Makətūbə̄ yā Malasi 3
3
1Najə̄ ń Kɔ́ɔ̄ɓē kə́ bo kə́ tɔ́gən i ngá̰ý tūr̄ əda ní n toó: M-ā m-ə́la nge kəla yāḿ. Ni a rāā róbə tām̄ yāḿ tə́. Kɔ́ɔ̄ɓē ń ī-gḛyn̄ ní, a reē kem *kújə yān tə́ i rétə́ gēé. Nge kəla yā *madə̄ naā ń ī ndi ā ī-ngóōī ní n toó, a reē. 2Dan ń a reē ní, i náā n a asə ra gas gotə kógə̄ḿ ní? Dan ń a ɔjə rɔ̄n kə̄ ndágá ní, i náa n a asə ra dɔɔ́ ní? Tɔdɔ̄ ni to i tītə̄ hor yā kɔdə̄ nge nōō gində̄ beé ō, tītə̄ sabūn̄ yā nge tə́go kūbə̄ beé ō. 3Ni a ndi nang tə́ yā nōō gində̄ arjā̰a̰ horoó ō, yā rāā kadə̄ gində̄ arjā̰a̰ *unjə̄ njáý njáý ō. *Ngé tun̄ yá̰a̰ gə̄ kə́ kem kojə yā Lebi tə́ ní, ni a tə́gódə́ kadə̄ a unjə̄n̄ njáý njáý. A rāādə́ kadə̄ a unjə̄n̄ njáý njáý tītə̄ loo rāā lɔ́r ō gində̄ arjā̰a̰ ō kadə̄ unjə̄n̄ njáý njáý beē. Loo ń noō tə́ nin̄ a asən̄ kadə̄ Kɔ́ɔ̄ɓē *yá̰a̰ ndējə̄ gə̄ kə gō looneé. 4I beé n *yá̰a̰ ndējə̄ gə̄ yā de kə́ Jerusalem gə̄ ō, yā de kə́ rang gə̄ ń ndin̄ dɔ nang kə́ *Juda tə́ ní ō, a nelə̄ń Kɔ́ɔ̄ɓē tītə̄ kə́ kété jóó ní. 5A̰á̰ā̰, Kɔ́ɔ̄ɓē kə́ bo kə́ tɔ́gən i ngá̰ý əda najə̄ ń toō: M-ā m̄-reē dansí tə́ yā rāā sarya sesí. M-ā m-ɔ́r bā̰ā̰ loo kəndā najə̄ dɔ ngé kəga gə̄ tə́ aĺ ō, ngé rāȳ gə̄ tə́ aĺ ō, ngé túbə dɔ lám̄ gə̄ tə́ aĺ ō, ngé kəgā ngé kəla yādə́ gə̄ kə gōó aĺ gə̄ ō, ngé rējə̄ dəyá̰ kə́ ngaa koy gə̄ ō, ngán hal gə̄ ō, kə yá̰a̰ rāādə́ kə́ gōtə́ aĺ ō, ngé rāā tə̄rā gə̄ majaĺ ō, de gə̄ malang ń ɓōlə́n̄ ndílə́ḿ aĺ ní ō.
Tél gogə́ rɔ̄ Kɔ́ɔ̄ɓē tə́
6Mā Kɔ́ɔ̄ɓē m̄-tūr̄ alé. Ba sḭḭ̄, ngándáńg ní sḭḭ̄ i ngán Jakob gə̄! 7Jī bēl̄ loo rāā yá̰a̰ gə̄ ń m̄-ndóōsí ní, sḭḭ̄ ə́ya̰īdə́ sa̰y kɔ̄ɔ́, úniī gōdə́ alé, tītə̄ ń kaasí gə̄ rāānəń ní. Ī-téliī kə̄ rɔ̄ḿ tə́, anī m-ā m̄-tél kə̄ rɔ̄sí tə́. I mā Kɔ́ɔ̄ɓē kə́ bo kə́ tɔ́gə́ḿ i ngá̰ý n m-ə́da najə̄ ń noō ní. Banī sḭḭ̄ ī-dəjeī najə̄ ə́daī na ké ā ī-téliī kə̄ rɔ̄ḿ tə́ i ba̰ý wa. 8m̄-tūr̄ m-ə́dásí na ké deē ndul asə gól̄ Nə́ɓā wa. Ɓá tā ba, sḭḭ̄ ī-gól̄mī! Ī-dəjeī ɓáý to̰ na ké ī-gól̄mī i kə rí wa. m̄-tél m̄-tūr̄sí m-ə́da na i dan ń majə kadə̄ ādə̄mī yá̰a̰ kənge yāsí gə̄ kə́ nge ko̰ kutə gə̄ ō, *yá̰a̰ ndējə̄ gə̄ ō ní. 9Yá̰á̰ kə́ to kum kaȳ aĺ a teē dɔsí tə́! Ndɔ̄lə́n̄sí, i tām̄ ī-gól̄mī, sḭḭ̄ ngán *Israel gə̄ malang. 10I beé ní, yá̰a̰ kənge yāsí gə̄ kə́ nge ko̰ kutə gə̄ ní, ī-reēīń kə́ rɔ̄kum tə́, kem kújə ngɔ̄m̄ yá̰a̰ kənge tə́, ādə̄ yá̰a̰ kəsa to ngándáńg kem *kújə yā Kɔ́ɔ̄ɓē tə́. Mā Kɔ́ɔ̄ɓē kə́ bo kə́ tɔ́gə́ḿ i ngá̰ý m-ə́da na: Ásiī ndəle gír yā ger̄ kadə̄ m-ə́da i najə̄ kə́ rɔ̄kum. Loo ń noō tə́ ā á̰a̰ī kadə̄ m-ā m̄-teē ta kār̄ man̄ gə̄ kə́ dɔ rā̰ tə́ tām̄ yāsí tə́ ō, m-ā m̄-rāā majə sesí ngá̰ý ō. 11M-ā m̄-tūr̄ ta gaẃ gə̄ kɔ̄ɔ́ dɔsí tə́: Nin̄ a nujən̄ kōō yāsí gə̄ aĺ ō, a ɔgə̄n̄ kāgə̄ nduú yāsí gə̄ ka̰a̰n̄ aĺ ō. I mā Kɔ́ɔ̄ɓē kə́ bo kə́ tɔ́gə́ḿ i ngá̰ý n m-ə̄nī ndūḿ ní. 12Nápar de gə̄ malang a ədan̄sí na sḭḭ̄ i ngé rɔ̄nel̄ gə̄, tɔdɔ̄ ndi kem ɓē yāsí tə́ a majə ngá̰ý. I mā Kɔ́ɔ̄ɓē kə́ bo kə́ tɔ́gə́ḿ i ngá̰ý n m-ə́da najə̄ ń noō ní.
Ndɔ̄ ń Nə́ɓā a ɔjəń yá̰a̰ rāā kə́ gōtə́ yān kə̄ ndágá ní
13Kɔ́ɔ̄ɓē əda na: Sḭḭ̄ ī-tə́daī najə̄ kə́ ngan̄g ngan̄g gə̄ dɔḿ tə́, ba ī-dəjeī najə̄ ə́daī na ké najə̄ ń ɔ̄rī dɔ dáńsí tə́ dɔḿ tə́ ní ké na i rí wa. 14Ní, najə̄ ń ə́daī ní n toó: Rāā kəla kadə̄ Nə́ɓā, i yá̰á̰ kə́ kanjə̄ kumən. Yá̰a̰ gə̄ ń ni-əda kadə̄ yā rāā ní, jḭḭ jə-ngɔ̄m̄. Jḭḭ j-əndā yo ta kum Kɔ́ɔ̄ɓē kə́ bo kə́ tɔ́gən i ngá̰ý tə́, banī i yá̰á̰ kə́ kanjə̄ kumən! 15J-a̰ā̰ ngɔlaā kadə̄ ngé rɔ̄nel̄ gə̄ i ngé kɔjə rɔ̄də́ gə̄. Yá̰a̰ malang ń ngé rāā yá̰a̰ majaĺ gə̄ rāān̄ ní, teē majə. Ká ré nin̄ sāān̄ ta Nə́ɓā gə̄gē anī, nin̄ teēn̄ kum tə́ ngándáńg!
16Loo ń noō tə́ ngé ɓōĺ ndíĺ Kɔ́ɔ̄ɓē gə̄ ɔrə̄n̄ najə̄ kə naá. Kɔ́ɔ̄ɓē nēl̄ mbīn ooń najə̄ kɔr̄də́ ní. Ndangən̄ rī ngé ɓōĺ ndílən gə̄ ō, rɔȳn gə̄ ō ta kumən tə́. 17Gō tə́ anī, Kɔ́ɔ̄ɓē kə́ bo kə́ tɔ́gən i ngá̰ý əda na: Ndɔ̄ ń m-ā m-ɔ́jəń tɔ́gə́ḿ ní, m-ā m̄-rāādə́ i deē yāḿ gə̄ tə́. M-ā m̄-rāā majə sedə́, tītə̄ ń bɔbə̄ ngōn̄ a rāań majə kə ngōnən kə́ dəngam kə́ nge rāā kəla kadə̄n ní. 18Loo ń noō tə́, ā á̰a̰ī dɔ nin̄ ngé koō taḿ gə̄ kə ngé koō taḿ aĺ gə̄ ō, ngé rāā kəla kadə̄m̄ gə̄ kə ngé rāā kəla kadə̄ḿ aĺ gə̄ ō. 19Mā Kɔ́ɔ̄ɓē kə́ bo kə́ tɔ́gə́ḿ i ngá̰ý m-ə́da najə̄ ń toō: Ndɔ̄ yāḿ a reē noó, ndɔ̄ ní təngā tītə̄ hor beé. Ndɔ̄ ngeé ń noō tə́ ní, ngé kɔjə rɔ̄də́ gə̄ malang ō, ngé rāā yá̰a̰ majaĺ gə̄ malang ō, a ton̄ i tītə̄ mu beé. Hor a o̰o̰də́ malang. M-ā m-ə́ya̰ ngəradə́ gə̄ yā kadə̄də́ aĺ ō, m-ā m-ə́ya̰ ta jīdə́ gə̄ yā kadə̄ aĺ ō. 20Ba tām̄ yāsí sḭḭ̄ ngé ɓōĺ ndílə́ḿ gə̄ tə́ tā anī, mbang yá̰a̰ rāā kə́ gōtə́ a əɓa. Yḛrə́n a reē kə rɔ̄ ngáāá. Ā ī-tḭ́ḭ̄ i bal walya n ā ī-teēīń kə̄ ndágá ní, tītə̄ ngán man̄g gə̄ kə́ ulə̄n̄də́ majə beé. 21Ba ndɔ̄ ń mā Kɔ́ɔ̄ɓē kə́ bo kə́ tɔ́gə́ḿ i ngá̰ý m-ā m-ɔ́jəń tɔ́gə́ḿ tə́ ní, ā ī-njə̄rāī dɔ de kə́ majaĺ gə̄ tə́. Nin̄ a ton̄ i tītə̄ bumbə́ru beé gír njasí tə́.
Eli tél reē
22Ādə̄ əga kemsí dɔ *ndū najə̄ yā nge kəla yāḿ Moijə tə́. Kété ní, m-ādə̄n ndū najə̄ gə̄ ō, jī bēl̄ loo rāā yá̰a̰ gə̄ ō, tām̄ yā ngán *Israel gə̄ tə́ malang, dɔ mbal̄ Oreb tə́.
23Kété pá tá kadə̄ ndɔ̄ yā Kɔ́ɔ̄ɓē ugə̄, ndɔ̄ ngeé ń noō ń i ndɔ̄ kə́ bo ō, to ɓōĺ ngá̰ý ō ní, m-ā m-ə́la kə *nge koō ta ń rīn na i *Eli ní yā kadə̄sí. 24Ni a rāā kadə̄ lɔm to mbənā bɔbə̄ ngán gə̄ tə́ kə ngáńdə́ gēé ō, mbənā ngán gə̄ tə́ kə bɔbə̄də́ gēé ō. Loo ń noō tə́ m-ā m̄-reē yā nujə ɓē yāsí alé.
Currently Selected:
Makətūbə̄ yā Malasi 3: BS
Highlight
Share
Copy
Want to have your highlights saved across all your devices? Sign up or sign in
© 2006, 2010 Alliance Biblique du Tchad