Makətūbə̄ yā Ejekiel 40

Rāān̄ kújə yā Kɔ́ɔ̄ɓē kə́ dɔ nang kə́ Israel tə́ adə̄ téĺ kə́ kijə

(40-48)

Ta kəla gíŕ yá̰á̰ ń Ejekiel a̰a̰ ní

1Ɔyn̄ de gə̄ aw̄n̄ sedə́ dɔ ɓē kə́ rang tə́ dɔ gúú tə́ rāā ɓāl̄ kutə jōó gidə i mí kɔ̄ɔ́. Kem ɓāl̄ kə́ nge ko̰ kutə jōó gidə i mí tə́, ta kəla gír ɓāl̄ ní tə́, kə ndɔ̄ nāā kə́ nge ko̰ kutə, dan ngeé ń noō tə́ ní, taān̄ ɓē kə́ Jerusalem rāā ɓāl̄ kutə gidə i sɔ́ kɔ̄ɔ́, ndɔ̄ nəkɔ́ ń noō tə́ bang anī, Kɔ́ɔ̄ɓē əhɔm̄ kə ngangá ngá̰ý ba unəm̄ aw̄ seḿ nú. 2Dan ń m-ā m-á̰a̰ń yá̰á̰ kógə̄ḿ ní, Nə́ɓā un aw̄ seḿ dɔ nang kə́ *Israel tə́. Ni əya̰m̄ dɔ mbal̄ kógə̄ḿ kə́ ngāl̄ ngá̰ý kum kə̄ dɔɔ́ tə́. Ɓūtə̄ kújə gə̄ kə́ tītə̄ kújə gə̄ kə́ kem ɓē bo kógə̄ḿ tə́ i kadə mbal̄ ní tə́, dām̄ mbɔ́r ɓē kə́ geleé tə́. 3Ni-aw̄ seḿ nú, ba yá̰á̰ ń m-á̰á̰ ní n toó: De kógə̄ḿ kə́ to tītə̄ gində̄ nə̄ngá kasə ra kə njan kə́ dɔɔ́, ngɔr kə̄ ta róbə́ kógə̄ḿ tə́. Ni-əhɔ kəlā *lḛ́ḛ́ kógə̄ḿ ō, mu tə̄ɓā kə́ yā mbɔ̄jə́nń ngāl̄ loo ō, jīn tə́. 4Ni ədam̄ na:

Ḭ̄ ngōn̄ deē, ī-teē kumií majə ō, ī-teē mbīí majə ō. Yá̰a̰ malang ń m-ā m-ɔ́jiī kadə̄ á̰a̰ā̰ ní, ə̄ndā kumií majə gírí. Tām̄ reēn̄ seí laā i yā kadə̄ á̰á̰ yá̰á̰ ní. Gō tə́ anī, ā ə̄nī *Israel gə̄ gotə yá̰a̰ malang ń á̰a̰ā̰ ní.

Ndágə̄ loo kə́ gidə tə́ ndágá ō, ta róbə gə̄ kə́ gidə tə́ ndágá ō

5Yá̰á̰ ń m-á̰a̰ā̰ ní n toó: Ndogə̄ mbal̄ kə́ gidə tə́ ndágá gīr̄ gidə *kújə yā Kɔ́ɔ̄ɓē. Deē ní əhɔ tə̄ɓā yān jīn tə́. Tə̄ɓā ní ngālən asə kíl deē mehḛ́. Ni mbɔ̄jə́ laa ndogə̄ mbal̄ ní ō, ngālən kə́ kə̄ dɔɔ́ i kíl deē mehḛ́ ō. 6Ni-aw̄ ta róbə́ ń deē ra kújə yā Kɔ́ɔ̄ɓē tə́ anī i kə̄ dām̄ kə́ gír ɓē tə́ ní. Ni al̄ dɔ loo kəndā nja kə́ yā kalə̄ń kə̄ dɔɔ́ tə́. Gō tə́ anī ni mbɔ̄jə́ ngāl̄ loo ní, malang ɓáa i kíl deē mehḛ́. 7Róbə́ kə́ danaá ń deē udə kə ta róbó anī a mān̄ tū tə́ ní, kújə yā ngé ngɔ̄m̄ loo gə̄ ran̄ kə gō kadə róbə́ ní. Kújə gə̄ ní ngāl̄də́ i kíl deē mehḛ́ ō, laadə́ i kíl deē mehḛ́ ō, kə dɔdə́ gēé kógə̄ḿ kógə̄ḿ. Ndogə̄ mbal̄ gə̄ kə́ dɔ dáńdə́ tə́ gə̄ ní, nder̄də́ i kíl deē mí. Róbə́ kógə̄ḿ kə́ ngālən i kíl deē mehḛ́ to kété no ngōn̄ kújə́ kə́ ta róbə́ tə́ ń ra sɔɔ̄n̄ ta naā kə kújə yā Kɔ́ɔ̄ɓēé ní tə́. 8-9Deē ní mbɔ̄jə́ loo kə́ kemeé ní ō. Rúun i kíl deē sɔ́sɔ́, ba ndogə̄ mbal̄ gə̄ ń gīrə̄n̄ gidə ní, nder̄də́ i kíl deē jōó ō. Kem ngōn̄ kújə́ kə́ ta róbə́ tə́ kə́ ngɔr ngá̰ý kə kújə yā Kɔ́ɔ̄ɓēé i ta róbə. 10Kújə́ kə́ mehḛ́ gə̄ yā ngé ngɔ̄m̄ ta róbə gə̄ ń deē ra kújə yā Kɔ́ɔ̄ɓē tə́ anī i kə̄ dām̄ kə́ gír ɓē tə́ ní, asən̄ naā malang. Ré deē un róbə́ kə́ danaá anī, kújə gə̄ ní ran̄ i dɔ jī jōó, mətá dām̄ kógə̄ḿ tə́ ō, mətá dām̄ kə́rēý tə́ ō. Ndogə̄ mbal̄ gə̄ ń kēgə̄n̄də́ naā tə́ ní, nder̄də́ asə naā malang. 11Deē ní mbɔ̄jə́ laa loo ń bápə́ kə́ ta róbə́ tə́ a teē tū tə́ ní ɓáý to̰, laan ní i kíl deē kutə. Róbə́ kə́ danaá ń kadə̄ de gə̄ mānə̄n̄ tū tə́ ní, laan malang i kíl deē kutə gidə i mətá. 12Kújə gə̄ yā ngé ngɔ̄m̄ loo gə̄ ń ngāl̄də́ gə̄ i kíl deē mehḛ́ mehḛ́ ō, laadə́ gə̄ i kíl deē mehḛ́ mehḛ́ ō ní, dēsə́n̄ yá̰a̰ gə̄ ta tə́ ɔgə̄n̄neé de gə̄ kaw̄ tū tə́. Yá̰a̰ gə̄ ń dēsə́n̄ ta tə́ ní, ngāl̄də́ kə́ kə̄ dɔɔ́ i kíl deē kógə̄ḿ. Ré deē un róbə́ kə́ danaá yā mānəń anī, yá̰á̰ kə́ dēsə́ ta róbə́ kújə́ tə́ gə̄ ní, ran̄ i dɔ jī jōó. 13Deē ní mbɔ̄jə́ dɔ dán loo ń ḭḭ ndogə̄ mbal̄ kə́ geleé yā kújə kógə̄ḿ tə́ bátə́ ndogə̄ mbal̄ yā kújə́ kə́ ra sɔɔ̄ ta tə́ gidə jī róbə́ kə́rēý tə́ ní anī, ənge i kíl deē kutə jōó gidə i mí. 14Kem ngōn̄ kújə́ kə́ ta róbə́ tə́ ń ndágə loo kə́ gīr̄ gidə kújə yā Kɔ́ɔ̄ɓē gīr̄ gidə malang ní, deē ní mbɔ̄jə́ ō. Laa kem kújə́ ní i kíl deē kutə jōó.

15Róbə́ kə́ yā kudəń kə̄ kemeé ń rāān̄ tū ndogə̄ mbal̄ kə́ gidə tə́ ndágá ní, kḭḭ ta kə́ ndágá tə́ bátə́ ta kə́ kemeé tə́ i ngāl̄ kíl deē kutə mí. 16Ko̰rō̰ kújə kə́ tə́la yḛngəre kum tə́ gə̄ gīrə̄n̄ gidə kújə gə̄ ō, ton̄ tū ndágə mbal̄ gə̄ yā kem ngōn̄ kújə́ kə́ ta róbə́ tə́ ō, tū ndogə̄ mbal̄ gə̄ ń kēgə̄n̄ kújə gə̄ naā tə́ ní ō, tū ndogə̄ mbal̄ gə̄ kə́ kem kújú tə́ ō, ba súūn̄ ndogə̄ mbal̄ gə̄ ní i kə tajī kāgə̄ túmbur gēé.

17Deē ní aw̄ seḿ ndágə loo kə́ gīr̄ gidə kújə yā Kɔ́ɔ̄ɓē tə́. Ɓatə̄n̄ ndágə loo kə́ gīr̄ gidə kújə yā Kɔ́ɔ̄ɓē ní i kə mbal̄ kə́ kɔsə̄ ta naā tə́. Kem kújə gə̄ kutə mətá gīrə̄n̄ gidə ndágə́ loo ní. 18Ɔsə̄n̄ mbal̄ ta naā tə́ nang tə́ gīr̄nəń gidə ta kújə́ kə́ tayā tayā gə̄. Kem kújə gə̄ télən̄ kə̄ nang tə́ tɔȳn̄ ndágə loo kə́ kemeé. 19Loo ń ḭḭ kadə̄ ndogə̄ mbal̄ kə́ kə́ ta róbə́ kə́ kə́ yā kudəń kə̄ kem kújə yā Kɔ́ɔ̄ɓē tə́, ta róbə́ ń deē teē tū tə́ kə̄ ndágá anī a ənge i ndágə loo kə́ gīr̄ gidə kújə yā Kɔ́ɔ̄ɓē kə́ gidə tə́ ndágá ní, loo ń ḭḭ kadə ndogə̄ mbal̄ ngeé ń noō tə́ bátə́ ugə̄ń kadə ndogə̄ mbal̄ kə́ gidə ndágə loo kə́ kemeé tə́ ní, deē ní mbɔ̄jə́ anī ənge i kíl deē ɓú. Nge ń noō i kə́ dām̄ kə́ gír ɓē tə́ n noó. 20Gō tə́ anī ni tūr̄ rɔ̄n kə̄ dām̄ mbɔ́r ɓē kə́ ko̰ó̰ tə́. Ta róbə́ kə́ dām̄ mbɔ́r ɓē kə́ ko̰ó̰ tə́ ń deē teē tū tə́ anī a ənge i ndágə loo kə́ gīr̄ gidə kújə yā Kɔ́ɔ̄ɓē kə́ gidə tə́ ndágá ní, ni mbɔ̄jə́ ngālən ō, laan ō. 21Róbə́ kə́ danaá kə́ yā kadə̄ de gə̄ mānə̄n̄ tū tə́ i ta róbə́ ní tə́ ō, ngáń kújə́ kə́ tām̄ yā ngé ngɔ̄m̄ loo gə̄ tə́ ran̄ kə ta naá mətá mətá dɔ jī jōó kadə róbə́ kə́ danaá ní tə́ ō. Ndogə̄ mbal̄ gə̄ ō, kem ngōn̄ kújə́ kə́ ta róbə́ tə́ ō ní, asən̄ naā kə ngé kə́ ta róbə́ kə́ gír ɓē tə́. Ta róbə́ kə́ dām̄ mbɔ́r ɓē kə́ ko̰ó̰ tə́ ní, ngālən i kíl deē kutə mí ō, laan i kíl deē kutə jōó gidə i mí ō. 22Kem ngōn̄ kújə́ kə́ ta róbə́ tə́ ō, ko̰rō̰ kújə gə̄ ō, ta jī kāgə̄ túmbur gə̄ ń súūnəń loo ō ní, asən̄ naā kə ngé kə́ ta róbə́ kə́ rang gə̄ tə́. Yā kadə̄ deē aw̄ ugə̄ń ta róbə́ kə́ dām̄ mbɔ́r ɓē kə́ ko̰ó̰ tə́ ní, deē a tə́ndā njan i loo kal̄ kə̄ dɔɔ́ tə́ gír sīrí. Kem ngōn̄ kújə́ kə́ ta róbə́ tə́ ō, loo kə́ yā tə́ndā nja tū tə́ kalə̄ń kə̄ dɔɔ́ ō ní, ran̄ sɔɔ̄n̄ ta naā. 23Ta róbə́ kógə̄ḿ ran̄ sɔɔ̄n̄ ta naā kə ta róbə́ kə́ dām̄ mbɔ́r ɓē kə́ ko̰ó̰ tə́. Ré deē teē tū tə́ anī a ənge i ndágə loo kə́ gīr̄ gidə kújə yā Kɔ́ɔ̄ɓē kə́ kemeé. Dām̄ kə́ gír ɓēé tə́ i tītə̄ ń noō ō. Loo ń to dɔ dán ta róbə́ kə́ jōó gə̄ tə́ ní, deē ní mbɔ̄jə́ ngālən. Ngālən ní i kíl deē ɓú. 24Gō tə́ anī, ni ɔr noḿ aw̄ seḿ dām̄ mbɔ́r ɓē kə́ geleé tə́, ta róbə́ kógə̄ḿ i noó ō. Ni mbɔ̄jə́ ngáń kújə yā ngé ngɔ̄m̄ loo gə̄ ō, kem ngōn̄ kújə́ kə́ ta róbə́ tə́ ō, ndogə̄ mbal̄ gə̄ ō. Ngāl̄də́ ō, laadə́ ō asən̄ naā kə yā ngé kə́ ta róbə́ kə́ rang gə̄ tə́. 25Ta kújə ō, kem ngōn̄ kújə́ kə́ ta róbə́ tə́ ō kə́ dām̄ loo ngeé ń noō tə́ ní, ko̰rō̰ kújə gə̄ gīrə̄n̄ gidə ō. Nin̄ ton̄ tītə̄ ngé kə́ dām̄ kə́ gír ɓē tə́ ō, ngé kə́ dām̄ kə́ mbɔ́r ɓē kə́ ko̰ó̰ tə́ ō. Ta róbə́ kə́ dām̄ mbɔ́r ɓē kə́ geleé tə́ ní, ngālən malang i kíl deē kutə mí ō, laan i kíl deē kutə jōó gidə i mí ō. 26Yā kugə̄ń ta róbə́ kə́ dām̄ mbór ɓē kə́ geleé tə́ ɓáa, deē a al̄ i dɔ loo tə́ndā nja sīrí pá tá a ugə̄ń tū ɓáý. Kem ngōn̄ kújə́ kə́ ta róbə́ tə́ ra sɔɔ̄ ta loo kə́ yā tə́ndā nja tū tə́ kalə̄ń kə̄ dɔɔ́. Súūn̄ kadə bɔr kə́ kemeé i kə ta jī kāgə̄ túmbur gēé. Róbə́ kə́ danaá ń kadə̄ deē mān̄ tū tə́ ní, ta jī kāgə̄ túmbur gə̄ ní ran̄ tū tə́ dɔ jī jōó, dām̄ kə́ ko̰ó̰ tə́ ō, dām̄ kə́ geleé tə́ ō. 27Ta róbə́ kə́ rang ra sɔɔ̄ ta ta róbə́ ní. Ré deē teē tū tə́ anī, a ənge i ndágə loo kə́ gīr̄ gidə kújə yā Kɔ́ɔ̄ɓē kə́ kemeé. Deē ní mbɔ̄jə́ loo kə́ dɔ dán ta róbə́ kə́ jōó gə̄ kə́ dām̄ mbɔ́r ɓē kə́ geleé tə́ ní, anī loo ní ngālən i kíl deē ɓú.

Ndágə loo kə́ kemeé ō, ta róbə́ kə́ kemeé gə̄ ō

28Gō tə́ anī, deē ní mān̄ seḿ kə ta róbə́ kə́ dām̄ mbɔ́r ɓē kə́ geleé tə́, ba aw̄ seḿ ndágə loo kə́ gīr̄ gidə kújə yā Kɔ́ɔ̄ɓē kə́ kemeé tə́. Ni mbɔ̄jə́ ta róbə́ ní, anī asən̄ naā kə ngé kə́ tū ndogə̄ mbal̄ kə́ ndágá tə́. 29Ngáń kújə gə̄ yā ngé ngɔ̄m̄ loo gə̄ ō, kem ngōn̄ kújə́ kə́ ta róbə́ tə́ ō, ndogə̄ mbal̄ gə̄ ń kēgə̄nń ngáń kújə gə̄ ní naā tə́ ní ō ní, asən̄ naā kə ngé kə́ tū ta róbə́ kə́ rang gə̄ tə́. Ko̰rō̰ kújə gə̄ gīrə̄n̄ gidə kem kújə́ ní. Ta róbə́ kə́ dām̄ mbɔ́r ɓē kə́ geleé tə́ ní, ngālən malang i kíl deē kutə mí ō, laan i kíl deē kutə jōó gidə i mí ō. 30Ngáń kújə́ kə́ ta róbə́ tə́ gə̄ kə́ ngāl̄də́ i kíl deē kutə jōó gidə i mí ō, laan i kíl deē kutə mí ō gīrə̄n̄ gidə ta róbə́ ní. 31Ré deē teē kem kújə ngeé ń noō tə́ kə̄ ndágá anī, a ənge i ndágə loo kə́ gīr̄ gidə kújə yā Kɔ́ɔ̄ɓē kə́ gidə tə́ ndágá. Súūn̄ kadə bɔr gə̄ kə́ kemeé i kə ta jī kāgə̄ túmbur gēé. Deē a tə́ndā njan i dɔ loo tə́ndā nja gə̄ tə́ gíŕ sɔ́sɔ́ n a alə̄ń kə̄ dɔɔ́ yā kugə̄ń tū tə́. 32Gō tə́ anī deē ní teē seḿ kə ta róbə́ kə́ dām̄ kə́ gír ɓēé tə́ yā kaw̄ń seḿ ndágə loo kə́ gīr̄ gidə kújə yā Kɔ́ɔ̄ɓē kə́ kemeé tə́. Ni mbɔ̄jə́ ta róbə́ ní anī, asən̄ naā kə gotə ta róbə́ kə́ rang gēé. 33Ngáń kújə gə̄ yā ngé ngɔ̄m̄ loo gə̄ ō, kem kújə́ kə́ ta róbə́ tə́ ní ō, ndogə̄ mbal̄ gə̄ ń ɔrə̄n̄nəń kam̄ ngáń kújə gə̄ naā tə́ ní ō, asən̄ naā kə ngé kə́ ta róbə́ kə́ rang gə̄ tə́. Ko̰rō̰ kújə gə̄ gīrə̄n̄ gidə ta róbə́ ní ō, kemən ō. Ta róbə́ ní ngālən malang i kíl deē kutə mí ō, laan i kíl deē kutə jōó gidə i mí ō. 34Ré deē teē kem kújə́ kə́ ta róbə́ ní tə́ anī, a ənge i ndágə loo kə́ gīr̄ gidə kújə yā Kɔ́ɔ̄ɓē kə́ gidə tə́ ndágá. Súūn̄ kadə bɔr kə́ kemeé gə̄ i kə ta jī kāgə̄ túmbur gēé. Ré deē un róbə́ kə́ danaá yā mānəń anī, ta jī kāgə̄ túmbur gə̄ ní i dām̄ jī kə́ geleé tə́ ō, ko̰ó̰ tə́ ō yā kugə̄ń tū tə́ ɓáa deē a tə́ndā njan i dɔ loo tə́ndā nja gə̄ tə́ gíŕ sɔ́sɔ́ n a alə̄ń kə̄ dɔɔ́ yā kugə̄ń tū tə́.

35Gō tə́ anī, deē ń aw̄ seḿ ta róbə́ kə́ dām̄ mbɔ́r ɓē kə́ ko̰ó̰ tə́. Ni mbɔ̄jə́ ta róbə́ ní, anī asən̄ naā kə gotə ta róbə́ kə́ rang gə̄. 36Kem kújə gə̄ kə́ tām̄ yā ngé ngɔ̄m̄ loo gə̄ tə́ i tū tə́ ō, ndogə̄ mbal̄ gə̄ kə́ yā kɔrə̄ń kam̄ kem kújə gə̄ i tū tə́ ō, kem kújə i ta róbə́ ní tə́ ō, ko̰rō̰ kújə gə̄ gīrə̄n̄ gidə ō. Ta róbə́ kə́ dām̄ mbɔ́r ɓē kə́ ko̰ó̰ tə́ ní, ngālən malang i kíl deē kutə mí ō, laan i kíl deē kutə jōó gidə i mí ō. 37Ré deē teē kem kújə́ kə́ ta róbə́ ní tə́ kə̄ ndágá anī, a ənge i ndágə loo kə́ gīr̄ gidə kújə yā Kɔ́ɔ̄ɓē kə́ gidə tə́ ndágá. Súūn̄ kadə bɔr gə̄ kə́ kemeé i kə ta jī kāgə̄ túmbur gə̄. Ré deē un róbə́ kə́ danaá yā mānəń anī, ta jī kāgə̄ túmbur gə̄ ní ran̄ i dām̄ kə́ geleé tə́ ō, dām̄ kə́ ko̰ó̰ tə́ ō. Yā kugə̄ń ta róbə́ ní tə́ ɓáa loo tə́ndā nja gə̄ gír i sɔ́sɔ́ n deē a tə́ndā njan tū tə́ tá a alə̄ń kə̄ dɔɔ́ yā kugə̄ń ta róbə́ ní tə́ ɓáý.

38Kem kújə́ kə́rēý i kadə kem kújə́ kə́ ta róbə́ tə́. Deē teē tū tə́ a reē i kem kújə́ kə́ ta róbə́ tə́. Dā̰ gə̄ ń tɔ̄lə̄n̄də́ yā róōdə́ kə taá malang ní, a tə́gon̄də́ i kem kújə ngeé ń noō tə́. 39Tə́ndān̄ tábəl gə̄ jōó jōó kə gō ta ngóy kem ngōn̄ kújə́ kə́ ta róbə́ tə́ ní. Dā̰ gə̄ kə́ yā tɔ̄l̄də́ ba róōdə́ kə taá malang gə̄ ō, kə́ yā tɔ̄l̄də́ ba ndējə̄də́ tām̄ yā mā̰ȳ rɔ̄ tə́ ō ní, a tɔ̄lə̄n̄də́ i dɔ tábəl gə̄ ngeé ń noō tə́. 40Tábəl gə̄ sɔ́ i ta ngōn̄ kújə́ kə́ ta róbə́ tə́ ngeé ń noō tə́ ndágá. Ta róbə́ kə́ dām̄ mbɔ́r ɓē kə́ ko̰ó̰ tə́ kə́ yā kudəń kə̄ kemeé ní ré deē aw̄ kə̄ tū tə́ anī, deē a a̰a̰ tábəl gə̄ ní, jōó dām̄ kógə̄ḿ tə́ ō, jōó dām̄ kə́rēý tə́ ō. 41Adə̄ tábəl kə́ yā tɔ̄ləń dā̰ kə́ yā tun̄ gə̄ malang i sɔ́sɔ́. Kə́ sɔ́ gə̄ i dām̄ ta róbə́ kógə̄ḿ tə́ ō, kə́ sɔ́ gə̄ i dām̄ ta róbə́ kə́rēý tə́ ō. 42Tábəl kə́ sɔ́ gə̄ kə́ yā rāań dā̰ kə́ yā róō kə taá malang gə̄ ní, rāān̄də́ i kə mbal̄ kə́ tɔ́sə̄ kadə gēé. Mbal̄ gə̄ ní, laadə́ gē ngāl̄də́ gē asən̄ naā mbak, i kíl deē kógə̄ḿ kə núsə, ba ngāl̄də́ kə́ kum kə̄ dɔɔ́ tá i kíl deē kógə̄ḿ kə núsə. A ɓōkə́n̄ yá̰a̰ rāā kəla dā̰ kə́ ndējə̄ yā tun̄ gə̄ i dɔ tə́. 43Tə́jān̄ ngán bəlo gə̄ kə́ laadə́ i núsə́ kíl deē kógə̄ḿ kə gō gidə tábəl gə̄ ní. A ɓōkə́n̄ dā̰ kə́ yā tun̄ gə̄ i dɔ tábəl gə̄ ní tə́. 44Deē ní aw̄ seḿ ndágə loo kə́ gīr̄ gidə kújə yā Kɔ́ɔ̄ɓē kə́ kemeé tə́. Kem kújə gə̄ yā ngé kənī pā gə̄ i loo ngeé ń noō tə́. Kə́ kógə̄ḿ i kadə ta róbə́ kə́ dām̄ mbɔ́r ɓē kə́ ko̰ó̰ tə́ ba tan i kə̄ dām̄ mbɔ́r ɓē kə́ geleé tə́ ō, kə́rēý i kadə ta róbə́ kə́ dām̄ mbɔ́r ɓē kə́ geleé tə́ ba tan i kə̄ dām̄ mbɔ́r ɓē kə́ ko̰ó̰ tə́. 45Deē ní ədam̄ na: Kem kújə ń tan i kə̄ dām̄ mbɔ́r ɓē kə́ geleé tə́ ní, i tām̄ yā *ngé tun̄ yá̰a̰ gə̄ ń a rāān̄ kəla kem kújə yā Kɔ́ɔ̄ɓē tə́ ní. 46Kem kújə́ ń tan i kə̄ dām̄ mbɔ́r ɓē kə́ ko̰ó̰ tə́ ní, i tām̄ yā *ngé tun̄ yá̰a̰ gə̄ ń a rāān̄ kəla ta *loo tun̄ yá̰á̰ tə́ ní. Dan de gə̄ kə́ gír ɓē yā Lebi tə́ ní, i ngé gə̄ ń i Sadok n ojədə́ ní ngóy n asən̄ kudə kem *loo kə́ táĺ tə́, yā rāā kəla kadə̄ Kɔ́ɔ̄ɓē ní.

Kújə yā Kɔ́ɔ̄ɓē

47Deē ní mbɔ̄jə́ ndágə loo kə́ gīr̄ gidə kújə yā Kɔ́ɔ̄ɓē kə́ kemeé anī, ngālən ō, laan ō, asən̄ naā: I kíl deē ɓú mbak. *Loo tun̄ yá̰a̰ ra no kújə yā Kɔ́ɔ̄ɓē tə́. 48Deē ní aw̄ seḿ kem ngōn̄ kújə́ kə́ ta róbə́ kújə yā Kɔ́ɔ̄ɓē tə́. Ndogə̄ mbal̄ gə̄ kə́ kadə róbə́ kə́ yā kaw̄ń kə̄ tū tə́ tə́ ní, nder̄də́ i kíl deē mí ō, laa ta róbə́ ní i kíl deē kutə gidə i sɔ́ ō. Ndogə̄ mbal̄ gə̄ kə́ kadə tə́ ní, nder̄də́ i kíl deē mətá ō. 49Kem ngōn̄ kújə́ kə́ ta róbə́ tə́ ní, ngālən i kíl deē kutə jōó ō, laan i kíl deē kutə gidə i jōó ō. Yā kadə̄ deē al̄ aw̄ ugə̄ń tū tə́ ní, loo tə́ndā nja gə̄ i kutə kógə̄ḿ. Túdə̄n̄ kāgə̄ ɗəra kə́ ngāl̄ ɓururu kum kə̄ dɔɔ́ gə̄ ta róbə́ tə́, kógə̄ḿ dām̄ kógə̄ḿ tə́ ō, kógə̄ḿ dām̄ kə́rēý tə́ ō.

Currently Selected:

Makətūbə̄ yā Ejekiel 40: BS

Highlight

Compare

Copy