Makətūbə̄ ń Pol ndang adə̄ Rom gə̄ ní 15

Ādə̄ jə-sāāī rāā yá̰á̰ kə́ kadə̄ nel̄ madə̄jí

1Jḭḭ̄ ń jə-raī ngan̄g dɔ taā kem yājí tə́ ní, majə kadə̄ jə-rāāī kə ngé gə̄ ń tɔ́gə́də́ gətóo ní, bā jə-lōōī sāā rāā yá̰á̰ kə́ kadə̄ nel̄jí jḭḭ̄ kɔ́ gə̄. 2Majə kadə̄ jḭḭ̄ kógə̄ḿ kógə̄ḿ ní jə-sāāī i rāā yá̰á̰ kə́ kadə̄ nel̄ madə̄jí tām̄ yā majə yān tə́ ō, tām̄ yā kadə̄ ni-taāń kem kum kə̄ kété kété ō. 3Tɔdɔ̄ *Kərist sāā i yá̰á̰ kə́ nelə̄n alé. Tītə̄ ń makətūbə̄ yā Nə́ɓā ədań ní, ndangən̄ na:

Ndū ń ngé tájī gə̄ tájīn̄ ní, i mā n m̄-taā kə̄ dɔḿ tə́ ní#15.3 K. 3: Á̰a̰ī Pā 69.10; Mat 27.34; Ja̰a̰ 2.17.

4Najə̄ gə̄ ń ndangən̄ kété malang ní i yā kɔjəńjí yá̰a̰, i gáŕ kadə̄ najə̄ gə̄ ní rāān̄jí adə̄ jə-tə́gāī tají ō, j-əhɔī rɔ̄jí tɔgə ō, j-əndāī kemjí dɔ Nə́ɓā tə́ ō. 5Kadə̄ Nə́ɓā kə́ nge rāā kadə̄ deē tə́gā tan ō, kə́ nge sɔl̄ kem deē ō, rāā tá kadə̄ kemsí i gō naā tə́, tītə̄ ń Jeju Kərist nəkɔ́ ndigəń ní, 6yā kadə̄ ɔ́siīń gɔn Nə́ɓā kə́ Bɔbə̄ Kɔ́ɔ̄ɓē yājí Jeju Kərist kə kemsí kə́ kógə̄ḿ beē ō, kə tasí kə́ kógə̄ḿ beē ō.

Najə̄ kə́ Majə kə́ tām̄ yā gír de gə̄ tə́ malang

7I beé ní ə́hɔī naā kə̄ rɔ̄sí tə́ tītə̄ ń *Kərist nəkɔ́ əhɔńsí kə̄ rɔ̄n tə́ ní ɔ́siīń gɔn Nə́ɓā. 8Tɔdɔ̄ m-ə́dásí na, dan ń Kərist rāā rɔ̄n nge kəla yā Nə́ɓā tə́ tām̄ yā *Jipə gə̄ tə́ ní, rāā i yā tɔ̄ləń ta kənī ń Nə́ɓā ənī míndən adə̄ kaají gə̄ ní. Ni-rāā beé i yā kɔjəń kadə̄ Nə́ɓā i de kə́ nge ra dɔ ndūn tə́. 9Ni-reē i yā kadə̄ de gə̄ ń nin̄ i Jipə aĺ gə̄ ní, ɔsən̄ gɔn Nə́ɓā tām̄ kem majə yān tə́. Tītə̄ ń makətūbə̄ yā Nə́ɓā ədań ní, ndangən̄ na:

I tām̄ najə̄ ń toō tə́ n m-ā m̄-ɓōkíī tɔ̄ȳ dan nápar de gə̄ tə́ ō,

m-ā m-ə̄nā pā yā tɔ̄ȳń rīí ō ní.

10Makətūbə̄ əda ɓáý to̰ na:

Sḭḭ̄ nápar de kə́ rang gə̄, ī-rāāī rɔ̄nel̄ kə gír deē yān gēé#15.10 K. 10: Á̰a̰ī Ndū 32.43.

11Əda ɓáý to̰ na:

Sḭḭ̄ nápar de gə̄ malang kə́ dɔ nang tə́, ī-tɔ̄yī Kɔ́ɔ̄ɓē!

Sḭḭ̄, gír de gə̄ malang, ɔ́siī gɔnən#15.11 K. 11: Á̰a̰ī Pā 117.1.

12Ba Ijai əda ɓáý to̰ ō, əda na:

Ngōn̄ kaa Jese kógə̄ḿ a reē.

I ni n a ḭḭ dɔɔ́ yā ndi dɔ nápar de gə̄ tə́ ní.

Nápar de gə̄ a əndān̄ kemdə́ i dɔn tə́.

13Ādə̄ Nə́ɓā kə́ nge rāā kadə̄ de gə̄ əndān̄ kemdə́ dɔ yá̰á̰ tə́ adə̄sí rɔ̄nel̄ ō, kem sɔl̄ lɔm ō, kə́ majə ɔtə̄ kə taá, kə ta kūl̄ taā ń sḭḭ̄ ī-taāī kemən ní, yā kadə̄ kəndā kem dɔ yá̰á̰ tə́ yāsí i kəndā kem dɔ yá̰á̰ tə́ ngá̰ý kə ta kūl̄ tɔ́gə yā *Ndíĺ kə́ Táĺ.

Najə̄ i yā Pol kadə̄ ndang makətūbə̄ tītə̄ ń ni-rāań ní

14Ngákó̰ó̰ḿ gə̄, mə̄kɔ́ m̄-ger̄ majə kadə̄ kem majə yāsí i ngá̰ý ō, kadə̄ ī-gerī yá̰a̰ malang majə ō, ásiī kɔjə̄ naā ō. 15Banī kem makətūbə̄ yāḿ ń m̄-ndang ń m̄-ə́lań m-ādə̄sí tə́ ní, m-ə́dásí yá̰á̰ kə́rēý gə̄ kanjə̄ ɓōĺ, ba i yā kadə̄ m̄-terə̄ń kemsí dɔ yá̰a̰ gə̄ ń ī-gerī kɔ̄ɔ́ ɓá tə́ ní. M-ə́dá yá̰a̰ gə̄ ń noō tītə̄ ń noō i kə tɔ́gə yā kadə̄ karī ń Nə́ɓā adə̄ rāań seḿ, 16adə̄ mā i nge kəla yā Jeju *Kərist, kə́ tām̄ yā gír de gə̄ kə́ nin̄ i Jipə aĺ gə̄ tə́ ní. Nə́ɓā ɔr̄ əndām̄ tayā tām̄ yān tə́ kadə̄ m-ə̄nā mbēr̄ Najə̄ kə́ Majə yān yā kadə̄ gír de gə̄ ń nin̄ i Jipə aĺ gə̄ ní télən̄ *yá̰a̰ ndējə̄ kə́ *táĺ kə ta kūl̄ *Ndíĺ kə́ Tálá kadə̄ nēl̄ kem Nə́ɓā. 17Adə̄ m-ásə rāā rɔ̄nel̄ kəla ń m̄-rāā tām̄ yā Nə́ɓā tə́ ní sɔɔ̄ń i ɓoo naā yāḿ kə́ kə Jeju Kərist. 18Tɔdɔ̄ ré m̄-sāā kɔr̄ najə̄ kə́ dɔ yá̰á̰ kə́rēý tə́ anī, i yá̰á̰ ń Kərist rāā kə ta kūlə̄ḿ ní ngóy n m-ā m-ɔ̄r̄ najə̄ kə́ dɔ tə́ ní. Ni-rāā adə̄ ngé gə̄ ń nin̄ i Jipə aĺ gə̄ ní oōn̄ ta Nə́ɓā i kə ta kūlə̄ḿ. Ni-rāā yá̰á̰ ní i kə najá ō, i kə kəla kə́ rāāá ō, 19i kə tɔ́gə́ yá̰á̰ kə́ to kɔr kum gə̄ ō, yá̰á̰ kə́ yáā gə̄ ō, i kə tɔ́gə yā *Ndíĺ kə́ Táĺ ō. Adə̄ m-ɔ́jə Najə̄ kə́ Majə yā Kərist kə taá malang, m-ə́lá gír i *Jerusalem ō, kem ɓē gə̄ ń ran̄ kə gō gidə ɓē kə́ Jerusalem ní ō, bátə́ gō nang kə́ Iliri tə́. 20Ba mā m-ɔ́jə Najə̄ kə́ Majə ní i loo kə́ deē oō rī *Kərist tū tə́ aĺ ɓáý tə́ ngóy. Kumən na m̄-gḛy kəndā kújə dɔ ngəra kújə yā de kə́ rang tə́ alé. 21Tītə̄ ń toō ní, mā m̄-rāā i kə gō loo ń makətūbə̄ ɔjəń ní. Makətūbə̄ əda na:

Ngé gə̄ ń ənīn̄ mbērən adə̄n̄də́ aĺ ɓáý ní, a a̰a̰nən̄ ō,

ngé gə̄ ń oōn̄ najə̄ yān kété aĺ ɓáý ní a gerə̄n̄ kum ō.

Pol núm̄ kaw̄ mbā tə́ Rom

22Adə̄ m̄-sāā kaw̄ loosí nja i ngá̰ý tā, ba i yá̰á̰ ń noō n ɔgə̄m̄ kaw̄ ní. 23Ba ń toō ɓáa m̄-təgā kəla yāḿ kə́ gō nang kə́ laā tə́ kɔ̄ɔ́. Asə ɓāl̄ ngá̰ý n m̄-sāā kaw̄ go̰ō̰sí tə́ ní. 24Ba i ta kaw̄ḿ Esəpa̰y tə́ tá m-ā m̄-teē dɔsí tə́ ɓáý. Tɔdɔ̄ m-ə̄ndā kemḿ dɔ ka̰a̰sí tə́ yā kadə̄ m-ə́ngé yá̰a̰ jīsí tə́ tá m-āwń nú, ba m-ā m̄-ndi sesí sḛ́ý pá tá m-ā m̄-mān̄ ɓáý. 25Ba kə́ ngɔr ń toō tə́ ɓáa, m-ā m-āw̄ *Jerusalem kə kəla yā de gə̄ yā Nə́ɓā. 26Tɔdɔ̄ ngé taā kem kə́ Masedəwan tə́ gə̄ ō kə́ Akayi tə́ gə̄ ō, ndigən̄ kɔsə dɔ yá̰a̰ naā tə́ tām̄ yā ngé ndoō gə̄ kə́ dan de gə̄ yā Nə́ɓā kə́ Jerusalem tə́. 27I nin̄ kɔ́ gə̄ n ndigən̄ rāā tītə̄ ń noō kə gō kemdə́ ní, ba mandang ɓáa i yá̰á̰ kə́ sɔɔ̄ kadə̄ nin̄-rāān̄. Tɔdɔ̄ *Jipə kə́ ngé taā kem *Kərist gə̄, kēgə̄n̄ yá̰á̰ yādə́ kə́ gō róbə yā ndíĺ tə́ adə̄n̄ ngé gə̄ ń nin̄ i Jipə aĺ gə̄ ní. Adə̄ majə kadə̄ ngé gə̄ ń nin̄ i Jipə aĺ gə̄ ní, rāān̄ sedə́ kə yá̰á̰ kə́ jīdə́ tə́ ō. 28Ré m̄-gān̄g gír najə̄ń toō kɔ̄ɔ́ adə̄ m-ādə̄də́ yá̰á̰ ń tɔ́sə̄n̄ dɔ naā tə́ ní oy anī, m-ā m-āw̄ Esəpa̰y, banī m-ā m̄-teē dɔsí tə́ pá tá.

29Ba m̄-ger̄ kadə̄ ré m-ā m-āw̄ loosí anī, sḭḭ̄ gə̄gē mā gə̄gē ní, *Kərist a tɔ́r̄ tan dɔjí tə́ ngá̰ý.

30Banī ngákó̰ó̰ḿ gə̄, yá̰á̰ ń m̄-dəjesí, kə ta kūl̄ Kɔ́ɔ̄ɓē yājí Jeju Kərist ō, kə ta kūl̄ táŕ ń Ndíĺ a adə̄ deē ō ní n toó: Ī-rɔ̄ɔ̄ī naā tə́ seḿ, kə ta kūl̄ ndɔ̄ȳ Nə́ɓāá tām̄ yāḿ tə́.

31Ī-ndɔ̄yī tām̄ kadə̄ m-ə̄sō jī ngé taā kem aĺ gə̄ kə́ gō nang kə́ Jude tə́ aĺ ō, yā kadə̄ ngé yā Nə́ɓā kə́ *Jerusalem gə̄ ndigən̄ yá̰á̰ ń m-ā m-āw̄ń kə̄ kadə̄də́ tə́ Jerusalem ní majə ō. 32Loo ń noō tə́ ré kem Nə́ɓā ndigə anī, m-ā m-āw̄ yā kugə̄ loosí kə rɔ̄nelēé ō, m-ā m-ɔ̄r̄ koō sḛ́ý dɔ dansí tə́ ō. 33Ādə̄ Nə́ɓā kə́ nge kadə̄ de gə̄ kem sɔl̄ lɔm ndi naā tə́ sesí malang. *Adə̄ i tītə̄ ń noō.

Currently Selected:

Makətūbə̄ ń Pol ndang adə̄ Rom gə̄ ní 15: BS

Highlight

Copy