Matt 16
16
iferryisiyen ḍelben g lmuƹjizaṯ
1usend lbeƹḍ n iferysiyyen aḏ iṣedduwqiyiyen al yesuwƹ bac atseḥṣlen, uwanas: «aγaneγd lmuƹjizaṯ seg ujenna.» 2yerrasen:
«almiy yezweγ jenna yid ina n tufuyt, temmalem: < tayeṯfeja lḥal. > 3aḏ almiy yezweγ yezdef jenna tajji temmalem: < ssuh d as n anzar. > tetesnem mammeḵ taydel as seg ujenna. amma witetquddumc afehmem lmuƹjizaṯiw lliy yeseḵen disneṯ rebbiy g ayuh n ussan. 4ljiyl lkafer lliy wiyeḥli idelleb g lmuƹjizaṯ. amma wisentetis kan lmuƹjizaṯ n nnabiy yuwnes.» wembeƹd ireḥ yedjin.
tenfust n lxmireṯ n iferysiyyen aḏ iṣedduwqiyiyen
5mniyn uṣellen tlamḏes al ljiheṯ ttani ttun awyen aγrum. 6lweqt ḏḏin yuwa yesuwƹ: «rreṯ lbaluwem seg lexmireṯ n iferysiyyen aḏ iṣedduwqiyiyen.» 7yaxy uḏellen sestunen g beƹḍhum: «ima yuwa ayuh, balek afelxaḍert widnuγic iḏenneγ aγrum.» 8yefhemin yesuwƹ yuwayasen:
«ayya lliy liymanuwem ḍƹiyf, maγer tetxemmemmem g aγrum? 9yaxy wicci witefhimemc? naγ tettum aydin n 5 n tiqurseṯin lliy seccebƹeneṯ 5000, aḏ mennit tƹebbim d tiƹellegin seg lfeḍlesneṯ? 10naγ tettum aydin n 7 n tiqurseṯin lliy secbƹeneṯ 4000, aḏ mennit d isnen tƹebbim seg lfaḍlesneṯ? 11mammeḵ witfehmemc lliy neči widdugixc af aγrum mniyn uwiγawem: rreṯ lbaluwem seg lxmireṯ n iferysiyyen aḏ iṣedduwqiyiyen?» 12lweqt ḏḏin fhemmen lliy netta yexs asenimel: «rreṯ lbaluwem seg seƹzem n iferysiyyen aḏ iṣedduwqiyiyen.»
cekkin d lmesiyḥ memmis n rebbiy lliy yedder
13mniyn yuṣel yesuwƹ al leḍraf n qeyṣeriya filibbi, ysesten tlamḏes: «matta mmalen midden fella neči lliy yeḏwel d bnaḏem.» 14uwanas: «lbeƹḍ mmalen cek d yaḥya lmeƹmedan, aḏ lbeƹḍ ammalen cek d nnabiy iyliya, aḏ ttenyaṯ mmalen: cek d nnabiy irmiya naγ d yjen seg lenbiya.» 15ysesetnin: «aḏ kennim matta temmalem fella.» 16yerras simƹan buṭrus, yuwa: «cek d lmesiyḥ memmis n rebbiy lliy yedder.» 17yuwayas yesuwƹ:
«ayya sseƹdiḵ ay simƹan memmis n yuwnes. ayuh isiḵneḵtiḏ baba lliy g ujenna muc d bnaḏem. 18aḏ neči zada afemleγ: cekkin d teḍγeγt aḏ af ayuh n teḍγeγt taggeγ lmejmeƹ y neči lliy ḥetta burriƹ n temettent wiγarc ssulṭeṯ felles. 19aḏ tafuceγ tinisa n lmelekuwt n ujenna aḏ sulṭeṯ n uḥellel aḏ uḥerrem g tammurt aḏ ujenna.» 20wembeƹd yuwa y tlamḏes: «rreṯ lbaluwem amlem y ḥed lliy d neči d lmesiyḥ.»
lmesiyḥ yedugga af tmettentis aḏ tineḵris
21seg lweqt ḏḏin yuḏel yesuwƹ yemmal y tlamḏes lliy yelzemmas ayreḥ al uwrceliym, we yeƹena seg uƹeḏḏeb af ifesn n iwessaren aḏ imeqqaren n lkuhhan aḏ lliy seḥfeḍen g cceriyƹeṯ, we ayemmunγ. aḏ g as wi 3 tayekker. 22yaxy yenzaγiy buṭrus af ljiheṯ yuwayas: «ḥacaḵ, ayya siydneγ kan afiṣar ayuh.» 23yenneḍ yesuwƹ al buṭrus yuwayas: «bƹeḏ seg zzaṯiw, ayya cciyḍan, cekkin d ymir zzaṯiw afelxaḍert cekkin tdebƹeḏ matta xsen midden aḏ tettetuḏ matta yexs rebbiy.»
matta tayestenfeƹ bnaḏem lmi yexser imanis?
24wembeƹd yuwa yesuwƹ y tlamḏes:
«lliy yexs ayeyyur defferiw, yexs ayettu imanis we ayeṣber af lƹeḏeb n ṣṣelib we alyeḏbeƹ. 25kul yjen yexs ayesteḥfeḍ af imanis tayexser, lekenti lliy tayexser imanis afelxaḍriw, tatetyaf. 26matta tayestenfeƹ bnaḏem kan yerbeḥ ddunyeṯ lkul aḏ yexser imanis? rahiy ḥetta cey wiyetquddu astadyer.
27neči lliy yeḏwel d bnaḏem tadeseγ yid lmejd n baba aḏ lmleykas. we aḏuceγ y kul yjen lliy yestahel. 28lḥeq afenemleγ: lbeƹḍ n lliy bbedden deh witmetinc qebbel man alzren neči lliy yeḏwel d bnaḏem tteseγd am lmelik.»
© 2025 Chutney Media Agency Ltd for the audio recording and for the text upon which the recording is based. The audio recording and the text are both released under a Creative Commons 4.0 CC BY-NC-ND license (Attribution - No-Commercial - No Derivatives).