Luka 2

Zwagwa KwaYesu

(Matewu 1.18-25)

1Kwakayetika kuti mumahhuba aKhesari Agasitasi kwakabhuda nlayo waka uti banhu muhango yose bakafanila kwalisiwa. 2Kwalisiwa ikoku kwekutanga kwakayetiwa Kwiriniyasi ali mbhati wentunhu weSiriya. 3Banhu bose bakayenda kuti benokwalisa, nhu wose eyenda kunzi-nkulu wakanyi kwabo.

4NaJosefa bo wakayenda ebva muntunhu weGalile, munzi-nkulu unoyi Nazaretha, akayenda kuntunhu weJudiya, kunzi unoyi Bhethelehhema ngobe waka ebaligwa kun'umba yeludzi gwaDavida. 5Wakayenda enokwalisa naMariya waaka ewholobola, atjikuligwa.#2.5 Matewu danho1. Vesi 31 6Kwakayetika kuti betji ikweno, mahhuba awe etshibama akaswika. 7Wakatshibama mbisana mbano iye; akawumpetela nematjila, akawunladzika munghoro nentha yekuti n'umba dzebezi dzakadzili hhele.

Balisi neBatumwa beNdzimu

8Kwakakuna balisi bemhwizi muhango iyeyo, begala kumakula bakalisa, kakale belinda mhwizi dzabo busiku. 9Ntumwa waHe wakaboneka kubali, kwidzima kwaHe kukabakombeledza, bakahhala luhlo kwazo. 10Ntumwa weNdzimu wakati kubali, “Musihle, ndawhotula ndebo mbuya inowhohanhisa banhu bose. 11Nasi mazwaligwa Ntjidzi, iye Khirisitu He, munzi-nkulu waDavida. 12Yetji tjowhobe tjilakidzilo kumuli. ‘Mowhowana mwana akapetelegwa nematjila akaladzikiwa munghoro.’ ”

13Tjinyolotjo kwakabe negubungano lekudzimu gulugulu lina ntumwa weNdzimu limba likudza Ndzimu liti,

14“Gudzo ngalibe kuNdzimu Upehhugwihhugwi,

kunyalala muhango nehanha ngakube kubanhu bose!”

15Kwakati ke batumwa beNdzimu babgwilila kudzimu, balisi bemhwizi bakalebelesana, beti, “Ayindeni ngwenuwali kuBhethelehhema tinobona tjayetika tjatazibisiwa naHe.”

16Bakayenda nekulibilidza, bakaswika bewana Mariya naJosefa, nemwana alilele munghoro. 17Bakati batjibona ikoku, bakathama kuti kuzibgwe kose kwalebgwa kubali nekwemwana iwhoyu. 18Bose bakawha, kwakabatjenamisa kwakakulebgwa nebalisi bemhwizi. 19Koga Mariya wakatjengeta zose zwinhu izwezwi mumoyo akakumbulisisa nekwazo. 20Balisi bemhwizi baka bgwilila, bekudza kakale belumbidza Ndzimu nezwabaka babona nezwabaka bawha, zwaka zwiyendilana nebudziwa kwabo.

Yesu Unotumigwa Zina

21Muhhuba lebuhhanakadzi, paakathumbigwa, wakatumigwa zina linoyi Yesu, zina laka lalebgwa nentumwa weNdzimu iye asanhu akabe muntumbu wameyabe.

Yesu Unoyendisiwa kuThempeli.

22Lubaka gwetjenesewa kutobegwa nlayo waMozisi gwaswika, bakayenda naye kuJerusalema kuti bawunlesi kuna He, 23sekwakwaka kwagwa munlayo waHe kuyi, “Yose mbano yetjilume inowhodan'wa iyi yakayengemala kuna He,” 24nekuti bahhise tjibhayilo sekwakunolebgwa munlayo waHe, “njiba mbili, kene whukunjiba njetjana mbili.”

25Kwaka kuna nlumetate muJerusalema zina lile eyi Simiyoni, waka akalulama, ali nhu unohla Ndzimu, akamilila hhuba lenyaladziwa kwe Isirayeli, neMeya Yakayengemala yaka ilipehhugwi kukwe. 26Waka azibisiwa neMeya Yakayengemala kuti atowhofa asanhu akabona Khirisitu waHe. 27Etungamigwa ngeMeya, wakanongina muthempeli; bazwadzi bakahhisa mwana wabo Yesu kuti bawunthamile nlenje umunlayo, 28wakatola mwana akawumilidza akawumbhata nemaboko awe akaboka Ndzimu eti,

29“He tjiletjani nlanda wenyu ayende nekunyalala

seleba kwedama lenyu.

30Ngobe meho angu atjibona kutjidza kwenyu

31kwamabaakanya mbeli kwebanhu bose,

32tjedza tjevonekela Bataya,

negudzo lebanhu benyu Isirayeli.”

33Tatayi namayi baka tjenamisiwa nayikoku kwakalebgwa nekukwe; 34Simiyoni akabakombolela, eti kuna Mariya meyabe, “Iwhoyu mwana unowhota kuti banjinji bawe nebanjinji bamuke mu Isirayeli, unowhoba tjilakidzilo tjinolebgwa kusakalulama nekwatjo 35(nempanga unowhobhaya moyo uwo), kudze mikumbulo yemimoyo minjinji ibe patjena.”

36Kwaka kuna umwe nlebesambeli wetjikadzi unoyi Ana, ali nkololokadzi waFanuweli wen'umba ya Aseri, waka atjikwegula, pakulobogwa kukwe alimhandala ihhele wakatjila nenlume makole ali kutondeka koga. 37Waka ali tjilikadzi atjiba nemakole makumi ali hhanakadzi nemana, asingabve pathempeli, enamata siku nesikati ngetembezela neyila zodliwa. 38Eswika bo ipapo, tjinyolotjo wakaboka Ndzimu, akaleba nekwemwana kubanhu bose baka bakamilila sunungugwa kweJerusalema.

Bgwilila kwabo kuNazaretha

39Bapedza thama kose betobela nlayo waHe bakabgwilila kuNazaretha kunzi-nkulu wabo, kuntunhu weGalile. 40Mwana wakakula kakale akasima mumeya, alihhele butjenjebvu, ngoni dzeNdzimu dzaka dzili pehhugwi kukwe.

Mbisana Yesu ali muThempeli.

41Bazwadzi babe bakabeyenda gole limwe nelimwe kuJerusalema kunzano wePhasika. 42Kwakati aba nemakole ali gumi nemabili bakayenda kuJerusalema sekwenlenje wenzano. 43Nzano wakati wapela, bobgwilila, mbisana Yesu akasalazwe kuJerusalema, bazwadzi babe bakasizibe. 44Koga ibo baka bekumbulila kuti upakati kwebamwe baka beli mugwendo, bakayenda hhuba lose, bakati bowun'haka pakati kwehama nebabakidzani babo bakawun'haya. 45Bakati bawun'haya bakabgwilila kuJerusalema benowun'haka. 46Hule kwemahhuba matatu bakawuwana muthempeli aligele pakati kwebadiyi akabawhilila, ebabhuzwanya mibhuzo. 47Bose bakawuwha bakatjenamisiwa newhisisa kukwe nen'handulo dzidze. 48Bakati bewumbona baka tjenama, meyabe bakati kuwunli, “Nkololo wangu nentha yeni utibhata ujali, imi natate babo tatikuhaka tina buyendasi.”

49Iye akabahandula eti, “Mamundihakilani, kati amutoziba kuti ndakafanila ba mun'hingo waTate bangu?” 50Koga ibo abazowhisisa handula kukwe.

51Wakamilika akayenda nabo, bakanoswika kuNazaretha, wakabawhilila ezwitebamisa pasi kwabo; koga meyabe bakatjengeta kose ikoku mumoyo wabo. 52Yesu wakakula mubutjenjebvu nemutjimo, ediwa nebanhu neNdzimu.

Currently Selected:

Luka 2: KTP

Highlight

Copy