Makətūbə̄ yā Ester 9
9
Jipə gə̄ dalən̄ ba̰ā̰
1Ndɔ̄ kə́ nge ko̰ kutə gidə i mətá yā nāā kə́ nge ko̰ kutə gidə i jōó ń i nāā *Adar ní ugə̄. Yá̰á̰ ń yá̰á̰ kə́ mban̄g ndang kadə̄ yā rāā əda ní ɔjən̄ rāā i ndɔ̄ ń noō tə́ ō, madə̄ ba̰ā̰ *Jipə gə̄ əndān̄ kemdə́ dɔ tetə Jipə gə̄ rɔ̄ɔ̄ tə́ i ndɔ̄ ń noō tə́ ō. Banī yá̰a̰ gə̄ tūrə̄n̄ gíŕdə́ kem kār̄ kə́ rang tə́ adə̄ i Jipə gə̄ n tetən̄ ngé kim̄də́ gə̄ rɔ̄ɔ̄ ní. 2Ɓē gə̄ malang kə́ gō nang yā mban̄g Jerses tə́ ń Jipə gə̄ ndin̄ tū tə́ ní, Jipə kə́ kemeé gə̄ kánə̄n̄ naā yā rɔ̄ɔ̄ de gə̄ ń a sāān̄ rāādə́ majaĺ ní. De kə́ dum̄də́ gətóo, tɔdɔ̄ de gə̄ malang ɓōlə́n̄də́ ngá̰ý. 3Tá de kə́ bo gə̄ malang ō, ngé kɔsə kum gotə mban̄g dɔ ɓē tə́ gə̄ ō, ngé ko̰o̰ ɓē gə̄ ō, ngé rāā kəla kə mbangāá gə̄ ō, rāān̄ i kə Jipə gēé ɓáý to̰ ō, tɔdɔ̄ nin̄ ɓōlə́n̄ Mardose ngá̰ý. 4Tɔdɔ̄ Mardose i de kə́ bo kə́ ndogó mbangāá ō, rīn ɓār̄ asə gō nang gə̄ malang ō, tɔ́gən reē dɔ madə̄ tə́ ō.
5Adə̄ *Jipə gə̄ tɔ́sə̄n̄ madə̄ ba̰ā̰də́ gə̄ kə kəyā kaskaraá. Nin̄ tɔ̄lə̄n̄də́ ō, rāān adə̄ nin̄ gətóon̄ malang kɔ̄ɔ́ ō. Nin̄ rāān̄ yá̰á̰ ń kemdə́ ndigə ní kə ngé kim̄də́ gēé. 6Nin̄ tɔ̄lə̄n̄ de kə́ dəngam gə̄ ɓú mí kem ɓē bo kə́ Sujə tə́, nujən̄ sedə́ kɔ̄ɔ́ malang. 7-10Haman kə́ ngōn̄ Hamedata kə́ nge rāā kum Jipə gə̄ ndoō tə́ ní, ngánən kə́ kutə kógə̄ḿ gə̄ ń rīdə́ na i Parsandata ō Dalpon ō Asəpata ō Porata ō Adalia ō Aridata ō Parmaseta ō Arisai ō Aridai ō Waijata ō ní, nin̄-tɔ̄lə̄n̄də́ kɔ̄ɔ́ malang. Banī nin̄ ɔyn̄ yá̰a̰ kənge gə̄ alé.
11Ədan̄ mban̄g kutə de gə̄ malang ń tɔ̄lə̄n̄də́ kem ɓē bo kə́ Sujə tə́ ní ndɔ̄ nəkɔ́ ń noō tə́. 12Tā anī mban̄g əda nə̄yá̰n Ester na: Kem ɓē bo kə́ Sujə tə́ ngóý ní *Jipə gə̄ tɔ̄lə̄n̄ de kə́ dəngam gə̄ i ɓú mí o , ngán Haman kə́ kutə kógə̄ḿ gə̄ ō. Ní gotə loo kə́ rang gə̄ kə́ kem ɓē ko̰o̰ tə́ ní a tɔ̄lə̄n̄ i kóndóńg? Ɓá tā ba ré ī-gḛy dəjem̄ yá̰á̰ kə́rēý ɓáý anī m-ā m-ādī yá̰á̰ ní, m-ā m̄-rāā yá̰a̰ malang ń kemií ndigə ní. 13Ester tél ədan na: Kɔ́ɔ̄ ɓē gə̄, ré ī-ndigə anī, ādə̄ Jipə kə́ Sujə tə́ gə̄ ta róbə ādə̄ yá̰á̰ ń i kə́ ndang kadə̄ yā rāā á ādə̄də́ ta róbə rāā i ɓōólaā ngóý ní ādə̄ rāān̄ bírí ɓáý to̰ ō, ə́da ādə̄ tə́nīn̄ kəlā míndə nīń ngán Haman kə́ kutə kógə̄ḿ gə̄ tə́ ba to̰ō̰n̄də́ dɔɔ́ tū kāgə̄ gə̄ tə́ ō. 14Anī mban̄g əda na: A rāān̄ tītə̄ ń noō. Yá̰a̰ ń mban̄g ndang kadə̄ yā rāā ní ənīn̄ mbērən kem ɓē kə́ Sujə tə́, adə̄ tə́nīn̄ kəlā míndə́ ngán Haman kə́ kutə kógə̄ḿ gə̄ tə́ ba to̰ō̰n̄də́ dɔɔ́ tū kāgə̄ tɔ̄l̄ deē tə́. 15Adə̄ *Jipə kə́ Sujə tə́ gə̄ kánə̄n̄ naā kə ndɔ̄ kutə gidə i sɔ́ yā nāā *Adar ɓáý to̰. Nin̄ tɔ̄lə̄n̄ de kə́ dəngam gə̄ ɓú mətá kem ɓē kə́ Sujə tə́. Banī ɔyn̄ yá̰a̰ kənge yādə́ gə̄ alé.
16Jipə kə́ rang gə̄ ń ndin̄ gō nang gə̄ yā mban̄g tə́ kə gō gidí ní kánə̄n̄ naā yā rɔ̄ɔ̄ dɔ rɔ̄də́ tə́ ō. Nin̄ rāān̄ adə̄ madə̄ ba̰ā̰də́ gə̄ əya̰n̄də́ jəke ō, tɔ̄lə̄n̄ ngé kim̄də́ gə̄ 75 000 ō, banī ɔyn̄ yá̰a̰ kənge yādə́ gə̄ alé. 17Yá̰á̰ ń noō rāā yá̰a̰ i kə ndɔ̄ kutə gidə i mətá yā nāā *Adar. Kə ndɔ̄ kə́ nge ko̰ kutə gidə i sɔ́ anī nin̄ ɔrə̄n̄ koō ō, rāān̄ ndɔ̄ ní i ndɔ̄ rāā yá̰a̰ kəsa kə́ ngá̰ý kə́ tītə̄ yá̰a̰ kəsa kə́ ndɔ̄ nāā tə́ ō, rāān̄ ndɔ̄ ní i ndɔ̄ rɔ̄nel̄ tə́ ō. 18Banī *Jipə kə́ Sujə tə́ gə̄ ń kánə̄n̄ naā kə ndɔ̄ kə́ nge ko̰ kutə gidə i mətá ō sɔ́ ō ní, ɔrə̄n̄ koō kə ndɔ̄ kə́ nge ko̰ kutə gidə i mí. Rāān̄ ndɔ̄ ní i ndɔ̄ rāā yá̰a̰ kəsa kə́ ngá̰ý tə́ tītə̄ yá̰a̰ kəsa kə́ ndɔ̄ nāā tə́ ō, rāān̄ ndɔ̄ ní i ndɔ̄ rɔ̄nel̄ tə́ ō. 19I tām̄ najə̄ ń noō tə́ n Jipə kə́ ngán ɓē kə́ ndágá gə̄ tə́ a rāān̄ ndɔ̄ kə́ nge ko̰ kutə gidə i sɔ́ yā nāā *Adar i ndɔ̄ rɔ̄nel̄ tə́ ō, i ndɔ̄ rāā yá̰a̰ kəsa kə́ ngá̰ý tə́ ō, i ndɔ̄ rāān̄ nāā tə́ ō ní. I ndɔ̄ ngeé ń noō tə́ n nin̄ a əlan̄neé kə núsə́ yá̰a̰ gēé a adə̄n̄ naā ní.
Əndān̄ ngəra rāā nāā kógə̄ḿ
20Mardose ndang yá̰a̰ gə̄ ń rāān̄ yá̰á̰ ní ba əla kə makətūbūú adə̄ Jipə gə̄ malang ń ndin̄ kem ɓē ko̰o̰ yā mban̄g Jerses tə́ gō nang kə́ ngɔr ngɔr gə̄ tə́ aláa gō nang kə́ sa̰y sa̰y gə̄ tə́ ní. 21Ni mēr̄də́ rāā nāā kógə̄ḿ kə dɔ ɓāl̄ gə̄, kə ndɔ̄ kə́ nge ko̰ kutə gidə i sɔ́ ō mí ō yā nāā *Adar. 22Tɔdɔ̄ *Jipə gə̄ rāān̄ adə̄ madə̄ ba̰ā̰də́ gə̄ əya̰n̄də́ jəke i kem ndɔ̄ gə̄ ngeé ń noō tə́. I kem nāā ń noō tə́ n ngān̄g nōō téləń ngān̄g kəgō ō, yá̰á̰ kə́ majaĺ kə́ reē dɔdə́ tə́ téləń yá̰a̰ rɔ̄nel̄ ō ní. Nin̄ rāān̄ ndɔ̄ gə̄ ngeé ń noō i ndɔ̄ kəsa yá̰a̰ kə rɔ̄nelēé yādə́ tə́. Nin̄ əlan̄ kə núsə yá̰a̰ gēé adə̄n̄ naā kem ndɔ̄ gə̄ ngeé ń noō tə́ ō, adə̄n̄ ngé ndoō gə̄ yá̰a̰ karī ō. 23Jipə gə̄ unən̄ gō yá̰á̰ ń Mardose ɔjədə́ ní, adə̄ ndigən̄ kadə̄ nāā ń nin̄ rāān̄ nja kógə̄ḿ kɔ̄ɔ́ ɓá ní téĺ yá̰a̰ kāgə̄ ɓē yādə́.
24Mardose ndang makətūbə̄ adə̄də́ terə̄ń kemdə́ dɔ yá̰á̰ ń toō tə́ əda na: Haman ngōn̄ Hamedata, de kə́ gír yā Agag tə́, madə̄ ba̰ā̰ Jipə gə̄, gḛy tɔ̄l̄ Jipə gə̄ malang kɔ̄ɔ́. Ni túgə̄ wə̄lā gə̄ ń ɓārə́n̄də́ na i Purim gə̄ ní yā kɔjəń ndɔ̄ tɔ̄l̄də́ malang kɔ̄ɔ́. 25Banī dan ń najə̄ ní ugə̄ rɔ̄ mban̄g tə́ anī ni-əda adə̄ ndangən̄ na yá̰á̰ kə́ majaĺ ń Haman sāā rāā kə *Jipə gēé ní a téĺ yā rāān nəkɔ́. I beé n ənīn̄neé kəlā míndə Haman tə́ ō, míndə ngánən gə̄ tə́ ō, ba tṵ́ṵ̄n̄neédə́ dɔɔ́ tū kāgə̄ tɔ̄l̄ deē gə̄ tə́ ní. 26I tām̄ ń noō tə́ n a ɓārə́n̄neé ndɔ̄ gə̄ ní na i Purim gə̄ ní. Ba əlan̄ gír i dɔ Purim ń kumən na i wə̄lā ní tə́.
Jipə gə̄ əndān̄ kumdə́ gō yá̰a̰ ń Mardose ɔjədə́ kem makətūbūú ní ō, yá̰a̰ ń nin̄ kɔ́ gə̄ a̰a̰n̄ kə kumdə́ ō, rāādə́ ō ní tə́ majə. 27Nin̄ əndān̄ ngəra yá̰a̰ kāgə̄ ɓē kógə̄ḿ kə́ tām̄ yādə́ nin̄ kɔ́ gə̄ tə́ ō, tām̄ yā ngáńdə́ gə̄ tə́ ō, ngán kaadə́ gə̄ tə́ ō, de gə̄ malang ń a télən̄ *Jipə gə̄ ní tə́ ō. Yá̰a̰ kāgə̄ ɓē ní i kadə̄ rāān̄ nāā kə dɔ ɓāl̄ gə̄ kem ndɔ̄ kə́ jōó gə̄ ń noō tə́ kanjə̄ lōō gírí. A rāān̄ i ndɔ̄ ń ɔjən̄ tə́ ní ō, kə jī bēl̄ loo rāā yá̰a̰ gə̄ ń Mardose ɔjəń ní ō. 28Gír kojə yā Jipə kə́ gō gogə́ gə̄ malang ń a reēn̄ ní, adə̄ i kojə yā Jipə gə̄ kógə̄ḿ kógə̄ḿ ń a ndin̄ kə̄ gō nang gə̄ tə́ ō, kə̄ kem ɓē gə̄ tə́ ō, kem ɓē ko̰o̰ tə́ ní, i gár kadə̄ na̰yn̄ kə̄ loo rāā nāā Purim gə̄ tə́. I gáŕ kadə̄ Jipə gə̄ ō ngáńdə́ gə̄ ō ngán kaadə́ gə̄ ō lōōn̄ gíŕ yá̰a̰ kāgə̄ ɓē ngeé ń toō tə́ aĺ ō, kadə̄ dɔdə́ ndígə̄ nal yá̰á̰ ń rāā yá̰á̰ ní aĺ ō.
29Ester kə́ nə̄yá̰ mban̄g ń i ngōn̄ Abihail kə́ dəyá̰ ní ō, Mardose ń i *Jipə ní ō, ndangən̄ makətūbə̄ kə́ nge ko̰ jōó ədan̄neé kə tɔ̄gə́də́ malang kadə̄ makətūbə̄ kə́ kété ń najə̄ yā Purim gə̄ i kemeé ní i makətūbə̄ kə́ rɔ̄kum. 30Makətūbə̄ kə́ gō gogə́ laā ní əlan̄neé adə̄n̄ i Jipə gə̄ malang kə́ gō nang kə́ ɓú kə kutə jōó kə kalən kə́ sīrí yā mban̄g Jerses ní tə́. Najə̄ gə̄ ń ndangən̄ kemeé ní i najə̄ lápə́ya ō, ndi kanjə̄ sōl̄ yá̰á̰ kógə̄ḿ ō. 31Makətūbə̄ ní ədan̄neé i Jipə gə̄ kadə̄ rāān̄ nāā Purim ndɔ̄ ń ɔjən̄ tə́ ní, kə gō ń Ester nin̄ kə Mardose ɔjən̄nee ní. Nin̄ əndān̄ ndɔ̄ gə̄ ní i tām̄ yādə́ nin̄ kɔ́ gə̄ tə́ ō, tām̄ yā ngáńdə́ gə̄ tə́ ō, ngán kaadə́ gə̄ tə́ ō. Ədan̄ kadə̄ de gə̄ *ndin̄ ɓō tām̄ yā Nə́ɓā tə́ ō, kadə̄ de gə̄ əgan̄ kɔŕ kə wur katāá ō. 32Yá̰a̰ gə̄ ń Ester əda kadə̄ yā rāā ní i yá̰a̰ gə̄ ń noō n əndān̄ ngəra nāā Purim ní ō, ndangən̄ yá̰a̰ gə̄ ní i kem makətūbə̄ kógə̄ḿ tə́ ō.
Currently Selected:
Makətūbə̄ yā Ester 9: BS
Highlight
Share
Copy
Want to have your highlights saved across all your devices? Sign up or sign in
© 2006, 2010 Alliance Biblique du Tchad