Najə̄ kə́ Majə yā Jeju ń Mark ndang ní 3

Jeju rāā adə̄ jī deē kógə̄ḿ kə́ oy tél majə gogə́

(Á̰a̰ī Mat 12.9-14; Luk 6.6-11)

1Jeju udə kem kújə kán̄ naā tə́ to̰. Deē kógə̄ḿ kə́ jīn tutə ndi kemeé. 2*Parijiyḛ gə̄ umə̄n̄ Jeju yā ka̰a̰ ké a rāā kadə̄ rɔ̄ deē ní a ngáā ndɔ̄ *sabat tə́ wa, kadə̄ kə n-sekə́nən̄neé. 3Ba Jeju əda de kə́ jīn tutə ní kə ḭḭ kə ra dɔɔ́ ta kum de gə̄ tə́ malang.

4Ni dəjedə́ na ké *ndū najə̄ yā Nə́ɓā ndigə kadə̄ ndɔ̄ *sabat tə́ ní, jə-rāāī yá̰á̰ kə́ majə aké i yá̰á̰ kə́ majaĺ wa, kadə̄ j-ajiī de gə̄ aké jə-tɔ̄līdə́ wa.

Ba nin̄-ndin̄ kə tadə́ kə́ mbóó. 5Jeju a̰a̰də́ kə wōngōó. Tōrə̄n ngá̰ý kemən tə́ najə̄ kem ngan̄g yādə́ tə́, ba əda deē ní na kə ndájə̄ jīn, ni-ndájə̄ jīn anī jīn tél to karī kɔ̄ɔ́. 6*Parijiyḛ gə̄ teēn̄, ba kə̄ ta jī tə́ noō, oōn̄ naā kə deē yā Herod gēé dɔ Jeju tə́, nin̄-sāān̄ loo tɔ̄lən.

Kósə de gə̄ reēn̄ rɔ̄ Jeju tə́

7Jeju nin̄ kə ngé ndóō yá̰a̰ yān gēé aw̄n̄ kadə bā bo tə́. Anī kósə de gə̄ ngá̰ý unən̄ gōn. 8Nin̄-ḭḭ̄n̄ Galile tə́ ō, Jude tə́ ō, *Jerusalem tə́ ō, Idume tə́ ō, gidə bā Jurdḛ tə́ ō, gō nang kə́ Tir tə́ ō, Sidon tə́ ō. Kósə de kə́ ngá̰ý gə̄ reēn̄ rɔ̄n tə́, tɔdɔ̄ oōn̄ najə̄ yá̰a̰ gə̄ malang ń ni-rāā ní. 9Jeju əda ngé ndóō yá̰a̰ yān gə̄ kadə̄ ɔrə̄n̄ to kógə̄ḿ tām̄ yān tə́, najə̄ kósə de gə̄ ń a mbə́rēnən̄ tə́ ní. 10Tɔdɔ̄ rāā adə̄ rɔ̄ de kə́ mo̰y gə̄ ngá̰ý ngáā, adə̄ ngé mo̰y gə̄ malang məren̄ naā dɔn tə́ kadə̄ n-ɔdən̄ rɔ̄n. 11Dan ń ndíĺ kə́ yḛr gə̄ gə̄gē a̰ā̰n̄ Jeju anī, teē tə́sōn̄ nang tə́ non tə́, ba əgan̄ kɔŕ ədan̄ na ni na i Ngōn̄ Nə́ɓā. 12Banī Jeju tāādə́ kə ngangāá ngá̰ý kadə̄ rāān̄ kadə̄ deē gerə̄n alé.

Jeju əndā ngé kə́ kutə gidə i jōó gə̄ ngámbang kəla yān gə̄ tə́

(Á̰a̰ī Mat 10.1-4; Luk 6.12-16)

13Jeju al̄ dɔ mbalá, ni-ɓāŕ ngé gə̄ ń ni-ndigədə́ ní, adə̄ reēn̄ rɔ̄n tə́. 14Jeju əndā ngé kə́ kutə gidə i jōó gə̄ kadə̄ nin̄ i naā tə́ seneé ō, kadə̄ əladə́ kɔjə najá ō. 15Ni-adə̄də́ tɔ́gə tə̄ɓā ndíĺ kə́ majaĺ gə̄. 16Jeju əndā ngé kə́ kutə gidə i jōó gə̄, adə̄ i Simo̰ ń əndā rīn na i Piyer ní ō, 17Jakə kə́ ngōn̄ Jebede nin̄ kə ngōkó̰o̰n Ja̰a̰ ń əndā rī ɓagədə́ na i Boanerges, á kumən na i ndán̄g man̄ ní ō, 18Andəre ō, Pilipə ō, Bartelemi ō, Matiye ō, Toma ō, Jakə kə́ ngōn̄ Alpe ō, Tade ō, Simo̰ ń a ɓār̄nən̄ na i nge rɔ̄ɔ̄ dɔ ɓē tə́ ní ō, 19Judas Iskariot ń əla Jeju jī de gə̄ tə́ ní ō.

Ngéé Jeju gə̄ sāān̄ kəhɔn

20Jeju aw̄ kújú, banī kósə de gə̄ kánə̄n̄ naā noó ɓáý to̰, adə̄ Jeju kə de gə̄ ń seneé ní yá̰a̰ kəsa gə̄gē a̰ā̰n̄ loo kəsa yá̰a̰ alé. 21Loo ń ngéén gə̄ oōn̄ beé anī, teē aw̄n̄ kəhɔn tə́, tɔdɔ̄ nin̄ ədan̄ na dɔn na ndi kə gōó aĺ na i mbée.

Ngé ndang makətūbə̄ gə̄ ədan̄ na Beljebul i kem Jeju tə́

(Á̰a̰ī Mat 12.22-32; Luk 11.14-23; 12.10)

22Ba ngé ndóō de gə̄ ndū najə̄ gə̄ ń ḭḭn̄ *Jerusalem ní ədan̄ na Beljebul na i kemən tə́, na i kə ta kūl̄ ngār yā ndíĺ kə́ majaĺ gə̄ n a tə̄ɓań ndíĺ kə́ majaĺ gə̄ ní.

23Jeju ɓāŕdə́ kə̄ rɔ̄n tə́ ngɔr, ba ɔr̄ najə̄ sedə́ kə kūjə́ najá ədadə́ na:

*Sətan asə tə̄ɓā Sətan i ba̰ý?

24Ré kem ɓē ko̰o̰ kógə̄ḿ tə́ de kə́ kemeé gə̄ a mbātə́n̄ naā anī, ɓē ko̰o̰ ń noō a ndi ngan̄g alé. 25Ré kem gír kojə kógə̄ḿ tə́ de kə́ kemeé gə̄ mbātə́n̄ naā anī, loo kadə̄ nge naā to mbənādə́ tə́ kum kə̄ kété a gətóo. 26Ré *Sətan ənī dā̰ rɔ̄n nəkɔ́ rɔ̄ɔ̄ anī, a kēgə̄ rɔ̄n naā tə́, adə̄ loo kadə̄ a ndi ɓáý to̰ a gətóo, gír yān a gān̄g kɔ̄ɔ́.

27Deē kógə̄ḿ kə́ yā kaw̄ kem kújə yā dəngam kə́ ngan̄g tə́ kadə̄ ndúr̄ yá̰a̰ yān yā kaw̄ń kɔ̄ɔ́ gətóo, ba ré tṵ́ṵ̄ dəngam kə́ ngan̄g ngeé ń toō kə kəlāá pá tá, gō tə́ anī a ndúr̄ yá̰á̰ kə́ kem kújə yān tə́ yā kaw̄ń ɓáý.

28Ādə̄ m-ə́dásí najə̄ kə́ bo ngá̰ý, yá̰a̰ malang ń ngán deē ndul gə̄ rāān̄, adə̄ i kəla rāādə́ kə́ majaĺ gə̄ ō, i najə̄ kə́ to ngonjə̄ gə̄ ō ní, Nə́ɓā a mā̰ȳ rɔ̄n dɔdə́ tə́ najə̄n tə́. 29Banī náā nəkɔ́ ń ngonjə̄ dɔ *Ndíĺ kə́ Táĺ tə́ ní, a asə kənge mā̰ȳ rɔ̄ yḛtə aĺ bátə́. Sarya majaĺ ń toō a əhɔn ō a rāān ngándáńg ō.

30Tɔdɔ̄ nin̄-ədan̄ na ndíĺ kə́ yḛr i kemən tə́.

Kó̰o̰ Jeju ō, ngákó̰o̰n gə̄ ō

(Á̰a̰ī Mat 12.46-50; Luk 8.19-21)

31Kó̰o̰ Jeju kə ngákó̰o̰n gēé reē ran̄ ndágá, ba əlan̄ ɓārə́n tə́. 32Kósə de gə̄ ń ndi gīrə̄n̄ gidən ní ədanən̄ na: Ōō tá, kó̰ó̰í kə ngákó̰ó̰í gə̄ nin̄ i ndágá noō, a sāānī.

33Ba ni-tél ədadə́ na:

Kó̰ó̰ḿ kə ngákó̰ó̰ḿ gə̄ i náā gə̄?

34Ni mbel a̰a̰ ngé gə̄ ń ndi gīrə̄n̄ gidən ní, ba əda na:

Nin̄ gə̄ ń toō i kó̰ó̰ḿ gə̄ ō ngákó̰ó̰ḿ gə̄ ō ní.

35Tɔdɔ̄ náā nəkɔ́ ń rāā yá̰a̰ kə gō kem ndigə yā Nə́ɓā ní anī, ni i ngōkó̰ó̰ḿ kə́ dəngam ō, kə́ dəyá̰ ō, ni i kó̰ó̰ḿ ō.

Currently Selected:

Najə̄ kə́ Majə yā Jeju ń Mark ndang ní 3: BS

Highlight

Copy