Makətūbə̄ yā Jakari 4
4
Yá̰á̰ kə́ nge ko̰ mí i ɗəra hor gə̄ ō, kāgə̄ olibə gə̄ ō
1*De kə́ dɔ rā̰ tə́ ń əndān̄ dɔn tə́ kadə̄ ɔr̄ najə̄ seḿ ní, reē ndólə̄m̄ tītə̄ kə́ m̄-to m-ā m̄-ɓīī i mbée beé. 2Ni dəjem̄ najə̄, əda na ké m-á̰a̰ i rí wa. Anī m̄-téĺ m-ə́dan na m-á̰a̰ i kāgə̄ ɗəra hor kə́ rāān̄ kə lɔ́rɔ́, ba jóo yibə̄ i ta tə́. Lámba gə̄ i sīrí ta kāgə̄ hor ní tə́ ō, ta ndo̰ hor gə̄ i sīrí tū lámbá kə́ kógə̄ḿ beē tə́ ō. 3*Kāgə̄ olibə gə̄ i jōó kadə jóo yibə̄ ní tə́. Kógə̄ḿ i kadən kə́ dām̄ kə́ ko̰ó̰ tə́ ō, kə́rēý i kadən kə́ dām̄ kə́ geleé tə́ ō. 4*De kə́ dɔ rā̰ tə́ ń əndān̄ dɔn tə́ kadə̄ ɔr̄ najə̄ seḿ ní, m̄-dəjen najə̄ m-ə́da na Kɔ́ɔ̄ɓē yāḿ, nge ń noō ní ɔsə i kum gotə rí? 5Anī ní tél dəjem̄ na ké m̄-ger̄ kum nge ń noō aĺ wa? Anī m-ə́dan na: A̰ á̰. 6aAnī ni ɔjəm̄ kum əda na:
10bLámbá kə́ sīrí gə̄ ɔsən̄ i kum gotə Kɔ́ɔ̄ɓē. Nin̄ əndān̄ kumdə́ gír dɔ nang tə́ kə taá malang. 11m̄-tél m̄-dəjen ɓáý to̰ m-ə́da na *kāgə̄ olibə gə̄ kə́ jōó gə̄ ń kógə̄ḿ i kadə kāgə̄ hor tə́ dām̄ kə́ ko̰ó̰ tə́ ō, kə́rēý i kadən tə́ dām̄ kə́ geleé tə́ ō ní, ɔsən̄ i kum gotə rí? 12m̄-dəjen najə̄ ń toō ō m-ə́da na: Ba ta jī kāgə̄ olibə kə́ jōó gə̄ ní, ɔsən̄ i kum gotə rí? Tām̄ rāān̄ təyōo gə̄ jōó kə lɔ́rɔ́, adə̄ yibə̄ kə́ kə lɔ́rɔ́ a teē ta təyōo gə̄ ní tə́, tū kāgə̄ olibə kə́ jōó gə̄ ní tə́. 13Anī ni-tél dəjem̄ na ké m̄-ger̄ nge ń noō aĺ wa. m̄-téĺ m-ə́dan na: A̰ á̰, Kɔ́ɔ̄ɓē yāḿ. 14Tā anī, ni ɔjəm̄ kum, əda na:
I de kə́ jōó gə̄ ń ɔrə̄n̄ kam̄də́ tayā kə yibīí kadə̄ rāān̄ kəla yā kɔ́ɔ̄ dɔ nang kə taá malang ní.
Kənī míndə gə̄ kə́ tām̄ yā Jorobabel tə́
6b*De kə́ dɔ rā̰ tə́ ní mērə̄m̄ kəda Jorobabel najə̄ ń toō: Najə̄ ń Kɔ́ɔ̄ɓē kə́ bo kə́ tɔ́gən i ngá̰ý əda ní n toó:
Ā ī-rāā yá̰a̰ i kə ta kūl̄ kəhɔ rɔ̄ tɔgə aĺ ō,
i kə ta kūl̄ dɔ́nɔ́ aĺ ō,
banī i kə ta kūl̄ Ndílə́ḿ.
7Ni-əda ɓáý to̰ na:
Mbal̄ kə́ bo ń noō,
i yá̰á̰ kə́ ngan̄g ngá̰ý a?
Jorobabel a rāān yā kadə̄
a téĺ ndágə mbō.
Ni a teē kə mbal̄ kə́ majə
tām̄ kíĺ kújə yā
Kɔ́ɔ̄ɓē tə́ i tū
mbal̄ bo ń noō tə́.
Adə̄ de gə̄ a əgan̄
kɔŕ a ədan̄ na:
Á, i mbal̄ kə́ majə ngá̰ý a̰á̰,
á, i mbal̄ kə́ majə ngá̰ý a̰á̰!
8Kɔ́ɔ̄ɓē əndā najə̄ kə́ rang ń toō taḿ tə́, əda na:
9Jorobabel əndā
ngəra kújə yā Kɔ́ɔ̄ɓē ō,
i ni n a tɔ̄l̄ ta ō ní.
Dan ń yá̰á̰ ń noō a rāā yá̰a̰ anī, ā ī-gerī kadə̄ i Kɔ́ɔ̄ɓē kə́ bo kə́ tɔ́gən i ngá̰ý n əlam̄ kə̄ rɔ̄sí tə́ ní.
10aĪ-lōō kídə̄ kəhɔ rɔ̄ tɔgə
kə́ sḛ́ý beē kə́ ta kəla gíŕ tə́.
Ba majə kadə̄ ī-rāā i rɔ̄nel̄ tá,
dan ń á̰a̰ Jorobabel loo kəla gíŕ
kəndā kújə yā Kɔ́ɔ̄ɓē
gogə́ rang tə́ ní.
Currently Selected:
Makətūbə̄ yā Jakari 4: BS
Highlight
Copy
Compare
Share
Want to have your highlights saved across all your devices? Sign up or sign in
© 2006, 2010 Alliance Biblique du Tchad
