Makətūbə̄ yā Ijai 2
2
1Najə̄ kə́ dɔ ɓē ko̰o̰ yā *Juda tə́ ō, ɓē kə́ Jerusalem tə́ ō, ń Ijai kə́ ngōn̄ Amots ənge tū yá̰á̰ kə́ ni-a̰a̰ tə́ ní n toó.
Nápar de gə̄ malang a aw̄n̄ Jerusalem
(Á̰a̰ī Mis 4.1-3)
2Ndɔ̄ kógə̄ḿ tə́, kem ɓāl̄ gə̄ ń a reēn̄ tə́ noō ní,
mbal̄ bo ń *kújə yā Kɔ́ɔ̄ɓē i dɔ tə́ ní,
a ngāl̄ yā mān̄ dɔ gotə mbal̄ kə́ rang gə̄.
Ni a tɔȳ dɔ ngán mbal̄ gə̄ kə̄ dɔɔ́.
Loo ń noō tə́ nápar de gə̄ malang a reēn̄ kə̄ rɔ̄n tə́.
3Gír de gə̄ ngá̰ý a əsōn̄ róbó.
Nin̄ a ədan̄ na: Ī-reē
j-awī dɔ mbal̄ yā Kɔ́ɔ̄ɓē tə́,
j-awī kújə yā Nə́ɓā yā Jakob tə́.
Ni a ndóōjí yá̰á̰ ń ni a sāā rɔ̄jí tə́ ní ō,
róbə́ ń ni ɔjəjí ní, j-a j-uniī ō.
Tām̄ yá̰á̰ ndóō yā Kɔ́ɔ̄ɓē
ḭḭ i *Siyo̰ n reē ní.
A̰á̰ā̰, najə̄ yān teē i Jerusalem n
reē ugə̄ rɔ̄jí tə́ ní.
4Ni a gān̄g sarya yān kə́ dɔ dáń nápar de gə̄ tə́ ō,
a ra dɔ dáń gír de kə́ ngá̰ý gə̄ tə́ yā gān̄gəń sarya ō.
Nin̄ a ɔyn̄ kaskar yādə́ gə̄
yā rāā kɔsə man̄g tə́ ō,
a ɔyn̄ nənga yādə́ gə̄ yā rāā ngorong tə́ ō.
Ɓē kógə̄ḿ a ḭḭ yā kənī ɓē kə́ rang rɔ̄ɔ̄ to̰ aĺ ō,
de kə́ dəngam gə̄ a ndóōn̄ naā loo rɔ̄ɔ̄ to̰ aĺ ō.
5Kojə gə̄ yā Jakob, ɔ̄rī dɔɔ́!
Jə-njə̄raī kum loo kə́
unjə̄ kow yā Kɔ́ɔ̄ɓē tə́!
Ndɔ̄ yā Kɔ́ɔ̄ɓē i ndɔ̄ sarya
6Kɔ́ɔ̄ɓē, ḭ̄ ə́yá̰ gír deē yāí gə̄ ń
i kojə yā Jakob ní kɔ̄ɔ́.
I tām̄ yā yá̰á̰ ń toō tə́:
Kɔdə̄ sāā gə̄ kə́ ḭḭn̄ gír ɓē tə́
taān̄ loo kem ɓē yān tə́.
Kutə ngé ka̰a̰ yá̰á̰ kə́ dɔ rā̰ tə́ gə̄
i ngá̰ý tītə̄ yā ngé kə́ ɓē Pilistin gēé.
Gír deē yāí gə̄ rāān̄ gātə̄ kə tə̄rā gēé.
7Gində̄ arjā̰a̰ ō, lɔ́r ō,
yá̰a̰ kənge gə̄ kə́ deē
asə tə́da kutədə́ aĺ gə̄ ō,
taān̄ loo kem ɓē yān tə́ ō,
sə́nda gə̄, kə púsə rɔ̄ɔ̄ gə̄,
taān̄ loo kem ɓē yān tə́ ō.
8Nə́ɓā kə́ rɔ̄kum aĺ gə̄
taān̄ loo kem ɓē yān tə́.
De gə̄ malang a ɔsən̄ i kejədə́ nang tə́
no yá̰á̰ kə́ tɔ́sə̄ rāā yá̰á̰ kógə̄ḿ tə́,
no yá̰á̰ kə́ jī deē rāā tə́.
9I tām̄ najə̄ ń toō tə́ n
a rāān̄ deē ndul gə̄
malang kadə̄ a rugən̄ nang tə́ ō,
a télən̄ sedə́ kə̄ nang tə́ ō ní.
Kɔ́ɔ̄ɓē, ī-lōō tél kundə́ dɔɔ́ gogə́!
10Ī-ɓɔ̄ɔ̄ī rɔ̄sí kə̄ mbo̰ō̰ mbal̄ gə̄ tə́.
Údiī gíŕ nángāá yā ka̰ȳń Kɔ́ɔ̄ɓē
kə́ nge rāā kadə̄ de gə̄ ɓōlə́n̄ ngá̰ý ō,
kə́ tɔ́gə yān to ɓōĺ ngá̰ý ō!
11Ngé ka̰a̰ madə̄də́ gə̄ ba kídə̄də́ ní,
i gáŕ kadə̄ nin̄ əgan̄ kumdə́ nang tə́ ō,
i gáŕ kadə̄ ngé kɔjə rɔ̄də́ gə̄ rugən̄ nang tə́ ō.
Ndɔ̄ ngeé ń noō tə́ ní, Kɔ́ɔ̄ɓē kal kógə̄ḿ beē
ngóy n i de kə́ bo ní.
12Kɔ́ɔ̄ɓē kə́ bo kə́ tɔ́gən i ngá̰ý,
ngɔ̄m̄ ndɔ̄ kógə̄ḿ
yā rɔ̄ɔń kə yá̰a̰ malang ń
a ənda kadən ō, a ɔjə rɔ̄n ní ō,
yā rɔ̄ɔń kə yá̰a̰ malang ń
a̰a̰ rɔ̄n i yá̰á̰ kə́ bo tə́ ní ō,
yā téləń seneé kə̄ nang tə́ ō.
13Kāgə̄ sédər kə́ Liban gə̄ ń
i kāgə̄ kə́ ngāl̄ ngá̰ý gə̄ ní,
ni a rɔ̄ɔ̄ sedə́ malang.
Ni a rɔ̄ɔ̄ kāgə̄ sén gə̄ malang kə́ Basan.
14Ni a rɔ̄ɔ̄ mbal̄ bo gə̄ kə́ ngāl̄ ngá̰ý gə̄ ō,
ngán mbal̄ kə́ kḭḭ kə̄ dɔɔ́ gə̄ malang ō.
15Ni a rɔ̄ɔ̄ kújə ngɔ̄m̄ dɔ ɓē kə́ bo gə̄ malang ō,
ndogə̄ mbal̄ kə́ yā rɔ̄ɔń dɔ ɓē tə́ gə̄ malang ō.
16Ni a rɔ̄ɔ̄ too bo gə̄ malang ō,
ngé kɔy yá̰a̰ gātə̄ kə́ majə ngá̰ý kaw̄ń gə̄ malang ō.
17I gáŕ kadə̄ ngé kɔjə rɔ̄də́ gə̄ malang rugən̄ nang tə́ ō,
ngé kənda kadədə́ gə̄ télən̄ kə rɔ̄də́ kə̄ nang tə́ ō.
Ndɔ̄ ngeé ń noō tə́ ní, i Kɔ́ɔ̄ɓē kal kógə̄ḿ
beē ngóy n i de kə́ bo ní.
18Nə́ɓā kə́ rɔ̄kum aĺ gə̄ malang a gətóon̄ kɔ̄ɔ́.
19Ī-ɓɔ̄ɔ̄ī rɔ̄sí gír mbal̄ gə̄ tə́ ō,
ī-túdiī kə̄ kem bəlo gə̄ kə́ dɔ nang tə́ tə́ ō,
yā ka̰ȳń Kɔ́ɔ̄ɓē kə́ nge rāā deē
kadə̄ ndew ndew ɓōĺ,
yā ka̰ȳń bo yān kə́ unjə̄
kow ō ndə́lē ngá̰ý ō,
dan ń ni-ḭḭ dɔɔ́ ba yéȳ dɔ nang ní.
20Ndɔ̄ ngeé ń noō tə́ ní, yá̰a̰ gə̄ ń de gə̄ rāān̄də́ yā kɔsə kejədə́ nang tə́ nodə́ tə́, adə̄ i nə́ɓā yādə́ kə́ rɔ̄kum aĺ gə̄ kə́ rāā kə gində̄ arjā̰a̰ ō, lɔ́r ō ní, kɔ́ɔ̄ gə̄ a tə́nīn̄də́ yā kadə̄ yégə̄ gə̄ ō, birbir gə̄ ō. 21Nin̄ a aw̄n̄ yā ɓɔ̄ɔ̄ rɔ̄də́ gír mbal̄ gə̄ tə́ ō, yā túdə̄ kə̄ kem bəlo gə̄ kə́ dɔ nang tə́ tə́ ō, yā ka̰ȳń Kɔ́ɔ̄ɓē kə́ nge rāā deē kadə̄ ndew ndew ɓōĺ ō, yā ka̰ȳń bo yān kə́ unjə̄ kow ō ndə́lē ngá̰ý ō, dan ń ni a ḭḭ dɔɔ́ yā yéȳ dɔ nang ní.
22I beé ní, ə́ya̰ī deē ndul gə̄!
Ndidə́ kə kumdə́ i koō ngóy.
Ní, nin̄ i rí kógə̄ḿ?
Currently Selected:
Makətūbə̄ yā Ijai 2: BS
Highlight
Share
Copy
Want to have your highlights saved across all your devices? Sign up or sign in
© 2006, 2010 Alliance Biblique du Tchad