Makətūbə̄ yā Esdras 10
10
Jipə gə̄ mbātə́n̄ nə̄yá̰də́ kə́ tə̄rā gə̄
1Dan ń Esdras tétə̄ kejən nang tə́ ta *kújə yā Kɔ́ɔ̄ɓē tə́ ba ndi a nōō ō, a ndɔ̄ȳ Nə́ɓā ō, a dəje Nə́ɓā mā̰ȳ rɔ̄ ō ní anī, *Israel gə̄ ngá̰ý, kə́ dəngam gə̄ kə kə́ dəyá̰ gə̄ kə ngán gə̄ kánə̄n̄ naā kə̄ dɔn tə́. Nin̄ malang nōōn̄ ngá̰ý kə man̄ kumdə́. 2Anī Sekania kə́ ngōn̄ Yehiel ń i de kə́ gír kaa yā Elam tə́ ní, əda Esdras na: Jə-rāā yá̰á̰ kə́ gōtə́ aĺ ngá̰ý kə Nə́ɓā yājí, tām̄ jə-táā dəyá̰ tə̄rā gə̄ dan de kə́ kem ɓēé gə̄ tə́. Banī kə́ ngɔr ń toō tə́ ɓáa yá̰á̰ kə́ kadə̄ Israel əndā kemən dɔ tə́ to noó: 3Ādə̄ j-ənī ndūjí j-adə̄ Nə́ɓā yājí kadə̄ jə-tə̄ɓā dəyá̰ kə́ tə̄rā gə̄ kɔ̄ɔ́ malang kə ngáńdə́ gēé. I beé n j-a j-unəń gō kɔjə̄ yāsí ń ngé ɓōĺ gō míndə Nə́ɓā yājí ō ḭ̄ ō ādījí ní. Ādə̄ i kə́ rāā tītə̄ ń ndū najə̄ ədań ní. 4Ḭ́ḭ dɔɔ́ tɔdɔ̄ najə̄ ní sɔɔ̄ī. Jḭḭ i seí. Ī-lōō kə hə́yā ba údə kə̄ rɔ̄ kəla tə́ ī-rāā.
5Loo ń noō tə́ Esdras ḭḭ ba ra kə ngār gə̄ yā *ngé tun̄ yá̰a̰ gə̄ ō, yā *ngán Lebi gə̄ ō, ngār gə̄ yā ngán Israel gə̄ malang ō, kadə̄ ənīn̄ ndūdə́ yā rāā tītə̄ ń Sekania ədań ní. Adə̄ nin̄ malang ənīn̄ ndūdə́. 6Esdras ḭḭ kɔ̄ɔ́ ndágə loo kə́ ta *kújə yā Kɔ́ɔ̄ɓē tə́ ba aw̄ ndi ɓē Yohanan kə́ ngōn̄ Eliasib. Banī ni-mbātə́ kəsa yá̰a̰ ō, mbātə́ ka̰ȳ man̄ ō, tɔdɔ̄ əhɔ ndoō i tām̄ háĺ kə́ gōtə́ aĺ ń ngé kaw̄ ɓəloó gə̄ rāān̄ tə́ ní.
7Gō tə́ anī ənīn̄ mbēr̄ Jerusalem ō, dɔ nang kə́ *Juda tə́ ō, kadə̄ de gə̄ malang ń aw̄n̄ ɓəloó ní kánə̄n̄ naā Jerusalem. 8Deē ń ngār gə̄ ō, de kə́ bo gə̄ ō, a adə̄nən̄ ndɔ̄ mətá yā reēń tá reē aĺ ní, a ɔyn̄ yá̰a̰ kənge yān gə̄ malang ō, a ɔr̄nən̄ kɔ̄ɔ́ dan ngé kán̄ naā gə̄ tə́ ō.
9Adə̄ dan ń ndɔ̄ kə́ mətá gə̄ ní asə anī de kə́ dəngam gə̄ kə́ *Juda tə́ ō Benjamḛ tə́ ō əngen̄ naā malang Jerusalem. I kə ndɔ̄ kə́ nge ko̰ kutə jōó yā nāā kə́ nge ko̰ ndōhó. Nin̄ kánə̄n̄ naā i loo ń *kújə yā Nə́ɓā i tū tə́ ní tə́. De gə̄ malang ndewn̄ tām̄ yá̰á̰ ń noō tə́ ō, tām̄ man̄ kə́ a edə tə́ ō. 10Esdras *nge tun̄ yá̰a̰ ḭḭ dɔɔ́ ba ədadə́ na: Sḭḭ̄ ī-rāāī yá̰a̰ gōtə́ aĺ bátə́ ō, dəyá̰ tə̄rā gə̄ ń ī-táaī ní rāān̄ adə̄ majaĺ yā *Israel i ngá̰ý tɔȳ kə́ kété gə̄ ō. 11Ngɔlaā ní ə́daī Kɔ́ɔ̄ɓē Nə́ɓā yā kaasí gə̄ yá̰á̰ kə́ gōtə́ aĺ ń ī-rāāī ní ō, ī-rāāī yá̰á̰ ń kemən ndigə ní ō. Ɔ̄rī rɔ̄sí kɔ̄ɔ́ rɔ̄ de kə́ kem ɓēé gə̄ tə́ ō, ī-mbātíī nə̄yá̰sí kə́ tə̄rā gə̄ kɔ̄ɔ́ ō.
12Ngé kán̄ naā gə̄ malang tūr̄ ədan̄ kə tɔ́gɔ́ na: Najə̄ yāí i gōtə́, ta i dɔjí tə́ kadə̄ jə-rāā yá̰á̰ ń ə́da ní! 13Banī jḭḭ i ngá̰ý ō, loo i ɓar adə̄ man̄ a edə i mbée ō. Adə̄ loo ra ndágá gətóo. Tá ɓáý to̰ ní najə̄ ní i najə̄ kə́ yā kəndā naā tə́ i kem ndɔ̄ kógə̄ḿ aĺ ō jōó aĺ ō, tɔdɔ̄ jḭḭ gə̄ ń jə-rāā majaĺ ń noō ní kutəjí i ngá̰ý . 14Ní jə-dəje kadə̄ ngār yājí gə̄ ndin̄ tām̄ yā ngé kán̄ naā gə̄ tə́ kadə̄ ngán *Israel gə̄ malang ń táān̄ dəyá̰ tə̄rā gə̄ ní ré ndɔ̄ ń adə̄n̄də́ ní asə anī reēn̄ kə *kum kɔɔ̄ gə̄ ō, ngé sarya gə̄ ō kə́ kem ɓē yādə́ gə̄ tə́ yā kəndā najə̄ ní naā tə́ bátə́ kadə̄ wōn̄g ń rāā Nə́ɓā yājí sejí tām̄ najə̄ ń noō tə́ ní tetəń.
15Ba Yonatan kə́ ngōn̄ Asael ō, Yajia kə́ ngōn̄ Tikəba ō, mbātə́n̄ gír̄ yādə́ ń noō kɔ̄ɔ́ ō, tá Mesulam ō, Sabetai kə́ ngōn̄ *Lebi ō ɔsən̄ gír najə̄ ní ō. 16Banī gotə *Israel kə́ rang gə̄ ń ḭḭn̄ ɓəloó ní tītə̄ ń Esdras ō, gotə ngé kán̄ naā gə̄ ō ədan̄neé ní. Esdras *nge tun̄ yá̰a̰ gə̄rā de gə̄ kə́ dɔ gír kojə gə̄ tə́ kə rīdə́ gēé kógə̄ḿ kógə̄ḿ, kə dɔ gír kaa gēé. De gə̄ ní əngen̄ naā loo sarya tə́ kə ndɔ̄ kə́ ta kəga dɔ yā nāā kə́ nge ko̰ kutuú yā kəndā najə̄ ní naā tə́. 17Ba kə ndɔ̄ kə́ ta kəga dɔ yā nāā kə́ ta kəga dɔ kə́ kem ɓāl̄ kə́ gogə́ tə́ anī gír najə̄ yā ngé táā dəyá̰ tə̄rā gə̄ gān̄g.
Rī Jipə gə̄ ń najə̄ i dɔdə́ tə́ ní
18Dan *ngé tun̄ yá̰a̰ gə̄ tə́ ní ngé táā dəyá̰ tə̄rā gə̄ n toó: De gə̄ kə́ dan ngán Yesua kə́ ngōn̄ Yosadak tə́ kə ngákó̰ó̰də́ gēé i Maseya ō, Eliejer ō, Yarib ō, Gedalia ō. 19Nin̄ ənīn̄ ndūdə́ yā tə̄ɓā nə̄yá̰də́ gə̄ kɔ̄ɔ́ ō, yā kadə̄ bal batə̄ kə́ yā tun̄ tām̄ yā majaĺ tə́ ō. 20De kə́ dan ngán Imer tə́ gə̄ i Hanani ō Jebadia ō. 21De kə́ dan ngán Harim tə́ gə̄ i Maseya ō Elia ō Semaya ō Yehiel ō Ujia ō. 22De kə́ dan ngán Pasəhur tə́ gə̄ i Elyohenai ō Maseya ō Ismael ō Netanel ō Yojabad ō Elasa ō. 23De gə̄ kə́ dan *ngán Lebi gə̄ tə́ i Yojabad ō Simei ō Kelaya ń ɓāŕnən̄ na i Kelita ní ō Petahia ō Yehuda ō Eliejer ō.
24De kə́ dan gōsə̄ pā gə̄ tə́ i Eliasib.
De gə̄ kə́ dan ngé ngɔ̄m̄ ta róbə́ kújə gə̄ tə́ i Salum ō Telem ō Uri ō.
25Kə́ sɔɔ̄ dɔ ngán *Israel kə́ karī gə̄ ní, de gə̄ kə́ dan ngán Paros tə́ gə̄ i Ramia ō Ijia ō Malkia ō Miamin ō Elajar ō Malkia ō Benaya ō. 26De kə́ dan ngán Elam tə́ gə̄ i Matania ō Jakari ō Yehiel ō Abədi ō Yeremot ō Elia ō. 27De gə̄ kə́ dan ngán Jatu tə́ gə̄ i Elohenai ō Eliasib ō Matania ō Yeremot ō Jabad ō Ajija ō. 28De kə́ dan ngán Bebai tə́ gə̄ i Yohanan ō Hanania ō Jabai ō Atəlai ō. 29De gə̄ kə́ dan ngán Bani tə́ gə̄ i Mesulam ō Maluk ō Adaya ō Yasub ō Seal ō Yeremot ō. 30De kə́ dan ngán Pahat Moab tə́ gə̄ i Adəna ō Kelal ō Benaya ō Maseya ō Matania ō Besalel ō Binui ō Manase ō. 31De kə́ dan ngán Harim tə́ gə̄ i Eliejer ō, Isia ō Malkia ō Semaya ō Simon ō 32Benjamḛ ō Maluk ō Semaria ō. 33De kə́ dan ngán Hasum tə́ gə̄ i Matenai ō Matata ō Jabad ō Elipelet ō Yeremai ō Manase ō Simei ō. 34De kə́ dan ngán Bani tə́ gə̄ i Maadai ō Amram ō Uwel ō 35Benaya ō Bedia ō Keluhu ō 36Bani ō Meremot ō Eliasib ō 37Matania ō Matenai ō Yasai ō 38Bani ō Binui ō Simei ō 39Selemia ō Natan ō Adaya ō 40Makənadebai ō Sasai ō Sarai ō 41Ajarel ō Selemia ō Semaria ō 42Salum ō Amaria ō Jəjep ō. 43De gə̄ kə́ dan ngán Nebo tə́ gə̄ i Yeyel ō Matitia ō Jabad ō Jebina ō Yadai ō Joel ō Benaya ō.
44De gə̄ ń noō malang táān̄ dəyá̰ tə̄rā gə̄. Kə́rēý gə̄ ojən̄ ngán gə̄ sedə́ gə̄gē.
Currently Selected:
Makətūbə̄ yā Esdras 10: BS
Highlight
Share
Copy
Want to have your highlights saved across all your devices? Sign up or sign in
© 2006, 2010 Alliance Biblique du Tchad