Makətūbə̄ ń Pol ndang adə̄ Rom gə̄ ní 13

Háĺ ngé taā kem gə̄ kə́ kə ngé ko̰o̰ ɓē gēé

1Ādə̄ de gə̄ kógə̄ḿ kógə̄ḿ sɔlə̄n̄ dɔdə́ kə̄ no ngé ko̰o̰ ɓē gə̄ tə́. Tɔdɔ̄ ko̰o̰ ɓē i jīdə́ tə́. Tɔdɔ̄ ngār, i Nə́ɓā n əndā ō, ngé gə̄ ń ndin̄ ngār ní, i Nə́ɓā n əndādə́ dɔ madə̄də́ gə̄ tə́ ō ní. Tām̄ ko̰o̰ ɓē malang ḭḭ i rɔ̄ Nə́ɓā tə́ ō, ngé gə̄ ń ko̰o̰ ɓē i jīdə́ tə́ ní, i Nə́ɓā n əndādə́ kem kəla ko̰o̰ ɓē ní tə́ ō. 2Adə̄ deē ń mbātə́ najə̄ ta ngé ko̰o̰ ɓē gə̄ tə́ ní ni-mbātə́ i rāā yá̰á̰ ń Nə́ɓā ɔsə kə de gēé ta rāā ní. Adə̄ ngé gə̄ ń a rāān̄ dɔ ngan̄g ní, a ɔyn̄ sarya kə̄ dɔdə́ nin̄ kɔ́ gə̄ tə́. 3Tɔdɔ̄ deē ń rāā yá̰á̰ kə́ majə ní a ɓōĺ nge ko̰o̰ ɓē alé, banī i deē ń rāā yá̰á̰ kə́ majaĺ ní n a ɓōlə́n. Ré ī-gḛy ɓōĺ nge ko̰o̰ ɓē aĺ ɓáa ī-rāā yá̰á̰ kə́ majə. Ī-rāā yá̰á̰ kə́ majanī ni a ndigiī. 4Tɔdɔ̄ ni i nge kəla yā Nə́ɓā tām̄ yāí tə́, yā rāań seí kadə̄ ī-rāā yá̰á̰ kə́ majə gə̄. Ba ré ī-rāā yá̰á̰ kə́ majaĺ tā anī, ādə̄ ɓōĺ rāāī, tɔdɔ̄ ré kaskar i jīn tə́ anī, i karī alé. Tɔdɔ̄ ni i nge kəla yā Nə́ɓā kə́ nge kɔjə wōn̄g yā Nə́ɓā kə̄ ndágá dɔ nge rāā yá̰á̰ kə́ majaĺ tə́. 5I tām̄ najə̄ ń toō tə́ n majə kadə̄ de gə̄ malang dɔdə́ a sɔl̄ kə̄ rɔ̄ ngé ko̰o̰ ɓē gə̄ tə́ ní. Ba dɔdə́ ń a sɔl̄ ní i tām̄ ɓōĺ wōn̄g yā Nə́ɓā tə́ ngóy alé, ba i tām̄ rāā yá̰á̰ kə́ kemdə́ ɔjədə́ tə́.

6I tām̄ najə̄ ń noō tə́ ɓáý to̰ n ə̄gāīneé lambóo ní. De gə̄ ń a taān̄ ní, i Nə́ɓā nəkɔ́ n əndā kəla ń noō dɔdə́ tə́ ní. 7Nin̄ kógə̄ḿ kógə̄ḿ malang ní, ādīdə́ yá̰á̰ ń sɔɔ̄ kadə̄ ādīdə́ ní, nge lambóo a ādīin̄ lambóo ō, nge taā tīr̄ a ādīin̄ yá̰a̰ tīr̄ ō, ré i de kə́ kadə̄ ī-ɓōlíī ndílən a, ī-ɓōlíī ndílən ō, ré i de kə́ kadə̄ ī-rɔȳnīī a, ī-rɔȳnīī ō.

Ī-táriī naā

8Ādī kə̄rā yā deē kógə̄ḿ i dɔsí tə́ alé. Ré Kadə̄ kə̄rā i dɔsí tə́ anī, ādī i kə̄rā tár naā tá ngóy. Tɔdɔ̄ deē ń tár madə̄n gə̄ ní, rāā i yá̰á̰ ń *ndū najə̄ ɔjə ní kə ta njaá malang. 9Tɔdɔ̄ gō míndə gə̄ ń na:

Ā ī-rāȳ aĺ ō, ā ī-tɔ̄l̄ deē aĺ ō,

ā ī-ɓogə aĺ ō, ā ī-ndə̄ngā yá̰a̰ yā madí aĺ ō#13.9 K. 9a: Á̰a̰ī Teē 20.13-17,

naā tə́ kə gotə ndū najə̄ kə́ rang gə̄ malang ní, i kem najə̄ kə́ kógə̄ḿ beé ń toō tə́:

Ā ī-tár madí tītə̄ rɔ̄í īkɔ́ beé#13.9 K. 9b: Á̰a̰ī Ndū 5.17-21; Leb 19.18.

10De kə́ tár madə̄n a rāā yá̰á̰ kə́ majaĺ seneé alé. Adə̄ deē ń tár madə̄n ní, rāā i yá̰a̰ ń *ndū najə̄ ɔjə ní kə taá malang.

Ī-ndiī dɔ rɔ̄sí tə́ ī-ngóōīneé ta tél Kərist

11Sḭḭ̄ kɔ́ gə̄ ī-gerī kum mbang ń jə-ndiī tū tə́ toō mbak: I kum mbang kə́ kadə̄ ī-ndólīneé dɔ ɓīī tə́ tā. Tɔdɔ̄ ɓōólaā ní, kajə i ngɔr ngá̰ý rɔ̄jí tə́ tɔȳ kə́ ndɔ̄ ń jə-taāiń kem tə́ ní. 12Dan ndɔ̄ tɔȳ kɔ̄ɔ́, adə̄ loo a rāā yā tīī ngɔr. Ní, ādə̄ j-əya̰ī kəla kə́ tilií gə̄ kɔ̄ɔ́, ba j-ɔyī yá̰a̰ rɔ̄ɔ̄ kə́ yā rɔ̄ɔ̄ń kum loo kə́ unjə̄ kow tə́ gə̄ jə-tə́laī rɔ̄jí tə́. 13Ādə̄ háĺjí i háĺ kə́ unjə̄ yā ngé njə̄rā dan kadaá gə̄: Jə-lōōī kəsa wa ō, ka̰ȳ kasə ngá̰ý ō, sāā naā loo kaya tə́ ō, jə-lōōī kɔ̄l̄ naā ō, kəndā naā nii ō. 14Úniī háĺ Kɔ́ɔ̄ɓē Jeju *Kərist ə́laī rɔ̄sí tə́ tītə̄ kūbə̄ beé. Ba ī-lōōī kəndā kumsí gír ngur yá̰a̰ gə̄ ń a rāāsí ní tə́ yā tɔ̄l̄ ɓōn.

Currently Selected:

Makətūbə̄ ń Pol ndang adə̄ Rom gə̄ ní 13: BS

Highlight

Copy