Tə́da kutə Ngán Israel gə̄ 36
36
Loo taā ngaa yā dəyá̰ gə̄ ń əngen̄ dɔ nang yá̰a̰ ndəbā tə́ ní
1Ngán kaa Jəjep gə̄ ń i ngār gə̄ kə́ dɔ de gə̄ kə́ gír kaa yā Galaad kə́ ngōn̄ Makir kə́ ngōn̄ Manase ní, reē əngen̄ Moijə ō, ngār gə̄ kə́ dɔ gír ɓē yā ngán *Israel gə̄ tə́ ō, 2ba ədan̄də́ na:
Kɔ́ɔ̄jí Moijə, dan ń Kɔ́ɔ̄ɓē mērī túgə̄ wə̄lā kadə̄ ī-nə̄ɓoń ngán Israel gə̄ dɔ nang kə́ Kanaan ní, mērī i kadə̄ ngán Selopad kə́ dəyá̰ gə̄ dɔ nang ngōkó̰ó̰jí Selopad ō. 3Ba ré nin̄ taān̄ ngaan gír ɓē kə́ rang yā ngán Israel gə̄ tə́ anī, a ɔrə̄n̄ dɔ nang yādə́ kɔ̄ɔ́ mbo̰ō̰ yā bɔbə̄jí gə̄ tə́ yā kərōń yā gír ɓē kə́ rang ń a aw̄n̄ tū tə́ ní. Adə̄ ta dɔ nang ń wə̄lā əhɔ adə̄jí ni a gá̰a̰. 4Adə̄ ré *ɓāl̄ Jubile yā ngán Israel gə̄ ugə̄ anī, dɔ nang yādə́ kə́ gír ɓē yā bɔbə̄jí gə̄ tə́ a tél i dɔ nang kə́ gír ɓē kə́ rang tə́ ń nin̄ taān̄ ngaa tū tə́ ní ɗer.
5Moijə adə̄ ngán *Israel gə̄ *ndū najə̄ gə̄ ń toō kə gō ndū Kɔ́ɔ̄ɓēé əda na:
Najə̄ ń de kə́ gír ɓē yā Jəjep tə́ gə̄ ədan̄ ní i najə̄ kə́ rɔ̄kum. 6Adə̄ yá̰á̰ kə́ dɔ ngán kə́ dəyá̰ gə̄ yā Selopad tə́ ń Kɔ́ɔ̄ɓē əda ní n toó: Nin̄ asən̄ taā dəngam ń kemdə́ ndigə ní, ba kadə̄ i dəngam kə́ gír ɓē yā bɔbə̄də́ tə́ tá. 7I beē tá ngán Israel gə̄ a dáyə̄n̄ kə dɔ nangaá dɔ dáń gír ɓē yādə́ gə̄ tə́ kə̄ yóō kə̄ laā alé. ngán *Israel gə̄ kógə̄ḿ kógə̄ḿ malang a əhɔn̄ dɔ nang ń i yá̰a̰ ndəbā kə́ gír ɓē yā bɔbə̄də́ gə̄ tə́ ní jīdə́ jōó. 8Ré ngōn̄ Israel kə́ dəyá̰ ənge dɔ nang yā bɔbə̄n yá̰a̰ ndəbā tə́ anī, a taā i dəngam kə́ dan gír kaa gə̄ kə́ ɓē yā bɔbə̄n tə́. I beé n ngán Israel gə̄ kógə̄ḿ kógə̄ḿ a əngenə̄n̄ dɔ nang yā bɔbə̄də́ gə̄ yá̰a̰ ndəbā tə́ ní. 9Ngán Israel gə̄ a dáyə̄n̄ kə dɔ nangaá dɔ dáń gír ɓē yādə́ gə̄ tə́ kə̄ yōó kə̄ laā alé. gír ɓē gə̄ yā ngán Israel gə̄ kógə̄ḿ kógə̄ḿ a əhɔn̄ dɔ nang yādə́ gə̄ ń əngen̄ yá̰a̰ ndəbā tə́ ní jīdə́ jōó.
10-11Ngán Selopad kə́ dəyá̰ gə̄ ń rīdə́ na i Mala ō, Tirsa ō, Hogəla ō, Milka ō Noa ō ní, rāān̄ tītə̄ ń Kɔ́ɔ̄ɓē ədań Moijə ní: Nin̄ táān̄ ngáń ngákó̰o̰ bɔbə̄də́ gə̄. 12Adə̄ i dəngam gə̄ kə́ gír kojə gə̄ yā Manase ngōn̄ Jəjep tə́. I beé ń dɔ nang yādə́ gə̄ ń əngen̄ yá̰a̰ ndəbā tə́ ní na̰yn̄ kə́ gír ɓē ń gír kaa yā bɔbə̄də́ i tīī tə́ ní.
13Gō míndə gə̄ ō, *ndū najə̄ gə̄ ō ń Kɔ́ɔ̄ɓē ndang adə̄ ngán *Israel gə̄ kə ta kūl̄ Moijə ndágə loo kə́ Moab tə́, kadə̄ bā Jurdḛ tə́, loo ń sɔɔ̄n̄ ta naā kə ɓē kə́ Jeriko ní n noó.
Currently Selected:
Tə́da kutə Ngán Israel gə̄ 36: BS
Highlight
Share
Copy
Want to have your highlights saved across all your devices? Sign up or sign in
© 2006, 2010 Alliance Biblique du Tchad