Matt 18
18
meqqar g lmelekuwt n ujenna
1lweqt ḏḏin usend tlamḏa n yesuwƹ sestunen diyes: «d mam zeγ meqqar g lmelekuwt n ujenna.» 2yaxy yesγuy y afrux d meckun yesbeddi jerasen, 3yuwa:
«lḥeq afenemleγ, kan witḏuglemc am imeckenen, witeteḏfemc al lmelekuwt n ujenna xlaṣ. 4lliy yeṯweḍeƹ am ayuh n wefrux rahiy d netta d meqqar g lmelekuwt n ujenna. 5aḏ lliy ayefreḥ s ayuh n afrux afelxaḍertiw. rahiy yefreḥ siyi.
6amma lliy ayseγleḍ yjen seg ayuh n ifrex lliy umennen siyi. rahiy lukan asƹelqen g teḵrumtis ƹeqqa n lemdar we atseγerqen g tebḥirt xiyr n lliy atiƹeqeb rebbiy af ayuh n bekkeḍu. 7ayya lwilesen midden seg seγleḍ. rahiy seγleḍ yella diyma g ddunyeṯ. aḏ ayya lwilis lliy tayseγleḍ midden.
8kan fusiḵ naγ dariḵ tafiseγleḍ qedƹi aḏ lewḥi. rahiy iḏef al temeddurt n ujenna am idin xiyr n iḏaf sisen al jhennem lliy treq diyma. 9kan ṭiṭiḵ taftseγleḍ, ksiṯ aḏ luḥiṯ. rahiy ikkesis aḏ iḏaf al temeddurt n ujenna am idin xiyr n iḏaf siyes al jhennem lliy treq diyma.
10rreṯ lbaluwem aḥeqrem yjen seg ayuh n imeckunen. rahiy neči tafenemleγ: lmleykesen smuqulen diyma al uḏem n baba g ujenna.
tenfust n izmer lliy iwedder
11rahiy neči lliy yeḏwel d bnaḏem usiγd bac asemneƹeγ lliy weddren. 12man amlem g yjen; yusi γares 100 d izmeren. ireḥ yjen sisen: yaxy muc tayedj aydin 99 g jbel we ayreḥ ayurzu af lliy iwedder? 13lḥeq afenemleγ: kan yufi tayefreḥ siyes iṭer n freḥis s aydin 99 lliy widdrenc. 14aḏ amyuh wiγisc babuwem lliy g ujenna aywedder yjen seg ayuh n imeckunen.
kan yeγleḍ iḏeḵ uwaḵ
15kan yeγleḍ iḏeḵ uwaḵ ureḥ lummi aḏ kennim weḥduwem. kan yesla dwiḵ. rahiy terbeḥet. 16amma kan wiyeslic dwiḵ, awi iḏeḵ yjen naγ sen seg ayeṯmaḵ bac acehden af mag iṣar as iḍen. 17kan wiyeqqil ayeγ s dwiysen, ḥerrec siyes al lmejmeƹ. aḏ kan wiyeqqil ayeγ s dwiy n lmejmeƹ zada. ḥesbi am lliy yetzella y ṣneb naγ am lliy yetlayem g ḍḍeribeṯ.
18lḥeq afenemleγ: γarwem ssulṭeṯ n uḥellel aḏ uḥerrem g tammurt aḏ ujenna. 19we afenemleγ zada: kan mfehmen sen siwem af tammurt af mehma ḥaja aḏ ḍlebenteṯ g tẓalliṯesen. rahiy baba lliy g ujenna tasentedyuc. 20mani mlaymen sen naγ 3 s ismiw. rahiy ḥetta neči lliγ yiḏesen.»
tenfust n usameḥ n ttanyaṯ
21lweqt ḏḏin yusesd buṭrus ysesetni: «ayya siydneγ mennit yexs asemḥeγ uwa almiy yeγleḍ iḏiy? yaxy yexs atsemḥeγ 7 merrat?» 22yerras yesuwƹ:
«muc 7 merrat akehaw amma 70 merrat deqqes n 7 merrat. 23afelxaḍert n ayuh lmelekuwt n ujenna am lmelek yexs ayḥaseb ixedemnis af ṣṣabeṯ.
24aḏ mniyn yuḏel yetḥasab disen uγennesd yjen xeṣnas 10,000 d idinaren n lfejreṯ. 25aḏ afelxaḍert wiγrec s matta tayxelleṣ swalis yuwayasen siydis atzenzen netta aḏ lehlis aḏ ṭarwas aḏ lliy γares bac ayxelleṣ swalis.
26lekenti xdim yezwa zzaṯis yesjeḏ yuwa: < ayya siydneγ sugmiḏ ussan afxelṣeγ g swal lkul. > 27yaxy yesxef aydin n lmelek fellas, yseybi, isamḥi g swal.
28lekenti mniyn yeffeγ aydin n xdim ireḥ al yjen seg iqrinnis yexs fellas 100 d idinaren. yeṭṭefi, yexneqqi, yuwayas: < ḏfeƹ lliy xsext fellaḵ. >
29yezwa qrinnis af ifednis zzaṯis yetjeheyas yemmal: < sugmiḏ ussan fxelṣeγ. > 30lekenti wiyeqqil atiseyyeb aḏ yerniy yeḥebsi bac atixelleṣ.
31mniyn zren ixdimen mag iṣar, ḥzennen aḏ reḥḥen uwan y siydsen af mag iṣar. 32yaxy yesγuyas siydis yuwayas: < ayya lliy witeḥliḏ, swaliḵ lkul sameḥγeḵ diyes afelxaḍert tjahidiḏ. 33yaxy muc yexs areḥmeḏ qriniḵ mammeḵ rḥemγaḵ neči?> 34aḏ mniyn teḍras y siydis yeggi g lḥebs almiy ayxelleṣ swalis. 35amyuh tafenyeg baba lliy g ujenna kan wisameḥc kul yjen siwem uwas seg ulis.»
© 2025 Chutney Media Agency Ltd for the audio recording and for the text upon which the recording is based. The audio recording and the text are both released under a Creative Commons 4.0 CC BY-NC-ND license (Attribution - No-Commercial - No Derivatives).