Makətūbə̄ yā Mise 7
7
Nge koō ta nōō rɔ̄n
1Yá̰á̰ kə́ to kum kaȳ aĺ kə́ ba̰ý beē!
m̄-to i tītə̄ deē kógə̄ḿ kə́
dan yā sāā kan̄ yá̰a̰ gə̄ tə́ anī, teē
aw̄ sāā kan̄ *kāgə̄ nduú tə́.
I dan kə́ yá̰a̰ gətóo kɔ̄ɔ́ tə́.
Dɔ bəra nduú kə́ yā kəsa gətóo!
Ka̰n̄ kótə̄ kə́ ta kəga dɔ ń
nelə̄m̄ ngá̰ý ní, kógə̄ḿ gē gətóo!
2Ngé ra dɔ ndūdə́ tə́ gə̄ kə Nə́ɓāá
gətóon̄ kɔ̄ɔ́ kem ɓēé,
deē kógə̄ḿ kə́ rɔ̄kum gətóo.
Nin̄ malang a sāān̄
i ta róbə tɔ̄l̄ deē.
Nin̄ kógə̄ḿ kógə̄ḿ ní,
a əyān̄ gūmbə̄ i yā kəhɔń madə̄də́ gə̄.
3Rāā yá̰á̰ kə́ majaĺ ní,
nin̄ ngangə̄n̄ ngá̰ý loon tə́.
Ngār gə̄ adə̄ a mangən̄də́ i mbée ō,
ngār sarya gə̄ a dəjen̄ i yá̰a̰ kəndā nja gə̄ ō,
yá̰a̰ gə̄ ń de kə́ bo gə̄ gḛyn̄ kənge ní,
nin̄ ədan̄ adə̄ kumən unjə̄ ō.
Nin̄ əndān̄ rɔ̄də́ naā tə́
yā rāań yá̰a̰ yādə́ kə́ majaĺ gə̄ ō.
4De kə́ dandə́ tə́ kə́ majə tɔȳ gotə́ gə̄,
to i tītə̄ mu kə́ ndo̰ō̰ kə́ to dɔ naā tə́ bing beé ō,
majaĺ tɔȳ túpə kō̰n̄ ō.
Ndɔ̄ kə́ yā kəndańsí tām̄
yá̰a̰ rāāsí kə́ gōtə́ aĺ tə́ n toó.
Ngé ngɔ̄m̄ loo yāsí gə̄ ń
i *ngé koō ta gə̄ ní,
ədan̄sí najə̄n kété.
Sḭḭ̄ ə́laī gír ndi kə ɓōló kɔ̄ɔ́ ɓá.
5Ī-lōōī taā kem de kə́
ngɔr rɔ̄sí tə́ gə̄ ō,
ī-lōōī taā kem madə̄ tasí gə̄ ō.
Á̰a̰ī majə! Ī-lōōī teē tasí,
ká i ta kum nə̄yá̰sí tə́ gə̄gē,
ī-lōōī teē tasí.
6Tɔdɔ̄ ngōn̄ kə́ dəngam tájə̄ bɔbə̄n ō,
ngōn̄ kə́ dəyá̰ ḭḭ kə kó̰o̰neé kə rɔ̄ɔ́ ō,
um kə́ dəyá̰ ḭḭ kə mumən
kə́ dəyá̰ kə rɔ̄ɔ́ ō.
De gə̄ kógə̄ḿ kógə̄ḿ ní,
madə̄ ba̰ā̰də́ gə̄ i de gə̄
kə́ kem kojə yādə́ tə́.
7Banī mā m̄-tūr̄ rɔ̄ḿ
kə̄ rɔ̄ Kɔ́ɔ̄ɓē tə́,
m̄-ngóō Nə́ɓā ń a ajəm̄ ní.
Ni Nə́ɓā yāḿ, a oōm̄.
Gír de gə̄ yā Nə́ɓā a əndān̄ kemdə́ dɔn tə́ ō, a ndɔ̄ȳnən̄ ō
8Sḭḭ̄ madə̄ ba̰ā̰jí gə̄,
ī-lōōī rāā rɔ̄nel̄ najə̄ yājí tə́.
Ré j-əsō anī, j-a j-ḭḭ dɔɔ́.
Ré jḭḭ i kum loo kə́ ndɔ̄ɔ́ tə́ anī,
Kɔ́ɔ̄ɓē i loo kə́ unjə̄ kow yājí.
9Majə kadə̄ jə-tə́gā tají,
dan ń Kɔ́ɔ̄ɓē
a rāāń wōn̄g tə́ ní.
Tɔdɔ̄ jə-mān̄ dɔ ndūn.
Banī ndɔ̄ a reē noó,
kadə̄ ni a rɔ̄ɔ̄ dɔjí tə́ ō,
ni a gān̄g sarya
kə́ gōtə́ yā kadə̄jí ō.
Ni a ɔrjí ta róbə
yā kaw̄ sejí
kum loo kə́ unjə̄ kow tə́ ō,
a rāā majə sejí
yā kutə̄ń gidəjí ō.
10Dan ń madə̄ ba̰ā̰jí gə̄
a a̰ā̰n̄ yá̰á̰ ń noō anī,
rɔ̄də́ a sɔl̄də́.
Kété ní, nin̄ dəjen̄jí
najə̄ ədan̄ na:
Ba Kɔ́ɔ̄ɓē ń i Nə́ɓā
yāsí ní, a rā i rí?
A tə́ɓān̄də́ njadə́ tə́
tītə̄ loo kəɓa bɔr
kə́ kum róbə kɔsə gə̄ tə́ beé,
adə̄ j-a j-a̰ā̰ kə kumjí.
11Ndɔ̄ a reē noó, kadə̄
a télən̄ yā kəndā ndogə̄ mbal̄
kə́ gidə ɓē bo yāsí tə́ gogə́.
Ndɔ̄ ngeé ń noō tə́ ní,
a teēn̄ kem dɔ nang
yāsí kə̄ gogə́.
12Loo ń noō tə́ ngákó̰ó̰sí gə̄
a télən̄ yā reē loosí gogə́.
A əlan̄ gír kḭḭ i dɔ nang kə́ Asiri tə́
bátə́ Ejiptə tə́ ō,
kadə bā Nil tə́ ō, bā Opəratə tə́ ō,
kadə bā bo gə̄ tə́ ō,
gō nang kə́ mbalá tə́ ō.
13Gotə loo kə́ rang gə̄ a télən̄
i dəla loo, najə̄ kem ndul
yā de gə̄ ń ndin̄ tū tə́ ní tə́.
14Kɔ́ɔ̄ɓē, ɔ́ŕ gír deē yāí gə̄
ta róbə kə kāgə̄ yāí ń
ā ī-ngɔ̄məń yá̰a̰ kul̄ gə̄ ní.
Nin̄ ndin̄ i kə kéŕdə́
dɔ nang kə́ tutə kɔ̄ɔ́ tə́.
Kāgə̄ kə́ kan̄ gə̄ gīrə̄n̄ gidədə́.
Ɔ́ŕdə́ ta róbə tītə̄ kə́ kété,
āw̄ sedə́ dɔ mu gə̄
kə́ Basan tə́ ō,
dɔ nang kə́ Galaad tə́ ō!
15Ɔ́jə́jí yá̰a̰ rāāí gə̄ kə́ ton̄ dáńg,
tītə̄ ń ī-rāań kété,
dan ń ī-teēń sejí kɔ̄ɔ́
kem ɓē kə́ Ejiptə tə́ ní!
16Nápar de gə̄ a a̰a̰n̄də́. Tɔ́gə́də́ i ngá̰ý
ɓá tā, banī rɔ̄də́ a sɔl̄də́.
Nin̄ a gerə̄n̄ yá̰á̰ kə́ yā kəda aĺ ō,
a gḛyn̄ koō yá̰á̰ kógə̄ḿ aĺ ō.
17Nin̄ a tō̰nə́n̄ bumbə́ru tītə̄ lī beé,
tītə̄ dā̰ kə́ kagə nang tə́ gə̄ beé.
Nin̄ a teēn̄ loo ɓɔ̄ɔ̄ rɔ̄ yādə́
kə́ ngan̄g ngá̰ý gə̄ tə́ kə rɔ̄ ndeweé,
yā reē rɔ̄í ḭ̄ Kɔ́ɔ̄ɓē Nə́ɓā yājí tə́.
Nin̄ a ɓōlə́n̄ tɔ́gí ngá̰ý.
18Nə́ɓā kə́ to tītīí ndi noó a?
Ḭ̄ ɔ̄r̄ yá̰a̰ rāā kə́ gōtə́ aĺ gə̄ kɔ̄ɔ́ ō,
ī-mā̰ȳ rɔ̄í dɔ mān̄ dɔ *ndū najə̄ gə̄
yā gír deē yāí gə̄ ń
na̰yn̄ kə kumdə́ ní tə́ ō.
Wōn̄g yāí to gotoó ngándáńg alé,
banī nelī kadə̄ ɔ́jə́jí kem majə yāí.
19Ā ī-tél kadə̄ kumií
a o̰o̰ī tām̄ yājí tə́ ɓáý.
Adə̄ ā ə̄ndā njaí dɔ mān̄ dɔ
*ndū najə̄ gə̄ yājí tə́ ō,
yá̰a̰ rāājí kə́ gōtə́ aĺ gə̄ malang ní,
ā ī-ɓōkə́də́ gír bā boó kɔ̄ɔ́ ō!
20De gə̄ kə́ kem kojə yā Jakob tə́ ní,
ā ɔ́jə́də́ kadə̄ ḭ̄ i de kə́ nge ra dɔ ndūí tə́ ō,
de gə̄ kə́ kem kojə yā Abəraham tə́ ní,
ā ɔ́jə́də́ kadə̄ ḭ̄ i de kə́ nge əhɔ *madə̄ naā ō,
tītə̄ ń ī-túbə ə̄niń ndūí ādə̄ kaají gə̄ kété ní.
Currently Selected:
Makətūbə̄ yā Mise 7: BS
Highlight
Copy
Compare
Share
Want to have your highlights saved across all your devices? Sign up or sign in
© 2006, 2010 Alliance Biblique du Tchad
