Makətūbə̄ ń Pol ndang adə̄ Rom gə̄ ní 4

Abəraham i yá̰á̰ ndájə̄ yā ngé taā kem gə̄

1Ní, kə j-əda na i rí dɔ kaají Abəraham tə́ tā? I yá̰a̰ rí n ni-ənge ní? 2Ré Abəraham tél de kə́ súmūú ta kum Nə́ɓā tə́ i tām̄ kəla rāān gə̄ tə́ anī, nge ń noō i yá̰á̰ kə́ yā kadə̄ ni a ɔjə rɔ̄n tāmən tə́. Banī ni-asə kɔjə rɔ̄n ta kum Nə́ɓā tə́ alé. 3Tɔdɔ̄ makətūbə̄ əda na i rí? Makətūbə̄ əda na:

Abəraham taā kem Nə́ɓā, adə̄ Nə́ɓā rāān de kə́ gōtə́ tə́ ta kumən tə́ najə̄ taā kem yān tə́#4.3 K. 3: Á̰a̰ī Tkg 15.6.

4Ba deē ń rāā kəla ní nar kəla ń ənge ní i yá̰á̰ kə́ adə̄nən̄ karī alé, ba i yá̰á̰ kə́ sɔɔ̄ kadə̄ ni a ənge gáŕ. 5Ba ré deē kógə̄ḿ rāā kəla aĺ gə̄gē, ba taā kem kadə̄ Nə́ɓā a rāā de kə́ nge rāā majaĺ kadə̄ a tél de kə́ gōtə́ anī, Nə́ɓā a rāā kadə̄ deē ń toō a tél de kə́ súmūú najə̄ taā ń ni-taā kem tə́ ní. 6Adə̄ i tām̄ ń noō tə́ n Dabid əda na deē ń Nə́ɓā tə́dan dan de kə́ gōtə́ gə̄ tə́ kanjə̄ kəndā kumən gír kəla rāān gə̄ tə́ ní, rɔ̄ kɔ́ɔ̄ nelə̄n ní. 7Najə̄ ń Dabid əda ní n toó:

Ngé gə̄ ń Nə́ɓā mā̰ȳ rɔ̄n dɔ yá̰á̰ kə́ gō tə́ aĺ yādə́ gə̄ tə́ ō,

əya̰ gír majaĺ yādə́ gə̄ kɔ̄ɔ́ ō ní rɔ̄də́ nel̄də́.

8Deē ń Nə́ɓā tə́da majaĺ yān gə̄ aĺ ní rɔ̄n nelə̄n#4.8 K. 8 Á̰a̰ī Pā 32.1-2.

9Ní, najə̄ rɔ̄nel̄ ń Dabid əda toó ní i tām̄ yā ngé *kəja mɔtə gə̄ tə́ ngóy, aké i tām̄ yā ngé kəja mɔtə aĺ gə̄ tə́ ō ḿ? Tɔdɔ̄ j-ədaī na Nə́ɓā rāā Abəraham de kə́ gōtə́ tə́ ta kumən tə́ i najə̄ taā kem yān tə́. 10I dan kə́ rá tə́ n Nə́ɓā rāān de kə́ súmūú tə́ ní? Kété tá kadə̄ Abəraham əja mɔtən, aké i gō tə́ ḿ? I gō tə́ alé, ba i kété. 11Tɔdɔ̄ dan ń Nə́ɓā adə̄ Abəraham əja mɔtən ní, Nə́ɓā əndā tə́re dɔ Abəraham tə́ yā kɔjəń kadə̄ ká ré Abəraham əja mɔtən aĺ ɓáý gə̄gē anī, na n-rāān kadə̄ tél de kə́ gōtə́ najə̄ taā kem yān tə́. Adə̄ i tām̄ noō tə́ n Abəraham i bɔbə̄ ngé gə̄ malang ń əjan̄ mɔtədə́ alé ba taān̄ kem, adə̄ Nə́ɓā tə́dádə́ dan de kə́ gōtə́ gə̄ tə́ ō ní. 12Ni i bɔbə̄ ngé gə̄ ń əjan̄ mɔtədə́ ní ō. Ngé *kəja mɔtə gə̄ ń toō ní i ngé gə̄ ń nin̄ i gír kaa yā ngé kəja mɔtə gə̄ tə́ ní ngóy alé, banī i ngé gə̄ ń unən̄ tóo kaají Abəraham loo taā ń ni-taā kem tə́ kété tá kadə̄ əja mɔtən ɓáý ní.

Abəraham taā kem kənī míndə yā Nə́ɓā

13Tɔdɔ̄ Nə́ɓā ənī míndən adə̄ Abəraham ō, ngán kaan gə̄ ō na a əngen̄ dɔ nang malang yá̰a̰ haladə́ tə́#4.13 K. 13: Tkg 12.5-7; 14-15. Kənī ń Nə́ɓā ənī míndən toó i tām̄ rāā kə́ Abəraham rāā yá̰á̰ kə́ *ndū najə̄ ɔjə tə́ alé, banī i tām̄ ni ń i de kə́ gōtə́ ta kum Nə́ɓā tə́ najə̄ taā kem yān tə́ ní. 14Ré ngé gə̄ ń a əngen̄ dɔ nang malang yá̰a̰ haladə́ tə́ ní, əngen̄ i tām̄ yā ndū najə̄ tə́ anī, taā kem i yá̰á̰ kə́ kanjə̄ kumən ō, kənī míndə i yá̰á̰ kə́ ndāńg karī ō. 15Tɔdɔ̄ *ndū najə̄ a reē kə wōn̄g yā Nə́ɓāá dɔ de gə̄ tə́, ba loo ń *ndū najə̄ gətóo tū tə́ ní, loo mbātə́ rāā yá̰á̰ kə́ ndū najə̄ ɔjə a gətóo ō.

16Adə̄ j-a j-əngeī yá̰á̰ ń Nə́ɓā ənī míndən yā kadə̄jí ní sɔɔ̄ń i taā kem yājí, yā kadə̄ jə-gerīiń na i Nə́ɓā n adə̄ yá̰á̰ ń toō tām̄ rajə yān tə́ ō, kadə̄ kənī míndə yā Nə́ɓā kə́ tām̄ yā Abəraham tə́ ní to noó ɓáý tām̄ yā ngán kaan gə̄ tə́ malang ō. I ngán kaan gə̄ ń rāān̄ yá̰á̰ kə́ *ndū najə̄ ɔjə ní ngóy alé, ba i ngé gə̄ ń taān̄ kem tītə̄ yān ní ō. Abəraham i kaají malang, 17tītə̄ ń makətūbə̄ yā Nə́ɓā ədań ní. Ndangən̄ na:

I ḭ̄ n m-ā m̄-rāā kadə̄ ā ī-tél kaa gír de kə́ ngá̰ý gə̄ ní#4.17 K. 17 Á̰a̰ī Tkg 17.5.

Ni i kaají ta kum nge ń ni-taā kemən tə́ ní, i Nə́ɓā kə́ nge ndól̄ de kə́ koy gə̄ ō, kə́ nge kəndā yá̰a̰ gə̄ ń gətóon̄ ní ō. 18Abəraham taā kem Nə́ɓā ō, əndā kemən dɔ yá̰á̰ ń Nə́ɓā əda tə́ ní ō, tá i yá̰á̰ kə́ to kadə̄ deē a əndā kemən dɔ tə́ aĺ bátə́, ba ni-əndā kemən dɔ tə́ ō, taā kem ō, adə̄ i tām̄ ń noō tə́ n ni-téləń kaa nápar de kə́ ngá̰ý gə̄ tītə̄ ń Nə́ɓā ədanəń na:

Ngán kaan gə̄ a télən̄ gíŕ nápar de kə́ ngá̰ý gə̄ ní#4.18 K. 18b: Á̰a̰ī Tkg 15.5.

19Abəraham i de kə́ ɓālə̄n asə yá̰á̰ kə́ ɓú ń noō. Ni tɔgə kə́ to kojə ngōn̄ to̰ aĺ ō, nə̄yá̰n Sara to kojə ngōn̄ to̰ aĺ ō. Rɔ̄də́ ndəlē kɔ̄ɔ́. 20Dan ń Nə́ɓā ənī míndən adə̄ Abəraham ní, kem Abəraham tɔ́sən dɔ míndə́ Nə́ɓā ń ənī adə̄n̄ tə́ ní alé. Taā kem yān adə̄n tɔ́gə, adə̄ ni-ɔsə gɔn Nə́ɓā. 21Ni ger̄ mámák kadə̄ yá̰á̰ ń Nə́ɓā ənī míndən yā rāā ní, Nə́ɓā i kə tɔ́gə yā rāā. 22Adə̄ i tām̄ ń noō tə́ n

Nə́ɓā tə́dan dan de kə́ gōtə́ tə́ ní.

23Ndangən̄ na

tə́danən̄ dan de kə́ súmūú gə̄ tə́,

tɔdɔ̄ i tām̄ yān tə́ ngóy alé, 24banī i tām̄ yājí jḭḭ̄ tə́ ō. I tām̄ yājí jḭḭ̄ ń a tə́dan̄jí dan de kə́ súmūú gə̄ tə́ najə̄ taā kem yājí tə́ ní. Tɔdɔ̄ jḭḭ̄ jə-taāī kem nge ń ndól̄ Kɔ́ɔ̄ɓē yājí Jeju dan de kə́ koy gə̄ tə́ ní. 25Nə́ɓā əya̰n jī de gə̄ tə́ adə̄ tɔ̄l̄nən̄ i najə̄ yá̰á̰ kə́ gō tə́ aĺ yājí gə̄ tə́, ba ndólən i kadə̄ tə́danə̄ńjí dan de kə́ súmūú gə̄ tə́.

Currently Selected:

Makətūbə̄ ń Pol ndang adə̄ Rom gə̄ ní 4: BS

Highlight

Copy