प्रेरित 12
12
हेरोडये ओसहटोयो
1होबेलाकं हेरोड राजाये मन्डलीला मीरंलाई चब्बनै सहटैने सुरु ओडोव। 2होये युहन्नालो ओडाज्यु याकुबलाई तरवालये पल्डे ओसो:यो। 3एटाव ये:न ओडोकं यहुडीरं यारेङो र:ङडे पत्रुसलाई पनि ओक्यो:व। आव घटना ओटाव बेलाकं खमिर माबंराईसिव बरे ज़्याने पर्ब लेव। 4हेरोडये पत्रुसलाई क्यो:डे झ्यालखानालं ओझाव, होकाम निस्तार पर्ब ओखेमो छिन्डे होलाई मीराई याङा:कं रैने बिचार डोडे चार पल्टन सिफाइँरंलाई होलाई गुने जिम्मा ओयोवरं। 5हैजैडे पत्रुस झ्यालखानालं उलिज़्याव, हैनि पनि मन्डलीराई नोलो ओलागिटं बनै जोसये ब्याल्डे कस्सि कस्सिडे परमेस्वरसं प्रार्ठना याडोज़्याव।
झ्याललाम पत्रुस उछुटिव
6हेरोडये होलाई हाइडे रैने ओपान्ज़्याव छ्याम रिलंज़, नेबऱ्याङ सिफाइँनि नेखार्ल पत्रुसलाई नेबऱ्याङ साङ्गलये किसिव ऐस्याडे उलिज़्याव। सिफाइर पनि झ्याललो ओझलायेमकंज़ च्याङसिडे यागुज़्याव। 7अम्ल्याङसानि प्रभुलो टोबो ओकटंवाल होक ओराव, होकाम हो कोठालं उज्यालो ओटाव। होकाम स्वर्गटा कटंवालये पत्रुसलाई ओकोखाट फ्याप ओझैड्योव “चानो सोङन” वार्डे हैओडोकं ओसन्सिव। होकाम उकुइटा साङ्गलरं पलासिडे याटे:व।
8नोलाई स्वर्गटा कटंवालये हैओडोव, “नवाम्फो पोसिन, होकाम नपनै जासिन।” होये हैज़ ओलेव। होये नोलाई हैओडोव, “बर्की क्वाइसिडे ङाछिन्ट रान।” 9होकाम हो पलुडे होलो उझिन्ट ओनाव। स्वर्गटा कटंवालये ओडोज़्याव स्यान्टै ये:नर डस्साज़ वार्डे होये ठाज़ मासोनोये। हैनि पनि होये ङामङ ओटाज़्याव ची वार्ने उसुन्चिज़्याव 10होनि पैला होकाम डोस्राला चुङडे लिज़्याव चौकीडाररंलाई ख्यानैडे सहरलं नाने झङलो झलालेवकं नेकेव पान्त्रा नो झला नोनि नेलागिटं ओल्ज़ ओफैसिव, होकाम होनि होलाम पुलुडे टोबो गल्लिला येमलं नेनाव, होकाम होपान्त्राज़ स्वर्गटा कटंवालये पत्रुसलाई रा:डे ओख्यानोयो।
11पत्रुसये सनसिडे हैओवारो, “डस्साज़ ङा ठा ङासंनडुखे, प्रभुये ओकटंवाललाई परि:ङडे हेरोड राजालो उकुइटाम, सोनो यहुडीराई ङासं डोने यापान्ज़्याव नो स्यान्टै ये:नटाम ओजोगैसोङो।”
12आवरो: ठा सन्डे, मर्कुस याडोज्याव युहन्नालो वामा मरियमलो उज़ी:मलं ओनाव। नलं बनै भ्या मीरं डुप्सिडे प्रार्ठना याडोज़्याव। 13नोये झला घचंघचं झैडे ओसकि:रंकं रोडा उमिनलेव नौकरनिय झला ओफैरिव। 14पत्रुसलो ओगा सरेडे रेङडे झला पनि माफैडे ज़ी:मलं ज़ोनाडे “पत्रुस झला येमकं च्याङसिडेले” वार्डे हैओडोवरं।
15हैनि पनि होराई नोलाई हैयाडोव, “नङ मालङग्याडे नलिज़्याव ची।” हैनि पनि नोये डस्साज़ हैङावार्ज़्याव ची वार्डे ओझ्याङ ओडोकं। होराई हैयाडोव, “मानि नोके पत्रुसलो स्वर्गटा ओकटंवाल ची वार्डे हैयावारो।”
16हैनि पनि पत्रुसये झला घचका घचज़ ओझोयो। होकाम होराई झला याफैकं होलाई र:ङडे अचम्ब याटाव। 17होये नोरंलाई “गाइगुइ टालेच्यो” वार्डे उकुइये साहान ओडोड्योवरं, होकाम प्रभुये ओल्लाई कैझैडे झ्यालखानालाम ओहायो हो स्यान्टै रो: होरंलाई हैओडोवरं। होकाम आव रो: याकुब सोनो उरुका भाइरंलाई पनि हैडाच्योर वार्डे होराई यालिज़्यावकाम टङडे ओनाव।
18होकाम उज्यालो ओटाव पान्त्रा पत्रुसलाई कै ओटाव वार्डे सिफाइराई याखार्ल बनै हल्ला ओटाव। 19हेरोडये होलाई खिम्डे पनि ओम्डैकं, सिफाइँरंलाईज़ चावसं जान्चिडे नोरंलाईज़ सै:ने आग्या ओयोवरं। हेरोड यहुडियालाम कैसरियालं नाडे होलज़ ओलेव।
हेरोड उसिव
20हेरोड टुरोस सोनो सिडोनला मीरासं बनै रिसिडे उलिज़्याव। होरं स्यान्टै डुप्सिडे टोबो युङ्का टाडे राजा लेवकं याराव, होकाम राजालो ओऐस्याने कोठालं ये:न डोने टोबो ओनौकर बलस्तसलाई यालेवडे झैडे राजासं मिलैसि वार्डे है याडोव। कडालेकं नो डेसला मीराई राजालो ओडेसलाम राव अन्नलो ओभरटं याबान्चिज़्याव।
21टछा हेरोड राजाये ओक्वाइसिने क्वा क्वाइसिडे राजगड्डिटं चुङडे हो मीराई याखार्ल ओपाङो। 22मीराई “आवके इस्वरलो ओपाङची, मीलो माङ्कची!” हैवार्डे याकि:व। 23हैजैडे होये परमेस्वरलो ओमहिमा ओम्डोकं होपान्त्राज़ प्रभुलो स्वर्गटा टोबो कटंवालये राजालाई घाइते ओझोयो, होकाम रुइज़ घुसघुस टाडे उसिव।
24हैनि पनि परमेस्वरलो ओपाङ झनज़ चारकोनाडे ओफैलिव। 25बारनाबास सोनो साउलनि यरुसलेमल नेये:न खेम्डे नेवोल्क। मर्कुस याडोज़्याव युहन्ना पनि होनिसंज़ ओराव।
Currently Selected:
प्रेरित 12: NTWMK25
Highlight
Share
Copy
Want to have your highlights saved across all your devices? Sign up or sign in
The New Testament Books in Wale Magar Kham Language © The Word for the World International and Wale Magar Kham Translation Project, Nepal, 2025
