Gōsə̄ najə̄ gə̄ 26
26
Najə̄ kə́ dɔ de kə́ mbóo gə̄ tə́
1Rɔȳ de kə́ mbóo i yá̰á̰ kə́ gōtə́ aĺ tītə̄ kɔ̄sə̄ kə́ tə́sō ɓālāá ō, tītə̄ man̄ kə́ edə dan yā sāā kōō gə̄ tə́ ō.
2Ndɔ̄ĺ kə́ kanjə̄ kumən a rāā yá̰a̰ aĺ tītə̄ ndetə kə́ ḭḭ bɔ̄gə̄ aw̄ sa̰y aĺ beē ō, tītə̄ yel̄ gabə kɔsə kə́ ḭḭ bɔ̄gə̄ beé ō.
3Ndéy məraw i tām̄ yā sə́ndá tə́ ō, jámá i tām̄ yā ta kərō tə́ ō, ndéý sálang i tām̄ yā dan gidə de kə́ mboó tə́ ō.
4Ī-lōō tūr̄ de kə́ mbóo najə̄ tə́ kə gō mbóo yānneé na sōgə́ ī-to tītə̄n ō. 5Ī-tūr̄ de kə́ mbóo najə̄ tə́ kə gō mbóo yānneé na sōgə́ gír̄ kemən tə́ na ni i nge kum kedə̄.
6Nge kəndā kəla ta de kə́ mbóo tə́ i de kə nge kəja njan nəkɔ́ ō, i nge sāā yá̰á̰ kə́ rāā kə dɔ́nɔ́ kə̄ dɔn nəkɔ́ tə́ tītə̄ loo ka̰ȳ man̄ beé ō.
7Tɔ́gə gōsə̄ najə̄ kə́ ta de kə́ mbóo tə́ gətóo tītə̄ nja de kə́ nge tə́sō motə beé.
8Rɔȳ de kə́ mbóo i yá̰á̰ kə́ kumən gətóo tītə̄ mbal̄ kə́ deē do̰ō̰ tū bējə̄ tə́ beē.
9Gōsə̄ najə̄ kə́ ta de kə́ mbóo gə̄ tə́ to i tītə̄ jə̄ngā ndéy kōn̄ kə́ nge kasə rāā un əhɔ dɔɔ́ yā kəndań deē beé.
10Nge kun de kə́ mbóo kəlaá, aláa nge kɔy ngé mān̄ róbə gə̄ kəlaá ní, to i tītə̄ ngār kə́ nge kadə̄ de gə̄ malang do beé.
11De kə́ mbóo kə́ tél rāā háĺ mbóo yān gogə́ to i tītə̄ bísə́ kə́ tél ra kə̄ ta tōmbən tə́ a əsa beē.
12Ré ə́nge de kə́ taā kem kadə̄ kumən edə ngá̰ý anī, majə kadə̄ ī-ger̄ na kəndā kem dɔ de kə́ mbóó tə́ i só tə́ t ɔȳ kəndā kem dɔ de kə́ beé tə́.
De kə́ yay
13De kə́ yay əda na dā̰ kə́ do̰ na ra kum róbó noō, ɓɔl na ra ndágə looó noō!
14De kə́ yay tūr̄ rɔ̄n dɔ tə̄rá ton tə́ tītə̄ bápə́ kə́ tūr̄ rɔ̄n gidə kāgə̄ ta róbə́ kújə́ tə́ beē.
15De kə́ yay əla jīn kārāá ba tél kaw̄ń tan tə́ i yá̰á̰ kə́ to kɔr ngá̰ý tām̄ yān tə́.
16De kə́ yay taā kem kadə̄ kumən ni na edə̄ tɔȳ yā de gə̄ sīrí kə́ tūrə̄n̄ najə̄ kə́ kə kumneé ədan̄.
Gōsə̄ najə̄ kə́ rang gə̄
17De kə́ nge mān̄ róbó ń rāā wōn̄g najə̄ yā kɔ̄l̄ kə́ gír ndetən aĺ tə́ ní, to i tītə̄ de kə́ láā mbī bísə yā kəhɔnneé beē. 18-19Deē ń gól̄ deē madə̄n ba gō tə́ anī ədan na n-ɔsə na i kum seneé ní, to i tītə̄ nge kɔ̄r̄ kə́ túr̄ kum gərā gə̄ kə́ hor i tadə́ tə́ gə̄ ō, kum gərā kə́ karī gə̄ ō kə gō gidəneé beē. Yá̰a̰ gə̄ ń noō i yá̰a̰ gə̄ kə́ a tɔ̄lə̄n̄ deē.
20Dan ń kīr̄ gətóó ɓáa hor a oy ō. Dan ń nge tetə najə̄ gətóó ɓáa gír kɔ̄l̄ naā a gān̄g ō.
21De kə́ gḛy kɔ̄l̄ ngá̰ý kə́ sə̄lā de gə̄ adə̄ kɔ̄lə̄n naā to i tītə̄ kúĺ kə́ ɓōkə́ dɔ yā̰l̄ hor tə́ ō, kīr̄ kə́ ɓōkə́ kum hor tə́ ō.
22Najə̄ kɔr̄ de kə́ nge tetə najə̄ to i tītə̄ yá̰á̰ kə́ leḿ beē, aw̄ bátə́ ugə̄ gə́la kem deē tə́.
23De kə́ tan nel̄ ngá̰ý ba kemən majaĺ to i tītə̄ gində̄ arjā̰a̰ kə́ kɔr̄ yedə̄n aĺ ba rāań gidə jóó nánjə beē.
24De kə́ nge kim̄ deē utə̄ gidə rɔ̄n kə najə̄ kə́ tan tə́, banī əndā gól̄ loo ngarā̰ kemən tə́. 25Ré ni-ɔr̄ najə̄ kə míndən nelé anī ī-lōō taā kemən, tɔdɔ̄ ni ɓɔ̄ɔ̄ dɔ yá̰á̰ kə́ to yḛr kum gə̄ ngá̰ý tū tə́ noō. 26De kə́ nge kim̄ deē asə kutə̄ gidə rɔ̄n banī kem ndul yān a ɔjə rɔ̄n kə̄ ndágá dan de gə̄ tə́.
27Nge ndēr̄ bəlo a əsō kemeé ō, mbal̄ tél a əsō dɔ nge ndūbə̄rūn tə́ ō.
28Kadə̄ deē do kemən tə́ kə najə̄ kə́ soró i kim̄ deē ní ō, ta de kə́ a gól̄ loo a nujə loo sák sák ō.
© 2006, 2010 Alliance Biblique du Tchad