Matt 7
7
wiḥekmec af ttenyaṯ
1«wiḥekmec af midden bac wiḥekmc fellewem rebbiy. 2rahiy mammeḵ tḥekemem af midden rebbiy tayḥekm fellewem. aḏ mammeḵ tesmuqelmasen tafenyesmuqel rebbiy.
3maγer tzarreḏ tesfeft g ṭiṭ n uwaḵ, lekenti witzerc sγer lliy g ṭiṭiḵ? 4mammeḵ temmaleḏ y uwaḵ: < djiḏ asefγeγ tesfeft seg ṭiṭiḵ. > aḏ witettaric lbaliḵ al sγer lliy g ṭiṭiḵ. 5ayya lliy tseḵaneḏ g imaniḵ, seffeγ saƹa sγer seg ṭiṭiḵ bac azerreḏ yeqƹeḏ mammeḵ akseḏ tesfeft seg ṭiṭ n uwaḵ.
6wittucec matta yemquddes y iṭṭan naγ anden fellawem we afenmezemzen. aḏ witluḥec ljuher zzaṯ iḥellufen, naγ atrefsen adug idernesen.
rebbiy ituc y mam iḍelbi
7mleṯ: < uceneγ. > afenyuc rebbiy, urzuṯ, aḏefem, uwatteṯ af lbab afennimir. 8rahiy lliy aymel uciḏ ayelqa, aḏ lliy ayurzu ayef, aḏ lliy aywet af lbab aymir zzaṯis. 9zeƹma almiy yjen siwem yeḍlebi memmis g aγrum tasyuc aḍγaγ? 10naγ almiy yeḍlebi g trebit zeƹma tasyuc telefsa? 11kan kennim lliy witteḥlim tessennem mammeḵ aḏucem y ṭarwiwiṯuwem ḥaja teṣbiḥt. rahiy babuwem lliy g ujenna bjel bac ayuc ḥaja d ṣbiḥ y lliy ḍelben diyes.
12ggeṯ yid midden mammeḵ texsem aggen midden iḏuwem. rahiy d ayuh d matta yused g cceriyƹeṯ n muwsa aḏ g lliy uγentiḏ lenbiya.
lbab lliy yeḍyeq
13ḏfeṯ seg lbab lliy yeḍyeq. rahiy lbab lliy yugay al tmettant yuseƹ aḏ abriyḏis yezhel, aḏ ggeṯ d midden tƹeddan siyes. 14mennit naγ mennit yeḍyeq aḏ yuƹer abriyḏ lliy yugay al tmeddurt, aḏ fercu d midden ttefent.
seg lγeltesen atensnem
15rreṯ lbaluwem seg lliy tteren imanesen d lenbiya s tkerkas. atesnawemd am izmaren. lekenti nihnin s jjaj d leḏyub tmetrecen. 16seg lγeltesen atensnem. yaxy tesekkumt tattaru tizurin? naγ teceƹƹelt tattaγed imečan? 17amyuh, kul ccejreṯ teṣbiḥt tettuc lγelleṯ teṣbiḥt, amma ccejreṯ lliy witteḥli rahiy tettuc lγelleṯ witḥeli. 18ccejreṯ teṣbiḥt witettuc lγelleṯ witteḥli, aḏ ccejreṯ lliy witḥeli witettuc lγelleṯ teṣbiḥt. 19aḏ kul ccejreṯ witettuc lγelleṯ teṣbiḥt atemmuqdaƹ we atemluweḥ g timsi. 20amyuh seg lγeltesen atensnem.
s igga muc s dwiy
21muc kul yjen yemmaliḏ: < ayya siydneγ. > am idin, tayeḏef al lmelekuwt n ujenna lekenti lliy iteg mag yexs baba lliy g ujenna tasyeḏef. 22as diyn talemlen ggeṯ d midden: < ayya siydneγ ayya siydneγ. yaxy muc s ismiḵ nufley y midden aḏ s ismiḵ nzeƹzeq cyaḍen, aḏ s ismiḵ negga lmuƹjizaṯ ggeṯ. > 23lekenti lweqt ḏḏin tasenemleγ: < wifensineγc xlaṣ, beƹdeṯ fella ayya lliy tteggen ibekkaḍn. >
tenfust n tezeqqa lliy tebna af ṣṣeḥ
24kul yjen aysel dwiyw wuhnit we ayeg felles netta am argaz yessen ayebna tezeqqas af ṣṣeḥ. 25yaxy yezwad anzar, uzellen aman, yekkerred aḍu, wetten ayuh n tzaqqa. lekenti witudic afelxaḍert tebna af ṣṣeḥ.
26aḏ kul yjen aysel dwiyw wuhnit aḏ witegc siyes, netta am argaz wiysenc. yebna tezeqqas af tammurt d safi. 27yaxy yezwad anzar, uzellen aman, yekkerred aḍu, wetten aydin n tzaqqa tuda lkulha.» 28mniyn ykemmel yesuwƹ dwiys ṯƹejben midden seg lqudretis af seḥfeḍ. 29afelxaḍert rebbiy yuces lqudreṯ bac atenyesseḥfaḍ s γares muc am indin lliy seḥfeḍen g cceriyƹeṯ.
Currently Selected:
Matt 7: IGJ
Highlight
Copy
Compare
Share
Want to have your highlights saved across all your devices? Sign up or sign in
© 2025 Chutney Media Agency Ltd for the audio recording and for the text upon which the recording is based. The audio recording and the text are both released under a Creative Commons 4.0 CC BY-NC-ND license (Attribution - No-Commercial - No Derivatives).