Makətūbə̄ yā Jonas 2
2
Jonas ndɔ̄ȳ Kɔ́ɔ̄ɓē
1Kɔ́ɔ̄ɓē əla kānjə̄ kógə̄ḿ kə́ bo adə̄ reē ur Jonas. Jonas rāā ndɔ̄ mətá kem kānjə̄ ní tə́. 2Jonas to kem kānjə̄ tə́ ndɔ̄yń Kɔ́ɔ̄ɓē Nə́ɓā yān.
3Ni-əda na:
Kumḿ tō ndoō ngá̰ý.
Adə̄ m-ə́ga kɔŕ
dɔí ḭ̄ Kɔ́ɔ̄ɓē tə́,
anī ḭ̄ ī-ndigəm̄.
m̄-to kem bəlo kə́ lú ngá̰ý yā yo tə́
m̄-ɓārə́nń yá̰a̰ kadə̄ deē dḭḭ̄m̄,
anī ḭ̄ ōō ndūḿ.
4Ḭ̄ ə̄nīm̄ kem bəlo
kə́ ɗúú ngá̰ý tə́
dan ɓūl̄ bā bo tə́ ō,
man̄ gīr̄ gidəḿ ō.
Ɓəngál man̄ yāí gə̄ malang ō,
man̄ yāí malang ō,
reēn̄ dɔḿ tə́.
5Ba mā m-ə́da na:
Ḭ̄ ī-tə̄ɓām̄ kɔ̄ɔ́ ta kumií tə́,
adə̄ mā i sa̰y rɔ̄í tə́.
Ɓá tā banī, m̄-ndigə
tél ka̰a̰ kújə́ yāí kə́ *táĺ.
6Man̄ ugə̄ míndə́ḿ tə́.
Bā bo gīr̄ gidəḿ.
Mu gə̄ ɓírə̄n̄ dɔḿ.
7m̄-risə bátə́ m-ūgə̄
nja mbal̄ bo gə̄ tə́ nang tə́.
Mā i ɓádá, dan de kə́ koy gə̄ tə́.
Utə̄n̄ ta róbə gə̄ kə lakélé
gāngə̄n̄neé gírə́ḿ, kə́ njɔ́ḿ gə̄ tə́.
Banī ḭ̄ Kɔ́ɔ̄ɓē Nə́ɓā yāḿ
ī-teē seḿ kɔ̄ɔ́ bəlo kə́ lú ngá̰ý
ń toō tə́ kə kumḿ.
8Kɔ́ɔ̄ɓē Nə́ɓā yāḿ, m-ā m-óy ngɔr.
Loo ń noō tə́ əga kemḿ dɔí ḭ̄ Kɔ́ɔ̄ɓē tə́ ō,
ndɔ̄ȳ yāḿ ḭḭ kum kə̄ dɔɔ́ aw̄ ugə̄ rɔ̄í tə́
kem kújə́ kə́ *táĺ yāí tə́ ō.
9Ngé ndɔ̄ȳ nə́ɓā kə́ rɔ̄kum aĺ gə̄ ní,
əngen̄ ta róbə́ kə́ yā kadə̄ ajən̄neédə́ alé.
10Banī mā m-ā m-ə̄nī pā yā ɓōkíīneé tɔ̄ȳ.
M-ā m̄-ndējī yá̰á̰ kə́ tun̄ gə̄.
M-ā m̄-rāā yá̰a̰ gə̄ ń m-ə̄nī ndūḿ m-ādī najə̄n tə́ ní.
A̰á̰ā̰, Kɔ́ɔ̄ɓē, i ḭ̄ n i nge kajə deē ní!
11Loo ń noō tə́ Kɔ́ɔ̄ɓē əda kānjə̄ na:
Ī-tɔ̄mbə̄ Jonas kɔ̄ɔ́ ndágá dɔ nang tə́! Anī kānjə̄ oō ta Kɔ́ɔ̄ɓē kə̄ ta jī tə́ noō, adə̄ rāā yá̰á̰ ń Kɔ́ɔ̄ɓē əda ní.
Currently Selected:
Makətūbə̄ yā Jonas 2: BS
Highlight
Copy
Compare
Share
Want to have your highlights saved across all your devices? Sign up or sign in
© 2006, 2010 Alliance Biblique du Tchad
