मत्ती 4
4
येसुन छोए सेम्पा
(मर्क १:१२-१३; लुक ४:१-१३)
1अन्न छाम्म सैतानलम छोए सेन्चेन भिह्तु पबित्र आत्मालम येसु सुनसान ठाउँग वप्पो। 2नू ङेथल ङिह्म रे ङेथल छान्न बेर बर्त छ्युङ तामी गुसिह्बो।#प्रस ३४:२८ 3तब छोए सेन्नानजै नुन स्याह् स्वास्वा र्वाबो, “ना परमेस्वरन ङोह्जो जेङ्न अन लुङवग रोता राःयो र्वार्वा आग्या भिना।”
4जेङ्नै येसुई झब बिम्बो, “सर्पा ङ्याह्, ‘सिमि रोताई मात्र नङ्पा, जेङ्नै परमेस्वरन ङुरलै गेप्पान बचन पुरूजै सम्पु लुईनान।’” 5तब सैतानजै नू पबित्र सहर यरूसलेमग वव्वै आराधनालयन यू सोल्बो,#लुक ४:९ 6रे नू र्वाबो, ङेन परमेस्वरन ङोह्जो जेङ्न स्यीह्लै माह्ः भोरा तैङर्वाङिन झाःम सर्पा ङ्याह्,
परमेस्वरजै जेँन दुतकाङ्मोः आग्या खेनान ङ्याह्
रे ख्युई नाः सेन्चे खेनान ङ्याह्,
तेमन्ता नान लेह् लुङ्ग थ्वाफान्नान ङ्याह्!#भजन ९१:११-१२
7येसुई नू र्वाबो, “सर्पा ङ्याह्, ‘नाई परमप्रभु जेँन परमेस्वरन छोए नसेह्ना।’”#कानुन ६:१६ 8ह्याङ सैतानजै नू ला थोमदीग वव्वै सन्सारन राज्य पुरू रे नुन बैभब नू थम्बो, 9रे नू र्वाबो, “नाई खल्बू क्यापक्याप ङाः ध्वाः खेङिन, अन तैस्याङ पुरू ङा नाः बिन्नान ङ्युँ।” 10तब येसुई नू र्वाबो, “सैतान, ना ग्याङ्म रा! तैङर्वाङिन सर्पा ङ्याह्, ‘नाई परमप्रभु जेँन परमेस्वरग ध्वाः ख्या, रे नुन मात्र सेवा ख्या’।”#कानुन ६:१३ 11तब सैतान नू ख्योवाख्योवा होई रे स्वर्गदुतवजै स्वास्वा नू सेवा खेबो।
येसुई गालीलग जेँन धोन सुरु खेपा
(मर्क १:१४-१५; लुक ४:१४-१५)
12बप्तिस्मा बिन्नान्न यूहन्ना झ्यालखानाः थेप्पो र्वानान्न ल्होई ताह्ताह् येसु गालील प्रदेसग होई,#मत्ती १४:३; मर्क ६:१७; लुक ३:१९-२० 13रे नासरत ख्योवाख्योवा कफर्नहुमग वैवै स्याह् छ्युङ्मः जाःबो। अन सहर जबूलून रे नप्तालिन छेत्रग, योह्न नाः परि राँ। 14यसैया भबिस्यबक्ताजै र्वापान बचन झामखेखे पुरा रह्बो 15“जबूलून्न मुलुक रे नप्तालिन मुलुक, यर्दन चाङ्पुन धिङाः, समुद्रक्याँ, यहूदीन खोलोःन सिमिवन गालील, 16नाःतुमाः छ्युङ्नान्न सिमिवजै किम ताह्मदी रङ्पा ङ्याह्। कालन तिप्सोन देसग छ्युङ्नानवन लाह्ः ताह्मदी स्यार्पा ङ्याह्।” 17मन्न भेलालै ताह्फेरैफेरै येसुई र्वामः जाःबो, “तीपावलम होला, तैङर्वाङिन स्वर्गन राज्य ङेह्मः स्वा ताप्पा ङ्याह्।”#मत्ती ३:२
येसुई ङाह् जुङ्नान्न लिपाः कताङ्पा
(मर्क १:१६-२०; लुक ५:१-११)
18गालील-योह्न नाः लेन्तौ नुई पत्रुस र्वानान्न सिमोन रे नुन भाई अन्द्रियास, थिक्कोव ङ्योरुमग योह्ग जाल कह्पाई छ्युङ्पा रङ्बो। ख्यु ङाह् जुङ्नान्न सिमि ङ्याह्। 19नुई ख्युकाङ्मोः र्वाबो, “ङन ङिक जाः, रे ङा ङेनकाङ्मोः सिमिकाङ्मोः जुङ्नान्न सिमि दोङ्नान ङ्युँ।” 20तब मन्नै भेला जालव ख्योवाख्योवा ख्यु येसुन ङिक जाःबो। 21स्याह्लै वैतौवैतौ नुई घङ थिक्कोव ङेह्, जब्दियान ङोह्जोव याकूब रे नुन भाई युहन्नाः ख्युन पा जब्दियान ङ्याबो दोङाः जेँन जाल दोङ्यङ खेपा रङ्बो, रे नुई ख्युकाङ्मोः कताङ्बो। 22तब तुरुन्तै दोङा रे ख्युन पाः ख्योवाख्योवा ख्यु नुन ङिक जाःबो।
गालिलग येसुन सेवाकाई
(लुक ६:१७-१९)
23आलै येसु ख्युन आराधनालयवग लह्नैलह्नै, राज्यन ल्होन् लः ताह्फेरैफेरै, रे सिमिकाङ्मोः ङिह्पान राँसा राँसान नाह्जा रे ल्होन नाह्प्पुवा ताःफानैफानै पुरू गालीलभरि तूह्बो। 24नुन मिह्नकै सिरिया देसभरि फेल्बो, रे खङ्नानव, आथबा राँसा राँसान नाह्जा रे पिरजै तेपफाम्पा, मुई सेम्पा, नाम्क्यान ताह्पा, रे ल्हो मगुल्नान्न नाह्जा रह्पाव पुरूग सिमिवजै नुन स्याह् सप्पो। नुई ख्युकाङ्मोः ताःफाम्बो। 25आलै गालील प्रदेस, देकापोलिस, यरूसलेम सहर, यहूदिया रे यर्दन चाङ्पुन धिङाःलैन मोङ किमव नुन ङिक जाःबो।
Currently Selected:
मत्ती 4: NTKST25
Highlight
Share
Copy
Want to have your highlights saved across all your devices? Sign up or sign in
The New Testament Books in Kaike Language © The Word for the World International and Kaike Translation Project, Nepal, 2025
