मर्कुस 11
11
यरुसलेमलं येसु राजा मान्टि उपसिनाव
मत्ती २१:१-११; लुका १९:२९-३८; युहन्ना १२:१२-१५
1येसुरं यरुसलेम सहरलो ओछ्योका जैतुन डान्डा लेवका बेठफागे सोनो बेठानिया वार्ने पोकं याकेरिव, होकाम येसुये नेबऱ्याङ उसिसनिलाई ऐ वार्डे उपरिःङोनि, 2“जिन ङाःङ लेव नाङखारलं नाचिन होल जेनाज़्याकं टोबो माडाहिसिव गडाहालो ओपाठालाई डैने जेले। होलाई पलाडे आकं रैचीन। 3कोइराई ‘आव कडि जेझैज़्याव?’ हैयावार्खेभने, प्रभुलाई आव चाहिज़्या, प्रभुये चानोज़ सवोल्नेले वार्डे हैडाचिनरं।”
4होकाम नोनि नेनाव, टोबो येमका ज़ीःम छ्योकं झलायेम ङाःकं नो माडाहिसिव गडाहा पाठा सुर्सिव नेडोयो, होकामटानि नोलाई नेपलाव। 5होका च्याङसिव मीराईलाम कोइ कोइराई नोनिलाई यापजोयोरं, “आव माडाहिसिव गडाहालाई पलाडे कडि जेझैज़्याव?”
6नोनि येसुये ओपोयोनि स्यावज़ हैनेडोवरं, होकामटानि नो मीराई नोनिलाई नाव यायोवरं। 7नोनि गडाहालाई येसु लेवकं नेरोयो, होकाम याक्वारं हाइडे गडाहा तर्ट याटानो, होकाम येसु होटं उचुङो। 8भ्याबिछुराई याक्वा सोनो कोइ-कोइराई बाङलाम छि ख्वान्डे रैडे येम्ल याटानो। 9होकाम येसुलो ओङाः उछिन बानेरं ऐ वार्डे याकिःव, “होसन्ना येसु के! रेङो ची, जो स्यान्टैराई भन्डा घ्योव प्रभुलो उमिन्ट रा! 10रेङो ओटाकं गेपुर्खा डाउडलो राने ओराज्य, बनै घ्योव स्वर्गटं होसन्ना!”
11येसु यरुसलेमलं राडे प्रार्ठना डोने ज़ीःमलं उपसिव। होकाम येसुये होकाला स्यान्टै बस्तरं ओरोःङो पाना रिःम्डे कुबुला ओटावये बार जना उसिसरासं बेठानिया वार्ने नाङखारडे यानाव।
येसुये डीलो उसिङलाई सराप ओयोव
मत्ती २१:१२-१७,१८-२१; लुका १९:४५-४७; युहन्ना २:१३-१६
12ओपराटि येसु सोनो उसिसरं बेठानिया नाङखारलाम यावोलकं येसु ओकंरेव। 13होकाम टाडाङाम ओख्या लेव डीलो उसिङ रःङडे होटं ओसै मलिज़्या वार्डे येसु सिङ खङकं ओनाव, होकाम हो सिङटं ओख्याकाम कडिज़ मालेव, नो बेलाकं डी सैने बेला मालेव।
14होकाम येसुये हो सिङ्लाई, “आबो खर्कज़ मीराई नसै टाज़्योरंकं।” वार्डे हैओडोव उसिसराई याठोयो।
येसु प्रार्ठना डोने ज़ीःमलं ओनाव
15होकाम यरुसलेमलं केडे येसु प्रार्ठना डोने ज़ीःमलं उपसिव, होकाम होलं सामान लःङने सोनो येनेरंलाई होलाम उपुलोयोरं पैसा टोःनेराई याटेबंल सोनो परिवा येनेरं चुङसिडे यालिज़्याव पिर्कारं पल्टैडे ओयोवरं। 16येसुये प्रार्ठना डोने ज़ीःमलाम काङ्कालाई पनि कडि सामानज़ लाङो मायोवरंये। 17होकाम येसुये ऐलेडे ओपोयोरं, “कडा ‘ङा ङाज़ीःम स्यान्टै डेसराई यालागिटं प्रार्ठनालो ज़ीःम टानेले वार्डे सर्सिव माले?’ बुरु जे के आव पोलाई डाङ्कुरं याडुप्सिने पो ची झैडे जेनै।”
18हो रोः ठैडे मुख्या सेवा डोने मीरं सोनो सास्त्रटा न्याम पैने मीरं येसुलाई कैजैडे सैःने वार्डे उपाय याखिमरिव। कडालेकं होरं येसुसं छेरंये, कडालेकं माहुल्ये मीराई येसुये ओपोयोरं ठैडे अचम्ब टाडे यालिज़्याव।
19रीःम्डे येसु सोनो उसिसरं सहरलाम टङडे यानाव।
ठोङो डीलो उसिङटाम पैसिने रोः
मत्ती २१:१८-२१
20छकाल्ने फरि येसु सोनो उसिसरं हो येमज़ यावोलज़्याकं डीलो उसिङलाई ओजरालामज़ राःङो यारोःङो। 21होकाम पत्रुसये होछ्यामका रोः ओचेटोयो, होकामटानि पत्रुसये येसुलाई हैओडोव, “रब्बी नङ सराप झाडे नोयोव डीलो उसिङके राःङडे ची ले।”
22येसुये नोरंलाई जबाफ याडे हैओडोवरं, “परमेस्वरटं बिस्वास नैच्यो 23डस्साज़ ङा जेलाई हैङाडाच्यो, कोइये यायुङलं सङ्खा माडाडे पाङसिव रोः पुरा टाये वार्डे बिस्वास डोडे आव डान्डा चिसिडे समन्डरलं नान हैयाडोरंखे भने नोलो ओलागिटं नैटावज़ टानेले। 24हैजैडेज़ ङा जेलाई हैङाडाच्यो, जे जेप्रार्ठनालं जो जिनीःनी पनि हो गेडैडुखे वार्डे बिस्वास डाच्यो, होकाम हो जे डैने जेले। 25जे प्रार्ठना डोने जेच्याङसिव बेलाकं, कोइ मीरासं माचाव रोः यालेखे भने छेमा याच्योरं, कडावार्क स्वर्गटा लिज़्याव जेबाबुये पनि जेसंका माचाव रोः छेमा ओडाच्योवकं 26मानि छेमा जेमयोखे भने, स्वर्गटा लेने जेपरमेस्वरये पनि जेसंका अपराडरं छेमा याने माले।”#१1:२६ कोइ कुइये सर्सिव कितापटं आव सर्सिव माले#मत्ती ६:१४-१५
येसुलो ओअडिकार बारेलं प्रस्न
मत्ती २१:२३-२७; लुका २०:१-८
27येसुरं फरि यरुसलेमला प्रार्ठना डोने ज़ीःमलं राडे आडे होडे ओबारिज़्याकं मुख्या सेवा डोने मीरं, सास्त्रटा न्याम पैने मीरं, सोनो यहुडी नेतारं, येसु लेवकं याराव। 28होराई येसुलाई यापजोयो, “कडि अडिकारये नङ आव येःनरं नोडोज़्याव? आव येःनरं डोने अडिकार नङलाई काङ्काये ओयानो?”
29येसुये नोरंलाई हैओडोवरं, “ङा जेलाई टोबो रोः ङापजैच्यो, हो रोःलो ओजबाफ याङच्यो, होकाम कडि अडिकारये ङा आव येःन ङाडोज़्याव, ङा जेलाई हैङाडाच्यो। 30युहन्नाये ओयोव बप्तिस्मा स्वर्गटाम सै मीराई लेवङाम, ङालाई हैगडाङच्योके।”
31होकाम नोरं ऐवार्डे या-याज़ यापाङो, “‘स्वर्गटाम’ वार्ने याटाखे भने ‘जे कडा युहन्नालाई बिस्वास जेमडा’ ऐवार्ने ले। 32‘मीराई लेवङाम’ हैवार्ने वार्क” नोरं होला मीरासं याछेव। कडालेकं स्यान्टैरं युहन्नालाई डस्साका अगमबक्ता वार्डे बिस्वास डोरंये। 33होकाम होराई येसुलाई हैयाडोव, “गेलाई ठा माले।”
येसुये होरंलाई हैओडोवरं, “ङा पनि कडि अडिकारये आव येःन ङाडोज़्या हो ङा जेलाई हैङाम्डाच्यो।”
Currently Selected:
मर्कुस 11: NTWMK26
Highlight
Copy
Compare
Share
Want to have your highlights saved across all your devices? Sign up or sign in
The New Testament Books in Wale Magar Kham Language © The Word for the World International and Wale Magar Kham Translation Project, Nepal, 2026
