YouVersion Logo
Search Icon

प्रेरित 8

8
1नोलाई सै:नेरासं साउल पनि सामेल लेव।
मन्डलीलाई साउलये ओसहटोयो
होछ्यामज़ यरुसलेमला लेव मन्डलीलं बनै घ्योव सतावट ओटाव, होकाम प्रेरितरंकाम यहुडीरंकाम उरुका मीरं स्यान्टै यहुडिया सोनो सामरियाला पोयाल तत्तर बित्तर टाडे यानाव। 2होला लेव बिस्वासिराई स्तिफनसलाई लाङडे यागाडिनाव, होकाम नोरं बनै याघोरो। 3हैनि पनि साउलये मन्डलीरंलाई याज़ी:म-याज़ी:मलं नाडे नास ओझैज़्यावरं। नोये खेपा मेमा स्यान्टैरंलाई से:ङ्‌डे झ्यालखानालं ओझाज़्यावरं।
सामरियालं चाव सोर प्रचार
4होकाम हो तत्तर बित्तर टाव बिस्वासिराई चार कोनाडे बचन यासठैनाव। 5फिलिपय सामरियाला टोबो सहरलं नाडे होला मीरंलाई ख्रीस्टलो ओबारेलं प्रचार ओडोव। 6फिलिपय ओपाङो बचन ठैडे सोनो नोये ओडोव चिन्नरं र:ङडे, बनै भ्या मीरं टोबो युङ्का टाडे ओपाङ याठोयो। 7कडालेकं बनै भ्या मीराई याक्याङटाम ज़्यारं कि:ये-कि:ये यापुलुव, होकाम बनै भ्या याखङ याकुइ मालागिव रोगीरं सोनो लङगरार पनि यासोमो। 8हैजैडे नो सहरलं मीरं बनै आनन्डसं यालेव।
9नलं टोबो सिमोन उमिन लेव मि लेव। नोये जाडु सटन्डे ङाडेकामज़ सामरियाला मीरंलाई बनै अचम्ब झैडे ओनैज़्यावर, होकाम बनै घ्योव ओझैसिज़्याव, 10होकाम नो मीलाई घ्योव आलिज़ा स्यान्टै मीराई ऐ वार्डे बनै ओमान डाड्योरंये, “आव मि के परमेस्वरलो एटाव ओसक्ति ची, जोलाई स्यान्टैराई भन्डा घ्योव सक्ति हैडोसिये।” 11होराई नोलाई बनै मानिरये, कडालेकं होये नोरंलाई ङा:डेकामज़ जाडु सतन्डे अचम्ब झैडे ओनैज़्यावर। 12हैनि पनि नोराई परमेस्वरलो ओराज्य सोनो येसु ख्रीस्टलो ओबारेला चाव सोर सठैने फिलिपलो ओरो:टं बिस्वास याडोव, होकाम खेपा मेमा स्यान्टैराई बप्तिस्मा यारोयो। 13सिमोनये ओल पनि बिस्वास ओडोव। बप्तिस्मा ओरोयो, होकाम नो फिलिपसंज़ ओलेव, होकाम चिन्नरं सटन्डे सोनो अचम्बला घ्यो-घ्योव ये:नर ओडोज़्याव र:ङडे अचम्ब ओटाव।
14सामरियाला मीराई परमेस्वरलो ओपाङ ठैडे स्वीकार याडोव वार्ने रो: ठैडे यरुसलेमला लिज़्याव प्रेरितराई पत्रुसनि सोनो युहन्नानिलाई होराई या लेवङं यापरि:ङोरं। 15नोराई चोखो आत्मा गडैरंकं वार्डे होनि राडे बिस्वासीराई यालागिटं प्रार्ठना डोडे नेयोवरं। 16कडालेकं नोराई प्रभु येसुलो उमिन्टयाज़ बप्तिस्मा रैडेयानैज़्याव। हैनि पनि नो बेला समं नोराई लेवकं चोखो आत्मा ओराव मालेव। 17होकाम होनि नोराई याटर्ट निकुइ नेनोयो, होकाम नोराई चोखो आत्मा याडोयो।
18प्रेरितराई याकुइ यानैकं चोखो आत्मा ची ओडैसिज़्याव लेव वार्डे सिमोनये नोनिलाई ऐ वार्डे रुप्या ओयोवनि, 19“आव सक्ति ङालाई पनि याङचिन, होकाम ङा पनि ङाकुइ मीराई याङै:टं ङानैकं मीराई चोखो आत्मा गडैरक।”
20हैनि पनि पत्रुसये हैओडोव, “नरुप्या नङसंज़ नास ओटाकं, कडालेकं परमेस्वरलो ओबरडानलाई रुप्याये ल:ङने युङ नडोव। 21आव ये:न्ट नजुङ पनि माले नअढिकार पनि माले, कडालेकं परमेस्वरलो ओङा:कं नयुङ चाव माले। 22हैजैडे आव माचाव जेयुङ लेवरं ये:न डोने रा:डे प्रभुलाई प्रार्ठना चरै, होकाम एटाव नयुङला बिचार छेमा टानेले। 23कडालेकं ङा नयुङलं, कपट उलिज़्याव सोनो नङ पापलो ओबन्डनल नलिज़्याव ङार:ङसनज़्या।”
24होकाम सिमोनये हैओवारो, “ङालागिटं जेज़ प्रभुसं प्रार्ठना डोड्याङच्यो, होकाम जे हैजेवारो मान्टि कडि रो: पनि ङालाई टापरिकं।”
25होकाम नोनि गोहाई याडे सोनो प्रभुलो ओपाङ पाङडे सामरीराई स्यान्टै यानाङखारयालं चाव सोर सठोयोग्यान वोल्डे यरुसलेमलं नेराव।
फिलिप सोनो इठियोपियाला घ्योव हाकिम
26होकाम परमेस्वरलो टोबो स्वर्गटा ओकटंवालये फिलिपलाई हैओडोव, “सोडे डछिन्डे यरुसलेमकाम गाजाडे नाने येमलं नान। नलं मरुभुमिलं येमले।” 27हो सोडे ओनाव, होकाम टोबो इठियोपियाला टोबो खेपा मेमा माजानिव मीलाई ओडोयो, जो इठियोपिया डेसला माहारानी कन्डाकिलो ओमन्त्री सोनो ओढन पैसा नैने हाकिम लेव। हो यरुसलेमलं आराढना डोने नाडे उलिज़्याव, 28हो वोल्डे ओराज़्याव, होकाम ओरठटं चुङडे यसैया अगमबक्तालो ओपोस्टोको उपरि:ज़्याव। 29होकाम चोखो आत्माये फिलिपलाई हैओडोव, “नो रठसं बोलोङ नान।”
30फिलिप चानो चानो ज़ो:डे ओछ्योकं ओनाव, होकाम नोये होलाई यसैया अगमबक्तालो ओपोस्टोको उपरि:ज़्याव ठैडे ओपोजोयो, “नो नपरि:ज़्याव रो: नबुझिज़्यारो?”
31होकाम होये हैओडोव, “काङ्कायेज़ मापैडे ङा कैजैडे ङाबुझिडु?” होकाम होये फिलिपलाई ओरंठंटं पुलुडे ओलस चुङने वार्डे बिन्ती ओडोव। 32होकाम होये उपरिज़्याव चोखो सास्त्रटा सर्सिव खन्ड एटाव लेव,
“कैजैडे भेडालाई पल्ने यालाङ्क,
सोनो सन कत्रेनेलो ओङाक गाइगुइ मालेय,
हैजैडेज़ होये पनि ओया: माफोयोये।#यसैया ५३:७-८
33होलो उबिज्याट ओटाव बेलाकं निया माडोयोखे।
नोलो ओसन्तानराई यारो: काङ्काये डोवके?
कडालेकं आबो नोलो उजीबन प्रिठीबीलं माले।”
34होकाम नो खेपा मेमा माजानिव मीये फिलिपलाई हैओडोव, “डया डोडे ङालाई हैडाङ, अगमबक्ताये आव काङ्कालो ओबारेलं हैओवारो, ओल ओबारेलं हैओवारो सै उरुका काङ्कालो ओबारेलं हैओवार्ज़्याव?” 35होकाम फिलिपये सास्त्रटा आव खन्डटामज़ होलाई येसुलो चाव ओसोर ओसठोयो।
36होकाम होनि नेनाज़्याक टोबो रि:लेव पोकं नेकेव। हो ये हैओवारो, “र:ङखेने, आकं रि: उलिज़्यावलेव, ङालाई बप्तिस्मा रैने कडिये वोङसोङो?” [37फिलिपय हैओडोव, “स्यान्टै नयुङय बिस्वास नडोखे भने नङ बप्तिस्मा रोयोनडै।” होये जुवाप ओयोव “येसु ख्रीस्टज़ परमेस्वरलो ओज़ाचि वार्डे ङा बिस्वास ङाडो।”]#8:37 कोइ पुरानो कागट टा कुइये सर्सिव किताप यालं आव सर्सिव माले 38होये रठ अड्डोयो उपरिङो, होकाम फिलिप सोनो नो खेपा मेमा माजानिव मिनि रि:ल नेनाव, होकाम नोये होलाई बप्तिस्मा ओयोव। 39होकाम नोनि रि:लाम पुलुडे पाखाक नेराव, होकाम प्रभुलो ओआत्माये फिलिपलाई क्यो:डे ओलाङो, होकाम नो खेपा मेमा माजानिव मीये फिलिपलाई फरि खर्कज़ मारो:ङोय, होकाम हो रेङय रेङये ओयेमडे ओनाव। 40हैनि पनि फिलिपय ओल अस्डोडलं उलिज़्याव वार्ने ठा ओसोनो, होकाम कैसरिया ओमकेया समं स्यान्टै सहरयाल चाव सोर सठोयोग्यान ओनाव।

Highlight

Share

Copy

None

Want to have your highlights saved across all your devices? Sign up or sign in