Makətūbə̄ yā Jojue 3
3
Israel gə̄ teēn̄ bā Jurdḛ
1Jojue nin̄ kə ngán *Israel gēé ḭḭn̄ Sitim kə gír looí ɓatə, aw̄ ugə̄n̄ ta bā Jurdḛ tə́. ɓīīn̄ kə̄ ta bā tə́ noō a ngóōnəń kum mbang kə́ yā teēń bā Jurdḛ kə̄ gidə kə́rēý tə́. 2Kə ndɔ̄ kə nge ko̰ mətá anī ngé gə̄ ń i ngé ndóō ngán Israel gə̄ *ndū najə̄ ní njə̄rān̄ mbo̰ō̰ de gə̄ tə́ kem gérgereé, 3ba ədan̄də́ na: Ré á̰a̰ī ngán Lebi kə́ *ngé tun̄ yá̰a̰ gə̄ a ətōn̄ *sandúkə madə̄ naā yā Kɔ́ɔ̄ɓē Nə́ɓā yāsí a aw̄n̄neé anī, ḭ́ḭḭ̄ kɔ̄ɔ́ loo ń ī-ndiī tū tə́ tə́ ní ba úniī gōdə́.
4I beé n ā ī-gerīiń róbə́ kə́ yā kun ní, tɔdɔ̄ sḭḭ̄ úniī róbə́ ń toō kété aĺ ɓáý, ɓá tā ba ādī dɔ dáńsí to asə kilometər kógə̄ḿ kə *sandúkə madə̄ naā ní, ba ī-lōōī njə̄rā gō tə́ ngɔr.
5Gō tə́ anī Jojue əda gír de gə̄ na: Ɔ̄rī kam̄sí tām̄ yā Nə́ɓā tə́ ādə̄ majaĺ gətóo dɔ dáńsí tə́, tɔdɔ̄ bírí anī Kɔ́ɔ̄ɓē a rāā yá̰á̰ kə́ kɔr kum gə̄ dɔ dáńsí tə́. 6Teē kə ndɔ̄ kə́ noō anī, ni-əda *ngé tun̄ yá̰a̰ gə̄ kadə̄ unən̄ sandúkə madə̄ naā ba kə mānə̄n̄ kété no de gə̄ tə́. Anī nin̄ rāān̄ tītə̄ ń Jojue ədańdə́ ní, adə̄ unən̄ *sandúkə madə̄ naā ba mānə̄n̄ kété no de gə̄ tə́.
7Kɔ́ɔ̄ɓē əda Jojue na: Ɓōólaā m-ā m-ə́lá gír rāā kadə̄ ī-tél de kə́ bo ta kum ngán *Israel gə̄ tə́ malang, kadə̄ gerə̄n̄ na mā i seí naā tə́ tītə̄ ń kété mā i naā tə́ kə Moijə ní. 8Ba ə́dá *ngé tun̄ yá̰a̰ gə̄ ń a ətōn̄ *sandúkə madə̄ naā ní kadə̄ udən̄ kum man̄ Jurdḛ tə́ anī, dəba ran̄ gotə kógə̄ḿ. 9Jojue əda ngán Israel gə̄ na: Ī-ndɔ́tī kə̄ ngɔr ōōīń najə̄ gə̄ ń Kɔ́ɔ̄ɓē Nə́ɓā yāsí əda ní. 10Ā ī-gerī kadə̄ Nə́ɓā kə́ kə kumuúi dɔ dáńsí tə́ ō, kadə̄ ni a tə̄ɓā Kanaan gə̄ ō, Het gə̄ ō, Hibi gə̄ ō, Periji gə̄ ō, Girgas gə̄ ō, *Amor gə̄ ō, Yebus gə̄ kɔ̄ɔ́ nosí tə́ i kə ta kūl̄ yá̰á̰ ń toō: 11*Sandúkə madə̄ naā yā Kɔ́ɔ̄ɓē ń i kɔ́ɔ̄ dɔ nang malang ní, a teē bā Jurdḛ kété nosí tə́. 12Ī-gə̄rāī de gə̄ kutə gidə i jōó dɔ dáńsí tə́, de gə̄ kógə̄ḿ kógə̄ḿ kə dɔ gír ɓē gēé. 13Loo ń ré *ngé tun̄ yá̰a̰ gə̄ ń a ətōn̄ *sandúkə madə̄ naā yā Kɔ́ɔ̄ɓē ń i kɔ́ɔ̄ dɔ nang malang ní a əndān̄ njadə́ kum bā Jurdḛ tə́ anī, bā Jurdḛ a gān̄g danaá jōó: Man̄ ń a ḭḭ dām̄ loo kə́ kḭḭ kə̄ dɔɔ́ tə́ á nūgə́ kum kə̄ dām̄ loo kə́ risə kə̄ nang tə́ tə́ ní, a tél yā kán̄ naā loo kógə̄ḿ tītə̄ kə́ deē gān̄g gírən i kə babəraá beé.
14Dan ń gír de gə̄ ḭḭn̄ kɔ̄ɔ́ loo ndidə́ gə̄ tə́ yā teē bā Jurdḛ anī, ngé kətō *sandúkə madə̄ naā ń i *ngé tun̄ yá̰a̰ gə̄ ní, njə̄rān̄ nodə́ tə́ kété. 15I dan yā sāā kōō gə̄ tə́ n bā Jurdḛ a ḭḭń ngá̰ý adə̄ a taāń loo ní. Dan nəkɔ́ ń *ngé tun̄ yá̰a̰ gə̄ ń i ngé kətō *sandúkə madə̄ naā gə̄ əlan̄ njadə́ kə̄ kum man̄ tə́ ta gógə́ tə́ anī, 16bā lōō gír nūgə́ tə́ ba dəba tītə̄ kə́ deē gān̄g gírən i kə babəraá. Man̄ dəba i sa̰y, ɓē ń rīn na i Dam ní tə́, kadə Sartan tə́, ba dāmə̄n ń a nūgə́ kum kə̄ bā katə̄ kə́ Araba tə́ ní gətóo kɔ̄ɔ́ malang, loo ń noō tə́ gír de gə̄ teēn̄ bā Jurdḛ kə̄ gidə kə́rēý tə́, teēn̄ i loo ń ra sɔɔ̄n̄ ta naā kə ɓē kə́ Jeriko ní tə́. 17Ngé tun̄ yá̰a̰ gə̄ ń ətōn̄ *sandúkə madə̄ naā yā Kɔ́ɔ̄ɓē ní, dəba ran̄ gotə kógə̄ḿ dan bāá loo kə́ tutə tə́, bátə́ adə̄ ngán *Israel gə̄ mānə̄nəń malang kə̄ gidə kə́rēý tə́ kanjə̄ kadə̄ man̄ ɔdə njadə́.
© 2006, 2010 Alliance Biblique du Tchad