Makətūbə̄ ń Pol ndang adə̄ Rom gə̄ ní 7
7
Nge taā kem Kərist i de kə́ ɔr dɔn kɔ̄ɔ́ gír ndū najə̄ tə́
1Ngákó̰ó̰ḿ gə̄, yá̰á̰ ń m-ā m-ə́dásí toō i yá̰á̰ kə́ sḭḭ̄ kɔ́ gə̄ ī-gerī majə kɔ̄ɔ́ ɓá, tɔdɔ̄ sḭḭ̄ i de kə́ ī-gerī *ndū najə̄ majə. Deē ń *ndū najə̄ i dɔn tə́ ní i de kə́ ndi kə kumneé ɓáý. 2Tītə̄ ń toō ré dəyá̰ taā dəngam anī, dan ń dəngam ndi kə kumneé ɓáý ní, ndū najə̄ ń taā naā i dɔn tə́ ngándáńg, ba ré dəngam oy anī, ndū najə̄ i dɔn tə́ to̰ alé. 3Adə̄ ré taā dəngam kə́ rang dan ń ngaan ndiń kə kumneé ɓáý ní anī, ni-rāȳ i mbée, ba ré dəngam oy kɔ̄ɔ́ anī, *ndū najə̄ ní i dɔn tə́ to̰ alé. Adə̄ ré taā dəngam kə́ rang anī, rāȳ i mbée alé. 4Ngákó̰ó̰ḿ gə̄, yāsí i tītə̄ ń noō ō tām̄ yā ndū najə̄ tə́, tɔdɔ̄ dan ń sḭḭ̄ ī-ɓooī naā kə *Kərist ní, sḭḭ̄ i de kə́ koy kɔ̄ɔ́ gə̄ ō, adə̄ sḭḭ̄ i yā de kə́ rang. Sḭḭ̄ i de gə̄ yā Kərist ń ndól̄ dan de kə́ koy gə̄ tə́ ní kadə̄ jə-rāāiń yá̰á̰ kə́ majə gə̄ tām̄ yā Nə́ɓā tə́. 5Tɔdɔ̄ ré jə-rāāī yá̰a̰ i kə gō kem ndigə yā dā̰ rɔ̄jí anī, ngur yá̰á̰ kə́ majaĺ gə̄ ń ton̄ kemjí tə́ ní, ndū najə̄ ndól̄də́ adə̄ nin̄-rāān̄ kəla rɔ̄jí tə́ kə taá malang. Loo ń noō tə́ jə-rāāī i yá̰a̰ gə̄ kə́ a aw̄n̄ sejí i yā kəlají ta yo tə́. 6Ba ngɔlaā ní yá̰a̰ gə̄ ń i dɔjí tə́ tītə̄ *ndū najə̄ ní, jḭḭ̄ i kə́ koy kɔ̄ɔ́ ta tə́ gə̄, adə̄ ndū najə̄ i dɔjí tə́ to̰ alé. Adə̄ jə-rāāī kəla i kə ta róbə́ kə́ kijə yā *Ndíĺ kə́ Táĺ, banī i kə gō róbə yā ndū najə̄ kə́ ndang makətūbūú to̰ alé.
Ndū najə̄ ō yá̰á̰ kə́ majaĺ ō
7Kumən na i rí? I kadə̄ i *ndū najə̄ n i yá̰á̰ kə́ majaĺ ní a? I tītə̄ ń noō alé. Banī i ndū najə̄ ngóy n rāā á m̄-gerə̄ń yá̰á̰ ń a ɓārə́n̄ na i yá̰á̰ kə́ majaĺ ní. Tītə̄ ń toō ní ré ndū najə̄ əda na:
Ī-ndə̄ngā yá̰a̰ yā madí aĺ anī,
mā m-ā m̄-ger̄ kadə̄ ndə̄ngā yá̰a̰ yā naā i yá̰á̰ kə́ majaĺ alé. 8Dan ń gō míndə gə̄ reēn̄ ɓá ní, yá̰á̰ kə́ majaĺ tetə rɔ̄n gō tə́, ba əndā ngur yá̰á̰ kə́ majaĺ gə̄ malang kemḿ tə́. Tɔdɔ̄ ré *ndū najə̄ gətóo anī, yá̰á̰ kə́ majaĺ rāā rɔ̄n i yá̰á̰ kə́ koy kɔ̄ɔ́ tə́. 9Tām̄ kété dan ń gō míndə gətóó ní, mā m̄-ndi majə. Ba dan ń ndū najə̄ reē ní anī, yá̰á̰ kə́ majaĺ tél ajə ying gogə́, 10ba mā m-óy kɔ̄ɔ́. Gō míndə́ ń i yá̰á̰ kə́ kadə̄ a rāāī ḭ̄ deē kadə̄ ī-ndi kə kumuú ní, yāḿ mā ɓáa tél i yá̰á̰ kə́ reē kə yoó dɔḿ tə́. 11Tɔdɔ̄ dan ń gō míndə reē ní, yá̰á̰ kə́ majaĺ tetə rɔ̄n gōn tə́, ba kɔ́ləm̄ aw̄ seḿ kum yo tə́#7.11 K. 11 Á̰a̰ī Tkg 3.13.
12Adə̄ *ndū najə̄ i yá̰á̰ kə́ majaĺ alé ba i yá̰á̰ kə́ táĺ ō, gō míndə i yá̰á̰ kə́ *táĺ ō, kə́ gōtə́ ō, kə́ majə ō. 13Adə̄ yá̰á̰ ń i yá̰á̰ kə́ majə ní tél reē kə yoó dɔḿ tə́ a? I tītə̄ ń noō alé. I majaĺ n rāā yá̰á̰ ń noō ní. Ni ɔjə kə̄ ndágá kadə̄ ni i yá̰á̰ kə́ majaĺ. Tɔdɔ̄ ni-un yá̰á̰ kə́ majə tɔ̄l̄məń. Loo téĺ ń yá̰á̰ kə́ majaĺ téləń yá̰á̰ kə́ majaĺ ngá̰ý al̄ naā kə ta kūl̄ gō míndə́ ní n noó.
Majaĺ o̰o̰ ɓē dɔ deē tə́
14Jə-ger̄ majə kadə̄ *ndū najə̄ i yá̰á̰ yā Ndíĺ. Ba mā i de kə́ kə dā̰ rɔ̄ḿ ō, mā i ɓəlo yā majaĺ ō. 15Adə̄ yá̰á̰ ń m̄-rāā ní, m̄-ger̄ kum alé, tɔdɔ̄ yá̰á̰ ń m̄-gḛy rāā ní m̄-rāā alé, banī yá̰á̰ ń m̄-gḛy rāā aĺ ngá̰ý ní tá m̄-rāā. 16Ba ré yá̰á̰ ń m̄-gḛy aĺ ní m̄-rāā anī, loo ń noō tə́ ní m̄-ndigə i najə̄ gō *ndū najə̄ tə́ ō, m-ə́da kadə̄ ndū najə̄ i yá̰á̰ kə́ majə ō. 17Adə̄ deē ń a rāā yá̰á̰ ń toō ní, i mā to̰ alé, banī i majaĺ kə́ kemḿ tə́. 18Dan ń mā i ɓəlo yā yá̰á̰ kə́ majaĺ kɔ̄ɔ́ ɓá ní, tɔ́gə́ḿ sḛ́ý kə́ kadə̄ m̄-rāań yá̰á̰ kə́ majə gətóo. m̄-gḛy rāā yá̰á̰ kə́ majə ngá̰ý ɓá tā, ba loo rāān dumə̄m̄ kɔ̄ɔ́. 19Tɔdɔ̄ yá̰á̰ kə́ majə ń m̄-gḛy ní m̄-rāā alé, banī i yá̰á̰ kə́ majaĺ ń m̄-gḛy aĺ ní tá m̄-rāā. 20Ba ré yá̰á̰ ń m̄-gḛy aĺ ní tá m̄-rāā anī, deē ń a rāā yá̰á̰ ń noō ní i mā to̰ alé, banī i majaĺ kə́ kemḿ tə́.
21Loo ń noō tə́ ní *ndū najə̄ ń m̄-teē dɔ tə́ ní n toó: Ré m̄-sāā rāā yá̰á̰ kə́ majanī i yá̰á̰ kə́ majaĺ n m-ásə rāā ní. 22*Ndū najə̄ yā Nə́ɓā nel̄ kemḿ ngá̰ý, 23ba m̄-teē dɔ *ndū najə̄ kə́ rang tə́ kemḿ tə́ ɓáý to̰, kə́ a rɔ̄ɔ̄ ndū najə̄ yā Nə́ɓā ń m̄-ndigə ní kɔ̄ɔ́ kemḿ tə́. Ndū najə̄ kə́ rang ní rāām̄ adə̄ m̄-tél ɓəlo yā yá̰á̰ kə́ majaĺ ń to kemḿ tə́ ní. 24Háy, rɔ̄ ndoō kə́ ba̰ý beē! I náā n a taām̄ jī kə́ nge kəlam̄ ta yo tə́ ń toō ní? 25m̄-ndadə̄ Nə́ɓā kə ta kūl̄ Jeju *Kərist, tɔdɔ̄ ni-taām̄ jī rɔ̄ḿ ngeé ń toō tə́.
Adə̄ mā i ɓəlo yā Nə́ɓā kə gír̄ yāḿ ō, ɓəlo yā majaĺ kə dā̰ rɔ̄ḿ ō.
Currently Selected:
Makətūbə̄ ń Pol ndang adə̄ Rom gə̄ ní 7: BS
Highlight
Share
Copy
Want to have your highlights saved across all your devices? Sign up or sign in
© 2006, 2010 Alliance Biblique du Tchad
