प्रेरित 10

पत्रुस सोनो कर्नेलियस

1कैसरियालं कर्नेलियस उमिनलेव टोबो मी लेव, हो रोमला इटालिया याडोज़्याव पल्टनला कप्तान लेव। 2हो परमेस्वरलो ओभक्त लेव, होकाम ओल सोनो उज़ी:ला स्यानटैराई परमेस्वरलो ओछ्या डोरंये। होये परमेस्वरसं बनै प्रार्ठना डोने सोनो मीरंलाई चाव युङस डान योवरय। 3कर्नेलियसये लाका तीन बजेयाल टोबो डर्सन ओरो:ङो परमेस्वरलो टोबो स्वर्गटा ओकटंवालये ओछ्योकं राडे ऐ ओवार्ज़्याव होये ओठोयो, “कर्नेलियस!”

4होकाम कर्नेलियसये ओछ्यासैये चावसं र:ङडे हैओवारो, “प्रभु, हैगवार्‌ङनके।”

होकाम होये नोलाई हैओडोव, “गरिबरलाई नयोव डानरं सोनो नडोव प्रार्ठनारं परमेस्वरलो ओङाक केडेलेरं होकाम परमेस्वरये नङलाई चेतैसन्ज़्याव। 5आबो योप्पालं नाडे होलाम, पत्रुस याडोज़्याव सिमोनलाई खुल्डे रैने मीरं परिङरं। 6हो छालालो बैपार डोने सिमोनलो उज़ी:मलं लिज़्या, होलो उज़ी:म समन्डरलो ओगोराटं ले।”

7होकाम कर्नेलियससं पाङज़्याव स्वर्गटा कटंवाल ओनाव मान्त्राज़, नोये ओनौकररंलाम नेबऱ्याङनिलाई सोनो बनै चावसं ओसेवा डोने टोबो भक्त सिफाइँलाई उखुलोर, 8होकाम होरंलाई स्यान्टै रो: हैडाडे योप्पालं ओपरि:ङोर।

9ओपराति नोरं बाडे हो सहर छ्योक केडे यालिज़्याव बेलाकं, लाक डोपहर बेलाकं पत्रुसये प्रार्ठना डोने वार्डे ज़ी:मलो ओपटाहाट उपुलुव। 10पत्रुसलाई ओकरेव, होकाम कडि ज़्यावरं ज़्याने युङ ओडोव, हैनि पनि उरुकारं काङ याफिन्ज़्याव बेलाकं पत्रुसये डर्सन ओरो:ङो। 11होये नम ओफैसिव सोनो चारकोनाङाम पोडे झुन्डैसिव टोबो बर्की स्यानाव क्वा प्रिठीबीलं ओराज़्याव ओरो:ङो। 12हो क्वाट प्रिठीबीला स्यान्टै चारगोटा याखङ लेव जन्तुरं सोनो घसारिसिडे बाने यापोहोन लेव बस्तरं, नमटा भुर्ने बाज़ारं लेवरं। 13होकाम होये टोबो एटाव गा ओठोयो, “ए पत्रुस सोङंन होकाम सै:डे कैरं।”

14हैनि पनि पत्रुसये हैओवारो, “प्रभु, एटावके माटा, कडालेकं ङा खर्कज़ बिटाल्या सोनो ज़्योने माबनिने बस्तरं ङाज़्योव माले।”

15फरि पनि हैटाव गाज़ ओठोयो, “परमेस्वरये चोखो ओझोयो बस्तलाई नङ बिटाल्या टावार्ङन।” 16सोङखेप समं हैटाव गाज़ ओराव, होकाम होपान्त्राज़ हो क्वा स्वर्गडे ओनाव।

17पत्रुसये आव ओरो:ङो डर्सनलो ओमाने कडिखेने वार्डे उयुङलं अलमल टाडे उलिज़्याकं, होपान्त्राज़ कर्नेलियसये उपरिङो मीरं सिमोनलो उज़ी:म खिमये-खिमये झला येमकं केडे, 18“पत्रुस याडोज़्याव सिमोन आलं उलिज़्यावरो?” वार्डे होराई सकि:डे हैयावारो।

19पत्रुसये ओल ओरो:ङो डर्सनलो ओबारेलं उसुन्चिज़्याकं चोखो आत्माये हैओडोव, “र:ङ, सोम्बऱ्याङ मीरं नङलाई खिम्सनज़्यारं। 20सोडे मेलं झरिङन, होकाम सङ्खा माडोडे नोरासं नान, कडालेकं नोरंलाई ङा ङापरि:ङोरं ची।”

21होकाम पत्रुस झरिडे मेलं ओनाव, होकाम हो मीरंलेवकं नाडे होरंलाई हैओडोवरं, “र:ङच्यो, जोलाई जे जिखिम्ज़या हो मी ङाज़। जे आकं कडि ये:नटं जेराव?”

22होराई हैयावारो, “परमेस्वरलो ओछ्या डोने, सहि सोनो स्यान्टै यहुडीरं लेवङाम मान डोयो टोबो कर्नेलियस उमिन लेव कप्तान ले, होये नङलाई उज़ी:मलं खुल्डे नङङाम बचन ठैने वार्डे टोबो चोखो स्वर्गटा कटंवालये होलाई आग्या योडेनोयो।” 23होकाम नोये होरंलाई ज़ी:मलं खुल्डे यामान ओडोड्योवरं।

ओपराति छकाल्ने पत्रुस सोडे होरासं ओनाव, होकाम योप्पाला लिज़्याव नेबऱ्याङया बिस्वासि भाइरं पनि ओल्स यानाव। 24नेला: बाडे कैसरियालं याकेव। कर्नेलियसये ओगोट्याररं सोनो ओनैरंलाई खुल्डे होरासं पत्रुसलो ओयेम यार:ङज़्याव।

25होकाम पत्रुस ज़ी:मलं ओराव, होकाम कर्नेलियसये होसं डैसिडे ओखङटं फुलुप्सिडे ढो ओडोव। 26हैनि पनि पत्रुसये होलाई ऐ वार्डे ओसोचोयो, “सोङंन, ङा पनि मीज़ ची।”

27होकाम होनि पाङोग्यानज़ ज़ी:मलं नेनाव, पत्रुसये नलं बनै भ्या मीरं डुप्सिडे यालिज़्याव र:ङडे, 28होलाई हैओडोव, “यहुडीरंकाम उरुका मी रासं बोलोङ बाने सोनो होरासं बोलोङ ज़्योने यहुडीरंलाई चाव माटाये वार्ने रो: नङलाई ठा ज़ ले, हैनि पनि परमेस्वरये ङालाई काङका मीलाई पनि झुठा सोनो माचाव टासुन्चि वार्डे हैडाडे नैसोङो। 29हैजैडे के नङ नखुल्सोङो मान्त्राज़ कडि पनि मापाङडे नङ लेवकं ङाराखे। जे ङालाई कडाने जेखुल्सोङो? आबो हैगवार्च्योके।”

30होकाम कर्नेलियसये हैओडोव, “आछिम चार डिन याटाडु आव बेलाकज़ तीन बजेला प्रार्ठना ङाडोज़्याकं, मिलङ झिने क्वा क्वाइसिव टोबो मी ङाङा:कं ओच्याङसिरिव, 31होकाम होये हैओवारो, ‘कर्नेलियस, परमेस्वरये नडोव प्रार्ठना ठैडेनोयो, होकाम नङ गरिबरंलाई नयोवरं डान परमेस्वरलाई ठा ले। 32हैजैडे मीरंलाई योप्पालं परिङडे पत्रुसलाई खुल्डे रोयो परि:ङरं। हो समन्डरलो ओगोराटं उज़ी:म लेव छालालो बैपार डोने सिमोनलो उज़ी:मलं पाहुना नाडेले।’ 33होकाम ङा होपान्त्राज़ मीरंलाई नङ लेवङ ङापरि:ङोरं, नङ डया डोडे नराखे। आबो प्रभुये नङलाई हैओडानो स्यान्टै रो:रं ठैने गे स्यान्टै आकं परमेस्वरलो ओङा:कंज़ गेलिज़्या।”

पत्रुसये बचन ओपाङो

34होकाम पत्रुसये हैओवारो, “डस्साज़ ङालाई ठा ले, परमेस्वर काङ्कालेवडे पनि माझैसि, 35हैनि पनि प्रिठीबीला लेने जोये परमेस्वरलो ओछ्या डाडे चाव ये:न डोव, होलाईज़ परमेस्वरये चाव ङप्सिये। 36परमेस्वरये इस्राएलीरंलाई उपरि:ङड्योवरं सान्तिला चाव सोर येसु ख्रीस्टये प्रचार ओडोव जेलाई ठाज़ ले। येसुज़ स्यान्टैराई याप्रभु ची। 37आव बचन नङलाई ठाज़ले जो युहन्नाये प्रचार ओडोव बप्तिस्मालो उझिन्डे, गालीललाम रैडे स्यान्टै यहुडिया भरि सठैसिव बचन आवज़, 38परमेस्वरये नासरतला येसुलाई चोखो आत्मा सोनो सक्तिये अभिसेक ओझोयो। होकाम येसुये चाव ये:न डोडे सैतानये ओसहटोयोरंलाई ओससोमोरं, कडालेकं परमेस्वर येसुसं लेव।”

39“येसुये यहुडीराई याडेसलं सोनो यरुसलेमलं ओडोव स्यान्टै ये:नलो ओसाचीरं गेज़। होराई येसुलाई क्रुसटं झुन्डैडे पनि यासो:यो। 40होकाम परमेस्वरये होलाईज़ सोङलाका ज्युङडा झैडे ओसोचोयो, होकाम मीराई याङा:कं ओसोटोनो, 41स्यान्टै मीरंलाई माङ्क, हैनि पनि गेलाईयाज़ परमेस्वरये साची झैनेलो लागिटं ङा:डेज़ ओरुजिसिव ची, होकाम येसु सिवरंलाम ज्युङडा ओटाव छिन्डे गे येसुसं ज़्याने ओँने गेडोव। 42येसुये गेलाई मीराई याखार्ल चावसोर सठैने सोनो येसु सिवरं सोनो ज्युङडाराई यानिया डोने लागिटं परमेस्वरङाम रुजिसिव मी ची वार्डे गोहाई यानेलो लागिटं गेलाई आग्या ओयासिव ची। 43येसुलाई बिस्वास डोनेराई येसुलो उमिनङाम यापाप छेमा टाये वार्डे, स्यान्टै अगमबक्ताराई होलो गोहाई योडेनैरं।”

यहुडीरंकाम उरुराई पनि चोखो आत्मा याडोयो

44पत्रुसये आव रो: ओपाङज़्याकज़ बचन ठैने स्यान्टैराई याक्याङटं चोखो आत्मा ओराव। 45चोखो आत्मालो ओबरडान यहुडीरंकाम उरुका मीराई याक्याङटं पनि ओराव र:ङडे पत्रुससं राव यहुडी बिस्वासीरं अचम्ब याटाव। 46कडालेकं होराई नोरंलाई छुटं पाङ पाङडे परमेस्वरलो ओप्रसन्सा याडोज़्याव याठोयो। होकाम पत्रुसये हैओवारो, 47“गे मान्टिवज़ आवराई पनि चोखो आत्मा डैडेनैरं आवरंलाई काङ्काये ची रि:लो बप्तिस्मा टानेङाम वोङोरं ड?” 48होकाम पत्रुसये होरंलाई येसु ख्रीस्टलो उमिन्ट आवरंलाई बप्तिस्मा याच्योरं वार्डे आग्या ओयोवरं। होकाम नोराई पत्रुसलाई जामा समं नलज़ लेन वार्डे बिन्ती याडोव।

Currently Selected:

प्रेरित 10: NTWMK25

Highlight

Copy