Makətūbə̄ yā Nehemi 1
1
1Najə̄ kɔr̄ Nehemi kə́ ngōn̄ Hakalia.
Nehemi oō najə̄ kə́ dɔ ɓē kə́ Jerusalem tə́
Kem ɓāl̄ kə́ nge ko̰ kutə jōó tə́ ń Artajerses o̰o̰ń ɓē tə́ ní kə nāā *Kislew anī, mā Nehemi m̄-ndi i Sujə ń i ɓē kə́ ngan̄g ní tə́. 2Ngōkó̰ó̰ḿ kógə̄ḿ kə́ dan madə̄ gə̄ tə́ ń rīn na i Hanani ní ḭḭ gō nang kə́ *Juda tə́ reē kə de kə́rēý gēé seneé. M-dəjedə́ kōō *Jipə gə̄ ń tél aw̄ ndin̄ Jerusalem ní ō, m̄-dəjedə́ najə̄ kə́ dɔ ɓē kə́ Jerusalem tə́ ō. 3Anī nin̄ tél ədamə̄n̄ na de gə̄ ní na ndin̄ na i gō nang kə́ Juda tə́. Banī ndin̄ na i dan yá̰á̰ kə́ to kum kaȳ aĺ kə́ ngá̰ý tə́ ō, kum rɔ̄sɔl̄ tə́ ō. Kə́ tām̄ yā ɓē kə́ Jerusalem tə́ ɓá anī ndogə̄ mbal̄ ń ənīn̄ dɔ tə́ ní dāmə̄n kə́rēý gə̄ na i kə́ tétə̄ nang tə́ kɔ̄ɔ́ ō, bápə gə̄ kə́ ta róbə gə̄ tə́ na i kə́ kəla hor dɔ tə́ kɔ̄ɔ́ ō.
Nehemi ndɔ̄ȳ Nə́ɓā tām̄ yā Jipə gə̄ tə́
4Dan ń m-ōō najə̄ ń gə̄ noō ní m̄-ndi nang tə́ m̄-nōō ō, m-ə́hɔ ndoō ndɔ̄ ngá̰ý ō, m̄-*ndi ɓō tām̄ yā Nə́ɓā tə́ ō. m̄-ndɔ̄ȳ Nə́ɓā kə́ dɔ rā̰ tə́ 5m-ə́da na: Á, Kɔ́ɔ̄ɓē Nə́ɓā kə́ dɔ rā̰ tə́, Nə́ɓā kə́ bo ō, kə́ to ɓōĺ ngá̰ý ō! Ngé gə̄ ń tár̄nī ō, rāān̄ gō míndə gə̄ ń ə̄ndā dɔdə́ tə́ kadə̄ rāān̄ ní ō ní, ḭ̄ ə́ya̰ *madə̄ naā yāí ādə̄ to gotoó sedə́ ō, ī-ra dɔ ndūí tə́ sedə́ ō. 6Ī-tūr̄ kumií kə̄ rɔ̄ḿ tə́ ba ī-nēl̄ mbīí ōoń ndɔ̄ȳ yāḿ mā nge kəla yāí. Ngɔlaā ní m̄-ndɔ̄yī ndɔ̄ɔ́ ō, kadaá ō, tām̄ yājí jḭḭ ngán *Israel gə̄ ń i ngé kəla yāí gə̄ tə́ ní. m̄-dəjeī kadə̄ ī-mā̰ȳ rɔ̄í dɔ yá̰á̰ kə́ gōtə́ aĺ gə̄ ń jə-rāā tə́ ní. Rɔ̄kum, mā nəkɔ́ ō, kaaḿ gə̄ ō, jə-rāā yá̰a̰ majaĺ. 7Jə-rāā yá̰a̰ adə̄ tōrī tɔdɔ̄ yá̰a̰ gə̄ ń ə̄ndā ta nge kəla yāí Moijə tə́ kadə̄ ədají á i gō míndə gə̄ ń ə̄ndā dɔ jí tə́ kadə̄ jə-rāā ní ō, yá̰a̰ gə̄ ń *ndū najə̄ əda ní ō, yá̰a̰ kāgə̄ ɓē gə̄ ō ní, jḭḭ jə-rāā alé. 8Ɓá tā ba ādə̄ əga kemií dɔ najə̄ ń ə̄ndā ta nge kəla yāí Moijə tə́ ādə̄ əda ní. Ni ədají na ré jə-ra dɔ ndūjí ń j-ənī j-adī tə́ ní aĺ anī ḭ̄ na ā ī-tə̄ndā yā tḭ̄ḭ̄jí kə̄ loo gə̄ tə́ dan gír de gə̄ tə́. 9Banī ré gō tə́ jə-tél jə-reē gogə́ rɔ̄í tə́ ba jə-ngɔ̄m̄ gō míndə gə̄ ń ə́dájí kadə̄ jə-rāā ní ō, jə-rāādə́ ō anī, ká ré ɔyn̄jí aw̄n̄ sejí i ta ngóy dɔ rā̰ tə́ gə̄gē anī, ḭ̄ na ā āw̄ gōjí tə́ yā reē sejí loo ń ī-gə̄rā yā kadə̄ rīí i dɔ tə́ ní tə́. 10Kɔ́ɔ̄ɓē, jḭḭ i ngé kəla yāí gə̄, jḭḭ i gír deē yāí gə̄! I jḭḭ ń toō n ī-gān̄g dɔjí kə ta kūl̄ tɔ́gí kə́ ngá̰ý ō, kə ta kūl̄ tɔ́gə jīí ō ní. 11Kɔ́ɔ̄ɓē, m̄-rāāī ɓɔ́, ī-nēl̄ mbīí ōoń ndɔ̄ȳ yāḿ mā nge kəla yāí ō, ndɔ̄ȳ yā gotə ngé kəla yāí kə́ rang gə̄ ń rɔ̄də́ nel̄də́ loo ɓōĺ ndūí tə́ ní ō. Ī-rāā ādə̄ yá̰á̰ ń m-ā m̄-rāā loon ɓōólaā ní teē yá̰a̰ ō, ī-rāā ādə̄ dəngam ń noō rāā kem majə seḿ ō.
Dan ngeé ń noō tə́ ní mā i nge kadə̄ mban̄g yá̰a̰ ka̰ȳ.
Currently Selected:
Makətūbə̄ yā Nehemi 1: BS
Highlight
Share
Copy
Want to have your highlights saved across all your devices? Sign up or sign in
© 2006, 2010 Alliance Biblique du Tchad