मत्ती 8
8
टोबो कु:रि ओसोमो
मर्कुस १:४०-४५; लुका ५:१२-१६
1येसु डान्डाटाम ओझरिव मान्त्राज़ भ्या माहुले मीरं उझिन्ट यानाव। 2टोबो कु:रि ओललेवकं ओराव होकाम येसुलो ओङा:कं उघुन्डा टिकिसिडे ऐओवारो, “ए प्रभु, नइछ्या यालेखे भने ङालाई नससम्सङ्डु।” 3येसुये नोलाई क्योडे सोचैडे ऐओडोव, “ङा इछ्या ङाडो नङ गसमङन्के।” होमान्त्राज़ नोलो ओको:रो ओसोमो। 4होकाम येसुये नो मीलाई ऐओडोव, “काङ्कालाईज़ हैटाडोरं। नङ नाडे सेवा डोने मीरं लेवङं सतन्सिनान, होकाम मोसाये ओअरोयो अनसार भेटी चरै, होकाम मीराई यार:ङकं टोबो प्रमान गटाकं।”#लेबी १४:१-३२
रोमी सिफाइँराई याहाकिमलो उबिस्वास
लुका ७:१-१०
5येसु कफर्नहुमलं ओकेराकं रोमी सिफाइँराई टोबो याहाकिम येसु लेवकं राडे ऐवार्डे बिन्ती ओडोव, 6“ए प्रभु ङानौकर नसा सिने रोगोये आढा ओक्याङ सिडे बनै डुखं डैडे ज़ी:मकं पोटं गलङडे ले।” 7येसुये नोलाई हैओडोव, “ङा राडे नोलाई ससम्ने ङाले।” 8होकाम याहाकिमये हैओवारो, “ए प्रभु नङलाई ङाज़ी:मकं खुल्ने हाडङ्का ङा ङाम्ले। हैनि पनि नो गसमकं वार्डेया मान्त्रा हैवार्ङन, ङानौकर सम्नेले। 9कडालेकं ङा पनि ङासे:रराई याअढिकार ङाठैये, ङा ङाअढिकार ङासिफाइँराई ठैरंये। ङा टोबोलाई ‘गराङन्के’ ङाडोखे भने हो नाये, होसोनो छुटंलाई ‘गरा:ङनके’ ङाडोकं हो राये। ङानौकरलाई ‘ऐ झै’ ङाडोकं नोये होज़ झोयोये।” 10नो हाकिमलो ओरो: ठैडे येसु अचम्ब टाडे उझिन्ट रानेरंलाई ऐओडोवरं, “डस्साज़ ङा जेलाई हैङाडाच्यो, इस्राएललं पनि आल्लु घ्योव बिस्वास ङारो:ङो माले। 11ङा जेलाई हैङाडाच्योज़्या, पुर्ब सोनो पोछ्योङङाम बनै भ्या मीरं राने लेरं, होकाम अब्राहाम, इसहाक सोनो याकुबरासं स्वर्गटा राज्याला भट्यारलं चुङनेलेरं। 12होकाम राज्यालो ओसन्तानरं पाखाङ अन्ड्यारोलं ख्यासिनेलेरं। नलं मीरं घर्डे याहाज़ कट्र सपिने लेरं।” 13होकाम येसुये हाकिमलाई हैओडोव, “गराङन्के नङ जो स्यानाव बिस्वास नडोव हैटावज़ ओटाकं।” होकाम हो बेलाकंज़ नोलो ओनौकर ओसोमो।
येसुये बनै भ्या ठलिव मीरं ओससोमोरं
मर्कुस १:२९-३४; लुका ४:३८-४१
14येसु पत्रुसलो उज़ी:मकं ओराकं नोलो उमैज्यु बनै ओजोरो राडे गलङडे उलिज़्याव ओरो:ङो। 15येसुये नो मेमालो उकुइटं छुडे ओयोव, होमान्त्राज़ नो मेमालाई ओजोरोये ओरा:व। होकाम नो मेमा सोडे येसुलो ओसेवा ओडोव। 16नो छ्याम रि:म्डे मीराई माचाव आत्माये ओडापो बनै भ्या मीरंलाई यारोयोरं। होकाम येसुये पाङडेज़ हो आत्मारंलाई ओहायोरं, खाडंङ ठलिव लेवरं हो भरि स्यान्टैलाई ओससोमोरं। 17यसैया अगमबक्ताये ओपाङो अगमबानी पुरा टाने लागिटंज़ आव स्यान्टै ओटाव, “नोये ओल्ज़ गेडुखंरं लाङडे गेजोरोलाम ससम्नेलो।”#यसैया ५३:४
येसुलो उझिन्ट काङ्का बाडु
लुका ९:५७-६२
18येसुये ओछ्योकं आसै होसैयालं बनै भ्या माहुले मीरं ओरो:ङोर, होकाम येसुये डहं होपट नाव उपरि:ङोरं। 19टोबो न्याम पैने मी येसु लेवकं ओराव, होकाम येसुलाई हैओडोव, “गुरबा नङ जोङं-जोङं नना, ङा पनि नझिन-नझिन ङारा।” 20येसुये नो मीलाई हैओडोव, “स्यालाराई यागारले नमटा बाज़ाराई याज़ी:मले मानवालो ओज़ालो ओङै: अडैने पो पनि माले।” 21येसुलो उसिसरंलाम छुटं टोबोये येसुलाई हैओडोव, “प्रभु ङा ङा:डे ङाबाबुलाई ङागाडिना होकाम ङाराके।” 22येसुये नो मीलाई हैओडोव, “ङाछिन्ट गराङन्के, सिवराईज़ यामोरो: ओगाडिरंकं।”
येसुये घुइँकालाई ओठकनोयो
मर्कुस ४:३४-४१; लुका ८:२२-२५
23येसु डोङ्गाटं उपुलुव, होकाम येसुलो उसिसरं येसुलो उझिन्ट यानाव। 24ओमल्यासिनी नो डहलं घ्योव घुइँका राडे रि:लो ओछल्काये डोङ्गालाई राल्ने ओपानो। येसु डोङ्गाटं ऐस्याडे ङ:ल्डे उलिज़्याव। 25उसिसरं राडे येसुलाई ऐवार्डे यासोचोयो, “गे गिसिरिडुखे प्रभु! गेलाई जोगैसि।” 26येसुये नोरंलाई हैओडोवरं, “जिबिस्वास टिगिडा लेव मीरं, जे कडाने जेछेज़्याव?” होकाम च्याङसिडे येसुये बतास सोनो डहंलाई ओहप्कोयो, होकाम हैटावका घुँइका च्यामचिम ओटाव। 27“आव खैटाव मी, कडालेकं घुइँकाये सोनो डहंये पनि आवलो ओपाङ याठैज़्याव लेव” वार्डे नो मीरं बनै छक्कज़ याटाव।
माचाव आत्माये ओक्यो:व नेम्लो मीनि नेसोमो
मर्कुस ५:१-२०; लुका ८:२६-३६
28येसु डह होपंटं गडरिनिराई यापोलं ओकेरिव होकाम खाडर लेव पोलाग्यान्ट ओराज़्याकं माचाव आत्माये ओडापो नेम्लो मीनि येसुसं नेडैसिव। नोनि एटाव छे-छे ङप्सिव लेवनि, काङ्का मीरं पनि नो येम यामबाज़्याव। 29नोनि ऐ लेडे निकि:वो, “ए परमेस्वरलो ओज़ा, नङ गिनसं कडि समन्ड उलिज़्याव? गिन गेसमय ओमयोडेज़ नङ गिनलाई डुखं याने आकं नराज़्याव?” 30नोरं यालिज़्यावकाम टटा:याङं घ्योव टबगाल वोरं यालाज़्याव। 31होकाम माचाव आत्माराई येसुलाई ऐ वार्डे बिन्ती याडोव, “नङ गेलाई आलाम नपुलैसिखे भने, गेलाई वोराई याबगाललं परि:ङसि।” 32होकाम येसुये नोरंलाई हैओडोवरं, “गनाच्योके” होकाम नोरं पुलुडे वोराई याज्युङलं यापसिव, होकाम वोराई स्यान्टै याबगाल उरालाटं डहडे पावग्यान ज़ो:वग्यान डाडे रि:लं बुडिडे यासिव। 33नो वो छाने मीरं ढोङ्डे सहरलं नाडे वोरंलाई सोनो माचाव आत्माये ओडापो मीनिलाई कै ओटाव वार्डे स्यान्टैरंलाई हैयाडोवरं। 34होकाम आव रो: याठोयो पानाज़ स्यान्टै सहरला मी भरि येसुलाई र:ङने वुडुडु च्याङडे याराव, होकाम येसुलाई र:ङडे नो मीराई गिलिज़्याव पोलाम गराङन्के वार्डे बिन्ती याडोव।
Currently Selected:
मत्ती 8: NTWMK25
Highlight
Share
Compare
Copy
Want to have your highlights saved across all your devices? Sign up or sign in
The New Testament Books in Wale Magar Kham Language © The Word for the World International and Wale Magar Kham Translation Project, Nepal, 2025
