मत्ती 4

बनलं येसुलो ओपरिछ्या

मर्कुस १:१२-१३; लुका ४:१-१३

1होकाम सैतानये येसुलो ओपरिछ्या गोडोवकं वार्डे चोखो आत्माये येसुलाई कडिज़ मालेव बनलं ओलाङो। 2येसुये चालीस डिन समं ला री उपासिडे ओखेमो पाना करेव उखिव। 3होकाम परिछ्या डोनेये येसु लेवकं राडे हैओडोव, “नङ परमेस्वरलो ओज़ा नटाखिन आव लुङरंलाई बरे ओटारंकं वार्डे हैडोरं।” 4होकाम येसुये जुवाप ओयोव, “सर्सिव ले, ‘मी बरेयेयाज़ माङ्क, बुरु परमेस्वरलो ओया:लाम पुलुव स्यान्टै टोबो-टोबो बचनये बान्चिये।’”#न्याम ८:३ 5होकाम सैतानये येसुलाई चोखो सहर यरुसलेमलं लाङडे प्रार्ठना डोने ज़ी:मलो उढुरिटं ओलाङो, 6होकाम हैओडोव, “नङ डस्साज़ परमेस्वरलो ओज़ा नटाखिन आटाम मेलं फाल गझा के कडालेकं सास्त्रटं एटाव सर्सिवले, ‘परमेस्वरये नलागिटं स्वर्गटा कटंवालरंलाई आग्या यानेले, होकाम होराई नखङ लुङटं टासनासिकं वार्डे नङलाई याकुइये अड्डैनेलेरं।’”#भजनरं ९१:११-१२ 7येसुये नोलाई हैओडोव, “ऐटाव पनि सर्सिव ले, ‘नङ स्यान्टैराई भन्डा घ्योव प्रभु नपरमेस्वरलो उपरिछ्या टाडो।’”#न्याम ६:१६ 8फरि सैतानये येसुलाई टोबो झेनो डान्डाटं लाङडे प्रिठीबीला स्यान्टै राज्या सोनो होला ओमहिमा लेव बस्तरं येसुलाई ओसटन्ड्योव। 9होकाम येसुलाई हैओडोव, “नङ ङालाई फुलुप्सिडे ढो नडाङखे भने, ङा आव स्यान्टै नङलाई यानेङाले।” 10होकाम येसुये सैतानलाई हैओडोव, “सैतान, नङ होडे नान! कडालेकं सर्सिवले, ‘नङ स्यान्टैराई भन्डा घ्योव प्रभु नपरमेस्वरलाई ढो डो, होकाम होलो याज़ ओसेवा डो।’”#न्याम ६:१३ 11होकाम सैतानये येसुलाई रा:डे ओनाव होकाम स्वर्गटा कटंवालराई राडे येसुलो ओसेवा याडोव।

गालीललं येसुलो ओप्रचार

मर्कुस १:१४-१५; लुका ४:१४-१५

12युहन्ना झ्याललं उपरिव वार्ने रो: ठैडे येसु गालीलडे ओनाव#मत्ती १४:३; मर्कुस ६:१७; लुका ३:१९-२०, 13होकाम नोये नासरत रा:डे कफर्नहुमलं नाडे होलं ओलेव।#युहन्ना २:१२ आव सहर जबुलुन सोनो नप्तालीराई याछेत्रलं, गालील डहलो ओगोराटं ले। 14यसैया अगमबक्ताये ओपाङो पाङ ऐझैडे पुरा ओटाव, 15“यर्डन भै होपंटं डह लेवडे नाने येमलं लेव जबुलुन सोनो नप्ताली बङसला मीराई याछेत्र सोनो गालीललं लेने यहुडीरंकाम उरुका मीरं! 16अन्ड्यारोलं लेनेराई घ्योव उज्यालो यारो:ङो। सिने काललो अन्ड्यारो ओपोलं लेनेरंलाई उज्यालो ओटाव।”#यसैया ९:१-२ 17हो बेलाकाम येसुये ऐवार्डे प्रचार ओडोव, “जेपापलाम वोल्च्यो, कडालेकं स्वर्गटा राज्या नजिकं केरिडे ले।”

येसुलो सुरुला उसिसरं

मर्कुस १:१६-२०; लुका ५:१-११

18गालील डहलो ओगोराटं ओबाज़्याकं येसुये पत्रुस याडोज़्याव सिमोन सोनो ओभाइ अन्ड्रियाससं, नेबऱ्याङलाई डहलं जाल नेख्याज़्याव ओरो:ङोनि। होनि ङा: क्यो:ने मीनि लेवनि। 19येसुये होनिलाई हैओडोवनि, “ङाछिन्ट राचिन, होकाम ङा जिनलाई मीरंलाई क्यो:ने ङाझैचिन।” 20होकाम होमान्त्राज़ नेजालरं रा:डे येसुलो उझिन्ट नेनाव। 21येसु नकाम ओनाज़्याकं छुटं डुइभाइनि, याकुब सोनो ओभाइ युहन्नालाई नेबाबु जब्डियासं डोङ्गाटं नेजाल नेबनैज़्याव र:ङडे, येसुये होनिलाई उखुलोनि। 22होमान्त्राज़ नेबाबुलाई डोङ्गाटंज़ ख्यानैडे येसुलो उझिन्ट नेनाव।

गालीललं येसुलो उसिछ्या सोनो मीरंलाई ओससोमोरं

लुका ६:१७-१९

23होकाम येसुये यहुडीरं याडुप्सिने ज़ी:मयालं पोयोग्यान, स्वर्ग राज्याला चाव सोर मीरंलाई सठोयोग्यान, किसिम-किसिमला रोगो सोनो कम्जोर लेवरंलाई ससोमोग्यान स्यान्टै गालील भरि ओबारिव। 24सिरिया डेस भरि येसुये ओडोव ये:नलो ओरो: ओफैलिव, होकाम भान्टि-भान्टिला रोगो सोनो डुखंये ओसहटोयोरं, ज़्या:ये ओडापोरं, पुलो मीरं, सोनो याखंङ, याकुइ स्याङोरं स्यान्टैरंलाई येसु लेवकं यारोयोरं। येसुये हो स्यान्टैरंलाई ओससोमोरं। 25होकाम गालील, डेकापोलिस, यरुसलेम, यहुडिया सोनो यर्डन भै होपंटाम बनै भ्या मीरं येसुलो उझिन्ट याराव।

Currently Selected:

मत्ती 4: NTWMK25

Highlight

Copy