Makətūbə̄ yā Ojee 14
14
1De kə́ Samari gə̄ a əgān̄ kə̄rā
yá̰a̰ rāādə́ kə́ gōtə́ aĺ gə̄,
tɔdɔ̄ nin̄ mbātə́n̄ najə̄ gō Nə́ɓā yādə́ tə́.
Nin̄ a oyn̄ ta rɔ̄ɔ̄ tə́ ō,
a rējə̄n̄ ngáń kásə̄ yādə́ gə̄ ō,
a njarən̄ kem dəyá̰ yādə́ gə̄
kə́ ndānə̄n̄ ngán gə̄ ō.
Gír de kə́ ngé ra dɔ ndūdə́ tə́ aĺ gə̄ əngen̄ rɔ̄ ngáā
2*Israel, ī-tél ī-reē rɔ̄
Kɔ́ɔ̄ɓē Nə́ɓā yāí tə́.
I yá̰a̰ rāāī kə́ gōtə́ aĺ rāāī adə̄ ə̄sō ní.
3Ī-tél ī-reēī rɔ̄ Kɔ́ɔ̄ɓē tə́ kə najə̄ gə̄ ń toō:
Ī-mā̰ȳ rɔ̄í dɔ yá̰a̰ rāājí kə́ gōtə́ aĺ gə̄ tə́ ō,
ī-taā yá̰á̰ kə́ majə ń jə-ndējī ní ō.
J-a jə-ndējī najə̄ kə́ tají tə́
kum gotə man̄g kə́ bəra kə́ tun̄ gə̄.
4Dɔ nang kə́ Asiri asə kajəjí alé.
J-a j-ḭḭ gidə sə́nda rɔ̄ɔ̄ gə̄ tə́ to̰ alé.
Yá̰á̰ kə́ tɔ́sə̄ kum gotə yá̰a̰ gə̄ ń
jḭḭ kɔ́ gə̄ jə-tɔ́sə̄ kə jījí ní,
j-a jə-ɓāŕdə́ na i Nə́ɓā yājí to̰ alé.
Tɔdɔ̄ i ḭ̄ ngóy n á̰a̰ kum tō ndoō
yā ngán hal gə̄ ní.
5Kɔ́ɔ̄ɓē əda na:
Mo̰y kəra dɔ ndū tə́ aĺ ń rāā *Israel ní,
m-ā m̄-tɔ̄l̄ kɔ̄ɔ́ dɔn tə́.
M-ā m̄-tárən kə kem kə́ majaá,
tɔdɔ̄ wōn̄g rāām̄ seneé to̰ alé.
6M-ā m̄-to tītə̄ tal kə́ dəloí beē
tām̄ yā *Israel tə́,
ni a hútə̄ tītə̄ ndə́ja lis beé,
ni a tə́la ngəran nang tə́
tītə̄ yā kāgə̄ gə̄ kə́ Liban tə́ beē.
7Ta jīn gə̄ a alən̄ ō,
ni a majə tītə̄ *kāgə̄ olibə beé ō,
sēēn a otə majə tītə̄ sēē ku kāgə̄ gə̄
kə́ Liban tə́ beē ō.
8De gə̄ kə́ *Israel tə́ a télən̄
yā reē ndi ndílə́ḿ tə́.
Nin̄ a ndɔrə̄n̄ gémē gogə́ ō,
a hútə̄n̄ tītə̄ *kāgə̄ nduú beē ō,
rīdə́ a ɓār̄ ngá̰ý tītə̄ yā
kasə *nduú kə́ Liban tə́ beē ō.
9*Epəraim, yá̰á̰ kə́ ɓoojí naā tə́,
mā ō, nə́ɓā kə́ rɔ̄kum aĺ gə̄ ō
to nuú ɓáý a?
Mā m̄-tūrī najə̄ tə́ ō,
m-ə̄ndā kumḿ gōí tə́ ō.
Mā m̄-to tītə̄ kāgə̄ sipəres beé,
ni i kāgə̄ kə́ mbīn to mbōl̄ nduju ngándáńg.
Kōō yāí gə̄ ń ī-sāādə́ kɔ̄ɔ́ ní, i mā n m-ādī ní.
10Deē ń kumən edə̄ ní,
a ger̄ kum yá̰a̰ malang ń i kə́ kəda laā ní.
De kə́ asə ger̄ kum yá̰a̰, a ger̄ kum yá̰a̰ gə̄ ní.
A̰á̰ā̰, gō róbə gə̄ yā Kɔ́ɔ̄ɓē
i gō róbə́ gə̄ kə́ ran̄ súmūú.
Ngé koō tan gə̄ a njə̄rān̄ dɔ róbə gə̄ ní tə́,
ba ngé mbātə́ tan gə̄
a ran̄ súmūú alé, adə̄ a əsōn̄.
Currently Selected:
Makətūbə̄ yā Ojee 14: BS
Highlight
Copy
Compare
Share
Want to have your highlights saved across all your devices? Sign up or sign in
© 2006, 2010 Alliance Biblique du Tchad
