మత్తయి 23
23
పరిసయుఁణి నియొమిసాస్తురి వెహ్నరఇఁ జీసు జాగ్రెత వెహ్నయి
(మార్కు 12:38-39; లూకా 11:43,46; 20:45-46)
1ఎచ్చెటిఎ జీసు జన్నలోకూణి, తన్ని సిసుయఁణి ఇల్లె ఇచ్చెసి, 2నియొమిసాస్తురి జాప్నరి, పరిసయుఁయఁ మోసే జాప్హిలేఁకి జాప్హలి హుక్కొమి గట్టరి ఆహాఁ కుగ్గానెరి. 3ఏదఅఁతక్కి ఏవరి మిమ్మఅఁ వెస్తన్నఅఁతి బర్రె వెంజహఁ ఏ సొమన తాకదు. సమ్మ ఏవరి కిన్ని కమ్మయఁ మాత్రొమి కిఅదు. ఏవరి వెహ్నెరి సమ్మ కిఒరి. 4డేకలి ఆడ్డఅగట్టి బరువుణి మణిసియఁ బొమ్మి లెక్కొ ఎక్నెరి సమ్మ ఏవఅఁతి డేకలితక్కి రో వంజుతొల్లెవ సయొమి కిఒరి. 5ఏవరి కిన్ని కమ్మయఁ బర్రె మణిసీఁకి తోంజఆపువ ఇంజిహిఁ కిన్నెరి. మహపురు బోలు రాచ్చితి తమ్మి ఊణ మోణయఁ ఓసర్క కిహకొడ్డినెరి. ఏవరి సొక్క కుంగుయఁ ఓసర్క కివ్వికిన్నెరి. 6బోజి టాయుత కజ్జరి కుగ్గిని తాణ కుగ్గలి ఆస ఆనెరి యూదుయఁ కూడఆని ప్రాతన టాయుతవ కజ్జరి కుగ్గిని టాంగాణి పర్రినెరి. 7హాటపంగత సాహ్డయఁణ జొహొరిక వెస్పికిహకొడ్డిహిఁ, లోకుతొల్లె గూరు, గూరు, ఇంజిహిఁ హాటికిహకొడ్డలి ఏవరకి రాఁహఁ. 8మీరు ఇచ్చీఁ గూరు ఇంజిహిఁ హాటికిహకొడ్డఅదు. బర్రెతక్కి రొఒసిఎ గూరు. మీరు బర్రెతెరి తయ్యియఁతెరి. 9ఓడె బూమిలెక్కొ ఎంబఅరఇఁ తంజి ఇంజిహిఁ హాటఅదు. లెక్కొపురు మన్ని మహపురు రొఒసిఎ మీ తంజి. 10ఎచ్చెకెఎదేఁ ఆఎ, మీరు గూరుయఁ ఇంజిహిఁ హాటికిహకొడ్డఅదు. క్రీస్తు రొఒసిఎ మీ గూరు. 11మీ తాణ బర్రెతి కిహఁ కజ్జసి మింగె సేబకియ్యనసి ఆహమన్నయి మన్నె. 12తంగొతక్కి తానుఎ కజ్జసి ఆనసి ఊణఆనెసి, తంగొతానుఎ ఊణ ఆనణఇఁ కజ్జసి కియ్యలి ఆనె.
పంగతరొల్లెకీఁ బిత్రరోల్లెకీఁ మన్నరి జీసు లొక్నయి
(మార్కు 12:40; లూకా 11:39-42,44,52; 20:47)
13ఆబలే, నియొమిసాస్తురి జాప్నతెరి, పరిసయుఁయఁతెరి, మీరు పంగతరోలెకీఁ బిత్రరోలెకీఁ జోలినత్తెరి మింగె డొండొ పిట్టొవిఆఎ. ఏనఅఁకి ఇచ్చిహిఁ మణిసియఁ లెక్కొపురు రాజి హల్లఅరేటు మీరు అడ్డు మంజజెరి. 14#23:14 ఈ కత్త మూల పుస్తెకొముతాణ రాస్కిఆహలెఎ మీరు ఎంబఅఁ హల్లొఒతెరి, ఎట్కతరఇఁ హజ్జలి హీఒతెరి.
15ఆబలే, నియొమిసాస్తురి జాప్నతెరి పరిసయుఁయఁతెరి, మీరు పంగతరోలెకీఁ బిత్రరోలెకీఁ జోలినతెరి. రో మణిసిఇఁ మీ మతొమిత కల్పకొడ్డలితక్కి మీరు సమ్దురితి, బూమితి సుట్టు వానిలేఁ కమ్మకిన్నెరి. ఏవసి మిమ్మఅఁ మీతొల్లె కల్హసరి ఏవసి మీకిహాఁ రీగూణ నరొకొమితక్కి పాడ ఆతసి ఆనెసి. మింగె డొండొపిట్టొవి ఆఎ.
16ఆబలెయ, జియ్యు తోహ్ని కాణయఁతెరి, రొఒసి మహపురు గుడి మానిఎ ఇంజిహిఁ ఒట్టుకిత్తివ ఏనఆఎ సమ్మ ఏ మహపురు గుడిత మన్ని బఙర మానిఎ ఇంజిహిఁ ఒట్టుకిత్తిహిఁ ఏదఅఁతక్కి మానికిహాఁ మచ్చిదేఁ ఇంజిహిఁ మీరు వెహ్దెరి. 17బుద్ది హిల్లఅగట్టి, కాణయఁతెరి, ఎమ్మినయి కజ్జయి? బఙరకి, ఏ బఙరతి సుద్దుకిన్ని గుడి ఏనయి? 18ఎల్లెకీఁఎ పూజపిండత మన్ని కానుకతి మానిఎ ఇంజిహిఁ ఒట్టు కిత్తివ ఆనఆఎ సమ్మ, ఏదఅఁలెక్కొ మన్ని పూజ హర్కు మానిఎ ఇంజిహిఁ ఒట్టు కిత్తిహిఁ ఏదఅఁతక్కి మాని తొల్లె మచ్చిదేఁ ఇంజిహిఁ మీరు వెహ్దెరి. 19కాణయఁతెరి, ఎమ్మినయి కజ్జయి? పూజ హెర్పితి కానుక ఓడె హర్కుకి, ఏదఅఁ సుద్దుకిన్ని పూజపిండ? 20పూజపిండ మానిఎ ఇంజిహిఁ ఒట్టు కిన్నసి, ఏద మానిఎ ఇంజిహిఁ, ఏదఅఁ ముహెఁ మన్ని బర్రెతి మానిఎ ఇంజిహిఁ ఒట్టు కిహీనెసి. 21ఎల్లెకీఁఎ మహపురు గుడి మానిఎ ఇంజిహిఁ ఒట్టు కిన్నసి, ఏదఅఁ మానిఎ ఇంజిహిఁ ఎంబఅఁ బస్సకిన్నరి మానిఎ ఇంజిహిఁ ఒట్టు కిహీనెసి. 22హాగు మానిఎ ఇంజిహిఁ ఒట్టు కిన్నసి మహపురు సింగసాణ మానిఎ ఇంజిహిఁ ఏదఅఁ ముహెఁ కుగ్గమన్ని మానిఎ ఇంజిహిఁ ఒట్టు కిహీనెసి.
23ఆబలే, నియొమిసాస్తురి జాప్నతెరి, పరిసయుఁయఁతెరి, మీరు పంగతరోలెకీఁ బిత్రరోలెకీఁ మన్నతెరి. మింగె డొండొ పిట్టొవి ఆఎ. మీరు పుదీనా, సోంపు, జీలకర్రతి మహపురుకి హెర్పిదెరి. సమ్మ నియొమిసాస్తురిత మన్ని మూలుతి హాడ్డయఁ ఇచ్చిహిఁ నెహఁఅ కర్మ, నమ్మకొమి, ఇవఅఁతి పిహ్దెరి. ఏవఅఁతి మహపురు పిహఅరేటు ఏవఅఁతి కిద్దు 24జియ్యు తొహ్నికాణయఁతెరి! ఊణ వీహాఁణి ఒట్హఁ లొట్టిపిట్టతి గుహ్నతెరిలెహెఁ మంజెరి.
25ఆబలెయ, నియొమిసాస్తురి జాప్నతెరి, పరిసయుఁయఁ, మీరు పంగతరోలెకీఁ బిత్రరోలెకీఁ మన్నతెరి. మింగె డొండొ పిట్టొవిఆఎ. మీరు గిన్నె, పల్లెమి పంగత సుద్దుకీదరి ఇచ్చిహిఁ ఏవి బిత్ర బర్రెఏ డొఙతొల్లె ఆసతొల్లె నెంజాహఁ మంజానె. 26కాణగట్టి పరిసయుఁతి, గిన్నె, పల్లెమి, తొల్లి బిత్ర సుద్దుకీదు. ఎచ్చెటిఎ ఏవఅఁతి పంగతవ నెహిఁఆను.
27నియొమిసాస్తురి జాప్నతెరి! పరిసయుఁయఁతెరి! మీరు పంగతరోలెకీఁ బిత్రరోలెకీఁ మన్నతెరి. మింగె డొండొ తప్పెఎ. మీరు సున్నొమితి రాక్హి మహ్ణియఁమండలెహెఁతతెరి. ఏవి పంగత కుమ్డిలెహెఁ తోంజఆను. సమ్మ ఎంబఅఁ నెంజె డుంమ్క. సిర్హితి అంగ మన్ను. 28ఎల్లెకిఁఎ మీరువ పంగత మణిసియఁకి నీతిగట్టరిలెహెఁ తోంజఆదెరి. కమ్మ, మీ బిత్ర గొడ్హతొల్లె, లగ్గెఎతనితొల్లె నెంజహఁ మంజెరి.
జీసు ఏవరి డొండొతి పాయిఁ తొల్లిఎ వెహ్నయి
(లూకా 11:47-51)
29ఆబలెయ, నియొమిసాస్తురి జాప్నతెరి, పరిసయుఁయఁ, మీరు పంగతరోలెకీఁ బిత్రరోలెకీఁ మన్నతెరి. మింగె డొండొ పిట్టొవిఆఎ. మీరు హాతి ప్రవక్తయఁకి మీరు దొస్పి కిహిమంజెరి, నీతిగట్టరఇఁ మహ్ణియఁమండతక్కి రంఙు రుబ్బిదెరి. 30మాంబు మా పూర్బెతరి కాలొమిత మచ్చిమ ప్రవక్తణి పాయినిఁ కమ్మత ఏవరితొల్లె అండితతొమి ఆఎ ఇంజిహిఁ వెస్సకొడ్డిదెరి 31అస్సులితక్కి మీరు ప్రవక్తయఁని పాయితి బేలితతరి ఇంజిహిఁ మీ ముహెఁ మీరుఎ సాక్కి వెస్సకొడ్డింజరి. 32నీఎఁ మీ పూర్బెతరి దోహొయఁ మీరుఎ రాప్దు. 33“మూర్కొగట్టి, రాచు బేలితతెరి మీరు నరొకొమిటి పిట్టొవిఅయ్యలి ఆడొఒతెరి? 34ఇంజహఁ వెంజు! నాను మీ దరితక్కి ప్రవక్తయఁని, తెల్విగట్టరఇఁ, నియొమిసాస్తురి జాప్నరని పండీజఇఁ. మీరు ఏవరితాణ కొచ్చెకజాణతి పాయితెరి. సిలువత వేతెరి. రొచ్చెక జాణతి మీ యూదుయఁ కూడఆని ప్రాతన టాయుతాణ బడ్గతొల్లె వేనెరి. ఓరొ కొచ్చెకజాణతి నాయుఁటి నాయుఁతక్కి పెరిహిఁ వేనెరి. 35నీతిగట్టసిఆతి హేబెలు కస్సతొల్లె ఆరొమికిహఁ, మీరు మహపురుగుడి, పూజపిండ మద్ది పాయహఁ మెత్హిఁ బరకీయ మీరెఎసి జెకర్యా కస్స పత్తెక ఈ తాడెపురు లెక్కొ నీతిగట్టరి కస్స దోహొ మీ లెక్కొవానె. 36ఏది బర్రెఏ ఈ బేలితరి లెక్కొ వానె ఇంజిహిఁ మీతొల్లె అస్సులిఎ వెస్సీంజఇఁ.
జీసు యెరుసలేముతి జీవునోనయి
(లూకా 13:34,35)
37“యెరుసలేము, యెరుసలేము, ప్రవక్తయఁని పాయితి, మహపురు నీ దరి పండితరఇఁ వల్కతొల్లె ఇరహఁ పాయినతి, కొయ్యు ఏదాని హీపని ఏనిలెహెఁకి ఏదాని మారయఁ డోకి కొడ్డహఁ డుకహఁకొడ్డినె ఎల్లెకీఁ నానువ నీ మీర్కాణి అట్హకొడ్డలి ఇంజిహిఁ సినికిత్తెఎఁ సమ్మ నీను ఒప్పకొడ్డఅతి. 38వెంజు మీ ఇల్లుతి మింగెఎ పాడు పిస్సీజఇఁ. 39నీఎఁటిఎ మీరు ‘ప్రెబు దోరుత వానసి ఆసీర్వాదొమి పడ్నసి సమ్మ’ ఇంజిహిఁ వెహ్ని పత్తెక మీరు నన్నఅఁ సినికియ్యొదెరి ఇంజిహిఁ నాను మీతొల్లె అస్సులిఎ వెస్సీంజఅఁ.”
Currently Selected:
మత్తయి 23: JST25
Highlight
Copy
Compare
Share
Want to have your highlights saved across all your devices? Sign up or sign in
The Jathapu Bible © The Word for the World International and Jathapu Translation Project, Andra Pradesh 2025
