మార్కు 9
9
1జీసు ఎంబఅఁ నిచ్చమచ్చి కొచ్చెకజాణ మహపురుతి రాజి సొక్తి బలొమితొల్లె వానణి మెహ్ని పత్తెక హాఒరి ఇంజిహిఁ సత్తెఎ వెస్సీఁజఇఁ ఇచ్చెసి.
జీసు రోలెతి వీర్తి తొల్లె వాణ మారినయి
(మత్తయి 17:1-8; లూకా 9:28-36)
2సోహొ దిన్న డాయు, జీసు పేతురుఇఁ యాకోబుఇఁ యోహానుఇఁ దెహెఁ దేచొ ఓహఁ, పడ్డ ఆతి హోరు లెక్కొ ఎంబఅరి హిల్లఅ తాణ ఓహిఁ హజ్జహఁ, ఏవరి నోకిత రోలెతి వీర్తి తొల్లె వాణ మారితెసి. 3ఎచ్చెటిఎ జీసు సొక్కయఁ తర్హఁణ ఆతు హారెఎ వెల్లఆహిఁ తోంజ ఆతు, ఈ తాడెపూరు ఎమ్మిని సాకెలవ హారెఎ వెల్లకిహీఁ రాచ్చలి ఆడ్డొఒసి. 4ఎచ్చెటిఎ మోసేఎ ఏలీయాఎ ఎంబఅఁ తోంజ ఆహఁ జీసుఇఁ జోలిసణి సిసుయఁ మెస్తెరి. 5ఎచ్చెటిఎ పేతురు జీసుఇఁ “గూరు మారొ ఇంబఅఁ మన్నయి నెహిఁ, మాంబు నింగె, రొండఅఁ మోసేకి, రొండఅఁ ఏలీయాకి,” రొండఅఁ తీనిగొట్ట గూడయఁ దొహ్నొమి ఇంజిహిఁ ఇచ్చెసి. 6పేతురు ఏనఅఁ జోలి మచ్చెసికి తానుఎ పుంజలి ఆడ్డఅతెసి, ఏనఅఁకి ఇచ్చిహిఁ ఏవరి హారెఎ అజ్జ మచ్చెరి.
7ఎచ్చెటిఎ దుంద్ర వాహఁ ఏవరఇఁ ప్డిక్హె ఇంజాఁ “ఈవసి నా జీవుతి మీరెఎసి, ఈవణి హాడ్డ వెంజు” ఇంజిహిఁ రో సోరొ ఏ దుంద్రటి వేంగితె. 8ఇంజహఁ ఏవరి జిక్కి సారిసుటు సినికియలెఎ, తమ్మి తాణ మని జీసు పిస్పె ఓడె ఎంబఅరివ ఏవరకి తోంజ ఆఅతెరి.
9ఏవరి హోరు లెక్కొటి రేచ వాహి మచ్చటి మణిసి మీరెఎసి హాకిటి వెండె నింగిని పత్తెక మీరు మెస్తణితి ఎంబఅరఇఁ వెహఅదు ఇంజిహిఁ జీసు ఏవరఇఁ గర్జితెసి.
10హాహిసవాఁ వెండె నింగినయి ఇచ్చిహిఁ ఏనిలేఁతి కత్త ఇంజిహిఁ రొఒణి తొల్లె రొఒసి వెఁణ్బి ఆహిఁ ఏ కత్తతి తమ్మి హిఁయఁతెఎ ఇట్టకొడ్డితెరి. 11ఎచ్చెటిఎ ఏవరి ఏలీయా తొల్లిఎ వానయి మన్నె ఇంజిహిఁ నియొమి సాస్తురి వెహ్నరి ఏనఅఁతక్కి వెస్సి మన్నెరి? ఇంజిహిఁ ఏవణఇఁ వెచ్చెరి.
12ఏదఅఁతక్కి జీసు ఎల్లె ఇచ్చెసి “ఏలీయా తొల్లిఎ వాహఁ బర్రెతి నెహిఁ కినెసి ఇన్నయి సొత్తొఎ, ఇచ్చివ మణిసి మీరెఎణఇఁ హారెఎ డొండొయఁ కిహఁ, లోకు ఓపొఒరి ఇంజిహిఁ పుస్తెకొముత రాచ్చ మన్నయి ఏనఅకి? 13ఏలీయా వాతెసి ఇంజిహిఁ ఏవణి పాయిఁ రాస్కిఆతి సొమన ఏవరి తాంబు మోనొఇచ్చ ఏవణఇఁ కిత్తెరి” ఇంజిహిఁ మిమ్మఅఁ వెస్సీఁజఇఁ ఇచ్చెసి.
బూతొ బ్డూతి కొక్కణఇఁ నెహికినయి
(మత్తయి 17:14-20; లూకా 9:37-42)
14ఏవరి సిసుయఁ తాణ వాహఁ, ఏవరి సుట్టు జన్నలోకు కూడ ఆహఁ, నియొమి సాస్తురి వెహ్నరి ఏవరఇఁ బాది బాద ఆహీసణి మెస్తెసి. 15జన్నలోకు జీసుఇఁ మెస్పొనిఎ జగ్ల ఆతెరి, ఇంజహఁ ఏవణి దరి హొట్టి హొట్టిహిఁ హజ్జహఁ జొహొర కిత్తెరి. 16ఎచ్చెటిఎ జీసు ఏవరఇఁ ఎల్లె ఇచ్చెసి మీరు ఏనఅతి పాయిఁ బాది బాద ఆవి ఆహీఁజెరి ఇంజిహిఁ ఏవరఇఁ వెచ్చెసి.
17ఏ లోకు తాణటి రొఒసి గూరు, బూతొ బ్డూతి జోలలి పున్నఅ గట్టి నా మీరెఎణఇఁ నీ తాణ తచ్చిహిఁ వాహమఇఁ. 18ఏది ఎంబియ ఏవణఇఁ బ్డూనె ఎంబెఎ ఏవణఇఁ త్రొక్హి మన్నె, ఎచ్చెటిఎ ఏవసి పొంబొలి హోప్హిఁ, పల్కహోకిఁ అంగ బర్రె వాయ హజ్జి మన్నెసి, ఏదఅఁతి పేర్హ పండదు ఇంజిహిఁ నీ సిసుయఁణి వెచ్చెఎఁ సమ్మ, ఏదఅఁతి ఏవరి పేర్హ పండలి ఆడ్డఅతెరి ఇంజిహిఁ, జీసుఇఁ వెస్తెసి.
19ఏదఅఁతక్కి జీసు ఏవరఇఁ ఎల్లె ఇచ్చెసి, నమ్మకొము హిల్లఅగట్టి పాటు తత్తెరి, నాను ఎచ్చెక పత్తె మీ తొల్లె మఇఁ? ఎచ్చెక పత్తె మిమ్మఅఁ ఓర్హఇఁ? ఏ కొక్కణి డాలుఇఁ నా తాణ తచ్చిహిఁ వాదు ఇంజిహిఁ ఏవరఇఁ వెస్తెసి. 20ఏవరి ఏవణఇఁ జీసు తాణ తచ్చిహిఁ వాతెరి
ఏ బూతొ జీసుఇఁ మెస్పొనిఎ, ఏవణఇఁ మూడు మడ కిత్తె ఏదఅఁతక్కి ఏవసి తొజ్జొ రీహఁ తెర్బిహిఁ పొంబొలి కక్కిహిఁ మచ్చెసి. 21ఎచ్చెటిఎ జీసు ఎల్లె ఇచ్చెసి, “ఇది ఈవణఇఁ బ్డూహఁ ఎచ్చొర బర్స ఆహినె” ఇంజిహిఁ ఏ కొక్కణి తంజిఇఁ వెంజలిఎ,
“ఊణ వేడటిఎ, 22ఏది ఏవణఇఁ హేడి కిఇఁవ ఇంజిహిఁ ఒల్లొ ఒల్లె హిచ్చుత ఏయుఁణ త్రొక్నె, ఏనికిఁవ నీ తాణటి ఆతిహిఁ మమ్మఅఁ కర్మ మెస్సాఁ మంగె సాయొమి కియ్యము” ఇంజిహిఁ ఇచ్చెసి.
23ఏదఅఁతక్కి జీసు ఏవణఇఁ ఇల్లె ఇచ్చెసి నీను నమ్మలి ఆడ్డితీఁ నమ్మినణకి బర్రె ఆనె ఇంజిహిఁ వెస్తెసి.
24ఏ రేటుఏ ఊణ కొక్కణి తంజి ఎల్లె ఇచ్చెసి నమ్మిమఇఁ, నా నమ్ము ఊణ ఆఅరేటు బల్మి కియ్యము ఇంజిహిఁ వెస్తెసి.
25ఎచ్చెటిఎ జీసు జన్నలోకు తన్ని దరి హొటిహిఁ వాతణి మెస్సహఁ “గుల్ల బేరాఆతి లగ్గెఎతి ఆత్మ, ఏవణఇఁ పిస్సాఁ హత్తుహ్ము,” ఇంబటిఎ ఇత్తల ఏవణఇఁ బ్డూఅనిదేఁ ఇంజిహిఁ నిన్నఅఁ హెల్లొ హీహిఁజఇఁ ఇంజిహిఁ ఏ బూతొతి పేర్హెసి.
26ఎచ్చెటిఎ ఏ బూతొ కిరిడిహిఁ, ఏవణఇఁ మూడు మడ కిహఁ పిస్స హచ్చె, ఎచ్చెటిఎ ఏవసి హాతసిలేఁ ఆతెసి, ఏదఅఁతక్కి హారెఎ జన్నలోకు వాహఁ “ఏవసి హాతెసి” ఇంజీఁ జోల్కి ఆహి మచ్చెరి. 27ఇంజాఁ జీసు ఏవణి కెయ్యు అస్సహఁ నిక్హలెఎ ఏవసి నిత్తెసి.
28ఎచ్చెటిఎ జీసు ఇజ్జొ వాతి డాయు తన్ని సిసుయఁ, ఎంబఅరి హిల్లఅ బేలత “మాంబు ఏనఅఁ తక్కి ఏ బూతొతి పేర్హలి ఆడ్డఅతొమి?” ఇంజిహిఁ, వెచ్చెరి.
29ఏదఅఁ తక్కి జీసు ఏవరఇఁ ఇల్లె ఇచ్చెసి “ప్రాతన#9:29 ఉపవాసొమి తొల్లె తొల్లెఎదెఁ సమ్మ ఓడె ఏనఅఁ తొల్లెవ ఇల్లెతి బూతొ హోచ హన్నయి కాకులిఎ” ఇంజిహిఁ ఏవరఇఁ వెస్తెసి.
జీసు తన్ని హాకితి తొల్లిఎ వెహ్నయి
(మత్తయి 17:22-23; లూకా 9:43-45)
30జీసు ఓడె తన్ని సిసుయఁ ఏ టాయుటిఎ గలిలయ నాయుఁ కుఇటి హజ్జి మచ్చెరి, ఏ కత్త ఎంబఅరకివ పుంజలితకి జీసుకి ఇచ్చ హిల్లెఎ. 31ఏనఅకి ఇచ్చిహిఁ జీసు తన్ని సిసుయఁణి వెస్సీహిఁ, “మణిసి మీరెఎసి మణిసియఁ కెయ్యుత హెర్పి ఆహి మన్నెసి, ఏవరి ఏవణఇఁ పాయినెరి, తీన్ని దిన్న ఆతి డాయు ఏవసి వెండె నింగ వానెసి” ఇంజిహిఁ ఏవరఇఁ వెస్తెసి.
32జీసు వెస్తి కత్తతి సిసుయఁ తెల్హ కొడ్డఅతెరి సమ్మ, జీసుఇఁ వెండె వెంజలి అజ్జితెరి.
ఎంబసి కజ్జసి ఇన్ని బాదిబాద
(మత్తయి 18:1-6; లూకా 9:46-48)
33ఏవరి కపెర్నహోముత ఎజ్జహఁ, బర్రెజాణ ఇజ్జొ హోడ్డలిఎ జీసు ఏవరఇఁ ఎల్లె ఇచ్చెసి, “జియ్యత ఆహాసట్టి మీరు ఏనఅ పాయిఁ బాదిబాద ఆహి మచ్చెరి?” ఇంజిహిఁ వెచ్చెసి.
34ఏ బర్రెజాణ పల్లెఎ ఆత్తెరి, ఏనఅకి ఇచ్చిహిఁ జియ్యుత ఏవరి తాంబు తాంబుఎ ఎంబసి కజ్జసి, ఇంజిహిఁ బాదిబాద ఆహి మచ్చెరి. 35ఎచ్చెటిఎ జీసు కుగ్గాఁ బారొ జాణతి హాటహాఁ “ఎంబసి ఇచ్చివ కజ్జతెఎఁ ఆపెఎ ఇన్నెసి, ఏవసి బర్రెతి కిహఁ డాయు మంజహఁ బర్రెతి సేబ కిన్నయి మన్నె” ఇంజిహిఁ ఏవరఇఁ వెస్తెసి. 36ఇంజాఁ రో ఊణ కొక్కణి డాలుఇఁ హాట కొడ్డహఁ ఏవరి మద్ది నిప్హఁ, ఏవణఇఁ పొమ్మితెసి ఇంజాఁ, ఇల్లె ఇచ్చెసి. 37ఇల్లెతి ఊణ కొక్కరి డాల్కటి “నా దోరుత ఓపినసి నన్నఅఁ ఓపనెసి, నన్నఅఁ ఓపనసి నన్నెఎదెఁ ఆఎ, నన్నఅఁ పండతణఇఁవ ఓపినెసి” ఇంజిహిఁ ఏవరఇఁ వెస్తెసి.
మంగె డాహ్రి అయ్యఅగట్టరి మాఅరిఎ
(లూకా 9:49,50)
38ఎచ్చెటిఎ యోహాను ఎల్లె ఇచ్చెసి “గూరు, రొఒసి నీ దోరుత బూతొణి పేర్హిసణి మెస్తొమి, ఏవసి మా తొల్లె అండతసి ఆఎ, ఏదఅఁ తక్కి ఏవణఇఁ అడ్డు ఆంగితొమ్మి” ఇచ్చెరి.
39ఏదఅఁ తక్కి జీసు ఎల్లె ఇచ్చెసి ఏవణఇఁ అడ్డు ఆంగఅదు ఏనఅకి ఇచ్చిహిఁ, నా దోరుత కబ్బగట్టి కమ్మయఁ కిన్నసి జప్పునంగ నా పాయిఁ లగ్గెఎతణి వెస్సలి ఆడ్డొఒసి. 40మంగె డాహ్రి హిల్లఅ గట్టరి మా పాడియ తరిఎ. 41మీరు క్రీస్తు లోకుతెరి ఇంజిహిఁ నా దోరుత మింగె దాచెక ఏయు గొస్సలితక్కి హియ్యనసి, తంగె వాని కూలితి పండ కొడ్డొఒసి ఇంజిహిఁ సత్తెఎ మిమ్మఅఁ వెస్సీఁజఇఁ.
పాపుతక్కి జియ్యు తొహ్నయి
42నా ముహెఁ నమ్ముకొము ఇట్టితి ఈ ఊణ కొక్కణఇఁ ఎంబసి పాపు కివికిన్నెసి, ఏవణి హెర్కిత కజ్జ జెత్త వల్లి దొస్సహఁ సమ్దురిత మెత్నయిఎ ఏవణకి నెహిఁ. 43నీ కెయ్యు నిన్నఅఁ పాపు కివికియ్యనె ఇచ్చిహిఁ ఏదఅఁతి రత్హఁ కుత్తుహ్ము. 44నీను జోడెక కెస్క తొల్లె డుంబఅ గట్టి హిచ్చుత హన్నణి కిహఁ రొండిఎ కెయ్యు తొల్లె కాలెఎతి జీవుత హన్నయిఎ నెహిఁ. 45నీ కొడ్డ నిన్నఅఁ పాపు కివికియ్యనె ఇచ్చిహిఁ ఏదఅఁతి రత్హఁ కుత్తుహ్ము, 46జోడ్డెక కొడ్డయఁ తొల్లె డుంబఅ గట్టి హిచ్చుత హన్నణి కిహఁ రొండిఎ కొడ్డ తొల్లె కాలెఎతి జీవుత హన్నయిఎ నెహిఁ. 47నీ కన్ను నిన్నఅఁ పాపు కివికియ్యనె ఇచ్చిహిఁ ఏదఅఁతి పిత్హ కుత్తుహ్ము, జోడెక కణ్క మంజహఁ హిచ్చు గ్డాయుత హన్నణి కిహఁ రో కన్ను తొల్లెఎ మహపురు రాజిత హన్నయిఎ నెహిఁ. 48నొర్కొ గ్డాయుత ఏవరి ప్డియులి హాఎ, హిచ్చు డుంబెఎ.
49బర్రెజాణతక్కి హారు రస్స, హిచ్చుటిఎ వానె.
50హారు నెహఁయిఎ సమ్మ హారుత మన్ని రస్స హచ్చిసరి ఏదఅఁతి మీరు ఏనఅఁ తొల్లె వెండె రస్సతి తచ్చలి ఆడ్డిదెరి?
మింగొతక్కి మీరు హారు రస్స గట్టతెరిలెహెఁ ఆహఁ రొఒణి తొల్లె రొఒసి సాంతి జీవుతొల్లె మంజు ఇంజిహిఁ వెస్తెసి.
Currently Selected:
మార్కు 9: JST25
Highlight
Share
Copy
Want to have your highlights saved across all your devices? Sign up or sign in
The Jathapu Bible © The Word for the World International and Jathapu Translation Project, Andra Pradesh 2025
