Makətūbə̄ Nōō rɔ̄ 5
5
Kɔ́ɔ̄ɓē, ī-rāā ādə̄ jə-tél kə̄ rɔ̄í tə́
1Kɔ́ɔ̄ɓē ādə̄ əga kemií dɔ yá̰á̰ ń rāājí tə́ ní,
ī-teē kumií á̰a̰ń tájə̄ ń de gə̄ tájə̄n̄jí asə naā beé ní.
2Télən̄ kə yá̰a̰ kənge yājí adə̄n̄ tə̄rā gə̄ ō,
kújə yājí gə̄ télən̄ yá̰a̰ kənge yā de kə́ deē ger̄də́ aĺ gə̄ ō.
3Jə-téĺ ngáń kə́ hal bɔbə̄ rāādə́ gə̄ ō,
kó̰ó̰jí gə̄ ton̄ tītə̄ dəyá̰ kə́ ngaa koy gə̄ ō.
4J-adə̄ i nar tá j-ɔdəń man̄ yājí j-a̰ȳ ō,
j-əgā i nar tá j-ɔyń kīr̄ yājí gə̄ kə̄ ɓēé ō.
5Nja ngé rāā kumjí ndoō tə́ gə̄ i gōjí tə́ gōjí tə́.
Kɔr asəjí nák ba deē əya̰jí adə̄ jə-taā koō alé.
6J-əla jījí i kum kə̄ rɔ̄ Ejiptə tə́ ō,
rɔ̄ Asiri tə́ ō tá jə-gədeń yá̰a̰ j-əsa adə̄ ndān̄jí.
7Bɔbə̄jí gə̄ rāān̄ majaĺ, ba gətóon̄ kɔ̄ɔ́,
adə̄ i jḭḭ n j-əgā kə̄rā yá̰á̰ kə́ gōtə́ aĺ yādə́ gə̄ ní.
8Ɓəlo gə̄ ndin̄ dɔjí tə́,
ba de kə́ yā taājí jīdə́ tə́ gətóo.
9J-ənī rɔ̄ɔ̄jí kɔ̄ɔ́ tá kadə̄ j-əngeń yá̰a̰ kəsa kə́ tají tə́,
tɔdɔ̄ ngé gān̄g róbə gə̄ taān̄ loo kem dəla loo tə́.
10Ɓō rāājí al̄ naā adə̄ rɔ̄jí təngā tólóló tītə̄ yá̰á̰ kə́ kəla bəlo púr tə́ beē.
11Nin̄ ɓīīn̄ kə dəyá̰ kə́ *Siyo̰ gə̄ ō,
kə ngáń kə́ mandə kə́ *Juda tə́ gə̄ ō, dɔ gúú tə́.
12Nin̄ kɔ́ gə̄ ənīn̄ kəlā míndə ngār gə̄ tə́ kə jīdə́ tɔ̄l̄neédə́ ō,
rɔyn̄ *kum kɔɔ̄ gə̄ aĺ ō.
13Balsáa gə̄ ətōn̄ mbal̄ riī yá̰a̰ ō,
ngán gə̄ bḭ́ḭ̄n̄ kə kāgə̄ kə́ kɔȳ ngá̰ý gə̄ dɔdə́ tə́ ō.
14Kum kɔɔ̄ gə̄ lōōn̄ gír kaw̄ loo koō naā dɔ najə̄ tə́ ō,
balsáa gə̄ lōōn̄ gír taā pā tə́ ō.
15Rɔ̄nel̄ gətóo kɔ̄ɔ́ ngarā̰ kemjí tə́ ō,
ndām̄ yājí tél i nōō yo ō.
16Jākā mbang kə́ dɔjí tə́ teē əsō kɔ̄ɔ́.
Yá̰á̰ kə́ to kum kaȳ aĺ əsō dɔjí tə́, tɔdɔ̄ jə-rāā majaĺ.
17Á̰a̰ī yá̰á̰ ń rāā yá̰á̰ á rɔ̄jí malang tōr̄jí ní ō,
yá̰á̰ ń rāā yá̰á̰ á loo əga til ta kumjí tə́ ō ní n toó:
18I tɔdɔ̄ mbal̄ *Siyo̰ tél loo kə́ nujə kɔ̄ɔ́ ō,
loo kə́ tal̄ gə̄ a njə̄rān̄ tū tə́ ō.
19Ḭ̄, Kɔ́ɔ̄ɓē, ī-ndi mban̄g ngándáńg.
Ī-ndi dɔ kōr̄ kāgə̄ mbang yāí tə́ i kə dɔ ɓāl̄ gə̄, ɓāl̄ gə̄.
20I tām̄ rí tə́ á dɔí ndígə̄nal dɔjí tə́ kə̄ noí tə́ ō,
ə́yá̰jí kɔ̄ɔ́ dəloí bátə́ mbang udə ō, i kə dɔ ndɔ̄ gə̄ ō ní?
21Kɔ́ɔ̄ɓē ī-rāā ādə̄ jə-tél kə̄ rɔ̄í tə́,
anī j-a jə-tél yā reē rɔ̄í tə́.
Ə̄nī ndɔ̄ gə̄ ta madə̄ tə́ adə̄jí tītə̄ kə́ kété jóo gə̄.
22Ā ī-mbātə́jí kɔ̄ɔ́ i kə́ njɔ́ḿ gə̄ tə́ a?
Wōn̄g rāāī sejí adə̄ al̄ naā!
Currently Selected:
Makətūbə̄ Nōō rɔ̄ 5: BS
Highlight
Share
Copy
Want to have your highlights saved across all your devices? Sign up or sign in
© 2006, 2010 Alliance Biblique du Tchad