Najə̄ kə́ Majə yā Jeju ń Mark ndang ní 7

Yá̰a̰ kāgə̄ ɓē yā ngán Israel gə̄ tə́

(Á̰a̰ī Mat 15.1-9)

1*Parijiyḛ gə̄ kə ngé ndóō de gə̄ ndū najə̄ kə́rēý gə̄ kə́ ḭḭn̄ *Jerusalem kánə̄n̄ naā rɔ̄ Jeju tə́. 2Nin̄-a̰a̰n̄ ngé ndóō yá̰a̰ yān kə́rēý gə̄ əsan̄ yá̰a̰ i kə jīdə́ kə́ yḛr gēé, tām̄ tə́gon̄ jīdə́ alé.

3Tɔdɔ̄ *Parijiyḛ gə̄ kə *Jipə gə̄ malang a əsan̄ yá̰a̰ kanjə̄ tə́go jīdə́ kadə̄ unjə̄ majə alé. Nin̄-əhɔn̄ i gō yá̰a̰ kāgə̄ ɓē yā kaadə́ gə̄. 4Loo ń télən̄ súkūú anī, a tə́gon̄ rɔ̄də́ pá tá a əsan̄ yá̰á̰ ɓáý. Ba yá̰a̰ kāgə̄ ɓē kə́ rang gə̄ ń nin̄-unən̄ gō ní i ngá̰ý, tītə̄ tə́go kópə gə̄, kə jóo gə̄, kə səmbē gə̄, kə tə̄rá gə̄, kadə̄ unjə̄.

5Adə̄ *Parijiyḛ gə̄ kə ngé ndóō de gə̄ ndū najə̄ gə̄ dəjen̄ Jeju na ké i tām̄ rí tə́ n ngé ndóō yá̰a̰ yān gə̄ unən̄ gō yá̰a̰ kāgə̄ ɓē yā kaadə́ gə̄ alé, ba əsan̄ yá̰a̰ i kə jīdə́ kə́ yḛr ní wa.

6Jeju tél ədadə́ na:

Sḭḭ̄ ń i ngé gól̄ kum de gə̄ ní, dan ń Ijai ɔr̄ najə̄ kə́ Nə́ɓā əndā tan tə́ ní, əda i najə̄ yāsí rɔ̄kum. Ndangən̄ makətūbūú i tītə̄ ń toō beé:

Gír de gə̄ ń toō rɔȳmə̄n̄ i kə tadə́ karī,

ba kemdə́ əya̰m̄ sa̰y.

7Nin̄-rāān̄ kəla yāḿ i ndāńg karī,

tɔdɔ̄ yá̰a̰ gə̄ ń nin̄-ndóōn̄ de gə̄ ní

i yá̰a̰ gə̄ ń de gə̄ ran̄ kə de gēé ta rāā ní ngóy.

8Sḭḭ̄ ə́ya̰ī gō míndə́ Nə́ɓā kɔ̄ɔ́, ba úniī i gō kāgə̄ najə̄ yā de gə̄.

9Jeju ədadə́ ɓáý to̰ na:

Ī-gírī kadə̄ ī-rāāī majə ngá̰ý loo ń ī-mbātíī gō míndə́ Nə́ɓā ba úniī gō yá̰a̰ kāgə̄ ɓē yāsí ní. 10Tɔdɔ̄ Moijə əda na kə ī-rɔȳ bɔbí ō, kó̰ó̰í ō, tá əda ɓáý to̰ na deē ń ndɔ̄ĺ bɔbə̄n aláa kó̰o̰n ɓáa, kə tɔ̄l̄nən̄ kɔ̄ɔ́. 11Ba sḭḭ̄, ré deē əda bɔbə̄n aláa kó̰o̰n na yá̰a̰ kənge yān gə̄ ń kadə̄ n ngɔ̄məńdə́ ní na i korban, kumən n a i yá̰á̰ kə́ na n-ndējə̄ Nə́ɓā kɔ̄ɔ́ ní anī, 12ə́ya̰ī deē ń noō kadə̄ rāā yá̰á̰ kógə̄ḿ tām̄ yā bɔbə̄n tə́ aké i kó̰o̰n tə́ to̰ alé, 13adə̄ tītə̄ ń toō beé ní, sḭḭ̄ ī-nujiī najə̄ yā Nə́ɓā kɔ̄ɔ́ kə gō yá̰a̰ kāgə̄ ɓē yāsí gə̄ ń ī-nə̄ɓōī naā ní, ba ī-rāāī yá̰á̰ kə́ rang gə̄ ngá̰ý kə́ tītə̄ ń noō ɓáý to̰.

Yá̰a̰ gə̄ ń a rāān̄ deē kadə̄ tél de kə́ yḛr ní

(Á̰a̰ī Mat 15.10-20)

14Tá Jeju ɓāŕ kósə de gə̄ kə̄ rɔ̄n tə́ to̰, ba ədadə́ na:

Sḭḭ̄ malang, ōōī najə̄ yāḿ, ba ī-gerī kum: 15Yá̰á̰ kógə̄ḿ kə́ ndágá kə́ aw̄ kem deē tə́, ba rāān adə̄ a tél de kə́ yḛr ní gətóo. Banī i yá̰a̰ gə̄ ń teēn̄ kem deē tə́ kə̄ ndágá ní n a rāān̄ deē kadə̄ tél de kə́ yḛr ní. 16Ré āwī kə mbīsí kə́ kadə̄ ōōiń najə̄ anī, ōōī majə#7.16 K. 16 gətóo kem makətūbə̄ yā Mark kə́rēý gə̄ kə́ kété tə́ kə ta Gərek..

17Loo ń Jeju əya̰ kósə de gə̄ ba aw̄ kújú anī, ngé ndóō yá̰a̰ yān gə̄ dəjenən̄ gír najə̄ ngeé ń toō. 18Anī ni-ədadə́ na:

Sḭḭ̄ nəkɔ́ ń ī-ndiī toó, ī-gerī kum yá̰a̰ aĺ bátə́ a? Ī-gerī kadə̄ yá̰á̰ kə́ ndágá kə́ udə kem deē tə́ kadə̄ rāān adə̄ tél de kə́ yḛr gətóo aĺ a? 19Tɔdɔ̄ ni ń toō udə i ngarān̄g kemən tə́ alé, ba aw̄ i jɔdəbon tə́, tá kadə̄ teē kɔ̄ɔ́ ta wa tə́.

Dan ń Jeju əda beé ní, ɔjə kadə̄ yá̰a̰ kəsa malang i yá̰á̰ kə́ *unjə̄ njáý njáý.

20Ni-əda ɓáý to̰ na:

I yá̰á̰ ń teē ngarān̄g kem deē tə́ ní n a rāān kadə̄ tél de kə́ yḛr ní. 21Tɔdɔ̄ yá̰a̰ gə̄ ń a teēn̄ ngarān̄g kem de gə̄ tə́ ní, i gír̄ kə́ majaĺ gə̄ ō, i sāā naā loo kaya tə́ ō, ɓogə ō, tɔ̄l̄ deē ō, 22rāȳ ō, kum ndaa yá̰a̰ ō, kem ndul ō, ngam ō, ngur rāā yá̰á̰ kə́ majaĺ gə̄ ō, ndə̄ngā yá̰a̰ ō, ngonjə̄ ō, kɔjə rɔ̄ ō, mbóo najə̄ gə̄ ō. 23Yá̰á̰ kə́ majaĺ gə̄ ń noō teēn̄ i ngarān̄g kem deē tə́, ba i nin̄ n a rāān̄ deē kadə̄ tél de kə́ yḛr ní.

Dəyá̰ tə̄rā kógə̄ḿ taā kem Jeju

(Á̰a̰ī Mat 15.21-28)

24Jeju ḭḭ loo ń noō tə́ aw̄ gō nang kə́ Tir tə́ anī, udə kem kújə́ kógə̄ḿ tə́. Ni ndigə kadə̄ deē ger̄ gōn alé. 25Banī dəyá̰ kógə̄ḿ oō kōōn. Dəyá̰ ní aw̄ kə ngōnən kə́ dəyá̰ kógə̄ḿ kə́ ndíĺ kə́ yḛr gə̄ i kemən tə́. Dan ń ni-oō kōō Jeju anī, kə̄ ta jī tə́ noō reē əsō kə̄ njan tə́. 26Dəyá̰ ní i Gərek, ba gír kaan i Penisi kə́ Siri. Ni-rāā Jeju ɓɔ́ kadə̄ tə̄ɓā ndíĺ kə́ majaĺ dɔ ngōnən tə́ kɔ̄ɔ́. 27Jeju ədan na:

Ādə̄ ngán gə̄ əsan̄ ndānə̄n̄ kété pá tá, tɔdɔ̄ kadə̄ deē taā yá̰a̰ kəsa yā ngán gə̄ ba tə́nī adə̄ ngáń bísə gə̄ i yá̰á̰ kə́ gō tə́ alé.

28Dəyá̰ ní ədan na:

A̰ýyē, i gō tə́, Kɔ́ɔ̄ɓē, banī ngáń bísə gə̄ ń ran̄ gíŕ tábəl tə́ ní gə̄gē a əsan̄ butə̄ yá̰a̰ kəsa yā ngán gə̄.

29Anī Jeju ədan na:

Tām̄ najə̄ ń toō tə́ ní āw̄, na ndíĺ kə́ majaĺ teē kem ngōnīí tə́ kɔ̄ɔ́.

30Loo ń dəyá̰ tél ugə̄ ɓēé anī, ənge ngōnən to dɔ tə̄ráá ba ndíĺ kə́ majaĺ ní teē kemən tə́ kɔ̄ɔ́.

Jeju rāā adə̄ de kə́ mbíkī oō loo ō, ɔr̄ najə̄ ō

31Jeju əya̰ gō nang kə́ Tir, ba əndā ɓē kə́ Sidon gān̄g. Ni-aw̄ kumən sɔɔ̄ bā bo kə́ Galile. Ni mān̄ gō nang kə́ Dekapol tə́. 32De gə̄ reēn̄ rɔ̄n tə́ kə mbíkī kógə̄ḿ kə́ ngan̄g seneé ngá̰ý kadə̄ ɔr̄ najə̄. Nin̄-rāān̄ Jeju ɓɔ́ kadə̄ əndā jīn dɔn tə́. 33Ni-aw̄ seneé sa̰y kɔ̄ɔ́ rɔ̄ de gə̄ tə́, adə̄ nin̄ i kə kéŕdə́. Ni tə́la ta ngán jīn gə̄ mbīn tə́ ō, tībə̄ hōr̄ ta ngōn̄ jīn tə́ ɔdəń ta ndo̰n ō. 34Gō tə́ anī, ənī kumən kə̄ dɔɔ́ dɔ rā̰ tə́ ō, tetə koō pḭḭ ō, ba əda na:

Epata, kumən na ī-teē taí. 35Kə̄ ta jī tə́ noō mbīn gə̄ oōn̄ loo ō, kəla ndo̰n tútə ō, adə̄ əla gír kɔr̄ najə̄ kə́ kum unjə̄ wáńg wáńg. 36Jeju tāādə́ ngá̰ý kadə̄ ədan̄ deē kógə̄ḿ gotə yá̰á̰ ní alé. Ba dan ń ni tāādə́ ngá̰ý anī, nin̄-ənīn̄ mbēr̄ ngá̰ý dɔ tə́. 37Ɔr kumdə́ ngá̰ý al̄ naā adə̄ ədan̄ na:

Ni-rāā yá̰a̰ malang majə ngá̰ý. Ni ra mbíkī gə̄ adə̄ oōn̄ loo ō, ngé kɔr̄ najə̄ aĺ gə̄ adə̄ ɔrə̄n̄ najə̄ ō.

Currently Selected:

Najə̄ kə́ Majə yā Jeju ń Mark ndang ní 7: BS

Highlight

Copy