komutunhu omuleka, ndele ashi iyumbile mefuta nosha sila mo.

34Aasita yoingulu nhyi ya mona nhyi sha ningwa, oya matuka po, ndele taa ka hokolola oshiningwanima meendoolopa nomomikunda. 35Aanhu oya ya, yaka tale nhyi sha ningwa ko. Oye ya kuYesus noya hanga omulumenhu ngu a li ena eemhepo va kaka e li omutumba puYesus, a zala nawa, ye okuna eenduge, noya li ya tila. 36Aanhu mba ye shi mona oya hokololela yakwawo, nghee omulumenhu ngu a li a kwatwa keemheepo va kaka a yeluvwa. 37Nena aanhu ayehe yomomikunda vomuGerasene, oya indila Yesus a ze mo moshilongo shawo, oshonhyi oya li ya tila neenghono. Yesus okwa ya mowato, ndele ta shuna. 38Omulumenhu ngu a li ena eemhepo va kaka okwa indila Yesus opo e mu pitike a kale naye.

Ndele Yesus okwe mu lekela a ti, 39“Shuna kolyeni, ndee to ka hokolola nhyi wa ningilwa kuKalunga.” Omulumenhu okwa shuna, ndee ta uvifile ondoolopa ayihe, oilonga oinene mbi Yesus e mu ningila.

Omonakavona waJairus nomukiinhu ngu a kuma onguwo yaYesus

(Mateusa9:18-26; Malukusa5:21-43)

40Yesus nhyi a yaluka, ayehe oye mu tambula ko, oshonhyi oya hangika yemu teelela. 41Ndee omulumenhu wevina Jairus, omukulunhu wOshinagoga, okwe ya kuYesus. Okwa twa eengolo peemhavi vaye, ndee te mu indile aye keumbo lyaye, 42oshonhyi okwa li e na omonakavona, weevula omulongo nambali, e li poku sa.

Yesus mhanga ta yi pamwe naJairus, aanhu oye mu ongakanene. 43Mokati kao omwa li mu na omukiinhu taaluka ouvu wetiko lyohonde oule weevula omulongo nambali, nonande okwa li a longifa oiniwe yaye ayihe mokukonga epango kaayakuli, kapuna ngu ali a vula oku mu yeluva. 44Omukiinhu ngu okwe ya, a zilila Yesus konima ndee te mu kumu komungege woikutu yaYesus. Viyaviya etiko lyohonde olya kanghama. 45Opo nee Yesus okwa pula, “Ngu a kuma nge olye?”

Kehe umwe okwe shi anya, ndee Peetulusa okwa ti, “Mulongi, owa kundukiva kaanhu oyendji.”

46Ndele Yesus okwa ti, “Onde shi vibulula kutya opuna umwe a kuma nge, shaanhyi onda uva mwaame mwa za eenghono.” 47Hano omukiinhu nhyi a vibulula kutya, okwa vibululwa, okwe ya ndee ta tu eengolo koshipala shaYesus, a tila ta kakama. Okwa lombwela Yesus momeho yaanhu ayehe kutya omolwashike e mu kuma nonghee a yeluka meendelelo. 48Yesus okwa ti ku ye, “Mumwange, eitaelo lyoye olye ku yeluva. Inda nombili.” 49Mhanga Yesus ali ta popi, opwe ya omulumenhu a za kolyawo yomukulunhu wOshinangoga a ti, “Omonakavona woe okwa mana eengeda. Oto monifile ali shi Omulongi oihuna?”

50Ndele Yesus nhyi eshi uvu, okwa ti ku Jairus, “Ino tila, kala una eitaelo, omumwoe ota yeluka.”

51Yesus nhyi e ya meumbo, ina pitika nande omunhu umwe aye mo pamwe naye kakele kuPeetulusa naYohanesa naYakopo nahe nayina yokaana. 52Aanhu ayehe mba yali mo oya lila nokuuva oluhovi omolweso lyako. Ndee Yesus okwa ti, “Ina mu lila, oshonhyi okaana inaka sa, oka kofa ike.”

53Aanhu oya yola Yesus, oshonhyi oyali ye shi shii kutya, okaana oka sa. 54Yesus okwe ka kwata moshikaha, ndee ta popi mopale, “Mumwange, penduka!” 55Omhepo yaye oyaaluka, ndee ta fikama viya. Yesus okwe ya lombwela ya pe okaana oikulya. 56Aakulunhu yokaana oya li ya kumwa, ndele Yesus okwe ya kunghulila opo inaa hokololela nande omunhu, nhyi sha ningwa po.

Currently Selected:

Lukasa 8: MBTP

Highlight

Copy