Acts 7
7
lxuṭbeṯ n istifanus
1ysesten rreyes n lkuhhan istifanus: «ayuh n dwiy lliy uwant fellaḵ nembelḥeq naγ aha.» 2yaxy yerras:
«ayya yeṯma, ayya iḏbaba, sseγdeṯ: yeḍherred rebbiy n lmejd y babenneγ ibrahiym g tammurt lliy jar lwiḏan, qebbel man ayerzef we ayesken g ḥaran. 3yuwayas rebbiy: «ffeγ seg tammurtiḵ aḏ midniḵ treḥḥeḏ al tammurt lliy taftedsiḵneγ.» 4yeggi s dwiys. yeffeγ seg tammurt n ikeldaniyen. yesken g ḥaran almiy yemmuṯ babis.
wembeƹd yuγettiḏ rebbiy al ayuh n mkan lliy tseknem diyes ṭuruh. 5aḏ wisyucic ḥetta ciy seg lmelk n ddunyeṯ. wisyucic ḥetta d cebber n tammurt deh. amma yuƹeḏ tasyuc tammurt tuwh y netta aḏ ṭarwas beƹdis. aḏ netta yusi wicci wiγrec imeckenen. 6yuwayas rebbiy lliy ṭarwa n ṭarwas taƹanan seg lγurbeṯ g tammurt muc nnasen 400 d isuggasen. we aḏulen d lƹebiyd we aḏellen. 7lekenti taƹeqbeγ indin lliy tateneggen d lƹebiyd. wembeƹd tafγen bac adesen alzellen g ayuh n mkan.
8aḏ yuwa rebbiy y ibrahiym aydehher ṭarwas d lemereṯ n lƹehd lliy yeggi yiḏes. yaxy ydehher ibrahiym isḥaq g as ṯṯamen. aḏ ydehher isḥaq memmis yeƹquwb. aḏ ydehher yeƹquwb ṭarwas s ṯnac aḏ nihnin d ibaben n aṯ israyil.
9aḏ ibaben n aṯ israyil lliy nihnin d aweṯen n yuwsef nγerren siyes. aḏ zenzent d lƹebd g miṣr. lekenti rebbiy yusi yiḏes. 10aḏ ysemenƹi seg lmṣayeb lkul lliy ƹeddaneṯ af ixfis aḏ yucas nnaƹmeṯ aḏ tmesniwt zzaṯ ferƹuwn lmelek n miṣr. yaxy yeggi d lḥakem af miṣr aḏ af leqṣuris.
11aḏ tƹedda af miṣr aḏ kenƹan zemmeṯ aḏ ḍḍiq d meqqar. yaxy wiḏufinc ibabnenneγ man ačan. 12yesla yeƹquwb lliy g miṣr diyes irden, yenkiyas ibabnenneγ tijekkelt temezwert. 13mniyn iƹaweḏ yenkiyin tijekkelt iḍen, yuwayasen yuwsef d mam netta. aḏ yesla ferƹuwn s leṣel n yuwsef.
14yenkiy yuwsef y babis bac adyas al miṣr netta aḏ nnasenis lliy wsiyn lkulhum 75. 15yused yeƹquwb al miṣr. aḏ yqqim diyes netta aḏ ibabnenneγ almiy muṯen. 16aḏ ḥewlenten al cakiym. aḏ dfenenten g leqber lliy yesγi ibrahiym s lfejreṯ af leƹcireṯ n ḥamura bab n cakiym.
17mniyn ḥaḍarbac tayeg rebbiy lliy yuƹeḏ siyes ibrahiym, yusi leƹded n israyiliyen yerniy ggeṯ g miṣr. 18aḏ yused lmelk d jdiḏ wiyiwiḍc af yuwsef. 19yaxy iƹeddayiṯ af ibabnenneγ aḏ idurrin almiy selmen g imeckenesen bac ammuṯen.
20ussan diyn yluled muwsa. aḏ yusi yezƹem ggeṯ. rebbent ibabnis 3 chuwr γarsen. 21mniyn yemluweḥ, testebnat yellis n ferƹuwn tessima diyes am memmis. 22yeḥfeḍ muwsa leƹlum n miṣr lkul yeḏwel d lfeleḥ g dwiy aḏ lxeḏmeṯ.
23mniyn yeḏwel lƹemris 40 d isuggasen, yexderras ijuwas bac ayḥekker leḥwal n yeṯmas seg aṯ israyil. 24yaxy yezra yjen yetcaṯ diyes miṣri, iḥama fellas, iwet miṣri yenγi. 25aḏ idun lliy yeṯmas tafehmen lliy rebbiy tatenisemneƹ af ifesnis. lekenti nihnin wifhimenc.
26al ača, yufa sen sisen tnuγun, yserḥin. aḏ yuwayasen: < ayya irgazen kennim d aweṯen, ima teteṯƹeddim af beƹeḍkum. >
27yaxy lliy yeḍlem rnawis iduzzi yuwayas: < mam yeggaḵ fellenneγ d rreyes aḏ d lqaḍi jarenneγ? 28yaxy texseḏ altenγeḏ mammeḵ tenγiḏ miṣri aseneṭ?> 29mniyn yesla muwsa ayuh n dwiy yerwel seg miṣr, ireḥ al midyan mani yedder d aγrib. aḏ diyes yuγed sen imeckenen.
30beƹd 40 d isuggasen, mniyn yusi muwsa g ṣṣeḥreṯ n siyna, yeḍherresd lmleyka n rebbiy g uhebluj n timsi seg tceƹƹelt teseγa. 31ifeh muwsa mniyn yezra aydin. aḏ mniyn ireḥ bac ayḥekker, yesla rebbiy yemmalas: 32<neči d rebbiy n ibabniḵ, rebbiy n ibrahiym aḏ isḥaq aḏ yeƹquwb. > yaxy yerjij muwsa aḏ wiqudc ayerni ayḥekker.
33yuwayas rebbiy: < kkes lbeleγtiḵ rahiy cek g mkan d meqdus. 34rahiy neči zriγ leƹḏab n cceƹbiw g miṣr, aḏ sliγ kuttusen. yaxy zwiγd bac atensemenƹeγ. yya yella, qa tafnekyeγ al miṣr. >
35rahiy muwsa lliy wirlinc siyes midden aḏ uwanas: < mam yeggaḵ d rreyes fellenneγ aḏ d lqaḍi jarenneγ?> d netta lliy yenkiyi rebbiy d rreyes bac atenisemneƹ aḏ yiḏes lmelek n rebbiy lliy yeḍherresd g tceƹƹelt.
36aḏ yseffeγ midden seg miṣr aḏ netta iteg g lmuƹjizaṯ d lemayer aḏ leγrayeb diyes aḏ g iylel zuggaγ aḏ g ṣṣeḥreṯ n siyna 40 d isuggasen. 37aḏ muwsa d netta lliy yuwa y aṯ israyil: < rahiy rebbiy tafenyenkiy yjen seg yeṯmewem d nnabiy am neči. > 38d netta lliy yusi yiḏesen g lmejmeƹ g ṣṣeḥreṯ. aḏ d netta lliy yusi yid lmleyka n rebbiy lliy yduggeyas af jbel n siynay. aḏ d netta lliy yelqa s γares dwiy n tmeddurt bac aγentiḏiseṣel. 39amma ibabnenneγ bbedenas aḏ wiqqilen atḏebƹen. aḏ smuḏen taḏulen al miṣr.
40aḏ uwan y haruwn asenyegga irebbiyen bac ayuren zzaṯesen. aḏ uwanas: < rahiy winessinc mag iṣar y ayuh n muwsa lliy ysefγeneγ seg miṣr. > 41yaxy ggen ṣembeṯ am ugenduz g ussan diyn aḏ aγresnas. aḏ freḥḥen s mag ggen.
42yaxy yedjin rebbiy tẓallan y iṯran n ujenna mammeḵ yetweri g lektub n lenbiya:
<yaxy teγresemiḏ g ṣṣeḥreṯ naγ tucimiḏ lweƹdeṯ
g ayuh n 40 d isuggasen ay ya aṯ israyil?
43aha, amma tqamem lƹecceṯ n lmuluk,
aḏ ṣembeṯ n iṯri n remfan lliy d rebbiywem.
ayuh n leṣnam lliy teggimten d irebbiyen tetzellimesen.
qa tafenzeƹezqeγ al mkan yebƹeḏ iṭer n babel. >
44aḏ qamen ibabnenneγ g ṣṣeḥreṯ lƹecceṯ n lƹehd lliy yuwa rebbiy y muwsa bac atetyeg mammeḵ isiḵnas. 45wembeƹd uḏeffen siyes al ayuh n tammurt mniyn yusi yecuwƹ d lqeydesen. aḏ yusi rebbiy izeƹzeq lliy seknen diyes seg zzaṯesen. aḏ teqqim diyn al ussan n dawud. 46dawud lliy yerla felles rebbiy aḏ yeḍleb: < ay rebbiy n yeƹquwb, adj afeggeγ mkan d meqdus. > 47aḏ iṣar ayuh af ffus n suleyman lliy yebna lheykel.
48lekenti rebbiy lliy yeƹla wisekkenc g lbni lliy ggenten ifesn n midden mammeḵ yuwa af imi n nnabiy.
49<jenna d lkursiyiw,
tammurt d teƹeffest n dariw.
matta zeγ teltebnim?
matta taggem bac alireyeḥ?
50yenda muc s fusiw ggiγ ayuh n iḥjeyen lkul. > »
51aḏ yuwa istifanus: «ayya lliy ixfewnewem qṣeḥḥen, ayya lliy ulawnewem aḏ tmezuγinuwem qeṣen am lkuffar. kennim tetḥarabem g rruwḥ lqudus am ibabnuwem. 52mantan seg lenbiya yemneƹ seg ḍulmesen? nihnin nγen lliy usend tbecren s ysa n lliy weḥdes d ṣbiḥ. aḏ kennim tucimt bac atenγen. 53rahiy kennim telqim cceriyƹeṯ seg ifesn n lmleyka aḏ witeggimc siyes.»
temettent n istifanus
54mniyn slen lliy ḥderren dwiys, teḍresen ggeṯ aḏ aqimen tmeγzezen felles. 55yečur s rruwḥ lqudus. iqam istifanus ixfis al ujenna. yaxy yezra lmejd n rebbiy aḏ yesuwƹ yebbed af liminis. 56yuwa: «zerreγ g ujenna imir aḏ lliy yeḏwel d bnaḏem yebbed af limin n rebbiy.»
57yaxy ṣleḥen timezuγinesen, aḏ ṣeyḥen jmiyƹ. aḏ hjemen felles g lweqt yjen. 58zeƹezqent seg tmura bac tḥdefent s iḍγaγen. aḏ ccuhhaḏ kkesen ibernesesen zzaṯ yjen d mezyan ismis cawel.
59mniyn wsiyn ḥedfen diyes yusi netta yemmal: «ay siydneγ yesuwƹ, qbel rruwḥiw.» 60aḏ yesjeḏ, yuwa s ṣṣut qwi: «ay rebbiy, wisenḥesebc ayuh n bekkeḍu.» mniyn yuwa ayuh qebesneṯ ṭiṭawinis.
© 2025 Chutney Media Agency Ltd for the audio recording and for the text upon which the recording is based. The audio recording and the text are both released under a Creative Commons 4.0 CC BY-NC-ND license (Attribution - No-Commercial - No Derivatives).