Makətūbə̄ ń Pol ndang adə̄ Pilipə gə̄ ní 4

1I beé ní ngákó̰ó̰ḿ gə̄, sḭḭ̄ ń i kó tár yāḿ gə̄ ní, ngur kadə̄ m̄-téĺ m-á̰á̰sí gogə́ rāām̄ ngá̰ý. Kó tár yāḿ gə̄, sḭḭ̄ ń i rɔ̄nel̄ yāḿ ō, jākā *mbang yāḿ ō ní, ī-raī ngan̄g tītə̄ ń noō dɔ ɓoo naā yāsí tə́ kə Kɔ́ɔ̄ɓēé.

Yá̰a̰ gə̄ ń Pol əda ngé taā kem kə́ Pilipə tə́ gə̄ kadə̄ rāān̄ ní

2Ebodi ō, Sḛntisə ō, m̄-rāāsí ɓɔ́, ādī gír̄ yāsí i kógə̄ḿ beē tītə̄ ngákó̰o̰ naā kə́ dəyá̰ gə̄ kə́ ɓoon̄ naā kə Kɔ́ɔ̄ɓēé. 3Ba ḭ̄ madə́ḿ kə́ rɔ̄kum, m̄-dəjeī kadə̄ ī-rāā sedə́, tɔdɔ̄ nin̄-rɔ̄ɔ̄n̄ naā tə́ seḿ dɔ Najə̄ kə́ Majə tə́, naā tə́ kə Kəlema ō, madə̄ kəlaḿ kə́ rang gə̄ ō, nin̄ ń rīdə́ i kə́ ndang kem makətūbə̄ ndi kə kumuú tə́ ní.

4Ī-rāāī rɔ̄nel̄ kə ndɔ̄ gə̄ najə̄ ɓoo kə́ ī-ɓooī naā kə Kɔ́ɔ̄ɓēé tə́. m̄-tél m-ə́dásí to̰: Ī-rāāī rɔ̄nel̄!

5Ī-rāāī ādī de gə̄ malang gerə̄n̄ háĺ kem majə yāsí. Dɔ reē Kɔ́ɔ̄ɓē i ngɔr. 6Ī-sōlī yá̰á̰ kógə̄ḿ alé. Ba tū yá̰a̰ gə̄ tə́ malang ɓáa, yá̰á̰ ń ndoōn rāāsí ní, ī-dəjeī Nə́ɓā kə ndɔ̄yɔ̄ɔ́ ō, ī-rāāniī ɓɔ́ ō, ī-ndadə̄ ādə̄niī ō. 7Anī kem sɔl̄ lɔm yā Nə́ɓā ń tɔȳ yá̰a̰ malang ń deē asə ger̄ ní, a ngɔ̄m̄ ngarān̄g kemsí ō, gír̄ yāsí ō, loo ɓoo naā yāsí tə́ kə Jeju *Kərist.

8Tām̄ yā gotə najə̄ gə̄ malang tə́ ɓáa ngákó̰ó̰ḿ gə̄, yá̰a̰ malang ń i yá̰á̰ kə́ majə ō, i yá̰á̰ kə́ to kadə̄ deē tɔ̄ȳsí loon tə́ ō, i yá̰á̰ kə́ rɔ̄kum ō, i yá̰á̰ kə́ to kadə̄ deē ɓōĺ gidə ō, i yá̰á̰ kə́ gō tə́ ō, i yá̰á̰ kə́ *unjə̄ njáý njáý ō, i yá̰á̰ kə́ nel̄ deē ō, i yá̰á̰ kə́ to rɔȳ ō ní, ādī gír̄ yāsí malang i dɔ tə́. 9Ī-rāāī yá̰á̰ ń m̄-ndóōsí ní ō, yá̰á̰ ń m-ɔ́jə́sí kadə̄ ī-rāāī ní ō, yá̰á̰ ń teē taḿ tə́ á ōōī ní ō, yá̰á̰ ń á̰a̰mī loo rāā tə́ ní ō. Loo ń noō tə́ Nə́ɓā kə́ nge kadə̄jí kem sɔl̄ lɔm a ndi sesí.

Pol ndadə̄ adə̄ ngé taā kem kə́ Pilipə tə́ gə̄

10M-ə́nge rɔ̄nel̄ kə́ ngá̰ý gō ɓoo naā yāḿ kə Kɔ́ɔ̄ɓēé tə́, tɔdɔ̄ ngɔlaā ə́ngeī ta róbə kɔjə kə̄ ndágá kadə̄ ī-gírī dɔḿ tə́ ɓáý to̰. A̰á̰ā̰ ī-gírī dɔḿ tə́ rɔ̄kum, banī i ta róbə kɔjən kə̄ ndágá n əngeī aĺ i mbée. 11I tām̄ ndoō kə́ rāām̄ tə́ n m-ɔ̄rəń najə̄ tītə̄ ń noō ní alé. Tɔdɔ̄ tū yá̰a̰ gə̄ tə́ malang ní m̄-ndóō loo kadə̄ nelə̄m̄ kə yá̰á̰ ń m-ə́ngé ní. 12m̄-ger̄ ndi dan ndoō tə́ ō, m̄-ger̄ ndi dan yá̰a̰ kal̄ loo tə́ ō. Dan yá̰a̰ gə̄ tə́ malang ō, kə ta róbə́ kə́ tayā tayā gə̄ malang ō ní, m̄-ndóō loo ndi kə ndānāá ō, loo ndi kə ɓōó ō. m̄-ndóō ndi dan yá̰a̰ kal̄ loo tə́ ō, dan ndoō tə́ ō. 13Yá̰a̰ gə̄ ń noō malang ní, m-ásə kundə́ dɔḿ tə́ kɔ̄ɔ́, kə ta kūl̄ *Kərist nge kadə̄m̄ tɔ́gə. 14Ɓá tā ba wursí ń ɔlsí seḿ ní, ī-rāāī i yá̰á̰ kə́ majə.

15Sḭḭ̄ kɔ́ gə̄ de kə́ Pilipə tə́ gə̄, ī-gerī majə kadə̄ dan ń ta kəla gír kɔjə Najə̄ kə́ Majə tə́ á m-ə́ya̰ gō nang kə́ Masedəwan ní, Egəlijə kógə̄ḿ kə́ rāā seḿ adə̄ adə̄m̄ yá̰a̰, aké taā yá̰a̰ jīḿ tə́ ní gətóo, ba i Egəlijə yāsí sḭḭ̄ ngóy. 16Dan ń mā i kem ɓē kə́ Tesalonik tə́ ɓáý ní, sḭḭ̄ ə́laī kə yá̰á̰ kə́ ndoōn rāām̄ ādə̄mī nja i kógə̄ḿ beē ngóy alé. 17Ré m-ɔ̄r̄ najə̄ tītə̄ ń noō anī m̄-sāā i kadə̄ de gə̄ adə̄mə̄n̄ yá̰a̰ alé, ba m̄-sāā i kadə̄ man̄ kəla yāsí reē kə dɔ madə̄ tə́ tām̄ yāsí tə́. 18Yá̰á̰ ń ə́laīneé ādə̄mī ní, m-ə́nge malang. Yá̰á̰ ní mān̄ dɔ yá̰á̰ ń ndoōn rāām̄ ní gə̄gē ɓáý. Dan ń Epapəroditə adə̄m̄ yá̰a̰ yāsí gə̄ ń ə́laniīneé ní, yá̰a̰ malang ń ndoōn rāām̄ ní m-ə́nge. Yá̰a̰ gə̄ ń ādə̄mī ní, ton̄ i tītə̄ *yá̰a̰ ndējə̄ kə́ tɔ̄l̄ ba tun̄ kadə̄ Nə́ɓā, kə́ sēēn otə nel̄ ō, i tītə̄ *yá̰a̰ tun̄ kə́ Nə́ɓā ndigə ō, nel̄ kemən ō beé. 19Ba Nə́ɓā yāḿ a adə̄sí yá̰a̰ malang ń ndoōn rāāsí ní, kə gō yá̰a̰ kal̄ loo yānneé ō, a adə̄sí i kadə̄ kə́ majə ngá̰ý kə ta kūl̄ Jeju *Kərist ō. 20*Kɔsə gɔn i yā Nə́ɓā ń i Bɔbə̄jí ní ngándáńg. *Adə̄ i tītə̄ ń noō.

Lápə́ya kə́ ta tɔ̄l̄ ta tə́

21De gə̄ yā Nə́ɓā gə̄ ń ɓoon̄ naā kə Jeju *Kərist ní, ī-rāāīdə́ lápə́ya kógə̄ḿ kógə̄ḿ malang. Ngákó̰ó̰jí gə̄ ń seḿ laā ní, rāān̄sí lápə́ya. 22De gə̄ yā Nə́ɓā malang ń ndin̄ laā ní, rāān̄sí lápə́ya, ba mandang ɓáa, i ngé kə́ kem ndogə̄ yā *Sejar tə́ gə̄.

23Ādə̄ Kɔ́ɔ̄ɓē Jeju Kərist rāā kem majə sesí!

Currently Selected:

Makətūbə̄ ń Pol ndang adə̄ Pilipə gə̄ ní 4: BS

Highlight

Copy

Compare