मत्ती 15

चाल चलन बारेलं येसुये ओपोयो

मर्कुस ७:१-१३

1यरुसलेमलाम राव फरिसीरं सोनो न्याम पैने मीरं येसु लेवकं राडे हैयाडोव, 2“नसिसराई पुर्खाराई याचलन कडा मामानिरं? कडालेकं नसिसरं काङ ज़्याने बेलाकं याकुई माहुरसीरंये।” 3येसुये नोरंलाई हैओडोवरं, “जे पनि कडा जेरितिठिति मानिडे परमेस्वरलो ओआग्या जेममानिज़्यावखेने? 4कडालेकं परमेस्वरये हैवार्डेले, ‘जेबाबु ज्यामालाई मान याच्यो, होकाम बाबु सोनो आमालो उबिरोडलं माचाव रो: जोये पाङ, होलाई सो:योज़ परिये।’#बाने २०:१२; न्याम ५:१६ 5हैटानि पनि जे हैजेवार्ये, जोये ओबाबु सोनो वामालाई हैडोवये, ‘नङ ङा लेवङाम जो डोयो परिने, हो परमेस्वरलाई भेटी चरैसिव ले।’ 6जे नो मीलाई नबाबुनि नामानिलाई नेमान नमडोनि टा वार्डे हैजेडोये। ऐझैडे जे पुरानो चालचलन डोडे परमेस्वरलो ओपाङलाई फाल्टु जेझैज़्या। 7ए कैफटिरं, यसैयाये जेबारेलं ठीकंज़ अगमबानी यापाङ, 8‘आव मीराई ङालाई याया:ये याज़ मान याङरं, हैनि पनि नोराई यायुङ ङालेवकाम टाडा ले।#यसैया २९:१३ 9नोराई याया:ये याज़ ङालाई सरैसङज़्यारं, हैनि पनि नोराई यापैज़्याव सिछ्यारं के मीराई यापोयोरं न्याम याज़ ची।’”

मीलाई माचाव झैने बस्त

मर्कुस ७:१४-२३

10येसुये मीरंलाई ओल लेवकं उखुलोरं होकाम हो मीरंलाई हैओडोवरं, “ठैच्यो होकाम बुझिच्यो। 11जो या:लाम पसिये, होये मीलाई माचाव माझोयो। बुरु जो या:लाम पाखाडे पुलुये, होये मीलाई माचाव झोयो।” 12होकाम उसिसरं होकं राडे येसुलाई हैयाडोव, “नङलाई ठा माले, फरिसीरं नपाङ ठैडे माचाव माङप्सिरंडोरो?” 13होकाम येसुये हैओडोवरं, “स्वर्गटा लिज़्याव ङाबाबुये ओमवाव बिरवारं स्यान्टै चिसिने ले। 14नोरंलाई गाइगुइ टाडाच्योरं, नोरं अन्डला अगंवारं ची। अन्डलाये अन्डलालाई याबोयोखे भने नेबऱ्याङज़ खाल्टालं टे:निये।” 15पत्रुसये येसुलाई हैओडोव, “गेलाई आव सात्रोलो ओमाने हैगडासिके।” 16येसुये हैओडोवरं, “जे अजं पनि माबुझिवज़ जिलिज़्याव रो? 17कडा जेलाई ठा माले? या:ल जो नाये हो भुन्डिलं नाये, होकाम पाखाडे पुलुये। 18होकाम जो रो: यालाम पुलुये, हो युङलाम पुलुये, होयेज़ मीलाई माचाव झोयोये। 19कडालेकं युङलामज़ माचाव बिचार, हत्या, कोबा मेमारासं बाने, ब्यभिचार, कुने, झुठ गोहाई सोनो उरुलाई माचाव डोने रो:रं पाखाडे पुलुये। 20एटाव रो:येज़ मीलाई माचाव झोयोये। हैजैडे कुइ माहुर्डे ज़्यानेये होलाई माचाव माझोयो।”

कनानी मेमालो उबिस्वास

मर्कुस ७:२४-३०

21होकाम येसु पुलुडे टुरोस सोनो सीडोनला पो यालं ओनाव। 22हो पो यालं टोबो कनानी मेमा राडे कि:डे हैओवारो, “ए प्रभु डाउडलो ओसन्तान ङालाई डया डाङ। ङाज़ालाई ज़्या:ये डाप्डेनोयो।” 23येसुये हो मेमालाई गाइगुइज़ माडोवये। येसुलो स्यान्टै उसिसरं येसु लेवकं राडे हैयाडोव, “आव मेमालाई गपरि:ङके, कडालेकं नो मेमा कि:ये-कि:ये गिझिन्ट राज़्या।” 24येसुये हैओवारो, “ङा इस्राएलला मा:व भेडाराई यालागिटं ङाराव ची।” 25होकाम हो मेमा येसुलो ओङा:कं फुलुप्सिडे हैओवारो, “ए प्रभु ङालाई गैसंङ।” 26येसुये हैओडोव, “बाल्खराई याबरे का:रंलाई ख्याड्याने चाव माटाये।” 27हो मेमाये हैओडोव, “हो के होज़ हैनि पनि ओसाहुलो ओटेबलटाम टे:व बरेलो उकुत्रारं के का:राई पनि ज़्योरंयेसा।” 28होकाम येसुये हो मेमालाई हैओडोव, “नबिस्वास घ्योव ओलेवलेव। नसुन्चिव स्यानावज़ ओटाकं।” होमान्त्राज़ हो मेमालो मेमा ओज़ा ओसोमो।

येसुये बनै भ्या मीरंलाई ओससोमोरं

29येसु होलाम पुलुडे गालील डहलो ओगोराटाग्यान नाडे, डान्डाटं पुलुडे उचुङो। 30होकाम बनै माहुले मीरं येसु लेवकं याराव, होकाम हो माहुले मीराई यासं यारोयो लङ्गरा, लुला, अन्डला, लाटा सोनो बनै भ्या रोगीरंलाई येसुलो ओङा:कं यानोयोरं, होकाम येसुये होरंलाई ससम्डे ओयोवरं, 31होला लाटारं यापाङो, लुला लङ्गरारं याबाव होसोनो अन्डलाराई यामि ओफैसिव र:ङडे मीरं छक्क याटाव, होकाम नोराई इस्राएलला परमेस्वरलो ओमहिमा याडोव।

येसुये चारहजाररंलाई ओसया:वरं

मर्कुस ८:१-१०

32होकाम येसुये उसिसरंलाई ओल लेवकं खुल्डे हैओडोवरं, “ङा आव मीरंलाई ङायुङ नाज़्या कडालेकं आवरं ङासं यालेव आछिम सोङला याटाडु, आवरासं याज़्याने ज़्याव कडिज़ माले। आवरंलाई ङा करेसं ङाम्परि:ङरं। मानिके आवरं येमटंज़ बेहोस टाडे ढलिरंके।” 33होकाम येसुलाई उसिसराई हैयाडोव, “ऐटाव कडिज़ मालेव बनलं आडङ मीराई याज़्योने बरे काङाम रैने?” 34येसुये उसिसरंलाई हैओडोवरं, “जेसं खागोटा बरे लिज़्या?” होराई हैयाडोव, “सात गोटा बरे सोनो नेबऱ्यायाँ आलिलिज़ा ङा: लिज़्या।” 35येसुये माहुले मीरंलाई नामलं चुङने आग्या ओयोवरं। 36येसुये हो सात गोटा बरे सोनो ङा: रैडे ढन्याबाड ओयोव पान्त्रा के:डे उसिसरंलाई ओयोवरं। होकाम उसिसराई मीरंलाई यायोवरं। 37स्यान्टै मीरं ज़्याडे यावाङो। होकाम ये:लो उकुत्रारं सात फुङ्गा याडुपो। 38मेमा सोनो छोऱ्या लुज़ारं माझाडे चार हजार खेपारं लेवरं। 39होकाम माहुले मीरंलाई परि:ङरंडे येसु डोङ्गाटं पलुडे मगाडान छेत्रडे ओनाव।

Currently Selected:

मत्ती 15: NTWMK25

Highlight

Copy