Yelemiya 36
36
Baluku atawafyomea wantu gondwe
1Mwe vui ja ne ja ugholokezi wa Yehoyakimu ng'wana wa Yosia zumbe wa Yuda, Zumbe Mulungu aamghamba Yelemia, 2“Ghua gondwe ugonde mbuli zosheni nikughambilezo kuanduka haja niandusheho kukughambila kwa mbuli ya shi ya Izilaeli na shi ya Yuda na mbali zosheni mwe mishi ya ugholokezi wa Yosia mpaka ivi lelo. 3Ngea wantu wa Yuda wakiiva ntogho zoshe nifanyanyezo kuwaetea, newahituke waeke mbuli zawe mbada. Naimi neniwaushiize ubada wawe na uhuza wawe.”
4Nee Yelemia ahemuitanga Baluku ng'wana wa Nelia. Baluku yohe akagonda mwe gondwe mbuli zoshe ashimoeezo Yelemia, aghambiwezo ni Zumbe Mulungu. 5Vikibinda, Yelemia akamuaghiiza Baluku, akamghambila, “Imi niishungighwe, sikundighwa kuingila mwe nyumba ya Zumbe Mulungu. 6Miya mwe mushi wa mviko wa kufunga, neuite mwe mesho ya bumba ja wantu we mwe nyumba ya Zumbe Mulungu, ukafyome mbuli zosheni ugondiezo, niaghiizwezo ni Zumbe Mulungu. Izo mbuli zoshe neuzifyome vingi mwe mesho ya wantu wa Yuda na wantu woshe waizilewo kulawa kwe mizi yawe. 7Ngea newamvike Zumbe Mulungu yohe neaive mviko wawe, na wantu wosheni newahituke waeke mbuli zawe mbada, kwa kuti Zumbe Mulungu aifanyanye kuwatoa awa wantu kwa maya makai.” 8Kwa ivyoho Baluku ng'wana wa Nelia, akaghoshola mbuli zoshe aaghiizwezo ni mteghanyi Yelemia, akafyoma mbuli za Zumbe Mulungu zigondighwezo mwe ijo gondwe, ndai ya nyumba ya Zumbe Mulungu.
9Mwe vui ja shano ja ugholokezi wa zumbe Yehoyakimu ng'wana wa Yosia zumbe wa Yuda, mwe ng'wezi wa kenda, wantu woshe wa Yelusalemu na wantu watuhu wosheni waizilewo Yelusalemu kuandukia mwe mizi ya Yuda, wakaaghiiza mushi wa kufunga mwe mesho ya Zumbe Mulungu. 10Nee Baluku ahefyoma mbuli zoshe za Yelemia aghambilezo ni Zumbe Mulungu ze mwe jia gondwe mwe mesho ya wantu woshe we mwe nyumba ya Zumbe Mulungu ai mwe chumba cha Gemalia ng'wana wa Shafani mwegonda. Icho chumba nee chii wazu we kenya hehi na zuvi hya ja kuingiila mwe nyumba ya Zumbe Mulungu.
Wagholokezi wa Yuda watafyomewa gondwe
11Mikaya ng'wana wa Gemalia, ng'wezukuue ja Shafani, aheziiva mbuli zoshe za Zumbe Mulungu zifyomighwezo ni Baluku kulawa mwe jia gondwe, 12ateita mwe kaya cha zumbe mwe chumba cha mwegonda, hantu ndiho waiikale wagholokezi woshe. Nee waihaho Elishama mwegonda, Delaya ng'wana wa Shemaya, Elinasani ng'wana wa Akiboli, Gemalia ng'wana wa Shafani, Sedekia ng'wana wa Hanania na wagholokezi watuhu woshe ndiwo waii uko. 13Mikaya akawaghambila mbuli zosheni aivilezo Baluku akiwafyomea wantu kulawa mwe jia gondwe. 14Nee, wagholokezi wakamuaghiiza Yehudi ng'wana wa Nesania, ng'wezukuue ja Shelemia, chezukuue cha Kushi, amghambile Baluku aghue jia gondwe afyomeejo wantu. Kwa ivyoho, Baluku ng'wana wa Nelia, akajighua jia gondwe, akawaighaiya. 15Wohe wakamghamba, “Taaombeza uikale shi utifyomee.” Baluku akawafyomea kunu wakimtegheleza. 16Waheiva izo mbuli zoshe, wakaweana kwa wogha. Wakamghamba Baluku, “Tikundighwa tikamghambile zumbe izi mbuli zoshe.” 17Nee wahemuuza Baluku, “Tee tighambile, udahie zeze kugonda mbuli izi zoshe? Hambu Yelemia nee akushimoezeye ukazigonda?”
18Baluku akawahisa, “Yelemia nee akinishimoeza naimi nee nikizigonda kwa kaamu ya wino mwe iji gondwe.”
19Nee waja wagholokezi wahemghambila Baluku, “Iwe na Yelemia hitai mukakifishe, mntu yoyoshe ashezataila hantu ndiho mukifishe.”
Zumbe Yehoyakimu atajioka gondwe
20Waja wagholokezi wahejiika jia gondwe mwe chumba cha Elishama mwegonda, wakamtongela zumbe mwe ukomea, wakamuukuiya mbuli zoshe. 21Vikibinda, zumbe akamuaghiiza Yehudi aite kwejighua jia gondwe. Yehudi akajighua mwe chumba cha Elishama mwegonda, akamfyomea zumbe na wagholokezi woshe ndiwo waigholoke hehi naye. 22Nee ni ng'wezi wa kenda mishi ya mpeho, zumbe nee ai mwe kitaa chakwe acheikala mwe mishi ya mpeho akiotea moto we mwe nyungu. 23Vikaituka kuti, Yehudi akibindiiza kufyoma makaatasi matatu hambu mane ivi ya ijo gondwe, zumbe atayatatua ayo makaatasi kwa tuni na kuyaoka mwe moto. Akahimba kughoshola ivyoho mpaka gondwe joshe jikahya. 24Miya, zumbe na waambizi wakwe woshe waheziiva zia mbuli zoshe, hewaivile wogha wala hewatatue shuke zawe kwa usoyoyo. 25Hang'we na kuti, Elinasani, Delaya na Gemalia waamkengeeza zumbe ashejioke ijo gondwe, miya zumbe hawategheleze. 26Miya zumbe akamghamba Yelameeli ng'wanae hang'we na Selaya ng'wana wa Azilieli na Shelemia ng'wana wa Abudeeli, wamgwiye Baluku agondieye ijo gondwe na mteghanyi Yelemia. Miya Zumbe Mulungu nee aiwafishize.
Yelemia atagonda gondwe tuhu
27Zumbe Yehoyakimu ahebinda kuoka jia gondwe jigondighwejo ni Baluku kwa mbuli ashimoezwezo ni Yelemia, Zumbe Mulungu akamghambila Yelemia kuti, 28aghue gondwe tuhu, agonde mbuli zoshe ndizo zii mwe jia gondwe ja boosi jaokwajo ni Yehoyakimu, zumbe wa Yuda. 29Na uyo Yehoyakimu zumbe wa Yuda, amghambile kuti Zumbe Mulungu aghamba ivi, “Iwe uzaoka ijo gondwe na kuuza kuti kwai Yelemia azagonda kuti zumbe wa Babeli neaize kweibana inu shi na kuwakoma wantu na vizama? 30Kwa ivyoho, imi Zumbe Mulungu naghamba kuti kwa mbuli ya Yehoyakimu zumbe wa Yuda, ye heaituke na mvyawa mweikaila kiti cha uzumbe cha Daudi, na maiti yakwe neiyashighwe na se itoighwe ni zua mshii na mpeho nakio. 31Nenimtoe ye na wavyawa wakwe hang'we na waambizi wakwe kwa mbuli ya uhuza wawe. Neniwaetee ntogho wo wenye na wantu woshe weikala Yelusalemu hang'we na wantu woshe wa Yuda, nilongiewo kwa mbuli yawe kwa kuti hewanitegheleze.”
32Vikibinda, Yelemia akaghua gondwe tuhu jishigondighwejo kintu chochoshe, akajimnka Baluku ng'wana wa Nelia, akagonda umo mbuli zoshe ashimoezwezo ni Yelemia ndizo zii mwe jia gondwe ja boosi jaokwajo ni Yehoyakimu zumbe wa Yuda. Na mbuli ntuhu zeitiana na izo zikaongezwa umo mwe ijo gondwe tuhu.
Currently Selected:
Yelemiya 36: SHBV
Highlight
Share
Copy
Want to have your highlights saved across all your devices? Sign up or sign in
The Old Testament in Shambala, @The Word for The World International, and Shambala Language translation. All rights reserved.
