Gōsə̄ najə̄ gə̄ 31
31
Kɔjə̄ gə̄ kə́ adə̄n̄ mban̄g kógə̄ḿ
1Kɔjə̄ gə̄ ń kó̰o̰ Lemuel adə̄ Lemuel mban̄g kə́ Masa ní n toó:
2Ngōnə̄ḿ, ngōn̄ kemḿ, ḭ̄ ń m̄-dəje Nə́ɓā kadə̄ adə̄m̄ seí ní, ōō najə̄ yāḿ! 3Ī-lōō kadə̄ dəyá̰ gə̄ taān̄ tɔ́gí kɔ̄ɔ́ ō, ī-lōō kəya̰ gō róbə yāí kɔ̄ɔ́ ba kunəń gō róbə yā dəyá̰ kə́ ngé tḭ̄ḭ̄ ta mban̄g gə̄ ō. 4Lemuel, kasə *nduú majə tām̄ yā mban̄g gə̄ tə́ aĺ ō, kasə kə́ ndḛḛ̄ kə́ ngan̄g majə tām̄ yā ngār gə̄ tə́ aĺ ō. 5Tām̄ ré nin̄ a̰ȳn̄ anī dɔdə́ a ndigə̄nal ndū najə̄ gə̄ ō, a nujən̄ najə̄ yā ngé ndoō gə̄ ō. 6Banī deē ń a oy ní, ādə̄ adə̄nən̄ kasə kə́ ngan̄g ō, deē ń wurən ɔlən ní ādə̄ adə̄nən̄ kasə *nduú ō. 7Ni a̰ȳ anī dɔn a ndígə̄nal rɔ̄ tō ndoō yān ō, a əga kemən dɔ yá̰á̰ ń tōr̄ rɔ̄n tə́ ní to̰ aĺ ō. 8Ī-teē taí ɔ̄rəń najə̄ tām̄ yā ngé kɔr̄ najə̄ aĺ gə̄ tə́ ō, ī-teē taí ɔ̄rəń najə̄ tām̄ yā de gə̄ malang ń əya̰n̄də́ kɔ̄ɔ́ ní tə́ ō. 9Ī-teē taí ī-gāngəń sarya kə gō róbə́ kə́ súmūú ō, ɔ̄rəń najə̄ yā nge ndoō ō, de kə́ nge rɔ̄ tō ndoō ō.
Dəyá̰ kə́ hɔ̄r̄mɔ̄
10I náā n ənge dəyá̰ kə́ hɔ̄r̄mɔ̄ ní? Dəyá̰ kə́ hɔ̄r̄mɔ̄ i dəyá̰ kə́ gātə̄n tɔȳ gātə̄ məde kɔ̄l̄.
11Ngaan ənī kemən adə̄n mámák. Ni nujə yá̰á̰ ń ngaan ənge ní alé.
12Kə dɔ ndɔ̄ gə̄ malang ń ngaan ndiń kə kumneé ní, ni-əla i rɔ̄nel̄ kemən tə́ tá ba rāā yá̰á̰ kə́ to kum kaȳ aĺ seneé alé.
13Ni sāā *bḭḭ̄ batə̄ ō kəlā *lḛ́ḛ ō, rāā kəla kə́ o̰o̰n tɔdɔ̄ kə jīneé ō.
14Ni to tītə̄ to bo yā ngé rāā gātə̄ gə̄ beé, əla sāā yá̰a̰ kəsa yān tə́ i sa̰y.
15Ni-ḭḭ dɔɔ́ pá tá kadə̄ loo tīī, yā ndīr̄ yá̰á̰ kə́ tām̄ yā de kə́ kem kújə yān tə́ gə̄ ō, yā kɔjə ngé kəla yān kə́ dəyá̰ gə̄ kəla kə́ kadə̄ rāān̄ ō.
16Ni gír̄ dɔ ndɔr̄ kógə̄ḿ tə́ ō, mang ndɔr̄ ní ō. Yá̰á̰ ń ni ənge gír kəla ń rāā kə jīneé tə́ ní, əndā tū ndɔr̄ yān tə́.
17Ni-rāā kəla kə tɔ́gɔ́ ō, ənī jīn nang tə́ aĺ ō.
18Ni əndā ma̰ȳ a̰ā̰ kadə̄ kəla yān gə̄ njə̄rān̄ majə, ndɔ̄ɔ́ gə̄gē ni əndā hor tū lámbá tə́ yā rāań kəla.
19Ni səre kəlā *bḭḭ̄ batə̄ kə jīneé ō, əjō kūbə̄ kə ta ngán jīneé ō.
20Ni teē jīn rāań kə nge rɔ̄ tō ndoó ō, əla jīn adə̄ nge ndoō ō.
21Ni sōl̄ kūl̄ tām̄ yā de kə́ kem kújə yān gə̄ tə́ alé, tɔdɔ̄ nin̄ malang ní kūbə̄ yādə́ gə̄ i dɔ naā tə́ jōó jōó.
22Ni əjō kūbə̄ tapīi gə̄ tām̄ yān tə́ ō, kūbə̄ ko̰ō̰n gə̄ i kūbə̄ gə̄ kə́ əjōn̄də́ i kə kəlā *lḛ́ḛ́ kə́ majə ngá̰ý kə́ kídə̄ yululu ō, kərē bḭḭ ō.
23Dan ń ngaan ndi dan *kum kɔɔ̄ gə̄ kə́ kem ɓēé tə́, loo kán̄ naā yā de kə́ bo gə̄ tə́ anī, de gə̄ rɔȳnən̄.
24Dəyá̰ ní əjō dɔ kūbə̄ yā gātəń ō, rāā ndāŕ kəhɔ ɓōdə̄ gə̄ adə̄ ngé kɔy njə̄rań dɔɔ́ gātəń gə̄ ō.
25Ni əla tɔ́gə ō hɔ̄r̄mɔ̄ ō, kūbə̄ tə́ rɔ̄n tə́. Dan ń ni gír̄ dɔ ndɔ̄ kə́ bírí tə́ anī, mūŕ kəgō.
26Ni ɔr̄ najə̄ i kə kum kedēé ō, ger̄ kɔjə̄ deē kə tárá ō.
27Ni əndā kumən gíŕ yá̰a̰ malang kə́ kem kújə yān tə́ ō, ndi karī kanjə̄ rāā kəla aĺ ō.
28Ngánən gə̄ ḭḭn̄ dɔɔ́ ba ədan na i dəyá̰ kə́ nge rɔ̄nel̄ ō, ngaan ḭḭ dɔɔ́ ɔsə gɔnən ō, əda na:
29Ngáń kə́ dəyá̰ gə̄ ngá̰ý rāān̄ yá̰a̰ kə tɔ́gə́də́ ba ḭ̄ ī-tɔȳdə́ malang.
30Rō̰ i yá̰á̰ kə́ a gól̄ loo ō, majə deē i yá̰á̰ kə́ a to ngándáńg aĺ ō. I dəyá̰ ń ɓōĺ ndíĺ Kɔ́ɔ̄ɓē ní n i dəyá̰ kə́ majə kɔsə gɔnən ní.
31Ādə̄niī yá̰a̰ gə̄ ń teēn̄ tū kəla yān ń ni-rāā kə jīneé tə́ ní ō, ādə̄ kəla rāān gə̄ ɓōkə́nən̄ tɔ̄ȳ kem ɓēé ō.
Currently Selected:
Gōsə̄ najə̄ gə̄ 31: BS
Highlight
Share
Copy
Want to have your highlights saved across all your devices? Sign up or sign in
© 2006, 2010 Alliance Biblique du Tchad