Makətūbə̄ yā Malasi 1
1
1Najə̄ ń Kɔ́ɔ̄ɓē ɔr̄ kə *Israel gə̄ kə ta kūl̄ Malasi ní n toó.
I Israel gə̄ n Kɔ́ɔ̄ɓē gə̄rādə́ ní
2Kɔ́ɔ̄ɓē əda gír deē yān gə̄ wáńg na:
Mā Kɔ́ɔ̄ɓē m̄-táŕsí, banī sḭḭ̄ ī-dəjemī najə̄ ə́daī na ké yá̰á̰ ń ɔjə kadə̄ m̄-táŕsí ní ké i rí wa. m̄-tél m̄-tūr̄sí m-ə́da na: Kété ní, Esau i ngōkó̰o̰ Jakob aĺ a? Ɓá tā ba m̄-gḛy i Jakob 3banī i Esau alé. Kété ní, de gə̄ kə́ kem kojə yā Esau tə́ ndin̄ i gō nang kə́ mbalá tə́. Mā m̄-rāā gō nang ní adə̄ tél dəla loo ō, m-ādə̄ tal̄ gə̄ ɓē yādə́ ō. 4De gə̄ ngeé gə̄ ń noō ń i Edom gə̄ ní, majanī a ədan̄ na: Rējēn̄jí, banī ɓē yājí gə̄ ń nujənə̄ń sák sák kɔ̄ɔ́ ní, j-a jə-tél yā rāā gogə́ rang. Yá̰á̰ ń mā Kɔ́ɔ̄ɓē kə́ bo kə́ tɔ́gə́ḿ i ngá̰ý m-ə́dá ní n toó: Nin̄ asən̄ tél rāā gogə́ tā, ba yá̰á̰ ń nin̄ a rāān̄ ní, m-ā m̄-nujəń kɔ̄ɔ́! A ɓārə́n̄də́ na i Ɓē yā de kə́ majaĺ gə̄ ō, i Gír de gə̄ kə́ Kɔ́ɔ̄ɓē rāā wōn̄g sedə́ kanjə̄ dəba ō. 5Sḭḭ̄ *Israel gə̄ a á̰a̰ī yá̰á̰ ń noō ba ā ə́daī na: I kem ɓē kə́ *Israel tə́ ngóy n Kɔ́ɔ̄ɓē i de kə́ bo ní alé, ni i de kə́ bo gidə tə́ ndágá ō.
Rāā kəla kadə̄ Kɔ́ɔ̄ɓē kə́ majə tām̄ yā Kɔ́ɔ̄ɓē tə́ alé
6Yá̰á̰ ń mā Kɔ́ɔ̄ɓē kə́ bo kə́ tɔ́gə́ḿ i ngá̰ý m-ə́dá *ngé tun̄ yá̰a̰ gə̄ ní n toó: Ngōn̄ kə́ dəngam rāā háĺ kə́ to hɔ̄r̄mɔ̄ kə bɔbə̄neé ō, nge kəla ɓōĺ ndíl kɔ́ɔ̄n ō. Sḭḭ̄ ī-ɓāŕmī bɔbə̄sí, ba ī-rāāī háĺ kə́ to hɔ̄r̄mɔ̄ seḿ a? Ī-ɓāŕmī kɔ́ɔ̄sí, ba ī-ɓōlíī ndílə́ḿ a? Sḭḭ̄ ī-kídə̄mī, ba ī-dəjeī najə̄ ə́daī na ké jə-kídī i tū rí tə́ wa. 7Sḭḭ̄ ī-reēī kə yá̰a̰ kəsa kə́ yḛr dɔ *loo tun̄ yá̰a̰ yāḿ tə́. Ba ī-dəjeī najə̄ ə́daī na ké ī-ɓōlíī ndílə́ḿ aĺ i tū rí tə́ wa. I kə ta kūl̄ kəda na: Loo tun̄ yá̰a̰ yā Kɔ́ɔ̄ɓē i yá̰á̰ kə́ bo ngá̰ý ta kumsí tə́ alé. 8Dan ń ī-ndējə̄mī dā̰ kə́ kum tɔ̄ɔ̄ ní, i yá̰á̰ kə́ majə a? Dan ń ī-ndējə̄mī dā̰ kə́ nja motə aláa kə́ mo̰y ní, i yá̰á̰ kə́ majə a? I beé ní, āwī kə dā̰ ní ādī nge ko̰o̰ ɓē yāsí! Rɔ̄n a nelə̄n a? A əhɔsí kə̄ rɔ̄n tə́ majə a? Mā Kɔ́ɔ̄ɓē kə́ bo kə́ tɔ́gə́ḿ i ngá̰ý m̄-dəjesí najə̄ ń noō. 9Ngɔlaā ní, ī-nāāī ndɔ̄ȳm̄ mā Nə́ɓā yāsí, yā kadə̄ kumḿ o̰o̰mə̄ń tām̄ yāsí tə́. Gō yá̰á̰ ń ī-rāāī tə́ ní, m-ā m-ə́wásí kə̄ rɔ̄ḿ tə́ majə a? Mā Kɔ́ɔ̄ɓē kə́ bo kə́ tɔ́gə́ḿ i ngá̰ý m̄-dəjesí najə̄ ń noō. 10Kə́ só tə́ i kadə̄ deē kógə̄ḿ kə́ dansí tə́ utə̄ ta róbə́ *kújə gə̄ yā Kɔ́ɔ̄ɓē kɔ̄ɔ́. I beé tá ā āwīiń dɔ *loo tun̄ yá̰a̰ yāḿ tə́ yā rāā hor ndāńg alé. Tām̄ mā Kɔ́ɔ̄ɓē kə́ bo kə́ tɔ́gə́ḿ i ngá̰ý nelə̄m̄ ka̰a̰sí aĺ ō, *yá̰a̰ ndējə̄ gə̄ ń ī-reēiń ādə̄mī ní, nelə̄m̄ aĺ ō. 11Ḭḭ ta ngóy dɔ nang kə́ dām̄ kógə̄ḿ tə́, bátə́ ta ngóyn kə́ dām̄ kə́rēý tə́ ní, gír de kə́ rang gə̄ a̰a̰n̄ bo yāḿ gerə̄n̄. Nin̄ róōn̄ ndujə̄ yá̰á̰ kə́ kotə majə gə̄ kə̄ loo gə̄ tə́ malang rɔȳmə̄n̄neé ō, reēn̄ kə yá̰a̰ ndə̄jə̄ kə́ unjə̄ njáý gə̄ adə̄mə̄n̄ ō. Mā Kɔ́ɔ̄ɓē kə́ bo kə́ tɔ́gə́ḿ i ngá̰ý m-ə́da na nápar de gə̄ a̰a̰n̄ bo yāḿ gerə̄n̄. 12Banī sḭḭ̄, dan ń ə́daī na *loo tun̄ yá̰a̰ yā Kɔ́ɔ̄ɓē i loo kə́ yḛr ō, yá̰a̰ kəsa ń j-əngeī tū tə́ ní, i yá̰á̰ kə́ ngá̰ý aĺ ō ní, ī-ɓōlíī i ndílə́ḿ loo de kə́ bo tə́ alé! 13Tá sḭḭ̄ ə́daī ɓáý to̰ na: I kəla kə́ to kɔr̄ tɔ́gə de kə́ ba̰ý beē! Mā ń i Kɔ́ɔ̄ɓē kə́ bo kə́ tɔ́gə́ḿ i ngá̰ý ní, sḭḭ̄ ī-kídə̄mī! Sḭḭ̄ ī-reēī kə dā̰ kə́ ɓogə gə̄, kə dā̰ kə́ nja motə gə̄, aláa kə́ mo̰y gə̄, ādə̄mī. I beé ní, m̄-dəjesí najə̄ ń toō: Yá̰a̰ gə̄ ń noō ń ī-ndējə̄mī ní, m-ásə taā jīsí tə́ a? 14Majanī deē kógə̄ḿ aw̄ kə́ dā̰ kə́ majə gə̄ dan yá̰a̰ kul̄ yān gə̄ tə́. Ré deē ní ənī ndūn ō, ndējə̄m̄ dā̰ kə́ majaĺ ō anī, yá̰á̰ kə́ to kum kaȳ aĺ a reē dɔ kɔ́ɔ̄ tə́! Tām̄ mā Kɔ́ɔ̄ɓē kə́ bo kə́ tɔ́gə́ḿ i ngá̰ý m-ə́da na: Mā i mban̄g kə́ bo ō, nápar de gə̄ ɓōlə́n̄ tɔ́gə́ḿ ō.
Currently Selected:
Makətūbə̄ yā Malasi 1: BS
Highlight
Share
Copy
Want to have your highlights saved across all your devices? Sign up or sign in
© 2006, 2010 Alliance Biblique du Tchad