Makətūbə̄ yā Ejekiel 48
48
Dɔ nang kə́ tām̄ yā de gə̄ kə́ gír ɓē kə́ mbɔ́r ɓē kə́ ko̰o̰ tə́
1Rī gír ɓē gə̄ naā tə́ kə dɔ nang yādə́ gə̄ n toó: Dɔ nang yā Dan a ra i ta ngóy mbɔ́r ɓē kə́ ko̰ó̰ tə́, kə gō ngāl̄ róbə́ kə́ Hetəlon tə́, kum kə̄ Hamat tə́ ō, kum kə̄ Hasar Enan, gō nang kə́ Damas ń i mbɔ́r ɓē kə́ ko̰ó̰ ní, kadə Hamat tə́ ní tə́ ō. Dɔ nin̄ dɔ nang ní a əla gír i dām̄ kə́ gír ɓē tə́ bátə́ ugə̄ no ɓē tə́. 2Dɔ nang yā Aser a ra kə gō ngāl̄ dɔ nang yā Dan, ḭḭ gír ɓē tə́ ugə̄ no ɓē tə́. 3Dɔ nang yā Nepətali a ra kə gō ngāl̄ dɔ nang yā Aser, ḭḭ gír ɓē tə́ ugə̄ no ɓē tə́. 4Dɔ nang yā Manase a ra kə gō ngāl̄ dɔ nang yā Nepətali, ḭḭ gír ɓē tə́ ugə̄ no ɓē tə́. 5Dɔ nang yā *Epəraim a ra kə gō ngāl̄ dɔ nang yā Manase, ḭḭ gír ɓē tə́ ugə̄ no ɓē tə́. 6Dɔ nang yā Ruben a ra kə gō ngāl̄ dɔ nang yā *Epəraim, ḭḭ gír ɓē tə́ ugə̄ no ɓē tə́. 7Dɔ nang yā *Juda a ra kə gō ngāl̄ dɔ nang yā Ruben, ḭḭ gír ɓē tə́ ugə̄ no ɓē tə́.
Dɔ nang kə́ tām̄ yā Kɔ́ɔ̄ɓē tə́
8Ā gāngə̄n̄ gō ngāl̄ dɔ nang yā *Juda ń ḭḭ gír ɓē tə́ ugə̄ no ɓē tə́ ní yā kəndā tayā. Laan a asə kíl deē dūbú kutə jōó gidə i mí ō, ngālən a asə naā kə ngāl̄ dɔ nang yā gír ɓē gēé kógə̄ḿ kógə̄ḿ ō. A rāān̄ *loo kə́ táĺ i danaá. 9Dɔ nang ń sḭḭ̄ ā ī-gāngī yā kəndā tayā tām̄ yā Kɔ́ɔ̄ɓē tə́ ní ngālən a asə kíl deē nja dūbú kutə jōó gidə i mí ō, laan a asə kíl deē nja dūbú kutə kógə̄ḿ ō. 10Dām̄ gō nang ń noō ń a adə̄n̄ *ngé tun̄ yá̰a̰ gə̄ ní a asə kíl deē 25 000 dām̄ mbɔ́r ɓē kə́ ko̰ó̰ tə́ ō, laan a asə kíl deē 10 000 dām̄ kə́ no ɓē tə́ ō, laan a asə kíl deē 10 000 dām̄ kə́ gír ɓē tə́ ō, ngālən a asə kíl deē 25 000 dām̄ mbɔ́r ɓē kə́ geleé tə́ ō. A rāān̄ *loo kə́ táĺ yā Kɔ́ɔ̄ɓē i danaá. 11Dɔ nang ní a i tām̄ yā *ngé tun̄ yá̰a̰ gə̄ ń ɔrə̄n̄ kam̄də́ tayā dan ngán Sadok gə̄ ń əndān̄ kumdə́ gír kəla yāḿ tə́ kə gōó ō, əya̰mə̄n̄ kɔ̄ɔ́ aĺ ō dan ń *Israel gə̄ əya̰mə̄n̄ kɔ̄ɔ́ tītə̄ yā ngán *Lebi gə̄ ń ndómə̄n̄ ní. 12Dɔ nang ń a i tām̄ yādə́ tə́ ní i dāmə̄n kə́ *táĺ ngá̰ý kə́ gān̄g kəndā tayā tām̄ yā Kɔ́ɔ̄ɓē tə́ ń i ngɔr kadə gō nang yā Lebi gə̄ tə́ ní. 13Dɔ nang yā *Lebi gə̄ ɓáa a asə naā kə yā *ngé tun̄ yá̰a̰ gēé adə̄ ngālən a asə kíl deē nja dūbú kutə jōó gidə i mí ō, laan a asə kíl deē nja dūbú kógə̄ḿ ō. Ngālən a asə kíl deē nja dūbú kutə jōó gidə i mí ō, laan a asə kíl deē nja dūbú kógə̄ḿ kə̄ loo gə̄ tə́ malang. 14De gə̄ a asən̄ kigə kə dɔ nang ní alé. A mbélə̄n̄ gír aĺ ō, a əya̰n̄ yá̰á̰ kə́ ta kəga dɔ gə̄ kə́ deē ənge tū tə́ yā kadə̄ de kə́ rang aĺ ō, tɔdɔ̄ ɔrə̄n̄ kam̄də́ kɔ̄ɔ́ tām̄ yā Kɔ́ɔ̄ɓē tə́.
Dɔ nang kə́ tām̄ yā ɓē tə́ ō, tām̄ yā ngār tə́ ō
15Loo kə́ laan asə kíl deē nja dūbú kógə̄ḿ ō, ngālən asə kíl deē nja dūbú kutə jōó gidə i mí á na̰y ní i loo kə́ karī kə́ tām̄ yā ɓē tə́ ō, tām̄ yā kújə gə̄ tə́ ō, tām̄ yā loo ko̰o̰ dā̰ gə̄ tə́ ō. A əndān̄ ɓē i danaá. 16Dɔ nang ní a asə naā malang, adə̄ dāmə̄n kə́ mbɔ́r ɓē kə́ ko̰ó̰ tə́ a asə kíl deē nja dūbú sɔ́ kə kə́ ɓú mí ō, dāmə̄n kə́ mbɔ́r ɓē kə́ geleé tə́ a asə kíl deē nja dūbú sɔ́ kə kə́ ɓú mí ō, dāmə̄n kə́ gír ɓē tə́ a asə kíl deē nja dūbú sɔ́ kə kə́ ɓú mí ō, dāmə̄n kə́ no ɓē tə́ a asə kíl deē nja dūbú sɔ́ kə kə́ ɓú mí ō. 17Loo ko̰o̰ dā̰ gə̄ kə́ kem ɓēé a asə kíl deē nja ɓú jōó kə kə́ kutə mí kum kə̄ mbɔ́r ɓē kə́ ko̰ó̰ tə́ ō, a asə kíl deē nja ɓú jōó kə kə́ kutə mí kum kə̄ mbɔ́r ɓē kə́ geleé tə́ ō, a asə kíl deē nja ɓú jōó kə kə́ kutə mí kum kə̄ gír ɓē tə́ ō, a asə kíl deē nja ɓú jōó kə kə́ kutə mí kum kə̄ no ɓē tə́ ō. 18Kə gō laa dɔ nang kə́ gān̄g kəya̰ tayā tām̄ yā Kɔ́ɔ̄ɓē tə́ ní, a na̰y loo kə́ asə kíl deē 10 000 kum kə̄ gír ɓē tə́ ō, 10 000 kum kə̄ no ɓē tə́ ō tū tə́ ɓáý. Ngé rāā kəla kə́ kem ɓēé gə̄ a əsan̄ yá̰á̰ kə́ tū tə́. 19De gə̄ ń a rāān̄ kəla tām̄ yā ɓē tə́ ní a ḭḭn̄ i gír ɓē gə̄ malang kə́ *Israel tə́ n a reēn̄ ní. 20Dɔ nang malang kə́ gān̄g kəya̰ tayā tām̄ yā Kɔ́ɔ̄ɓē tə́ ní, a asə kíl deē nja dūbú kutə jōó gidə i mí ō, nge kə́ tām̄ yā ɓē tə́ a asə kíl deē nja dūbú kutə jōó gidə i mí ō. 21Dɔ nang ń a na̰y ní i tām̄ yā ngār tə́. Dɔ nang yān ní a ra i kadə nge kə́ gān̄g tayā tām̄ yā Kɔ́ɔ̄ɓē tə́ ō, kadə nge kə́ tām̄ yā ɓē tə́ ō ní dām̄ jōó mbak. A ra kə gō ngāl̄ dāmə̄n kə́ gān̄g kəya̰ tayā ń asə kíl deē nja dūbú kutə jōó gidə i mí ní bátə́ ugə̄ dɔ nin̄ dɔ nang kə́ gír ɓē tə́ ō, a ra kə gō ngāl̄ dāmə̄n kə́ no ɓē tə́ ń asə kíl deē nja dūbú kutə jōó gidə i mí ní bátə́ kum kə̄ dɔ nin̄ dɔ nang kə́ no ɓē tə́, kə gō kadə dɔ nang kə́ rang gə̄. Nge ń noō a i tām̄ yā ngār tə́. Dām̄ dɔ nang kə́ *táĺ ō, *loo kə́ táĺ kə́ kem kújə yā Kɔ́ɔ̄ɓē tə́ ō a i danaá. 22Dɔ nang kə́ tām̄ yā *Lebi gə̄ tə́ ō, kə́ tām̄ yā ɓē tə́ ō, a ran̄ dɔ dán dɔ nin̄ dɔ nang yā *Juda kə dɔ nin̄ dɔ nang yā Benjamḛ tə́, tū dɔ nang ń a i tām̄ yā ngār tə́ ní danaá.
Dɔ nang kə́ tām̄ yā de gə̄ kə́ gír ɓē kə́ mbɔ́r ɓē kə́ geleé tə́
23Rī gotə gír ɓē gə̄ naā tə́ kə dɔ nang yādə́ gə̄ n toó: Dɔ nang yā Benjamḛ a əla gír i dām̄ kə́ gír ɓē tə́ bátə́ ugə̄ no ɓē tə́. 24Dɔ nang yā Simeo̰ a ra kə gō ngāl̄ dɔ nin̄ dɔ nang yā Benjamḛ, a ḭḭ gír ɓē tə́ ugə̄ no ɓē tə́. 25Dɔ nang yā Isakar a ra kə gō ngāl̄ dɔ nin̄ dɔ nang yā Simeo̰, a ḭḭ gír ɓē tə́ ugə̄ no ɓē tə́. 26Dɔ nang yā Jabulo̰ a ra kə gō ngāl̄ dɔ nin̄ dɔ nang yā Isakar, a ḭḭ gír ɓē tə́ ugə̄ no ɓē tə́. 27Dɔ nang yā Gad a ra kə gō ngāl̄ dɔ nin̄ dɔ nang yā Jabulo̰, a ḭḭ gír ɓē tə́ ugə̄ no ɓē tə́. 28Dɔ nin̄ dɔ nang yā Gad kə́ dām̄ mbɔ́r ɓē kə́ geleé tə́ a i dɔ nin̄ dɔ nang yā ɓē. A əla gír Tamar tə́ dām̄ kə́ gír ɓē tə́ bátə́ man̄ gə̄ kə́ Meriba kə́ Kades tə́ ō, a un gō man̄ kə́ Ejiptə tə́ yā gāngəń kum bā bo tə́ ō. 29Ɓē ń sḭḭ̄ ā ī-túgī wə̄lā yā kadə̄ ī-nə̄ɓōiń naā kə́ yá̰a̰ kənge kə́ tām̄ yā gír ɓē kə́ *Israel tə́ ō, dɔ nang yādə́ gə̄ ō ní n noó. Najə̄ ń Kɔ́ɔ̄ɓē Nə́ɓā əda ní n noó.
Bápə́ kə́ kutə gidə i jōó gə̄ kə́ Jerusalem tə́
30Bápə gə̄ kə́ dām̄ mbɔ́r ɓē kə́ ko̰ó̰ tə́ kə́ yā kudəń kə̄ kem ɓēé ń ngāl̄də́ asə kíl deē nja dūbú sɔ́ kə kə́ ɓú mí ní n toó. 31A ndangən̄ rī gír ɓē gə̄ kə́ *Israel tə́ kə dɔdə́ kógə̄ḿ kógə̄ḿ tū tə́. Bápə́ kə́ mətá gə̄ kə́ dām̄ mbɔ́r ɓē kə́ ko̰ó̰ tə́ n toó: Bápə yā Ruben ō, bápə yā *Juda ō, bápə yā *Lebi ō. 32Bápə́ kə́ mətá gə̄ kə́ gír ɓē tə́ ń ngāl̄də́ asə kíl deē nja dūbú sɔ́ kə kə́ ɓú mí ń n toó: Bápə yā Jəjep ō, bápə yā Benjamḛ ō, bápə yā Dan ō. 33Bápə́ kə́ mətá gə̄ kə́ mbɔ́r ɓē kə́ geleé tə́ ń ngāl̄də́ asə kíl deē nja dūbú sɔ́ kə kə́ ɓú mí ń n toó: Bápə yā Simeo̰ ō, bápə yā Isakar ō, bápə yā Jabulo̰ ō. 34Bápə́ kə́ mətá gə̄ kə́ no ɓē tə́ ń ngāl̄də́ asə kíl deē nja dūbú sɔ́ kə kə́ ɓú mí ń n toó: Bápə yā Gad ō, bápə yā Aser ō, bápə yā Nepətali ō. 35Laa ndogə̄ mbal̄ ń gīr̄ gidə ɓē ní asə kíl deē 18 000.
Əla gír ndɔ̄ ń noō tə́ ní, a ɓārə́n̄ rī ɓē na i Kɔ́ɔ̄ɓē i loo ń toō tə́.
Currently Selected:
Makətūbə̄ yā Ejekiel 48: BS
Highlight
Share
Copy
Want to have your highlights saved across all your devices? Sign up or sign in
© 2006, 2010 Alliance Biblique du Tchad