A. M. 20

Ọmẹn ọMakidoniya kẹ uHellas

1Ẹlẹn shin ishim lan la ya wọ, uBulus la tuan lẹ apaduan lan, le ushin àá hurẹ ọma wan ẹhurẹ ẹdọ, ala laa wan ka frẹ ọntraan kan ghan lẹ ọMakidoniya. 2Àá osoon kẹ ọmẹn ọMakidoniya la ama ada lapam ẹhurẹ ẹdọ sẹ ẹlẹn shin àá fuan uHellas wọ 3Ọnhuọ shin àá ywua ẹprẹn ẹtaa. sablọ shin aYahudawa kyẹ uni udu ghan ebebi ẹlẹn shin àá kyẹ uni ọkpẹẹn kan lẹ uSuriya, ọnwọ ala kpọn udu ka eywure ghan ọMakidoniya. 4uSufata, arẹn ọFarus bi kẹ uBiriya nga la kaan nga wọ, kẹ Aristarkus kẹ ọSakundus bikẹ ọMakidoniya, ọGayus bikẹ ọDarbe, kẹ uTimoti, uTikikus ọTarofimus, bikẹ ẹbọn Asiya. 5Ekyii lẹn kpoon kan wan akaaka zọ enyi kẹ ọToruwas. 6tushin enyi a kpẹẹn bikẹ uFilibi akaaka okon ewedri enyi kẹ uToruwas a ta ọhuọ hurẹ ẹpaan ubrodi shin usoo wọ lẹ uyisti wan.

Anyọọn uYutakus bikẹ ọmẹn itun kẹ uToruwas

7Aywuẹ inzuun kẹ ọtẹkpa aywuẹ otumpua, enyi aklan kyẹ ọya ubrodi. uBulus la frẹ pẹẹ lẹ ada sẹ anka otu sablọ shin èé nii ọlaa ẹshaan lan wọ ọnwaa ubun. 8Ẹla ọma ọsẹẹ soo lapam kẹ ọmẹn unkoo aprẹn lan shin enyin aklan kẹ ọmẹn lẹn. 9Eple arọfuọ shin adrọ ghan shin uYutikus la trẹtraa kẹ aprẹn ọtaga, kẹ afrẹ ọna ọ̀na ghan lakẹnkan lẹ ushin uBulus ywua kẹ ọnhuọ ọpẹẹ lẹ ada. Lẹ ushin ọna kpọn ghan, ala osrom bikẹ aprẹn unkoo ọnyaan ẹtaa, ka kpaa ba lẹ ẹbọn ala kpẹkpon ọkrọọ ghan ata ọhuọ hurẹ ukpo ghan. 10uBulus le sri kan lẹ ẹbọn, kẹ eshee ongbun ka hwua ghan, kẹ ekee ghan lẹ anyẹẹn ghan tuhuan kẹ akọ ghan shin, “Kalẹ unu shee àkpa wan, ohyu atrẹ ”. 11Ala ywure ka nyaan kan gha lẹ aprẹn tuhuan ka faa ubrodi ka ya. Lẹ ushi àá pya onyun kan lẹ ọshaa ombun, ala okpo kan ghan. 12Ada la kpọn arọfuọ lan ka trẹ kan wan lẹ ẹshaan wọ tuhuan ala okon ẹhurẹ ẹdọ.

uBulus klan kẹ onokon ama Afisa

13uBulus soon kẹ ẹbọn kan lẹ Asus, ọnhuọ shin èé nii enyi kẹ okon ghan wọ, enyi tọ ọhuọ kon usoon kẹ ọmẹn ọkpa ambrẹ. 14Le ushin òó kon enyi kẹ Asus, enyi la kpọn ghan kan lẹ uMitilin. 15Ọnwaa ubun, enyin la kpẹẹn kẹ ọkpa kẹ ẹnga kẹ esri kẹ ukiyos. Lẹ ombun shaa, enyi la eywure ka akpẹẹn kan lẹ ọSamos, tuhuan ọnwaa ubun, enyi la fuan uMitilin. 16Tushin ubulus la kpon udu shin ẹnga ni ọkpẹẹn kẹ ẹnga sẹẹ Afisa sablọ kalẹ ẹnga tẹgha kẹ ẹbọn Asiya wan, sablọ shin ẹnga kya udiduo kẹ ẹnga fuan Urushalima edre ọnọm ọFentikos ta ọsọ ba wan inshin uni uyi.

uBulus ma onokon ana ubii ama Afisa anya

17Kẹ uMiletus, uBulus la tuan lẹ onokon ana ukon ekyee Abaan Ọnọm amma Afisa. 18Lẹ ushin aba, ala kọ ghan shin: “Unu za emle shin imi la aywua wọ kẹ unu huọ ilon ẹlẹn yaau, kẹ ọnyaan kẹ idre ọnọm imi aba lẹ ẹbọn Asiya wọ. 19Imi anaa lẹ ẹkyuẹ mi kẹ ẹbọn kẹ udu ọtuan Ọnọm lẹ edre mi, tushin ala maa mi lẹ ebebi aYahudawa. 20Unu za shin imi traan mi ulolo ọnlẹghẹ shin usoo kẹ agyagyuan kẹ ọnhuọ ọywua unu mat ushin imi a frẹ ulolo unu kẹ aprẹn edre ada tuhuan ọnyaan ẹn ka abaan kan lẹ ẹn kaa. 21Imi ahurẹ u too aYahudawa kẹ eHelenawa shin ọdọ wọ eywure wan ọnhuọ Ọnọm lẹ ọkpaa ẹtrẹẹ tuhuan kẹ okon ọkpọn lẹ ẹhurẹ kẹ ọmẹn Ekyee Abaan enyi ọYẹsọ.

22“Kaladẹn, Iri Ọnọm so mi ọkon lẹ Urushalima lẹ ọdọ, bọ ọza ọnkyẹ shin uni ọba mi kẹ ọnhuọ lan. 23Ọnkyẹ shin imi za lehule wọ uso shin, huọ ilon ẹshan nga kọ, Iri Ẹsẹẹ ka la mi ẹn nyẹẹn shin unkoo ẹva kẹ ọhyua ẹva ywuà lẹ ọzọ mi. 24Tushin imi akpọn mi ọrẹ mi shin ọnlighẹ wọ wan, inshin imi ta ẹn hurẹ utitọn lẹn tuhuan kẹ imi hurẹ ọtuan shin Ekyee Abaan ọYẹsọ ma mi--ọntuan unyin esheshii ihyuu ishishii Ọnọm.

25“Ẹladẹn, Imi za shin bọ alọ unu kẹ ọmẹn anushin imi a huọ uklem lẹ imi lolo wan aprẹẹ ẹgọn Ọnọm ni uywure kẹ eshin mi. 26Ọnwọ ọsọ, imi kyẹ utoo unu kẹ ubin shin, eji alọ enkyii so wan kẹ aprẹn ẹkyuẹ mi ma, 27sabọ imi otoo unu ididu ọnkyẹ shin Ọnọm nii. 28Unu kon aklọ lẹ akyuẹ unu kẹ ididu anushin Iri Ẹsẹẹ sọ unu kẹ anyẹẹn. Unu frẹ upyee Abaan Ọnọm shin àá lọ lẹ eji ghan. 29Imi za shin inshin imi okpo kan mi, eple áva onum ni utro kẹ ọmẹn unu tuhuan bọ àla ọlaa àtẹẹn lan ma. 30Huọ kẹ ọnyaan kẹ ẹlẹn nẹẹ, eple ekyii unu ni ọnyaan kẹ odu ifuo kẹ ẹplẹpan sablọ kẹ ẹma woo ana ubii kẹ ere wan kan. 31Ọnwọ ọsọ, unu ywuà lẹ unu za! Unu za shin amẹẹ ata kẹ ẹladẹn, mi so utrim ọlà unu ẹn nyẹẹn ma otun kẹ aywuẹ lẹ edre mi.

32“Imi asọ unu kẹ anyẹẹn Ọnọm kẹ ẹnrẹn esheshii ghan, shi uni ọvra unu tuhuan kẹ ama unu ọkà kẹ ọmẹn ididu anushin ohurò wan la dẹ-dẹy. 33Imi sọ mi ẹhurẹ lẹ ikli huọ ọnkyẹ alo wan. 34Inu ka kyuakyuan za shin imi odu ọtuan lẹ ayẹ mi sabọ imi kon ọnkyẹ imi tẹ kyẹmu kẹ onushin oso kẹ imi. 35Ididu ọmprẹ shi imi oton nu ni, ọgbaa shin inu du ọtuan lakanka sabọ enyi shẹ anushin asuwan lẹ ọdọ wan ayẹn kọ. kẹ unu ka wan lẹ aprẹ Ekye abaan uKristi shin, ‘Ọsẹ lẹ ọgyagyuwan shin ẹngọ ma lẹ shin ẹngo ngrẹ.’ ”

36uBulus hurẹ ọpiya oyun la, ele she ọngbun ka pẹ lẹ Ọnọm kẹ ma lẹ diduwan. 37Ididukawan lẹ huọ ukruẹ ka huọ kyua nga kẹ huọ nin gha oyun, 38Ọnkyẹ shin ọlọ wan wọ sọ aprẹ shin otoo wan shin, ẹnii ma utu shii nga ma. Ala ka kaa ngan kalẹ ọnhuọ ọkpa ambrẹ.

Currently Selected:

A. M. 20: KAD

Highlight

Copy