Gōsə̄ najə̄ gə̄ 7
7
Dəyá̰ kə́ nge rāā rāȳ kə́ nge gól̄ balsáa gə̄
1Ngōnə̄ḿ, ī-lōō kadə̄ dɔí ndígə̄nal najə̄ yāḿ, ādə̄ əga kemií dɔ yá̰a̰ gə̄ ń m-ə́daī kadə̄ ī-rāā tə́ ní. 2Ī-rāā yá̰á̰ ń m-ə́daī ní, anī ā ī-ndi kə dɔí dɔɔ́. Ī-ngɔ̄m̄ yá̰á̰ ń m̄-ndóōī ní tītə̄ loo ngɔ̄m̄ ngarā̰ kumií beē. 3Ī-do̰ō̰də́ ta ngán jīí tə́, ī-ndangdə́ dan wurií tə́. 4Ī-rāā kum kedə̄ ngōkó̰ó̰í kə́ dəyá̰ tə́ ō, ger̄ yá̰a̰ ngeeí kə́ dəyá̰ tə́ ō. 5Nin̄ a ngɔ̄m̄nī ta kaya dəyá̰ tə́ ō, ta najə̄ kə́ to gól̄ loo gə̄ yā nə̄yá̰ deē tə́ ō.
6Ndɔ̄ kógə̄ḿ tə́ m̄-rā kújú ba m-á̰a̰ loo ko̰rō̰ kújə́ tə́ kə̄ ndágá kum páŕ par tə́. 7Anī m-á̰á̰ ngáń kə́ dəngam gə̄ kə́ kumdə́ gān̄g aĺ gə̄, anī kumḿ əsō dɔ balsáá kógə̄ḿ kə́ kur̄ dɔn gətóo tə́ dɔ dáńdə́ tə́. 8Balsáá ní a mān̄ i mbée kum róbə́ kógə̄ḿ tə́, kadə̄ loo kə́ dəyá̰ kógə̄ḿ kə́ dan dəyá̰ kə́ tītə̄ ń noō gə̄ tə́ ndi tū tə́ tə́. Anī un róbə́ kə́ ta kaw̄ kə̄ ɓē yā dəyá̰ ní tə́. 9I ta loo tíbə́ tə́, dan ń loo to put put ō, loo a ndɔ̄ i mbée ō ní tə́. 10Anī dəyá̰ ní tə́nī tan, o̰ō̰ i kūbə̄ ko̰ō̰ ájə́ba gə̄ ō, gól̄ loo rosə kemən ō. 11Tan ɓār̄ ngá̰ý ō, əre rɔ̄n aĺ ō, ndi gotoó kem kújə yān tə́ aĺ ō. 12Ta ń toō aĺ a ni i ndágə looó, ta ń toō aĺ a ni i róbə kɔsɔɔ́. Kíl loo gə̄ malang ń noō ni-ra tū tə́ umə̄ń loo. 13Ni-əhɔ balsáá ní kə̄ rɔ̄n tə́ ɓirə̄n dagə, ba ədan kanjə̄ ɓōĺ na: 14Kété m-ə̄nī ndūḿ m-ādə̄ Nə́ɓā kadə̄ m̄-ndējən *yá̰a̰ tun̄ kə́ tām̄ yā kem kógə̄ḿ tə́, ba ɓōólaā m̄-rāā yá̰á̰ ń m-ə̄nī ndūḿ yā rāā ní kɔ̄ɔ́. 15I tām̄ najə̄ ń noō tə́ n m̄-tə́nā taí, m̄-sāāī ba m-ə́ngeī ní. 16m̄-seĺ bájo kə́ ɓáĺdə́ i ngá̰ý gə̄ ō, kūbə̄ gə̄ kə́ əjōn̄də́ i kə kəlā *lḛ́ḛ́ kə́ Ejiptə ō, dɔ tə̄rá yāḿ tə́ kɔ̄ɔ́ ɓá. 17Yá̰á̰ kə́ kotə majə gə̄ ń i nō kāgə̄ *mír ō, kāgə̄ aloe ō kāgə̄ sinamon ō ní, m̄-sə̄kādə́ loo toḿ tə́ kɔ̄ɔ́ ɓá. 18Ī-reē ādə̄ jə-sāā naā bátə́ loo tīī dɔjí tə́, ādə̄ jə-ger̄ nel̄ tár naā. 19Tɔdɔ̄ ngaaḿ gətóo ɓēé, aw̄ mbā tə́ sa̰y ngá̰ý. 20Ni un ngong nar jīn tə́, adə̄ a tél i kə ndaa nāá tə́. 21Dəyá̰ əhɔ balsáá ní kə najə̄ gól̄ loo yān gēé, ndɔ́rən gōn tə́ kə najə̄ kə́ nel̄ gēé. 22Balsáá ní un gōn tītə̄ man̄g kə́ a aw̄n̄ seneé kə̄ loo tɔ̄lən tə́ beē, tītə̄ nge kɔ̄r̄ kə́ do̰ō̰nən̄ yā kəndan beé! 23Ni-aw̄ beé bátə́ kadə̄ kum gərā urən teē dām̄ kə́rēý tə́. Ni ger̄ kadə̄ yá̰á̰ kə́ to yo a ngḛyn nang tə́, tītə̄ yel̄ kə́ nāgə́ a aw̄ kə̄ kum réńg tə́ beé alé.
24Ngɔlaā ní ngánə́ḿ gə̄, ōōī najə̄ yāḿ, ī-nēlī mbīsí ōōīneé najə̄ gə̄ ń a teēn̄ taḿ tə́ ní. 25Ī-lōōī kadə̄ kemsí gír̄ dɔ kun gō dəyá̰ kə́ beē tə́, ī-lōōī ndóm̄ teē dɔ róbə yān tə́. 26Tɔdɔ̄ ngé kənge do gə̄ ń ni rāādə́ adə̄ tə́sōn̄ ní nin̄ i ngá̰ý ō, de gə̄ malang ń ni-tɔ̄l̄də́ ní i de kə́ ngan̄g gə̄ ō! 27Kújə yān i róbə́ kə́ ta kaw̄ kə̄ ɓádá, róbə́ ní risə kum kə̄ nang tə́ a aw̄ i kə̄ loo ndi yo kə́ risə til tə́.
© 2006, 2010 Alliance Biblique du Tchad